Ndzima 99

Yesu U Dyondzisa eYeriko

HI KU hatlisa Yesu ni mintshungu leyi fambaka na yena va fika eYeriko, lowu ku nga muti lowu wu nga kwalomu ka riendzo ra siku ku sukela eYerusalema. Entiyisweni ku na Tiyeriko timbirhi, muti wa khale wa Yuda wu ri kwalomu ka khilomitara ni hafu ku sukela emutini lowuntshwa wa Rhoma. Loko mintshungu yi huma emutini lowa khale kutani yi tshinelela lowuntshwa, vakomberi vambirhi va mabofu va twa huwa leyikulu ni ku famba-famba. Un’wana wa vona u vuriwa Bartimiya.

Loko va twe leswaku i Yesu loyi a hundzaka, Bartimiya ni munghana wa yena va sungula ku huwelela va ku: “Hosi, N’wana Davhida, hi twele vusiwana!” Loko ntshungu hi ku tiyisa wu va byela ku miyela, va huwelela swinene ni hi marito lama tlakukeke va ku: “Hosi, N’wana Davhida, hi twele vusiwana!”

Loko a twa ku kavanyetiwa, Yesu wa yima. U kombela lava va nga na yena ku vitana vanhu lava huwelelaka. Vona va ya eka vakomberi va mabofu ivi va byela un’wana wa vona va ku: “Tiyisa mbilu, suka u yima, wa ku vitana.” Hi ku nyanyuka lokukulu, bofu ri cukumeta nguvu ya rona ya le handle, ri tlula-tlula hi milenge ya rona, kutani ri ya eka Yesu.

“Mi lava leswaku ndzi mi endlela yini xana?” Yesu a vutisa.

“Hosi, hi hanyanyise mahlo!” vavanuna vambirhi lava feke mahlo va kombela.

Hi ku susumetiwa hi ntwela-vusiwana, Yesu u khumba mahlo ya vona. Hi ku ya hi mhaka ya Marka, Yesu u ri eka un’wana wa vona: “Famba, ku pfumela ka wena ku ku hanyisile.” Hi ku hatlisa vakomberi va mabofu va vona, naswona handle ko kanakana hinkwavo ka vona va sungula ku dzunisa Xikwembu. Loko vanhu hinkwavo va vona leswi humeleleke, na vona va dzunisa Xikwembu. Handle ko hlwela, Bartimiya ni munghana wa yena va sungula ku landzela Yesu.

Loko Yesu a hundza hi le Yeriko, mintshungu ya kula. Un’wana ni un’wana u lava ku vona loyi a horiseke vavanuna va mabofu. Vanhu va rhendzela Yesu hi matlhelo hinkwawo, naswona hikwalaho, van’wana a va swi koti na ku n’wi vona. Exikarhi ka vona ku na Zakiya, hosi ya valuvisi eYeriko ni le kusuhi na kona. U kome ngopfu lerova a nga koti ku vona leswi humelelaka.

Kutani Zakiya u tsutsumela emahlweni ivi a khandziya murhi wa nkuwa etlhelo ka gondzo leri Yesu a fambaka ha rona. Eka yinhla leyi yo kota ku vona hinkwaswo, a nga kota ku vona xin’wana ni xin’wana. Loko mintshungu yi tshinela, Yesu u huwelela emurhini a ku: “Zakiya, hatlisa u xika, hikuva ndzi fanela ku ya tshama emutini wa wena namuntlha.” Zakiya u xika hi ku tsaka kutani a tsutsumela ekaya ku ya lulamisela muendzi wa yena wo hlawuleka.

Kambe, loko vanhu va vona leswi swi humelelaka, hinkwavo va sungula ku vilela. Va swi vona swi nga fanelanga leswaku Yesu a va muendzi wa munhu wo tano. Phela, Zakiya u ve mufumi hi ku yiva mali entirhweni wa yena wa vuluvisi.

Vanhu vo tala va landzela, kutani loko Yesu a nghena ekaya ra Zakiya, va vilela va ku: “Ú nghenile eka wanuna wa mudyohi, ku ya rhurheriwa kona.” Kambe Yesu u vona ku tsakela ku hundzuka eka Zakiya. Naswona Yesu a nga helanga matimba, hikuva Zakiya u yima ivi a tivisa a ku: “Vona Hosi, ndzi ta avanyisa rifuwo ra mina hi le xikarhi, ndzi nyika swisiwana; ni loko ndzi tekile xilo xa munhu hi ku n’wi xisa, ndzi ta n’wi tlherisela xona ka mune.”

Zakiya u kombisa leswaku ku hundzuka ka yena i ka xiviri hi ku nyika hafu ya leswi swi nga swa yena eka swisiwana ni ku tirhisa hafu leyin’wana ku rihela lava a va kanganyiseke. Entiyisweni u kota ku hlayela etirhekhodweni ta yena ta vuluvisi leswaku vanhu lava u va kolota swo tani hi kwihi. Kutani u tshembisa ku riha ka matlhelo ya mune, ku pfumelelana ni nawu wa Xikwembu lowu nge: ‘Loko munhu a yiva nyimpfu, u fanele ku riha nyimpfu hi mune wa tona eka ntlhambi.’

Yesu u tsakisiwa hi ndlela leyi Zakiya a tshembisaka ku nyika swilo swa yena, hikuva U ri: “Namuntlha ku ponisiwa ku nghenile emutini lowu, hi leswi munhu loyi na yena a nga n’wana Abrahama: Hikuva N’wana-wa-Munhu ú tile ku ta lava ni ku ta ponisa lava lahlekeke.”

Sweswinyana, Yesu wa ha ku kombisa xiyimo xa ‘la lahlekeke’ hi xitori xa yena lexi vulavulaka hi n’wana wa vusopfa. Sweswi hi na xikombiso xa xiviri xa vutomi xa munhu loyi a a lahlekile loyi a kumiweke. Hambi loko varhangeri va vukhongeri ni lava va va landzelaka va n’unun’uta ni ku vilela hi ku yisa ka Yesu mianakanyo eka vanhu lava fanaka na Zakiya, Yesu u ya emahlweni a lava ni ku hlengeleta vana lava va lahlekeke va Abrahama. Matewu 20:29-34; Marka 10:46-52; Luka 18:35–19:10; Eksoda 22:1.

▪ Entiyisweni, Yesu u hlangana kwihi ni vakomberi va mabofu, naswona u va endlela yini?

▪ Zakiya i mani, naswona ha yini a khandziya murhi?

▪ Zakiya u kombisa ku hundzuka ka yena hi ndlela yihi?

▪ I dyondzo yihi leyi hi nga yi dyondzaka eka ndlela leyi Yesu a khomeke Zakiya ha yona?