Xiyenge 8
Xikongomelo Xa Xikwembu Xi Ya Eku Hetisekeni
1, 2. Xikwembu a xi ri karhi xi endla lunghiselelo ro herisa ku xaniseka hi ndlela yihi?
VULAWURI bya vanhu ni mademona lama xandzukeke a a byi ri karhi byi tshikilela ndyangu wa vanhu hi malembe xidzana yo tala. Kambe, Xikwembu a xi ku honisanga ku xaniseka ka hina. Ematshan’wini ya sweswo, eka malembe xidzana lawa hinkwawo, a xi ri karhi xi endla lunghiselelo ro ntshunxa vanhu eka vubihi ni ku xaniseka.
2 Enkarhini wa ku xandzuka aEdeni, Xikwembu xi sungule ku paluxa xikongomelo xa xona xa ku vumba hulumendhe leyi nga ta endla misava leyi yi va kaya ra vanhu ra paradeyisi. (Genesa 3:15) Endzhakunyana, tanihi muvulavuleri-nkulu wa Xikwembu, Yesu u endle hulumendhe leyi yi taka ya Xikwembu yi va nhloko-mhaka ya dyondzo yakwe. U vule leswaku a yi ta va ntshembo lowu nga woxe wa vanhu.—Daniel 2:44; Matewu 6:9, 10; 12:21.
3. Yesu u yi vule yini hulumendhe leyi taka emisaveni, naswona hikwalaho ka yini?
3 Yesu u vule leswaku hulumendhe yoleyo leyi taka ya Xikwembu i “Mfumo wa matilo,” tanihi leswi a yi ta fuma yi ri etilweni. (Matewu 4:17) U tlhele a yi vitana “Mfumo wa Xikwembu,” tanihi leswi Xikwembu a xi ta va Musunguri wa yona. (Luka 17:20) Hi malembe xidzana yo tala Xikwembu xi huhutele vatsari va xona leswaku va tsala vuprofeta mayelana ni lava a va ta vumba hulumendhe yoleyo ni leswi a yi ta swi hetisisa.
Hosi Leyintshwa Ya Misava
4, 5. Xikwembu xi swi kombisise ku yini leswaku Yesu a a ri Hosi ya xona leyi hlawuriweke?
4 Kwalomu ka malembe ya magidi mambirhi lama hundzeke, a a ku ri Yesu la hetisiseke vuprofeta byo tala malunghana na loyi a a ta va Hosi ya Mfumo wa Xikwembu. U tikombe a hlawuriwe hi Xikwembu leswaku a va Mufumi wa hulumendhe yoleyo ya le tilweni ehenhla ka vanhu. Naswona endzhaku ka rifu rakwe, Xikwembu xi pfuxe Yesu a ya evuton’wini bya le tilweni tanihi xivumbiwa xa moya xa matimba, lexi nga riki na ku fa. A a ku ri ni timbhoni to tala ta ku pfuxiwa ka yena.—Mintirho 4:10; 9:1-9; Varhoma 1:1-4; 1 Vakorinto 15:3-8.
5 Kutani Yesu “ú yile a ya tshama evokweni ra xinene ra Xikwembu.” (Vaheveru 10:12) U fike kona a rindzela nkarhi lowu Xikwembu a xi ta n’wi nyika matimba yo tirha tanihi Hosi ya Mfumo wa Xikwembu wa le tilweni. Leswi swi hetisise vuprofeta lebyi nga eka Psalma 110:1, laha Xikwembu xi n’wi byelaka kona xi ku: “Tshamisa evokweni ra mina ra xinene, ndzi ko ndzi endla lava nga valala eka wena evunavelo bya mikondzo ya wena.”
6. Yesu u swi kombise njhani leswaku u fanelekela ku va Hosi ya Mfumo wa Xikwembu?
6 Loko a ha ri emisaveni, Yesu u kombise leswaku u fanelekela xikhundla xexo. Ku nga khathariseki nxaniso, u hlawule ku hlayisa vutshembeki byakwe eka Xikwembu. Hi ku endla tano, u kombise leswaku Sathana a a ri ni vunwa loko a vule leswaku a nga kona munhu loyi a nga tshembekaka eka Xikwembu loko a ringiwa. Yesu, munhu la hetisekeke, ‘Adamu wa vumbirhi,’ u kombise leswaku Xikwembu a xi nga hoxisanga hi ku vumba vanhu lava hetisekeke.—1 Vakorinto 15:22, 45; Matewu 4:1-11.
7, 8. Hi swihi swilo leswinene leswi Yesu a swi endleke loko a ha ri emisaveni, naswona u kombise yini?
7 Hi wihi mufumi loyi a endleke swilo leswinene ku fana ni leswi Yesu a swi endleke eka malembe ma nga ri mangani ya vutirheli bya yena? Loko a nyikiwe matimba hi moya lowo kwetsima wa Xikwembu, Yesu u hanyise vavabyi, lava lamaleke, mabofu, vamafa-tindleve ni timbheveve. U pfuxe ni lava feke! U kombise hi mpimo lowutsongo leswi a nga ta swi endlela vanhu emisaveni hinkwayo loko a ri ematimbeni ya Mfumo.—Matewu 15:30, 31; Luka 7:11-16.
