Ndzima 31

Ndlela Leyi Va Hlawuriwaka Ni Ku Kongomisiwa Ha Yona Hi Xikwembu

“SWA twala leswaku a ku fanele ku va ni vukhongeri byin’we bya ntiyiso. Leswi swi fambisana ni ntiyiso wa leswaku Xikwembu xa ntiyiso, ‘a hi Xikwembu xa mpfilumpfilu, kambe i xa ku rhula.’ (1 Vakorinto 14:33) Bibele yi ri entiyisweni ku ni ‘ku pfumela kun’we ntsena.’ (Vaefesa 4:5) Kutani ke, i vamani lava vumbaka huvo ya vagandzeri va ntiyiso namuntlha ke? A hi kanakani ku vula leswaku i Timbhoni ta Yehovha,” ku vula buku leyi nge U Nga Hanya Hi Masiku aParadeyisini eMisaveni.a

Van’wana va nga vutisa: ‘Mi nga tiyiseka njhani leswaku mi ni vukhongeri bya ntiyiso? A mi na wona matimba lama nga riki ya ntumbuluko—tanihi tinyiko ta mahlori. Naswona hi ku famba ka malembe xana a swi lavanga leswaku mi ololoxa mavonelo ni tidyondzo ta n’wina? Kutani, mi nga tiyiseka njhani leswaku mi kongomisiwa hi Xikwembu?’

Ku hlamula swivutiso leswi, swa pfuna ku rhanga hi languta ndlela leyi ha yona Yehovha a hlawuleke ni ku kongomisa vanhu vakwe eminkarhini ya khale.

Ku Hlawula Ka Xikwembu eMinkarhini Ya Bibele

Eka lembe xidzana ra vu-16 B.C.E., Yehovha u hlengelete Vaisrayele eNtshaveni ya Sinayi, a va rhamba leswaku va va vanhu vakwe lava hlawuriweke. Hambi swi ri tano, Yehovha u rhange hi ku va byela leswaku a ku ri ni swilaveko leswi a va fanele va swi fikelela. U va byele leswi: “Loko mi yingisa rito ra mina, . . . mi ta v̌a rifuwo ra mina kunene.” (Eks. 19:5) Hi ku tirhisa Muxe, Yehovha u veke swilaveko erivaleni, ivi endzhaku ka sweswo vanhu va hlamula va ku: “E timhaka hikwato le’ti v̌uriweke i Yehova, hi ta ti endla.” Kutani Yehovha u endle ntwanano na Israyele kutani a va nyika Nawu.—Eks. 24:3-8, 12.

Ku hlawuriwa hi Xikwembu—i lunghelo leri chavekaka hakunene! Kambe lunghelo rero ri nyike Israyele vutihlamuleri bya ku yingiserisisa Nawu wa Xikwembu. Ku tsandzeka ku wu yingisa a ku ta vanga leswaku va lahliwa hinkwavo ka vona. Leswaku a nghenisa xichavo lexikulu eka vona leswaku va n’wi yingisa, Yehovha u endle swikombiso swo hlamarisa swa matimba lama tlulaka ya munhu—“e ku pfuma ku v̌a kona ni ku hatima,” ni “nṭhav̌a hikwayo a yi ṭekaṭeka ngopfu.” (Eks. 19:9, 16-18; 20:18, 20) Emalembeni ya kwalomu ka 1 500 lama landzeleke, Vaisrayele a va ri exiyin’weni xo hlawuleka—a va ri vanhu va Xikwembu lava hlawuriweke.

Hambi swi ri tano, eka lembe xidzana ro sungula C.E., xiyimo xi cince hi ku helela. Israyele ri lahlekeriwe hi lunghelo ra rona, Yehovha u ri cukumetile hikwalaho ko ala N’wana wakwe. (Mt. 21:43; 23:37, 38; Mint. 4:24-28) Kutani Yehovha u vumbe vandlha ra Vukreste ro sungula, leri sekeriweke eka Kreste. Hi Pentekosta ya 33 C.E., Yehovha u chululele moya wakwe lowo kwetsima eka valandzeri va Yesu le Yerusalema, a va endla “rixaka leri hlawuriweke, . . . tiko leri hlawulekeke.” (1 Pet. 2:9; Mint. 2:1-4; Ef. 2:19, 20) Va ve “vahlawuriwa va [Xikwembu].”—Kol. 3:12.

