Yesu A Pfula Matihlo Ya Vavanuna Lava A Va Nga Voni Ni Ku Pfuna Zakiya

Yesu ni lava a famba na vona va fika eYeriko ku nga riendzo ra siku ku suka eYerusalema. Muti wa Yeriko a wu ri ni madoroba mambirhi naswona ku suka eka doroba ra khale ku ya eka lerintshwa ra Rhoma, a swi teka kwalomu ka 1,6 wa tikhilomitara. Loko Yesu ni ntshungu va ri karhi va tshinela ku suka eka doroba lerin’wana, vavanuna vambirhi lava nga voniki lava tshamaka etlhelo ka ndlela leswaku va kombela, va twa Yesu ni ntshungu lowu a fambaka na wona. Un’wana wa vona i Bartimiya.

Loko Bartimiya ni munghana wakwe va twa leswaku Yesu wa hundza, va sungula ku huwelela va ku: “Hosi, hi twele vusiwana, N’wana wa Davhida!” (Matewu 20:30) Van’wana lava a va ri exikarhi ka ntshungu va ringeta ku va miyeta kambe a vo va vanga. Loko Yesu a twa pongo rero, wa yima. U byela lava a nga na vona leswaku va vitana lava va huwelelaka. Hiloko va ya eka un’wana wa vavanuna lava ivi va fika va ku: “U nga chavi! Suka u yima; wa ku vitana.” (Marka 10:49) Wanuna loyi a nga voniki u lahla xiambalo xakwe a tlula a ya eka Yesu a tsakile.

Yesu u va vutisa a ku: “Mi lava ndzi mi endlela yini?” Hiloko va n’wi kombela va ku: “Hosi, pfula matihlo ya hina.” (Matewu 20:32, 33) Leswi a va twelaka vusiwana, Yesu u va khoma matihlo ivi a byela un’wana wa vona a ku: “Famba. Ripfumelo ra wena ri ku hanyisile.” (Marka 10:52) Hiloko va sungula ku vona naswona handle ko kanakana, va sungula ku dzunisa Xikwembu. Loko vanhu va vona leswi nga endleka, hiloko na vona va sungula ku dzunisa Xikwembu. Vavanuna lava, lava a va nga voni va sungula ku landzela Yesu.

Yesu u rhendzeriwe hi mitshungu leyikulu loko a hundza eYeriko. Un’wana ni un’wana u lava ku vona munhu loyi a horiseke vavanuna lava a va nga voni. Vanhu hinkwavo va rhendzele Yesu naswona van’wana a va swi koti ku n’wi vona. Zakiya hi un’wana wa lava nga kotiki ku vona Yesu. Zakiya i ndhuna ya valuvisi eYeriko. Leswi a nga koma a nga koti ku vona leswi endlekaka. Kutani Zakiya u tsutsuma a ya khandziya nkuwa lowu a wu ri endleleni leyi Yesu a fambaka hi yona. Kwalaho Zakiya u kota ku vona hinkwaswo leswi endlekaka. Loko Yesu a tshinela, u vona Zakiya a ri ehenhla ka nsinya, hiloko a ku: “Zakiya, hatlisa u xika hikuva namuntlha ndzi muendzi wa wena.” (Luka 19:5) Hiloko a chika a ya ekaya hi ku hatlisa leswaku a ta amukela muendzi wakwe loyi a ri wa nkoka.

Loko vanhu va vona leswi a swi endleka, va sungula ku gungula. Va vona swi nga ri swinene leswaku Yesu u endzela wanuna loyi a va n’wi teka tanihi mudyohi. Zakiya u fumile hileswi a dyelelaka vanhu eka swibalo.

Loko Yesu a nghena ekaya ka Zakiya, vanhu va gungula va ku: “U endzele wanuna loyi a nga mudyohi.” Hambiswiritano, Yesu wa swi vona leswaku Zakiya u tiyimisele ku hundzuka. Hikwalaho, Yesu a nga khomiwi hi tingana. Hiloko Zakiya a suka a yima a byela Yesu a ku: “Hosi! Ndzi ta nyika swisiwana hafu ya swilo leswi ndzi nga na swona, naswona leswi ndzi nga tekela van’wana hi vukanganyisi ndzi ta va tlherisela swona ka mune.”—Luka 19:7, 8.

Mayana ndlela leyinene leyi Zakiya a swi kombiseke hayona leswaku u hundzuke hi mbilu hinkwayo! U kambisise tirhekhodo ta mali ya swibalo leyi a yi amukeleke eka Vayuda kutani a ti boha leswaku u ta va tlherisela hilaha ku phindhiweke ka mune. Sweswo a swi tlula ni leswi a swi vuriwa hi nawu wa Xikwembu. (Eksoda 22:1; Levhitika 6:2-5) Ku engetela kwalaho, Zakiya u tshembise ni ku teka hafu ya swilo swakwe a swi nyika swisiwana.

Yesu u tsakisiwa hi vumbhoni lebyi kombisaka leswaku Zakiya u hundzukile kutani u n’wi byela a ku: “Namuntlha Xikwembu xi ponise wanuna loyi ni ndyangu wakwe, hikuva na yena i n’wana wa Abrahama. Hikuva N’wana wa munhu u tele ku ta lava ni ku ponisa lava lahlekeke.”—Luka 19:9, 10.

A hi khale ngopfu Yesu a ha ku vulavula hi ‘lava lahlekeke’ hi ku tirhisa xifaniso xa n’wana loyi a a lahlekile. (Luka 15:11-24) Sweswi u tirhisa xifaniso xa xiviri xa munhu loyi swi fanaka ni loko a lahlekile ivi a kumeka. Varhangeri va vukhongeri ni valandzeri va vona a va gungula ni ku tlhela va sola Yesu hileswi a tshamaka ni vanhu vo fana na Zakiya. Nilokoswiritano, Yesu u ya emahlweni a lava ni ku vuyisa vana va Abrahama lava lahlekeke.