Vumundzuku Lebyi Tsakisaka

Sathana ni madimona ya yena va nge hembeli vanhu ku ringana nkarhi wo leha. Ana se Yehovha u va hlongorile etilweni a va cukumetela laha misaveni. (Nhlavutelo 12:⁠9) Ku nga ri khale, Xikwembu xi ta tlhela xi lwisana na Sathana ni madimona yakwe. Eka xivono lexi humaka eka Xikwembu, muapostola Yohane u te: “Kutani ndzi vona ntsumi leyi xikaka hi le tilweni, yi tamele xilotlelo xa khele lero enta ku ya ni ku ya, yi tamele ni nketani leyikulu. Kutani yi khoma dragona, nyoka leya khale (hileswaku Diyavulosi, kumbe Sathana), yi n’wi boha nkarhi wo ringana malembe ya 1 000. Yi n’wi hoxa ekheleni, yi pfala, yi n’wi lemela endzeni leswaku a nga ha yi emahlweni ku xisa vanhu va matiko, ku fikela loko malembe ya 1 000 ma ta va ma hundzile.” (Nhlavutelo 20:​1-⁠3) Endzhaku, Diyavulosi ni madimona yakwe va ta heriseriwela makumu.​—⁠Nhlavutelo 20:⁠10.

Nakambe vanhu vo biha lava nge misaveni va ta herisiwa.​—⁠Pisalema 37:​9, 10; Luka 13:⁠5.

Vafi Va Ta Tlhela Va Hanya!

Loko Sathana ni madimona va herisiwile, Yehovha u ta tisela vanhu mikateko leyo tala. U ta tsundzuka leswaku vafi a va hanyi. Yesu u fanise rifu ni vurhongo​—⁠vurhongo lebyikulu byo pfumala milorho. (Yohane 11:​11-⁠14) U endle sweswo hikuva a a swi tiva leswaku nkarhi a wu ta ta lowu lava etleleke eku feni a va ta pfuxeriwa evuton’wini ha wona. U te: “Nkarhi wa ta lowu hinkwavo lava nge masirheni va nga ta twa rito ra yena, kutani va ta huma.”​—⁠Yohane 5:​28, 29; ringanisa na Mintirho 24:⁠15.

Va ta pfuxeriwa ku hanya kwala misaveni. Ematshan’wini ya swiviko swa minkosi ku ta va ni swiviko leswi tsakisaka swa leswaku vanhu va pfuxiwile va ta hanya nakambe! ­Mayana ntsako wonghasi lowu nga ta va kona loko vanhu va amukela varhandziwa va vona lava pfukeke emasirheni!