Ku va xirho xa tiko rero leri hlawuriweke a ku ri ni swipimelo. Yehovha u veke swilaveko leswi tiyeke swa mahanyelo ni swa moya leswi a swi fanele ku fikeleriwa. (Gal. 5:19-24) Lava va fikeleleke swilaveko sweswo a va tiendla va fanelekela ku hlawuriwa hi yena. Hambi swi ri tano, loko se Xikwembu xi va hlawurile a swi ri swa nkoka leswaku va tshama va yingisa milawu ya xona. Lava ‘va xi yingisaka tanihi mufumi’ hi vona ntsena lava a va ta hambeta va amukela moya wa xona lowo kwetsima. (Mint. 5:32) Lava a va tsandzeka ku xi yingisa a va ri ekhombyeni ro susiwa evandlheni ni ku lahlekeriwa hi ndzhaka ya vona eMfun’weni wa Xikwembu.—1 Kor. 5:11-13; 6:9, 10.

Kambe van’wana a va ta swi tivisa ku yini leswaku Xikwembu xi hlawule vandlha leriya ra Vukreste ro sungula leswaku ri pfala Israyele tanihi “vandlha ra Xikwembu”? (Mint. 20:28, NW) Ku hlawula ka Xikwembu a ku ri erivaleni. Endzhaku ka rifu ra Yesu, xi nyike swirho swa vandlha ra Vukreste ro sungula tinyiko ta mahlori, ku komba leswaku se a swi ri vahlawuriwa va Xikwembu.—Hev. 2:3, 4.

Xana swikombiso swa masingita, kumbe mahlori, a swi laveka nkarhi hinkwawo leswaku ku voniwa lava hlawuriweke ni ku kongomisiwa hi Xikwembu eminkarhini ya Bibele? Doo. Mintirho ya mahlori a yi nga endleki nkarhi hinkwawo ematin’wini ya Bibele hinkwawo. Vanhu vo tala lava hanyeke eminkarhini ya Bibele a va vonanga ni hlori na rin’we. Mahlori yo tala lama tsariweke eBibeleni ma endleke emasikwini ya Muxe na Yoxuwa (lembe xidzana ra vu-16 ni ra vu-15 B.C.E.), Eliya na Elixa (lembe xidzana ra vu-10 ni ra vu-9 B.C.E.), na Yesu ni vaapostola vakwe (lembe xidzana ro sungula C.E.). Vanhu van’wana vo tshembeka lava hlawuriweke hi Xikwembu hikwalaho ka swikongomelo swo karhi, vo tanihi Abrahama na Davhida, va vone kumbe ku kombisiwa matimba ya Xikwembu, kambe a byi kona vumbhoni bya leswaku va endle mahlori hi voxe. (Gen. 18:14; 19:27-29; 21:1-3; ringanisa 2 Samuwele 6:21; Nehemiya 9:7.) Malunghana ni tinyiko ta mahlori leti a ti ri kona eka lembe xidzana ro sungula, Bibele yi vhumbhile leswaku “[ti] ta hundza.” (1 Kor. 13:8) Naswona leswi swi humelele loko ku hundza vaapostola vo hetelela va 12 ni lava va amukeleke tinyiko ta mahlori eka vona.—Ringanisa Mintirho 8:14-20.

Ku Vuriwa Yini Hi Ku Hlawula Ka Xikwembu Namuntlha?

Endzhaku ka lembe xidzana ro sungula, vugwinehi lebyi vhumbhiweke byi andze ngopfu. (Mint. 20:29, 30; 2 Tes. 2:7-12) Hi malembe xidzana yo tala rivoni ra Vukreste bya ntiyiso a ri pfurhela ehansi. (Ringanisa Matewu 5:14-16.) Kambe, exifanisweni Yesu u kombe leswaku ‘emakun’wini ya mafambiselo lawa ya swilo,’ ku ta va ni ku hambana loku vonakaka kahle exikarhi ka “maxalana,” (Vakreste va ntiyiso) ni “mfava,” (Vakreste va mavunwa). Maxalana, kumbe “vahlawuriwa,” a va ta hlengeletiwa eka vandlha rin’we ra Vukreste bya ntiyiso, tanihi le ka lembe xidzana ro sungula. (Mt. 13:24-30, 36-43; 24:31) Nakambe Yesu u hlamusele swirho leswi totiweke swa vandlha rero tanihi “nandza la tshembekaka, wo tlhariha” a tlhela a komba leswaku enkarhini wa makumu, swi ta ava swakudya swa moya. (Mt. 24:3, 45-47) Nandza yoloye wo tshembeka a a ta joyiniwa hi “ntshungu lowukulu” wa vagandzeri va ntiyiso lava humaka ematikweni hinkwawo.—Nhlav. 7:9, 10; ringanisa Mikiya 4:1-4.

