Xiyenge 11
Masungulo Ya Misava Leyintshwa Ma Karhi Ma Endliwa Sweswi
1, 2. Eku hetisekeni ka vuprofeta bya Bibele, i yini lexi endlekaka hi xi langutile?
XIN’WANA lexi hlamarisaka i mhaka ya leswaku masungulo ya misava leyintshwa ya Xikwembu ma karhi ma endliwa sweswi, tanihi leswi misava ya khale ya Sathana yi helaka matimba. Hi ri karhi hi langutile, Xikwembu xi hlengeleta vanhu va huma eka matiko hinkwawo ivi xi va endla masungulo ya vandla lerintshwa ra misava leri hi ku hlatlisa ri nga ta siva misava ya namuntlha leyi avaneke. EBibeleni, eka 2 Petro 3:13, vandla leri lerintshwa ri vitaniwa “misava leyintshwa.”
2 Vuprofeta bya Bibele nakambe byi ri: “Eminkarhini ya makumu [nkarhi lowu hi hanyaka eka wona sweswi], . . . Matiko layo tala ma ta ta kona, ma ku: Tanani, hi ta tlhandlukela ntshaveni ya Yehova [vugandzeri bya yena bya ntiyiso], . . . [u] ta hi dyondzisa tindlela ta [ye]na, kutani hi ta famba emitileni ya [ye]na.”—Esaya 2:2, 3.
3. (a) Vuprofeta bya Esaya byi hetiseka exikarhi ka vamani? (b) Buku yo hetelela ya Bibele yi swi hlamusela njhani leswi?
3 Vuprofeta byebyo bya hetiseka sweswi eka lava va titsongahatelaka ‘tindlela ta Xikwembu ni ku famba emitileni ya xona.’ Buku yo hetelela ya Bibele yi vulavula hi leswaku vandla leri ra vanhu va matiko hinkwawo leri rhandzaka ku rhula i “ntshungu lowukulu . . . [wo] huma ematikweni hinkwawo, ni le tinxakeni hinkwato, [wu] ri [wa] swivongo hinkwaswo ni [wa] tindzimi hinkwato,” vamakwerhu va ntiyiso lava tirhelaka Xikwembu hi vun’we. Naswona Bibele yi tlhela yi ku: “Lava, hi lava humaka eku xanisekeni lokukulu.” Hi leswaku, va ta pona ku hela ka mafambiselo lawa yo biha ya swilo.—Nhlavutelo 7:9, 14; Matewu 24:3.
Vumakwerhu Bya Ntiyiso Bya Matiko Hinkwawo
4, 5. Ha yini vumakwerhu bya misava hinkwayo bya Timbhoni ta Yehova byi koteka?
4 Timiliyoni ta Timbhoni ta Yehova ti ringeta hi matimba ku hanya hi ku fambisana ni swiletelo ni tindlela ta Xikwembu. Ntshembo wa vona wa vutomi lebyi nga heriki wu titshege hi misava leyintshwa ya Xikwembu. Hi ku hanya vutomi bya vona bya siku na siku hi ku yingisa milawu ya Xikwembu, va xi komba leswaku va rhandza ku titsongahatela ndlela ya xona ya ku fuma sweswi ni le misaveni leyintshwa. Hinkwako-nkwako, ku nga khathariseki tiko kumbe rixaka ra vona, va yingisa mimpimanyeto leyi fanaka—leyi yi andlariweke hi Xikwembu eRitweni ra xona. Hi yona mhaka leyi va nga ni vumakwerhu bya ntiyiso ematikweni hinkwawo, vandla ra misava leyintshwa leyi endliweke hi Xikwembu.—Esaya 54:13; Matewu 22:37, 38; Yohane 15:9, 14.
5 Timbhoni ta Yehova a ti tidzunisi hi mhaka ya leswi ti nga ni vumakwerhu lebyi hlawulekeke ematikweni hinkwawo. Va swi tiva leswaku lebyi i vuyelo bya moya wa Xikwembu wa matimba lowu tirhaka evanhwini lava yingisaka milawu ya xona. (Mintirho 5:29, 32; Vagalatiya 5:22, 23) Swi endliwa hi Xikwembu. Hi laha Yesu a vuleke ha kona, “Leswi tsandzaka vanhu a swi tsandzi Xikwembu.” (Luka 18:27) Kutani Xikwembu lexi endleke vuako lebyi tshamaka hi masiku hi xona nakambe lexi endlaka vandla ra misava leyintshwa leri tshamaka hi masiku.