8 Yesu u endle swilo swo tala leswinene loko a ha ri emisaveni lerova mudyondzisiwa wakwe Yohane a ku: “Ka ha ri ni timhaka tin’wana leto tala leti Yesu a nga ti endla; loko ti nga tsariwa ha yin’we-yin’we, a ndzi tshembi leswaku misava hinkwayo yona yi nga ringana tibuku leti a ti ta tsariwa.”—Yohane 21:25.a
9. Hikwalaho ka yini vanhu va timbilu letinene va khitikanele eka Yesu?
9 Yesu a a ri ni musa ni ntwela-vusiwana, a ri ni rirhandzu lerikulu ngopfu evanhwini. U pfune swisiwana ni lava karhatekaka, kambe a nga va tshikanga lava nga ni rifuwo kumbe swikhundla. Vanhu va timbilu letinene va amukele xirhambo xa rirhandzu xa Yesu loko a te: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’win[a] yi ta kuma ku wisa; hikuva joko ra mina ra olova, ni ndzhwalo wa mina wa vevuka.” (Matewu 11:28-30) Vanhu lava chavaka Xikwembu va khitikanele eka yena naswona a va langutele vulawuri bya yena.—Yohane 12:19.
Vafumi-kulobye
10, 11. I vamani lava nga ta hlanganyela na Yesu eku fumeni ka misava?
10 Tanihi leswi tihulumendhe ta vanhu ti nga ni valawuri-kulobye, Mfumo wa le tilweni wa Xikwembu na wona wu tano. Van’wana handle ka Yesu va ta hlanganyela eku fumeni ka misava, hikuva Yesu u tshembise vanghana va yena lavakulu leswaku va ta fuma na yena tanihi tihosi ehenhla ka vanhu.—Yohane 14:2, 3; Nhlavutelo 5:10; 20:6.
11 Hikwalaho, kun’we na Yesu, nhlayo leyi hikiweke ya vanhu na yona yi pfuxeriwa evuton’wini bya le tilweni. Va vumba Mfumo wa Xikwembu lowu nga ta tisa mikateko leyi nga heriki evanhwini. (2 Vakorinto 4:14; Nhlavutelo 14:1-3) Kutani emalembeni hinkwawo, Yehova u veke masungulo ya vulawuri lebyi nga ta tisa mikateko leyi nga heriki endyangwini wa vanhu.
Mfumo Wa Ku Tilawula Wu Ta Hela
12, 13. Mfumo wa Xikwembu wu lunghekele ku endla yini sweswi?
12 Eka lembe xidzana leri, Xikwembu xi nghene hi ku kongoma etimhakeni ta misava. Hi laha Xiyenge 9 xa broxara leyi xi nga ta hlamusela ha kona, vuprofeta bya Bibele byi komba leswaku Mfumo wa Xikwembu ehansi ka Kriste wu simekiwile hi 1914 naswona sweswi wu lunghekele ku pfotlosa mafambiselo hinkwawo ya Sathana. Mfumo wolowo wu lunghekele ku “fuma . . . exikarhi ka valala va [Kriste]!”—Psalma 110:2.
13 Emhakeni leyi vuprofeta bya Daniel 2:44 byi ri: “Emasikwini ya tihosi teto [leti nga kona sweswi], Xikwembu xa matilo xi ta simeka mfumo [etilweni] lowu nga ta ka wu nga herisiwi, naswona vuhosi bya wona byi nga ka byi nga siyeriwi vanhu van’wana [vulawuri bya munhu a byi nge he pfumeleriwi nakambe]. [Mfumo wa Xikwembu] wu ta fayetela mimfumo leyi hinkwayo ivi wu yi herisa, kutani wona wu ta tshama hi laha ku nga heriki.”—Revised Standard Version.
14. Hi yihi mimpfuno yin’wana leyi nga ta ta loko ku fuma ka munhu ku hela?
14 Loko ku herisiwe vulawuri hinkwabyo lebyi nga riki ehansi ka Xikwembu, ku fuma ka Mfumo wa Xikwembu ehenhla ka misava ku ta helela. Naswona hikwalaho ka leswi Mfumo wu fumaka wu ri etilweni, wu nga ka wu nga onhiwi hi vanhu. Matimba yo fuma ma ta va laha a ma ri kona eku sunguleni, etilweni, ni Xikwembu. Naswona tanihi leswi mfumo wa Xikwembu wu nga ta lawula misava hinkwayo, ku hava loyi a nga ta hambukisiwa hi vukhongeri bya mavunwa kumbe tifilosofi ta vanhu ni mianakanyo ya politiki leyi nga enerisiki. A xi kona ni xin’we xa swilo sweswo lexi nga ta pfumeleriwa ku va kona.—Matewu 7:15-23; Nhlavutelo, ndzima 17 ku ya ka 19.
[Nhlamuselo ya le hansi]
a Leswaku u kuma ku hlanganisiwa loku teleke ka vutomi bya Yesu, vona buku leyi Nghwazi Leyi Tshameke Yi Hanya, leyi humesiweke hi 1991 hi Sosayiti ya Watchtower.
[Swifaniso leswi nga eka tluka 18]
Loko a ha ri emisaveni Yesu u hanyise vavabyi ni ku pfuxa vafi leswaku a kombisa leswi a nga ta swi endla emisaveni leyintshwa
[Xifaniso lexi nga eka tluka 19]
Mfumo wa Xikwembu wa le tilweni wu ta herisa swivumbeko hinkwaswo swa vulawuri lebyi tintshunxeke eka xona swi nga ha vi kona