Ndzima 3

Timbhoni Ta Yehovha Ta Vukreste Eka Lembe Xidzana Ro Sungula

“MI TA va timbhoni ta mina . . . ku ya fika emakun’wini ya misava.” (Mint. 1:8) Hi marito lawa yo lela, Yesu u lerise vadyondzisiwa va yena leswaku va va timbhoni. Kambe va va timbhoni ta mani? “Timbhoni ta mina,” ku vule Yesu. Xana marito lawa ma vula leswaku a a va nga ta va timbhoni ta Yehovha? Nikatsongo!

Entiyisweni, vadyondzisiwa va Yesu va nyikiwe lunghelo leri nga si tshamaka ri va kona—ra ku va timbhoni ta Yehovha na Yesu ha vambirhi. Tanihi Vayuda lava tshembekeke, vadyondzisiwa va Yesu vo sungula ana se a va ri timbhoni ta Yehovha. (Esa. 43:10-12) Kambe sweswi a va ta tlhela va nyikela vumbhoni malunghana ni xiphemu xa nkoka, xa Yesu, eku kwetsimisiweni ka vito ra Yehovha hi Mfumo wa Yena wa Vumesiya. Ku nyikela ka vona vumbhoni ha Yesu a ku ri ku endlela ku kwetsimisa Yehovha. (Rhom. 16:25-27; Vafil. 2:9-11) Va tiyisise leswaku Yehovha a nga vulanga vunwa, hi leswi endzhaku ka malembe ya 4 000 eku heteleleni, a tiseke Mesiya kumbe Kreste loyi a a tshembisiwile khale!

Timbhoni ta Yehovha ta Vukreste eka lembe xidzana ro sungula na tona a a ti nyikiwe vutihlamuleri lebyi hlawulekeke—lebyi byi byarhiweke hi Vakreste va ntiyiso ni namuntlha.

‘Yanani Mi Ya Endla Vadyondzisiwa’

Endzhaku ka ku pfuxiwa ka Yesu eku feni, u humelerile eka vadyondzisiwa va yena lava a va hlengeletane entshaveni le Galeliya. Kwalaho, Yesu u andlale vutihlamuleri bya vona: “Hikokwalaho, yanani eka vamatiko hinkwavo, mi va endla vadyondzisiwa va mina, mi va khuvula hi vito ra Tatana, ni ra N’wana, ni ra Moya lowo Kwetsima, mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n’wina masiku hinkwawo, ku ko ku hela misava.” (Mt. 28:19, 20) Xiya leswi a a swi katseka eka ntirho lowu wo tika.

“Yanani,” ku vule Yesu. Eka vamani? Eka “vamatiko hikwavo.” Lexi a xi ri xileriso lexintshwa, ngopfu-ngopfu a xi ri ntlhontlho eka Vayuda lava nga vapfumeri. (Ringanisa Mintirho 10:9-16, 28.) Emahlweni ka siku ra Yesu, Vamatiko a a va amukeleka loko va ta eIsrayele hi ku tsakela vugandzeri bya ntiyiso. (1 Tih. 8:41-43) Eku sunguleni ka vutirheli byakwe, Yesu u byele vaapostola a ku “yanani, [mi ya chumayela, NW],” kambe eka “Vaisraele, lava lahlekeke kukota tinyimpfu” ntsena. (Mt. 10:1, 6, 7) Sweswi va lerisiwa ku ya eka vanhu va matiko hinkwawo. Hi xikongomelo xihi?

“Mi . . . endla vadyondzisiwa,” ku lerise Yesu. Ina, vadyondzisiwa vakwe va lerisiwe ku endla van’wana vadyondzisiwa. Xana leswi swi katsa yini? Mudyondzisiwa i mudyondzi, munhu la leteriwaka. I mulandzeri, ku nga ri mudyondzi ntsena. Mudyondzisiwa u amukela vulawuri bya Yesu ehandle hi ku n’wi yingisa ku nga ri endzeni ntsena hi ku pfumela eka yena. Hi ku ya hi Theological Dictionary of the New Testament, rito ra Xigriki leri hundzuluxeriweke va ku “mudyondzisiwa” (ma·the·tesʹ) “ri vula vukona bya vunghana bya munhu hi xiyexe lebyi vumbaka vutomi hinkwabyo bya loyi a hlamuseriwaka tanihi [mudyondzisiwa].”