6. Ha yini vumakwerhu bya Timbhoni ta Yehova byi nga ha vitaniwaka hlori eka manguva lawa?
6 Xisweswo, ndlela ya Yehova ya ku lawula emisaveni leyintshwa se yi nga voniwa hi leswi a swi humesaka eka masungulo ya misava leyintshwa lama endliwaka sweswi. Naswona leswi a swi endleke hi Timbhoni ta yena, hi ndlela yo karhi, i hlori eka manguva lawa. Hikwalaho ka yini? Hikuva u vumbe Timbhoni ta Yehova ti va ni vumakwerhu bya ntiyiso bya misava hinkwayo, lebyi nga ta ka byi nga onhiwi hi timhaka leti avanisaka ta vutiko, rixaka kumbe vukhongeri. Hambi leswi Timbhoni ti hlayiwaka hi timiliyoni ni leswi ti tshamaka ematikweni yo tlula 200, ti hlanganisiwe tanihi munhu un’we hi xiboho lexi nga tsemekiki. Vumakwerhu lebyi bya misava hinkwayo, lebyi hlawulekeke ematin’wini hinkwawo, hakunene i hlori ra manguva lawa—byi endliwa hi Xikwembu.—Esaya 43:10, 11, 21; Mintirho 10:34, 35; Vagalatiya 3:28.
Ku Fungha Vanhu Va Xikwembu
7. Yesu u vule leswaku valandzeri vakwe va ntiyiso va ta tiviwa hi ndlela yihi?
7 Swi nga voniwa njhani hi laha ku engetelekeke leswaku hi vahi vanhu lava Xikwembu xi va tirhisaka tanihi masungulo ya misava ya xona leyintshwa? Kahle-kahle, i vamani lava hetisisaka marito ya Yesu eka Yohane 13:34, 35? U te: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” Timbhoni ta Yehova ta ma pfumela marito ya Yesu naswona ta ma tirhisa. Hi laha Rito ra Xikwembu ri letelaka ha kona, va ‘rhandzana ngopfu.’ (1 Petro 4:8) Va ‘tifunengeta hi rirhandzu, hikuva i xiboho lexi hetisekeke xa vun’we.’ (Vakolosa 3:14) Kutani rirhandzu ra vumakwerhu i “xidamarheti” lexi xi va hlanganisaka emisaveni hinkwayo.
8. Yohane wo Sungula 3:10-12 yi va hlamusela njhani hi laha ku engetelekeke vanhu va Xikwembu?
8 Nakambe, 1 Yohane 3:10-12 yi ri: “Ku hambana exikarhi ka vana va Xikwembu ni vana va Diyavulosi, ku nga vonaka hi ndlela leyi: Hileswaku un’wana ni un’wana loyi a nga endliki leswo lulama, kumbe loyi a nga rhandziki makwavo, a hi wa Xikwembu. Rito leri hi ri tweke ku sukela eku sunguleni, hileswaku hi fanlele ku rhandzana. Hi nga fani na Kayini, loyi a a twanana na Lowo biha, kutani ú dlele makwavo.” Xisweswo, vanhu va Xikwembu i vamakwavo lava nga riki na vukari, emisaveni hinkwayo.
Xivumbeko Xin’wana Lexi Va Funghaka
9, 10. (a) Malandza ya Xikwembu a ma ta tiviwa hi ntirho wihi emasikwini ya makumu? (b) Timbhoni ta Yehova ti hetisisa Matewu 24:14 hi ndlela yihi?
9 Ku ni ndlela yin’wana ya ku tiva malandza ya Xikwembu. Eka vuprofeta bya yena mayelana ni ku hela ka misava, Yesu u vulavule hi swilo swo tala leswi a a swi ta fungha nkarhi lowu tanihi masiku ya makumu. (Vona Xiyenge 9.) Xivumbeko lexikulu xa vuprofeta lebyi xi boxiwa emaritweni ya yena eka Matewu 24:14: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.”
