Xiyenge 9
Ndlela Leyi Hi Tivaka Ha Yona Leswaku Hi Le ‘Masikwini Ya Makumu’
1, 2. Hi nga swi tivisa ku yini loko hi ri emasikwini ya makumu?
HI NGA tiyiseka njhani leswaku hi hanya enkarhini lowu eka wona Mfumo wa Xikwembu wu nga ta teka goza ro lwisana ni mafambiselo lawa ya sweswi ya ku fuma ka munhu? Hi nga swi tivisa ku yini leswaku hi le kusuhi swinene ni nkarhi lowu ha wona Xikwembu xi nga ta herisa vubihi ni ku xaniseka hinkwako?
2 Vadyondzisiwa va Yesu Kriste a va lava ku tiva swilo sweswo. Va n’wi vutise leswaku xi ta va xihi “xikombiso” xa vukona bya yena ematimbeni ya Mfumo ni xa “ku hela ka [mafambiselo ya swilo, NW].” (Matewu 24:3) Yesu u hlamule hi ku nyikela vuxokoxoko bya swiendlakalo leswi tsekatsekisaka misava ni swiyimo leswi a swi ta hlangana ku kombisa leswaku vanhu va le “minkarhini ya makumu,” ‘masiku ya makumu’ ya mafambiselo lawa ya swilo. (Daniel 11:40; 2 Timotiya 3:1) Eka lembe xidzana leri, xana hi xi vonile xikombiso xexo lexi hlanganeke? Ina, hi xi vone kahle!
Tinyimpi Ta Misava
3, 4. Tinyimpi ta lembe xidzana leri ti byi fanela njhani vuprofeta bya Yesu?
3 Yesu u vhumbe leswaku ‘tiko rin’wana ri ta pfukela tiko rin’wanyana ni mfumo wun’wana wu pfukela mfumo wun’wanyana.’ (Matewu 24:7) Hi 1914 misava yi nghene enyimpini leyi voneke ku hloma ka matiko ni mimfumo hi ndlela leyi a a yi hambanile ni nyimpi yin’wana ni yin’wana ya le mahlweni ka yona. Hi ku xiya ntiyiso wolowo, van’wamatimu enkarhini wolowo va yi vitane Nyimpi Leyikulu. A a ku ri nyimpi yo sungula ya muxaka wolowo ematin’wini, nyimpi yo sungula ya misava. Masocha ni vaaka-tiko va kwalomu ka 20 000 000 va lahlekeriwe hi vutomi bya vona, ku tlula nyimpi yin’wana ni yin’wana ya le mahlweni.
4 Nyimpi yo Sungula ya Misava yi funghe masungulo ya masiku ya makumu. Yesu u vule leswaku xiendlakalo lexi ni swin’wana a swi ta va “ku sungula ka mahlomulo.” (Matewu 24:8) Sweswo swi ve ntiyiso, tanihi leswi Nyimpi ya Vumbirhi ya Misava yi dlayeke vanhu vo tala swinene, masocha ni vaaka-tiko va kwalomu ka 50 000 000 va lahlekeriwe hi vutomi bya vona. Eka lembe xidzana leri ra vu-20, vanhu vo tlula 100 000 000 va dlayiwile etinyimpini, va tlula ka mune nhlayo leyi dlayiweke eka malembe ya 400 ya le mahlweni loko ma hlanganisiwile! Vona xisolo lexikulu swonghasi eka vulawuri bya munhu!
Vumbhoni Byin’wana
5-7. Hi byihi vumbhoni byin’wana lebyi kombaka leswaku hi hanya emasikwini ya makumu?
5 Yesu u katse ni swilo swin’wana leswi a swi ta fambisana ni masiku ya makumu: “Ku ta va ni ku tsekatseka ka misava; mintungu [ku andza ka mavabyi] ni tindlala swi ta va kona ematlhlelweni layo tala.” (Luka 21:11) Sweswo swi swi fanela kahle swiendlakalo swo sukela hi 1914, tanihi leswi ku veke ni ku andza lokukulu ka ku karhateka hikwalaho ka makhombo yo tano.