Yesu u tlhandlekerile a ku: “Mi va dyondzisa ku hlayisa hinkwaswo leswi ndzi mi leriseke swona.” Leswaku a endla vunghana bya munhu hi xiyexe na Yesu, munhu u fanele a dyondzisiwa ku “hlayisa hinkwaswo leswi” Kreste a swi leriseke, ku katsa ni xileriso xa yena xo chumayela ‘mahungu lamanene ya mfumo.’ (Mt. 24:14) Hi ku ya hi mongo wa rito leri, a nga va mudyondzisiwa hi ndlela leyi ntsena. Naswona ku khuvuriwa lava va amukelaka dyondzo leyi ntsena ivi va va vadyondzisiwa va xiviri.

Yesu u va tiyisekisile a ku: “Ndzi na n’wina masiku hinkwawo, ku ko ku hela misava.” Dyondzo ya Yesu minkarhi hinkwayo ya faneleka, a yi heleriwi hi nkarhi. Hikwalaho, ni namuntlha, Vakreste, va ni vutihlamuleri byo endla van’wana vadyondzisiwa.

Xisweswo valandzeri va Kreste va byarhisiwe ntirho lowukulu, ku nga ku endla ntirho wo endla vadyondzisiwa exikarhi ka matiko hinkwawo. Kambe, leswaku va endla vadyondzisiwa va Kreste, a va fanele va nyikela vumbhoni malunghana ni vito ni Mfumo wa Yehovha, hikuva sweswo hi swona leswi Xikombiso xa vona, Yesu, a swi endleke. (Lk. 4:43; Yoh. 17:26) Lava va amukeleke dyondzo ya Kreste ivi va va vadyondzisiwa xisweswo va ve timbhoni ta Yehovha ta Vukreste. Ku va mbhoni ya Yehovha a swi nga ha ri mhaka yo tswariwa u ri yona—eka rixaka ra Vayuda—kambe a ku ri mhaka yo hlawula ku va yona. Lava va veke timbhoni va endle tano hi mhaka ya leswi a a va rhandza Yehovha naswona hi ku tiyimisela a a va lava ku titsongahatela vuhosi bya yena lebyikulu.—1 Yoh. 5:3.

Kambe xana timbhoni ta Yehovha ta Vukreste eka lembe xidzana ro sungula ti wu hetisisile ntirho wa tona wo va timbhoni ta Xikwembu ni ta Kreste ni ku ‘endla vanhu va matiko hinkwawo vadyondzisiwa’?

“Ku Ya Fika eMakun’wini Ya Misava”

Endzhakunyana ka ku nyika vadyondzisiwa va yena ntirho wa vona, Yesu u tlhelele evuakweni bya le tilweni bya Tata wakwe. (Mint. 1:9-11) Endzhaku ka masiku ya khume, hi siku ra Pentekosta ya 33 C.E., ntirho lowukulu wa ku endla vadyondzisiwa wu sungurile. Yesu u chululele moya wo kwetsima lowu tshembisiweke ehenhla ka vadyondzisiwa vakwe lava a va wu rindzerile. (Mint. 2:1-4; ringanisa Luka 24:49 na Mintirho 1:4, 5.) Leswi swi va nyike matimba yo chumayela hi Kreste la pfuxiweke ni ku vuya ka yena ematimbeni ya Mfumo enkarhini lowu taka.

Hi ku pfumelelana ni swiletelo swa Yesu, vadyondzisiwa volavo va lembe xidzana ro sungula va sungule ku nyikela ka vona vumbhoni hi Xikwembu na Kreste kwalaho eYerusalema. (Mint. 1:8) Muapostola Petro u rhangerile eNkhubyeni wa Pentekosta “a tiyisa vumbhoni bya yena” eka magidi ya Vayuda lava teke enkhubyeni va huma ematikweni yo tala. (Mint. 2:5-11, 40) Hi ku hatlisa nhlayo ya vavanuna lava pfumelaka ntsena a yi ri kwalomu ka 5 000. (Mint. 4:4; 6:7) Endzhakunyana, eka Vasamariya, Filipi u twarise “Evhangeli ya Mfumo wa Xikwembu, ni . . . vito ra Yesu Kreste.”—Mint. 8:12.