10 Xana hi vone vuprofeta byebyo byi hetiseka? Ina. Ku sukela loko masiku ya makumu ma sungurile hi 1914, Timbhoni ta Yehova ti chumayele mahungu lamanene ya Mfumo wa Xikwembu emisaveni hinkwayo hi mukhuva lowu Yesu a leriseke ha wona, ku nga emakaya ya vanhu. (Matewu 10:7, 12; Mintirho 20:20) Timiliyoni ta Timbhoni ti endzela vanhu va matiko hinkwawo, ti vulavurisana na vona hi ta misava leyintshwa. Leswi swi endle leswaku wena u kuma broxara leyi, tanihi leswi ntirho wa Timbhoni ta Yehova wu katsaka ku kandziyisa ni ku hangalasa tibiliyoni ta tibuku to hambana-hambana leti vulavulaka hi Mfumo wa Xikwembu. Xana u tiva un’wanyana la chumayelaka hi ta Mfumo wa Xikwembu hi yindlu ni yindlu emisaveni hinkwayo? Naswona Marka 13:10 yi komba leswaku ntirho lowu wo chumayela ni ku dyondzisa wu fanele wu “rhanga” wu endliwa, ku nga si fika makumu.
Ku Hlamula Mphikamakaneta Ya Vumbirhi Leyikulu
11. I yini swin’wana leswi Timbhoni ta Yehova ti swi hetisisaka hi ku titsongahatela vulawuri bya Xikwembu?
11 Hi ku titsongahata eka milawu ni misinya ya milawu ya Xikwembu, Timbhoni ta Yehova ti hetisisa swin’wana. Va kombisa leswaku Sathana a a ri muhembi loko a vule leswaku vanhu va nga ka va nga tshembeki eka Xikwembu loko va ringiwa, xisweswo va hlamula mphikamakaneta ya vumbirhi leyikulu, leyi katsaka vutshembeki bya munhu. (Yobo 2:1-5) Leswi va nga vandla ra timiliyoni ta vanhu lava humaka ematikweni hinkwawo, Timbhoni tanihi ntlawa ti kombisa ku tshembeka eka vulawuri bya Xikwembu. Hambi leswi va nga vanhu lava nga hetisekangiki, va yima ni Xikwembu eka mphikamakaneta ya vuhosi bya vuako hinkwabyo, ku nga khathariseki ntshikilelo wa Sathana.
12. Timbhoni ti tekelela vamani hi ripfumelo ra tona?
12 Namuntlha, timiliyoni leti ta Timbhoni ta Yehova ti engetela vumbhoni bya tona eka nxaxamelo wo leha wa timbhoni tin’wana ta nkarhi lowu hundzeke leti kombiseke ku tshembeka eka Xikwembu. Ku boxa va nga ri vangani va tona, a a ku ri na Avele, Nowa, Yobo, Abrahama, Sara, Isaka, Yakobo, Debora, Rhuti, Davhida na Daniyele. (Vaheveru, ndzima 11) Hi laha Bibele yi vulaka ha kona, i ‘papa lerikulu ra timbhoni to tshembeka.’ (Vaheveru 12:1) Lava kun’we ni van’wana, ku katsa ni vadyondzisiwa va Yesu va hlayise vutshembeki eka Xikwembu. Naswona Yesu hi yexe u nyikele xikombiso lexikulu ngopfu hi ku hlayisa vutshembeki lebyi hetisekeke.
13. I marito wahi ya Yesu mayelana na Sathana lama veke ntiyiso?
13 Leswi swi komba leswaku leswi Yesu a swi byeleke varhangeri va vukhongeri hi Sathana i ntiyiso: “Kambe sweswi mi lava ku ndzi dlaya, mina loyi ndzi nga mi byela ntiyiso lowu ndzi wu tweke eka Xikwembu! . . . N’wina mi huma eka tata wa n’wina, a nga Diyavulosi, kutani mi tsakela ku endla ku navela ka tata wa n’wina. A a ri mudlayi ni le ku sunguleni. A nga yimanga entiyisweni, hikuva ku hava ntiyiso eka yena. Loko a vulavula mavunwa, ú tikomba lexi a nga xona, hikuva i muhembi, ni tata wa mavunwa.”—Yohane 8:40, 44.
Wena U Hlawula Yini?
14. Xana ku humelela yini hi masungulo ya misava leyintshwa sweswi?
14 Masungulo ya misava leyintshwa lama endliwaka sweswi hi Xikwembu eka vandla ra matiko hinkwawo ra Timbhoni ta Yehova ma ya ma tiya ngopfu. Lembe na lembe madzana ya magidi ya vanhu ma tirhisa ku tihlawulela ka wona, loku sekeriweke eka vutivi lebyi kongomeke, leswaku ma amukela vulawuri bya Xikwembu. Va va xiphemu xa vandla ra misava leyintshwa, va yima ni Xikwembu eka mphikamakaneta ya vuhosi bya vuako hinkwabyo, kutani va kombisa Sathana a ri muhembi.