6 Ku tsekatseka lokukulu ka misava ku endleka nkarhi na nkarhi, ku dlaya vanhu vo tala. Chachalaza ya le Spain yi ri yoxe yi dlaye vanhu va kwalomu ka 20 000 000 endzhaku ka Nyimpi yo Sungula ya Misava—laha van’wana va ringanyetaka leswaku i 30 000 000 kumbe ku tlula. AIDS yi dlaye vanhu va madzana ya magidi naswona yi nga ha tlhela yi dlaya timiliyoni ta vanhu ku nga ri khale. Lembe na lembe timiliyoni ta vanhu ta fa hikwalaho ka vuvabyi bya mbilu, khensa ni mavabyi man’wana. Timiliyoni leti engetelekeke ta fa hakatsongo-tsongo hikwalaho ka ndlala. Handle ko kanakana ‘vagadi va tihanci va Apocalipsi’ a va ri karhi va dlaya vanhu vo tala va ndyangu wa vanhu ku sukela hi 1914 hi tinyimpi ta vona, ku kayivela ka swakudya ni mintungu ya mavabyi.—Nhlavutelo 6:3-8.
7 Yesu na yena u vhumbe ku andza ka vugevenga loku voniwaka etindhawini hinkwato. U te: “Rirhandzu ra lavo tala ri ta sungula ku titimela, hikuva ku homboloka ku ta va ku andzile.”—Matewu 24:12.
8. Vuprofeta lebyi nga eka 2 Timotiya ndzima 3 byi wu fanela njhani nkarhi wa hina?
8 Ku engetela kwalaho, vuprofeta bya Bibele byi vhumbe ku onhaka ka mahanyelo loku hi ku vonaka emisaveni hinkwayo namuntlha: “Emasikwini ya makumu, ku ta fika minkarhi yo nonon’hwa. Hikuva vanhu va ta va lava tirhandzaka, va ta va lava rhandzaka mali ngopfu, ni ku tikurisa, ni ku titiva, ni ku rhukana; va ta va lava nga yingisiki vatswari va vona, lava nga riki na ku nkhensa, lava nga khongeriki; va ta va vanhu va tihanyi, lava nga riki na ku tsetselela, valumbeti, lava nga tikotiki, lavo leva, lava vengaka leswo lulama; va ta va timbabva, vanhu va futa, lava nga ni manyunyu, lava rhandzaka ku tiphina ku tlula ku rhandza Xikwembu. Va ta [va ni xiyimo xa ku tinyiketela eka Xikwembu], kambe va ta ala matimba ya [kona] . . . Vanhu lavo biha ni vakanganyisi va ta ya emahlweni va nyanya ku biha.” (2 Timotiya 3:1-13) Sweswo hinkwaswo swi ve tano ematihlweni ya hina.
Xivangelo Xin’wana
9. Ku endleke yini etilweni lexi fambisaneke ni ku sungula ka masiku ya makumu emisaveni?
9 Ku ni xivangelo xin’wana lexi endlaka leswaku ku va ni ku andza lokukulu ka ku xaniseka eka lembe xidzana leri. Hi ku fambisana ni ku sungula ka masiku ya makumu hi 1914, ku endleke nchumu wo karhi lowu ngheniseke vanhu ekhombyeni lerikulu ngopfu. Enkarhini wolowo, hi laha vuprofeta lebyi nga ebukwini yo hetelela ya Bibele byi hlamuselaka ha kona: “Kutani ku pfuka nyimpi etilweni, ya Mikaele [Kriste a ri eku fumeni etilweni] ni tintsumi ta yena loko va lwa ni dragona [Sathana]; na yona dragona yi lwa yi ri ni tintsumi ta yona [mademona]. Kambe dragona yi hluriwa, yi nga ha pfumeleriwi ku tshama etilweni, yona ni tintsumi ta yona. Hiloko dragona leyikulu leyi yi cukumetiwa yi ya wela hansi, yona nyoka ya khale leyi vuriwaka Diyavulosi kumbe Sathana, Mukanganyisi wa misava hinkwayo; yi cukumetiwa yi ya wela ehansi emisaveni, tintsumi ta yona na tona ti cukumetiwa kun’we na yona.”—Nhlavutelo 12:7-9.