Kambe a a ka ha ri ni ntirho wo tala swinene lowu a wu fanele ku endliwa. Ku sukela hi 36 C.E., loko Korneliyo, Wamatiko la nga yimbangiki a hundzuka, mahungu lamanene ma sungule ku hangalakela eka vanhu lava nga riki Vayuda va matiko hinkwawo. (Mint., ndzima 10) Kahle-kahle, ma hangalake hi xihatla swinene lerova hi 60 C.E., muapostola Pawulo u swi kotile ku vula leswaku mahungu lamanene ma “twarisiwile eka swivumbiwa hinkwaswo leswi nge hansi ka tilo.” (Vakol. 1:23) Xisweswo, eku heleni ka lembe xidzana ro sungula, valandzeri va Yesu vo tshembeka a va endle vadyondzisiwa eMfun’weni hinkwawo wa Rhoma—Asia, Yuropa ni le Afrika!

Tanihi leswi timbhoni ta Yehovha ta Vukreste eka lembe xidzana ro sungula ti hetisiseke ntirho lowukulu ngopfu hi xinkarhana xexo, swivutiso swa tlakuka: Xana a a ti hleriwile? Loko swi ri tano, njhani?

Ku Hleriwa Ka Vandlha Ra Vukreste

Ku sukela enkarhini wa Muxe ku ya emahlweni, rixaka ra Vayuda a ri ri eka xiyimo lexi hlawulekeke—a a ri tirha tanihi vandlha ra Xikwembu. Vandlha rero a a ri hleriwe kahle swinene hi Xikwembu ehansi ka vakulukumba, tinhloko, vaavanyisi ni valanguteri. (Yox. 23:1, 2) Kambe rixaka ra Vayuda ri lahlekeriwe hi xikhundlha xa rona xo hlawuleka hi leswi ri aleke N’wana wa Yehovha. (Mt. 21:42, 43; 23:37, 38; Mint. 4:24-28) Hi Pentekosta ya 33 C.E., vandlha ra Xikwembu ra Vukreste ri sive vandlha ra Israyele.a Xana vandlha leri ra Vukreste a a ri hleriwe hi ndlela yihi?

Ana hi siku ra Pentekosta, vadyondzisiwa a a “va chivirikela ku dyondzisiwa hi vaapostola,” leswi kombisaka leswaku va sungule hi vun’we lebyi sekeriweke edyondzweni. Ku sukela hi siku rero, va hlengeletanile hi “mbilu yin’we.” (Mint. 2:42, 46) Loko ntirho wo endla vadyondzisiwa wu hangalaka, mavandlha ya vapfumeri ma sungule ku vumbiwa, ku sungula eYerusalema kutani ku landzela ehandle ka Yerusalema. (Mint. 8:1; 9:31; 11:19-21; 14:21-23) A va swi toloverile ku hlengeletana etindhawini ta mani na mani swin’we ni le makaya ya vanhu.—Mint. 19:8, 9; Rhom. 16:3, 5; Vakol. 4:15.

I yini lexi endleke leswaku vandlha leri ndlandlamukaka ra Vukreste ri nga vi mintlawa leyi nga yoxe ya mavandlha ya kwalaho lama tilawulaka? A a va hlangane ehansi ka Murhangeri un’we. Ku sukela eku sunguleni, Yesu Kreste a a ri Hosi ni Nhloko leyi hlawuriweke ya vandlha, naswona mavandlha hinkwawo a ma n’wi teka tano. (Mint. 2:34-36; Vaef. 1:22) A ri ematilweni, Kreste u kongomise timhaka ta vandlha rakwe emisaveni hi ku chivirika. Njhani? Hi ku tirhisa moya lowo kwetsima ni tintsumi, leswi a swi nyikiweke hi Yehovha.—Mint. 2:33; ringanisa Mintirho 5:19, 20; 8:26; 1 Petro 3:22.

Kreste a a ri na xo karhi xo xi tirhisa leswaku a hlayisa vun’we bya vandlha ra Vukreste—huvo leyi fumaka leyi vonakaka. Eku sunguleni, huvo leyi fumaka a a yi vumbiwa hi vaapostola va Yesu vo tshembeka. Endzhakunyana, yi katse vakulukumba van’wana va vandlha ra Yerusalema swin’we na muapostola Pawulo, hambi leswi a a nga tshami kona eYerusalema. Vandlha rin’wana ni rin’wana a ri byi xiya vulawuri bya huvo leyi ya vakulukumba naswona a ri kuma nkongomiso eka yona loko ku tlhekeka swiphiqo swa nhleleko kumbe swa dyondzo. (Mint. 2:42; 6:1-6; 8:14-17; 11:22; 15:1-31) Vuyelo byi ve byihi? “Hi mukhuva lowu, [mavandlha ma, NW] tiyisiwa eku pfumeleni, [ma] andza siku rin’wana ni rin’wana.”—Mint. 16:4, 5.