15. Hi wihi ntirho wo hlawula lowu Yesu a wu endlaka esikwini ra hina?
15 Hi ku hlawula vulawuri bya Xikwembu, va fanelekela ku vekiwa ‘evokweni ra xinene’ ra Kriste loko a hlawula “tinyimpfu” eka “timbuti.” Eka vuprofeta byakwe bya masiku ya makumu, Yesu u vhumbile: “Vanhu va matiko hinkwawo va ta hlengeletiwa emahlweni ka yena; ú ta hlawula van’wana a siya van’wana, kukotisa murisi loko a hlawula tinyimpfu exikarhi ka timbuti. Ú ta yisa tinyimpfu evokweni ra yena ra xinene, timbuti tona eka lera ximatsi.” Tinyimpfu i vanhu lava titsongahataka, lava hlanganyelaka ni ku seketela vamakwavo va Kriste, lava titsongahatelaka vulawuri bya Xikwembu. Timbuti i vanhu lava tiarisaka lava alaka vamakwavo va Kriste naswona va nga endli nchumu xo seketela vulawuri bya Xikwembu. Vuyelo byi ta va byihi? Yesu u te: “Volavo [timbuti] va ta [loviseriwa makumu] kambe lavo lulama [tinyimpfu] va ta ya evutomini lebyi nga heriki.”—Matewu 25:31-46.
16. U fanele ku endla yini loko u lava ku hanya eParadeyisini leyi nga ta ta?
16 Entiyisweni, Xikwembu xa hi khathalela! Ku nga ri khale xi ta tisa misava yo tsakisa ya paradeyisi. Xana wa swi lava ku hanya eka Paradeyisi yoleyo? Loko swi ri tano, kombisa ku tlangela ka wena malunghiselelo ya Yehova hi ku dyondza ha yena ni ku tirhisa leswi u swi dyondzaka. “Lavani Yehova loko a ha kumeka; huwelelani ka yena, loko a ha ri kusuhi! Lowo biha a a tshike ndlela ya yena, ni wa lunya emeehleketo ya yena; a a tlhelele ka Yehova, la nga ta n’wi twela vusiwana.”—Esaya 55:6, 7.
17. Ha yini ku nga ri na nkarhi wo tlanga ha wona eku hlawuleni ka loyi hi fanelaka ku n’wi tirhela?
17 Ku hava nkarhi wo tlanga ha wona. Makumu ya mafambiselo lawa ya khale ma le kusuhi swinene. Rito ra Xikwembu ra tsundzuxa: “Mi nga rhandzeni misava, kumbe swilo leswi nge misaveni. Loko munhu a rhandza misava, rirhandzu ro rhandza Tatana a ri kona eka yena . . . Kutani misava ya hundza, ni ku navela ka yona, kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:15-17.
18. I xiendlo xihi lexi nga ta ku pfuna leswaku u langutela ku hanya emisaveni leyintshwa yo saseka ya Xikwembu hi ntshembo?
18 Vanhu va Xikwembu sweswi va leteriwa hi ta vutomi lebyi nga heriki emisaveni leyintshwa. Va dyondza vutshila bya moya ni byin’wana lebyi lavekaka eku endleni ka paradeyisi. Hi ku khutaza leswaku u hlawula Xikwembu tanihi xona Mulawuri ni ku seketela ntirho wo ponisa vutomi lowu xi wu endlaka emisaveni hinkwayo namuntlha. Dyondza Bibele kun’we ni Timbhoni ta Yehova, kutani u tiva Xikwembu lexi ku khathalelaka hakunene ni lexi nga ta herisa ku xaniseka. Hi ndlela leyi na wena u nga va xiphemu xa masungulo ya misava leyintshwa. Kutani hi ntshembo u nga langutela ku amukeriwa hi Xikwembu ni ku hanya hi laha ku nga heriki emisaveni yoleyo leyintshwa yo saseka.
[Xifaniso lexi nga eka tluka 31]
Timbhoni ta Yehova ti ni vumakwerhu bya ntiyiso ematikweni hinkwawo
[Xifaniso lexi nga eka tluka 32]
Masungulo ya misava leyintshwa ya Xikwembu ma karhi ma endliwa sweswi