Ndzima 113
Ku Titsongahata Hi Nkarhi Wa Paseka Yo Hetelela
PETRO na Yohane, ehansi ka swileriso swa Yesu, ana se va fikile eYerusalema ku ta lunghiselela Paseka. Entiyisweni, Yesu ni vaapostola van’wana va khume, va vonaka va fika endzhakunyana ni ndzhenga. Dyambu ri nyupela evugimamusi loko Yesu ni ntlawa wa yena va rhelela eNtshaveni ya Mitlhwari. Leri i siku ro hetelela ra Yesu ku vona muti ni nhlikanhi ku kondza ku va endzhaku ka ku pfuxiwa ka yena.
Hi ku hatlisa Yesu ni ntlawa wa yena va fika emutini kutani va teka riendzo ro ya emutini lowu va nga ta endlela Paseka eka wona. Va khandziya switepisi va ya ekamareni lerikulu ra le henhla, laha va kumaka malunghiselelo hinkwawo ya ku tlangela nkhuvo wa vona wa Paseka ma endliwile. Yesu a a langutele xiendlakalo lexi, tanihi leswi a nge: “Ndzi naverile ku dya paseka leyi na n’wina, ndzi nga si twisiwa ku vaviseka.”
Hi ntolovelo, tikhapu ta mune ta vhinyo ta nwiwa hi lava va vaka kona eka Paseka. Endzhaku ko amukela leyi entiyisweni a ku ri khapu ya vumune, Yesu wa nkhensa kutani a ku: “Tekani, mi siyerisana. Ndzi tiyisile ndzi ri ka n’wina, ku sukela sweswi a ndzi nga ha nwi swa mihandzu ya vhinya, ku kondza ku fika Mfumo wa Xikwembu.”
Nkarhi wun’wana hi nkarhi wa swakudya, Yesu wa tlakuka, a veka khancu wa yena wa le handle etlhelo, a teka nceka, kutani a tata nkambani hi mati. Hakanyingi, muendzeriwa u fanele a vona leswaku milenge ya vaendzi ya hlantswiwa. Kambe tanihi leswi eka xiendlakalo lexi ku nga riki na muendzeriwa, Yesu u khathalela ntirho lowu wa munhu hi xiyexe. Un’wana ni un’wana wa vaapostola a nga ha va a ve ni nkarhi wo swi endla; kambe, kumbexana hi ku va ka ha ri ni ku kanetana kun’wana exikarhi ka vona, a ku na la swi endlaka. Sweswi va hlamala loko Yesu a sungula ku hlantswa milenge ya vona.
Loko Yesu a fika eka yena, Petro wa landzula: “U nga ka u nga ndzi hlambisi milenge ni siku ni rin’we!”
Yesu u ri: “Loko ndzi nga ku hlambisi, a wu nchumu eka mina.”
Petro wa hlamula: “Hosi, ku nga ri milenge ya mina ntsena, kambe na wona mavoko ni nhloko.”
Yesu wa hlamula: “Loyi a hlambeke miri a nga ha faneli ku engeta a hlamba, loko yi nga ri milenge ntsena, hikuva hinkwawo miri wa yena wu basile; kutani na n’wina, mi basile, kambe ku nga ri hinkwenu.” U vula leswi hikuva u tiva leswaku Yudasi Iskariyota u kunguhata ku n’wi xenga.
Loko Yesu a hlantswe milenge ya hinkwavo va 12, ku katsa ni milenge ya muxengi wa yena, Yudasi, u ambala khancu wa yena nakambe kutani a tlhela a tshama etafuleni. Kutani wa vutisa: “Xana ma twisisa leswi ndzi mi endleleke swona xana? Mi ndzi vula ‘Mudyondzisi’ ni ‘Hosi’; ma vurisa, hikuva ndzi yena. Kutani ke loko mina, Hosi ya n’wina ni Mudyondzisi wa n’wina, ndzi mi hlambisile milenge, na n’wina mi ta fanela ku hlambisana milenge, hikuva ndzi mi vekele ntila, leswaku na n’wina mi endlisa leswi ndzi nga endlisa swona eka n’wina. Ndzi tiyisile ndzi ri ka n’wina: Nandza a hi nkulu eka n’wini wa yena, ni murhumiwa a hi nkulu eka loyi a n’wi rhumeke. Loko mi tiva swilo leswi, mi tlhela mi swi endla, mi ta va mi katekile.”
Mawaku dyondzo yo saseka eka ntirho wo titsongahata! Vaapostola a va fanelanga ku tilavela ndhawu yo sungula, va ehleketa leswaku i va nkoka lerova van’wana nkarhi hinkwawo va fanele va tirhela vona. Va fanele va landzela xikombiso lexi kombisiweke hi Yesu. Lexi a hi xona xa mukhuva wo hlantswa milenge. Doo, kambe hi lexi xa ku tirha hi ku tirhandzela handle ka xihlawuhlawu, ku nga khathariseki leswaku ntirho wa kona wa tsongahata kumbe a wu tsakisi ku fika kwihi. Matewu 26:20, 21; Marka 14:17, 18; Luka 22:14-18; 7:44; Yohane 13:1-17.
▪ I yini lexi xiyekaka hi langutelo ra Yesu hi Yerusalema loko a nghena emutini ku ta tlangela Paseka?
▪ Enkarhini wa Paseka, swi vonaka ku ri khapu yihi leyi Yesu a yi hundziselaka eka vaapostola va 12 endzhaku ko khongela?
▪ I ntirho wihi wa munhu hi xiyexe lowu hi ntolovelo a wu endleriwa vaendzi loko Yesu a ha ri emisaveni, naswona ha yini wu nga endliwanga hi nkarhi wa Paseka leyi endliweke hi Yesu ni vaapostola va yena?
▪ A ku ri xihi xikongomelo xa Yesu xo endla ntirho lowu wo tsongahata wo hlantswa milenge ya vaapostola va yena?