Huvo leyi fumaka, ehansi ka nkongomiso wa moya lowo kwetsima, a a yi langutela ku hlawuriwa ka valanguteri ni vapfuni, lava ku nga malandza ya vutirheli, leswaku va langutela vandlha rin’wana ni rin’wana. Lava a a va ri vavanuna lava va fikeleleke timfanelo ta moya leti a ti tirha eka mavandlha hinkwawo, ku nga ri mimpimanyeto ntsena leyi simekiweke hi vandlha rero. (1 Tim. 3:1-13; Tito 1:5-9; 1 Pet. 5:1-3) Valanguteri va khutaziwe ku landzelela Matsalwa ni ku titsongahatela nkongomiso wa moya lowo kwetsima. (Mint. 20:28; Tito 1:9) Hinkwavo evandlheni a va khutaziwa leswaku ‘va yingisa lava va rhangelaka.’ (Vahev. 13:17) Hi ndlela leyi vun’we a byi hlayisiwa evandlheni ra Vukreste hinkwaro ku nga ri eka rin’we ntsena.

Hambi leswi vavanuna van’wana a va ri eka swikhundla swa vutihlamuleri, a ku nga ri na ku hambana ka vafundhisi ni vanhu ntsena, exikarhi ka timbhoni ta Yehovha ta Vukreste ta lembe xidzana ro sungula. Hinkwavo a va ri vamakwavo; a ku ri na Murhangeri un’we, Kreste.—Mt. 23:8, 10.

Ti Voniwa Hi Mahanyelo Yo Kwetsima Ni Rirhandzu

Vumbhoni bya timbhoni ta Yehovha ta lembe xidzana ro sungula a byi nga hikeriwanga eka “marito lama humaka emilon’weni.” (Vahev. 13:15) Ku endla vadyondzisiwa a ku ri xiphemu xa vutomi hinkwabyo bya mbhoni leyi nga Mukreste. Hikwalaho, Vakreste volavo a va twarisanga ripfumelo ra vona ntsena, kambe ripfumelo ra vona ri cince vutomi bya vona. Va lahle vumunhu bya khale ni mintirho ya byona ya vudyoho ivi va ringeta ku tiambexa vumunhu lebyintshwa lebyi endliweke hi ku rhandza ka Xikwembu. (Vakol. 3:5-10) A a va ri na ntiyiso, ni ku tshembeka, naswona a a va tirha hi matimba ni ku kota ku byarha vutihlamuleri. (Vaef. 4:25, 28) A va basile emahanyelweni—vunghwavava a byi yirisiwile hi ku helela. Vudakwa ni ku gandzela swikwembu swa hava na swona a swi yirisiwile. (Vagal. 5:19-21) Kutani ke, swa twala leswi Vukreste byi tiviweke tanihi “Ndlela,” ntila kumbe ku hanya hi ku fambisana ni ku pfumela eka Yesu, ku nga ku landzelela swinene minkondzo yakwe.—Mint. 9:1, 2; 1 Pet. 2:21, 22.

Kambe, mfanelo yin’wana yi tlula hinkwato—rirhandzu. Vakreste vo sungula va kombise nkhathalelo wa rirhandzu eka swilaveko swa vapfumeri-kulobye. (Rhom. 15:26; Vagal. 2:10) A va rhandzana ku nga ri hi ndlela leyi va tirhandzaka ha yona kambe ku tlula leswi va tirhandzisaka xiswona. (Ringanisa Vafilipiya 2:25-30.) A a va tiyimiserile hambi ku ri ku felana. Kambe leswi a a swi nga hlamarisi. Xana Yesu a a nga tiyimiselanga ku va fela? (Yoh. 15:13; ringanisa Luka 6:40.) U swi kotile ku byela vadyondzisiwa vakwe a ku: “Ndzi mi nyika nawu lowuntshwa ndzi ri: Rhandzanani! Kukotisa leswi mina ndzi mi rhandzeke, rhandzanani na n’wina. Hinkwavo va ta tiva leswaku mi vadyondzisiwa va mina, loko mi rhandzana.” (Yoh. 13:34, 35) Kreste u lerise leswaku valandzeri vakwe va kombisa rirhandzu ro tano ra ku tinyiketa; naswona vadyondzisiwa va yena va lembe xidzana ro sungula va xi landzelerile swinene xileriso lexi.—Mt. 28:20.