10, 11. Vanhu va khumbiwe njhani loko Sathana ni mademona yakwe va cukumeteriwe emisaveni?
10 Vuyelo byi ve byihi eka ndyangu wa vanhu? Vuprofeta byi ya emahlweni: “Mi ni khombo n’wina misava ni lwandle, hikuva Diyavulosi ú xikele ka n’wina; ú karihile ngopfu hi ku tiva leswaku nkarhi wa yena wu komile.” Ina, Sathana wa swi tiva leswaku mafambiselo yakwe ma le kusuhi ni ku hela, kutani u lwela ku endla leswaku vanhu va xandzukela Xikwembu a nga si herisiwa kun’we ni misava ya yena. (Nhlavutelo 12:12; 20:1-3) A hi ku thyaka ka swona swivumbiwa sweswo swa moya hi ku va swi tirhise ku tihlawulela ka swona hi ndlela yo biha! Vona ndlela leyi swiyimo swi chavisaka ha yona emisaveni hikwalaho ka nkucetelo wa swona, ngopfu-ngopfu ku sukela hi 1914!
11 A swi hlamarisi leswi Yesu a vhumbeke leswi hi ta nkarhi wa hina: “Laha misaveni, matiko ma ta hela ntamu . . . Vanhu va ta titivala hi ku chava ni ku ehleketa leswi nga ta humelela la misaveni.”—Luka 21:25, 26.
Ku Hela Ka Vulawuri Bya Vanhu Ni Mademona Ku Le Kusuhi
12. Hi byihi byin’wana bya vuprofeta byo hetelela lebya ha ta hetisekaka ku nga si hela mafambiselo lawa?
12 I vuprofeta byingani bya Bibele lebya ha ta hetisekaka Xikwembu xi nga si lovisa mafambiselo lawa? A byi talanga! Byin’wana bya lebyo hetelela byi le ka 1 Vatesalonika 5:3, leyi nge: “Loko va ha vulavula hi ku rhula ni nsirhelelo, xikan’we-kan’we khombo ri ta va wela ehenhla.” (The New English Bible) Leswi swi komba leswaku ku hela ka mafambiselo lawa ku ta sungula “loko va ha vulavula.” Wu nga si voniwa hi misava, ndzoviso wu ta ta wu nga languteriwanga, loko nyingiso wa vanhu wu ri eka ku rhula ni nsirhelelo lowu va wu languteleke.
13, 14. Yesu u vhumbe nkarhi wihi wa maxangu, naswona wu ta hela hi ndlela yihi?
13 Misava leyi nga ehansi ka nkucetelo wa Sathana yi heleriwa hi nkarhi. Ku nga ri khale yi ta hela enkarhini wa maxangu lowu Yesu a vulavuleke ha wona a ku: “[Ku ta va ni nhlomulo lowukulu, NW]; nhlomulo lowo tano a wu si va kona hi mpfhuka misava yi tumbulukile ku fikela namuntlha, naswona a wu nga ha vi kona ni siku ni rin’we.”—Matewu 24:21.
14 Ku chaputa ka “nhlomulo lowukulu” ku ta va nyimpi ya Xikwembu ya Armagedoni. Wolowo i nkarhi lowu muprofeta Daniyele a vulavuleke ha wona laha Xikwembu xi nga ta “seletela ni ku herisa ku fuma koloku hinkwako.” Loku ku ta va ku hela ka vulawuri hinkwabyo bya sweswi bya vanhu lebyi tintshunxeke eka Xikwembu. Kutani Mfumo wa xona wa le tilweni wu ta lawula timhaka hinkwato ta vanhu hi ku helela. Daniyele u vhumbe leswaku matimba yo fuma a ma nga ha hundzeli ‘eka vanhu van’wana.’—Daniel 2:44; Nhlavutelo 16:14-16.
