Va Endle Ku Rhandza Ka Yehovha
Nghwazi Yi Endla Ntirho Wa Xiyimo Xa Le Hansi
YESU a a swi tiva leswaku tiawara to hetelela ta ku va ni vaapostola va yena ti ta va ta risima. Ku nga ri khale, a ta khomiwa naswona ripfumelo rakwe a ri ta ringiwa ku tlula eku sunguleni. Nakambe Yesu a swi tiva leswaku mikateko leyikulu a ya ha ri emahlweni. Ku nga ri khale a ta tlakuseriwa evokweni ra xinene ra Xikwembu ivi a nyikiwa “vito leri nga ehenhla ka mavito man’wana hinkwawo, leswaku matsolo hinkwawo ya lava nga etilweni ni lava nga emisaveni ni lava nga ehansi ka misava, ma nkhinsama hi vito ra Yesu.”—Vafilipiya 2:9, 10.
Hambiswiritano, Yesu a nga kalanga a honisa swilaveko swa vaapostola vakwe hikwalaho ka ntshikilelo wa rifu rakwe leri a ri ri kusuhi kumbe hikwalaho ka ku hisekela hakelo leyi a tshembisiweke yona. Endzhaku, Yohane u tsarile eka Evhangeli yakwe leswaku u “va rhandze ku fikela emakumu.” (Yohane 13:1) Naswona eka tiawara leti ta nkoka to hetelela evuton’wini byakwe tanihi munhu la hetisekeke, Yesu u dyondzise vadyondzisiwa vakwe dyondzo ya risima.
Dyondzo Ya Ku Titsongahata
Vaapostola a va ri na Yesu ekamareni ra le henhla eYerusalema leswaku va ta tlangela nkhuvo wa Paseka. Eku sunguleni, Yesu a swi twile loko va holova malunghana ni ku tiva leswaku i mani lonkulu exikarhi ka vona. (Matewu 18:1; Marka 9:33, 34) U bule na vona hi mhaka leyi naswona a ringeta ku lulamisa langutelo ra vona. (Luka 9:46) Hambiswiritano, hi nkarhi lowu Yesu u tirhise endlelo rin’wana ku kandziyisa mhaka leyi. A nga tsakelanga ku vulavula na vona hi nomu ntsena malunghana ni ku titsongahata, kambe u tlhele a ku kombisa.
Yohane u tsale leswaku Yesu “[u] suk[e] a yima exilalelweni ivi a vekela etlhelo tinguvu takwe ta le handle. Kutani a teka thawula a tikhama. Endzhaku ka sweswo a chela mati exibyeni kutani a sungula ku hlambisa milenge ya vadyondzisiwa ni ku yi sula hi thawula leri a a tikhame hi rona.”—Yohane 13:4, 5.
Ehansi ka maxelo yo hisa ya le Middle East ya khale, hi ntolovelo vanhu a va ambala maphaxana loko va ri karhi va famba emagondzweni lama nga ni ritshuri. Loko va fika emutini wa munhu la tolovelekeke, a va pfuxeriwa hi muendzeriwa ivi a va nyika swo hlambela eka swona ni mati leswaku va hlamba milenge. Emakaya ya swigwili, mahlonga a ma hlambisa vanhu milenge.—Vaavanyisi 19:21; 1 Samuwele 25:40-42.
Ekamareni ra le henhla, Yesu ni vaapostola vakwe a va nga endzelanga munhu. A ku nga ri na muendzeriwa loyi a ta va nyika swo hlambela eka swona, naswona a ku nga ri na mahlonga lawa a ma ta va hlambisa milenge. Loko Yesu a sungula ku va hlambisa milenge, vaapostola va khomiwe hi tingana. Munhu Loyi a ri nkulu exikarhi ka vona u endle ntirho wa xiyimo xa le hansi!
Eku sunguleni, Petro u arile ku hlambisiwa milenge hi Yesu. Kambe Yesu u te: “Loko ndzi nga ku hlambisi, a wu na xiphemu na mina.” Endzhaku ka loko Yesu a hlambise milenge ya vaapostola hinkwavo, u te: “Xana ma swi tiva leswi ndzi mi endleke swona? Mi ndzi vula ‘Mudyondzisi,’ ni ‘Hosi,’ naswona ma vurisa, hikuva ndzi tano. Hikokwalaho, loko mina, hambileswi ndzi nga Hosi ni Mudyondzisi, ndzi hlambise milenge ya n’wina, na n’wina mi fanele ku hlambisana milenge. Hikuva ndzi mi vekele ntila, leswaku, hilaha ndzi endleke hakona eka n’wina, na n’wina mi endla hakona.”—Yohane 13:6-15.
Yesu a a nga sunguli mukhuva wa ku hlambisa vanhu milenge. Ematshan’weni ya sweswo, a pfuna vaapostola vakwe leswaku va hlakulela langutelo lerintshwa ra mianakanyo—mianakanyo ya ku titsongahata ni ku tiyimisela ku endlela vamakwavo mintirho ya xiyimo xa le hansi. A swi kanakanisi leswaku mongo wa mhaka va wu kumile. Anakanya hi leswi humeleleke emalembeni lama landzeleke loko ku tlhekeke mhaka ya ku yimba. Hambileswi ku veke ni ku “kanetana lokukulu,” lava a va ri kona a va endlanga hasahasa naswona va yingisele mavonelo ya van’wana hi xichavo. Ku tlula kwalaho, swi tikomba onge loyi a ungamele nhlangano lowu a ku ri mudyondzisiwa Yakobo—a ku nga ri un’wana wa vaapostola tanihi laha hi nga anakanyaka hakona, hikwalaho ka leswi a va ri kona. Rungula leri leri andlariweke eka Mintirho ri kombisa leswaku vaapostola va endle nhluvuko lowukulu emhakeni ya ku kombisa ku titsongahata.—Mintirho 15:6-29.
Dyondzo Eka Hina
Hi ku hlambisa milenge ya vadyondzisiwa va yena, Yesu u nyikele dyondzo ya matimba ehenhleni ka ku titsongahata. Entiyisweni, Vakreste a va fanelanga va anakanya leswaku i va nkoka ngopfu lerova va fanele va tirheriwa hi van’wana, naswona a va fanelanga va navela swikhundlha swo xiximeka ni ndhuma. Ematshan’weni ya sweswo, va fanele va landzela ntila lowu siyiweke hi Yesu, loyi “a nga telangiki ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.” (Matewu 20:28) Ina, valandzeri va Yesu va fanele va tiyimisela ku endlelana mintirho ya xiyimo xa le hansi.
Hikwalaho ka xivangelo lexinene Petro u tsarile: “Tikhameni hi mianakanyo yo titsongahata un’wana eka un’wana, hikuva Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.” (1 Petro 5:5) Rito ra Xigriki leri vulaka ku “tikhama” ri huma eka rito leri vulaka “fasikoti ya hlonga,” leyi a yi khama xiambalo lexi vululaka. Xana Petro a kombetela eka xiendlo xa Yesu xa ku tikhama hi thawula ni ku hlambisa milenge ya vaapostola vakwe? A hi tiyiseki emhakeni leyi. Hambiswiritano, ntirho wa Yesu wa xiyimo xa le hansi, Petro a nga wu rivalanga embilwini yakwe, tanihi leswi swi faneleke swi va tano etimbilwini ta valandzeri hinkwavo va Kreste.—Vakolosa 3:12-14.