‘A Mi Va Misava’

Leswaku va hetisisa vutihlamuleri bya vona byo endla vadyondzisiwa ni ku va timbhoni ta Xikwembu ni ta Kreste, Vakreste va lembe xidzana ro sungula a a va nga fanelanga va pfumelela ku hambukisiwa hi timhaka ta misava; a a va fanele va tsundzuka ntirho wa vona minkarhi hinkwayo. Yesu u endle tano hakunene. Eka Pilato u te: “Mfumo wa mina a hi wa misava leyi.” (Yoh. 18:36) Vadyondzisiwa va yena u va byele kahle a ku: ‘A mi xiphemu xa misava.’ (Yoh. 15:19) Kutani ke, tanihi Yesu, Vakreste vo sungula va tihambanisile ni misava; a va katsekanga eka tipolitiki kumbe tinyimpi. (Ringanisa Yohane 6:15.) Naswona a va phasiwanga hi tindlela ta misava—ku hlongorisa ka yona swilo leswi vonakaka ni ku katseka ka yona lokukulu eku titsakiseni.—Lk. 12:29-31; Rhom. 12:2; 1 Pet. 4:3, 4.

Hi mhaka ya leswi ti tihambaniseke ni misava, timbhoni ta Vukreste ta lembe xidzana ro sungula a ti ri vanhu vo hlawuleka. N’wamatimu E. G. Hardy ebukwini yakwe leyi nge Christianity and the Roman Government wa xiya: “Vakreste a va ri valuveri ni vatsendzeleki emisaveni; vuako bya vona a byi ri etilweni; mfumo lowu a a va wu languterile a wu nga ri wa misava leyi. Ku nga tsakeli timhaka ta tiko ku ve xivumbeko lexi xiyekaka eka Vukreste.”

Va Xaniseriwa Ku Lulama

Yesu u tsundzuxile a ku: “Nandza a hi nkulu eka n’wini wa yena. Loko va ndzi xanisile, na n’wina va ta mi xanisa.” (Yoh. 15:20) Loko a nga si fa emhandzini ya nxaniso, Yesu u tokote nxaniso lowukulu. (Mt. 26:67; 27:26-31, 38-44) Naswona hi ku pfumelelana ni xitsundzuxo xa yena, vadyondzisiwa va yena hi ku hatlisa va khomiwe hi ndlela yoleyo. (Mt. 10:22, 23) Kambe hikwalaho ka yini?

A swi tekanga nkarhi wo leha Vakreste vo sungula va nga si xiyiwa hi van’wana. A a va ri vanhu va mahanyelo lamanene ni vutshembeki. Va endle ntirho wa ku endla vadyondzisiwa erivaleni na hi ku gingiriteka; hikwalaho, magidi ya vanhu va tshike mafambiselo ya vukhongeri bya mavunwa ivi va va Vakreste. Va arile ku katseka etimhakeni ta misava. A va nga hlanganyeli eku gandzeleni ka mufumi. Kutani ke, a swi hlamarisi leswi hi ku hatlisa va veke vahlaseriwa va nxaniso wa tihanyi lowu hlohloteriweke hi varhangeri va vukhongeri bya mavunwa ni vafumi va politiki lava xisiweke. (Mint. 12:1-5; 13:45, 50; 14:1-7; 16:19-24) Kambe, lava a va ri switirho leswi nga vanhu swa muxanisi wa xiviri—“nyoka ya khale,” Sathana. (Nhlav. 12:9; ringanisa Nhlavutelo 12:12, 17.) Xikongomelo xakwe hi xihi? I ku herisa Vukreste ni ku nyikela ka byona vumbhoni hi xivindzi.

Kambe a wu kona nxaniso lowu wu swi koteke ku pfala milomu ya timbhoni ta Yehovha ta Vukreste ta lembe xidzana ro sungula! Va amukele ntirho wa vona wo chumayela lowu humaka eka Xikwembu ha Kreste, naswona a a va tiyimiserile ku yingisa Xikwembu ku ri na vanhu. (Mint. 4:19, 20, 29; 5:27-32) Va titshege hi matimba ya Yehovha, va tiyiseka leswaku u ta ti hakela timbhoni ta yena to tshembeka hi ku tiyisela ka tona.—Mt. 5:10; Rhom. 8:35-39; 15:5.