15. Ku ta humelela yini hi nkucetelo wa Sathana ni mademona yakwe?
15 Enkarhini wolowo ku ta hela ni nkucetelo hinkwawo wa Sathana ni mademona. Swivumbiwa sweswo swa moya leswi xandzukeke swi ta herisiwa leswaku swi “nga ha yi emahlweni [ni] ku xisa vanhu va matiko.” (Nhlavutelo 12:9; 20:1-3) Swi gweveriwe rifu naswona swi rindzele ndzoviso. Mawaku ku wisa loku vanhu va nga ta va na kona hi ku ntshuxeka eka nkucetelo wa swona lowu thyakisaka!
I Vamani Va Nga Ta Pona? I Vamani Va Nga Ta Lova?
16-18. I vamani lava nga ta pona makumu ya mafambiselo lawa, naswona i vamani lava nga ta lova?
16 Loko Xikwembu xi avanyisa misava leyi, i vamani va nga ta pona? I vamani va nga ta lova? Bibele yi komba leswaku lava lavaka vulawuri bya Xikwembu va ta sirheleriwa naswona va ta pona. Lava nga byi laviki vulawuri bya Xikwembu a va nge sirheleriwi kambe va ta lovisiwa kun’we ni misava ya Sathana.
17 Swivuriso 2:21, 22 yi ri: “Lava lulameke [lava titsongahatelaka vulawuri bya Xikwembu] va ta aka misaveni, lavo tenga va ta siyiwa kona; kambe lavo biha [lava nga titsongahateriki vulawuri bya Xikwembu] va ta susiwa la misaveni, ni timbabva ti ta tsuvuriwa eka yona.”
18 Psalma 37:10, 11 na yona yi ri: “Ku sele nkarhinyana, kutani lowo biha a nga ka a nga ha vi kona . . . Va musa va ta fuma misava, va ta titsakela eku rhuleni lokukulu ka vona.” Ndzimana 29 ya engetela: “Lavo lulama va ta fuma misava, va ta tshama ka yona hi masiku.”
19. Hi fanele hi yingisa ndzayo yihi?
19 Hi fanele hi yingisa ndzayo ya Psalma 37:34, leyi nge: “Tshemba Yehova, u hlayisa ndlela ya yena, u ta ku kurisa leswaku u fuma misava; kambe u ta vona ku herisiwa ka lavo biha.” Ndzimana 37 na 38 ti ri: “Xiya la tengeke, u languta la lulameke; hikuva [vumundzuku bya munhu yoloye byi ta va ni ku rhula, NW]; kambe valandzuri va ta hela hinkwavo, rixaka ra lavo biha ri ta herisiwa.”
20. Hikwalaho ka yini hi nga vulaka leswaku leyi i minkarhi leyi nyanyulaka ku hanya eka yona?
20 Mawaku ku chavelela ka swona, ina, mawaku ku tsakisa ka swona ku tiva leswaku Xikwembu xa khathalela hakunene ni leswaku ku nga ri khale xi ta herisa vubihi ni ku xaniseka hinkwako! Mawaku ndlela leyi swi nyanyulaka ha yona ku xiya leswaku ku hetiseka ka vuprofeta byebyo lebyi vangamaka ku le kusuhi!
[Xifaniso lexi nga eka tluka 20]
Bibele yi vhumbe swiendlakalo leswi a swi ta vumba “xikombiso” xa masiku ya makumu
[Xifaniso lexi nga eka tluka 22]
Ku nga ri khale, eArmagedoni, lava nga titsongahateriki vulawuri bya Xikwembu va ta herisiwa. Lava titsongahatelaka byona va ta ponela emisaveni leyintshwa ya ku lulama