Matimu ma tiyisa leswaku nxaniso wa valawuri va Mfumo wa Rhoma wu tsandzekile ku herisa timbhoni ta Yehovha to sungula ta Vukreste. N’wamatimu wa Muyuda, Josephus, wa lembe xidzana ro sungula C.E. u ri: “Rixaka ra Vakreste, leri vitaniwaka tano hikwalaho ka [Yesu] ku fikela ni namuntlha [kwalomu ka 93 C.E.] a ri si nyamalala.”—Jewish Antiquities, XVIII, 64 (iii, 3).

Rhekhodo ya vumbhoni bya timbhoni ta Yehovha ta Vukreste eka lembe xidzana ro sungula xisweswo yi kombisa timfanelo to hlayanyana leti vonakaka kahle: Va hetisise ntirho wa vona wo nyikela vumbhoni malunghana ni Xikwembu na Kreste ni ku endla ntirho wo endla vadyondzisiwa hi xivindzi na hi ku gingiriteka; a va ri na nhlengeletano leyi eka yona hinkwavo a a va ri vamakwavo, ku ri hava ku hambana ka vafundhisi ni vanhu ntsena; a va khomelele eka mahanyelo lamanene naswona a a va rhandzana; a a va nga ri na mhaka ni tindlela kun’we ni timhaka ta misava; naswona a va xaniseriwa ku lulama.

Kambe, eku heleni ka lembe xidzana ro sungula, vandlha leri nga ni vun’we ra Vukreste ri xungetiwe hi khombo lerikulu, ra vusukumbele.

[Nhlamuselo ya le hansi]

[Marito lama tshahiweke exihlokweni lama nga eka tluka 26]

Vadyondzisiwa lavantshwa a va nga fanelanga va va vapfumeri ntsena, kambe a va fanele va va valandzeri lava yingisaka

[Marito lama tshahiweke exihlokweni lama nga eka tluka 27]

Ku va mbhoni ya Yehovha se a ku ri mhaka ya ku hlawula hayi ya ku velekiwa u ri yona

[Marito lama tshahiweke exihlokweni lama nga eka tluka 28]

Eku heleni ka lembe xidzana ro sungula, timbhoni ta Yehovha ta Vukreste a a ti endle vadyondzisiwa eAsia, Yuropa ni le Afrika!

[Marito lama tshahiweke exihlokweni lama nga eka tluka 29]

A ku nga ri na ku hambana ka vafundhisi ni vanhu ntsena exikarhi ka Vakreste va lembe xidzana ro sungula

[Bokisi leri nga eka tluka 27]

Vukreste Byi Hangalasiwa Hikwalaho Ka Ku Chumayela Hi Ku Hiseka

Hi ku susumetiwa hi ku hiseka loku nga sivelekiki, timbhoni ta Yehovha to sungula ta Vukreste ti chivirike swinene eku hangalaseni ka mahungu lamanene hi laha ti nga kotaka ha kona. Edward Gibbon, eka “The Decline and Fall of the Roman Empire,” u xiya leswaku “ku hiseka ka Vakreste . . . ku va fikelerile eka swifundzha hinkwaswo, kwalomu ka muti wun’wana ni wun’wana wa mfumo [wa Rhoma].” Profesa J. W. Thompson wa engetela eka “History of the Middle Ages” u ri: “Vukreste byi andze hi xihatla swinene emfun’weni wa Rhoma. Hi lembe ra 100 kumbexana xifundza xin’wana ni xin’wana lexi nga ekusuhi na Mediteraniya a xi ri na vaaki va Vakreste.”

[Bokisi leri nga eka tluka 30]

‘Ku Hlula Ka Vukreste’

Tibuku tin’wana ta Bibele ti tiyisa mahanyelo lamanene ni rirhandzu leswi a a swi fungha Vakreste vo sungula. N’wamatimu John Lord u te: “Ku hlula ka ntiyiso ka Vukreste ku vonake hi ku endla lava amukeleke tidyondzo ta byona va va vanhu lavanene. . . . Hi ni vumbhoni bya vutomi bya vona lebyi nga solekiki, ni bya mahanyelo ya vona yo pfumala xisandzu, ni bya ku va ka vona vaaki lavanene ni bya tintswalo ta vona ta Vukreste.”—“The Old Roman World.”

[Xifaniso lexi nga eka tluka 31]

Huvo leyi fumaka leyi lawulaka a a yi pfuna ku nyikela nkongomiso emavandlheni, kambe hinkwavo a a va langute Kreste tanihi Murhangeri wa vona

[Xifaniso lexi nga eka tluka 32]

Vakreste vo sungula a a va hlaseriwa hi nxaniso wa tihanyi