Xana vagandzeri lava va ntiyiso a va ta voniwa njhani enkarhini wa makumu? Xana a va ta va vanene nkarhi hinkwawo, xana ku anakanya ka vona a ku ta pfumala xihoxo? Vaapostola va Yesu a va ha fanela ku lulamisiwa. (Lk. 22:24-27; Gal. 2:11-14) Ku kota vaapostola, valandzeri va ntiyiso va Kreste esikwini ra hina va fanele va titsongahata, va tiyimisela ku amukela ndzayo ni ku endla mindzulamiso loko swi fanerile, leswaku mianakanyo ya vona yi twanana swinene ni ya Xikwembu.—1 Pet. 5:5, 6.

Loko misava yi nghene emasikwini ya makumu hi 1914, i ntlawa wihi lowu tikombeke wu ri yona nhlengeletano ya Vukreste bya ntiyiso? Vujagana a byi ri ni tikereke to tala leti a ti vula leswaku ti yimelela Kreste. Kambe xivutiso hi lexi: Hi yihi exikarhi ka tona leyi a yi fikelela swilaveko swa Matsalwa?

Nhlengeletano yin’we ya ntiyiso ya Vukreste yi fanele yi va nhlengeletano leyi namarhelaka Bibele tanihi xihlovo xa yona lexikulu, ku nga ri leyi yi tshahaka matsalwa hi ku hlawula-hlawula kambe yi ala laman’wana loko ma nga twanani ni mianakanyo ya yona leyintshwa. (Yoh. 17:17; 2 Tim. 3:16, 17) Yi fanele yi va nhlengeletano leyi swirho swa yona—ku nga ri swin’wana kambe hinkwaswo—swi nga riki xiphemu xa misava hakunene, swi kotisa Kreste. Kutani va nga nghenelela njhani eka politiki hi laha tikereke ta Vujagana ti endleke ha kona hi ku phindha-phindha? (Yoh. 15:19; 17:16) Nhlengeletano ya Vakreste va ntiyiso yi fanele ku veka vumbhoni ehenhleni ka vito ra Xikwembu, Yehovha, ni ku endla ntirho lowu Yesu a wu leriseke—ku chumayela mahungu lamanene ya Mfumo wa Xikwembu. Ku kota vandlha ra lembe xidzana ro sungula, swirho swa yona hinkwaswo ku nga ri swin’wana swa swona ntsena, swi fanele swi va vavuri va evhangeli lava hisekaka. (Esa. 43:10-12; Mt. 24:14; 28:19, 20; Kol. 3:23) Vagandzeri va ntiyiso nakambe a va ta tiviwa hi rirhandzu ra vona ro tikarhatela van’wana, rirhandzu leri a ri ta hlula swihinga swa rixaka ni swa vutiko kutani ri va hlanganisa eka vumakwerhu bya misava hinkwayo. Rirhandzu ro tano a ri nga ta kombiwa eka timhaka to karhi ntsena, kambe ni hi ndlela leyi a yi ta va yi va hlawula hakunene tanihi nhlengeletano.—Yoh. 13:34, 35.

Hakunene, loko nkarhi wa makumu wu sungurile hi 1914, ku hava ni yin’we kereke ya Vujagana leyi a yi fikelela mimpimanyeto leyi ya Bibele ya vandlha rin’we ra Vukreste bya ntiyiso. Kambe, ku vuriwa yini hi Swichudeni swa Bibele, hi laha Timbhoni ta Yehovha a ti vitaniwa ha kona enkarhini wolowo?

Ku Lavisisa Ntiyiso Loku Vekaka Mihandzu

Loko a ha ri jaha, C. T. Russell u endle xiboho xa leswaku Bibele a yi yimeriwanga kahle hi Vujagana. Nakambe a vula leswaku a ku ri nkarhi wa leswaku Rito ra Xikwembu ri twisisiwa ni leswaku lava va dyondzaka Bibele hakunene, va yi tirhisa evuton’wini bya vona, va ta kuma ku twisisa.

Rungula ra vutomi bya Russell, leri humesiweke endzhakunyana ka ku fa kakwe, ri te: “A a nga ri musunguri wa vukhongeri lebyintshwa naswona a nga swi vulanga sweswo. U pfuxe ntiyiso lowukulu lowu dyondzisiweke hi Yesu ni Vaapostola vakwe, a tlhela a humesa ku vonakala ka lembe xidzana ro sungula eka wona. A nga vulanga leswaku u kume ku hlavuteriwa ko hlawuleka loku humaka eka Xikwembu, kambe u vule leswaku a ku ri nkarhi lowu faneleke wa Xikwembu leswaku Bibele yi twisisiwa; ni leswaku tanihi leswi a a tinyiketele eka Xikwembu hi ku helela ni le ntirhweni wa xona, u pfumeleriwe ku yi twisisa. Hikwalaho ka leswi a tinyiketeleke ku kurisa mihandzu ni tintswalo ta Moya lowo Kwetsima, xitshembiso xa Hosi xi hetisekile eka yena: ‘Hikuva loko mi ri ni swilo leswi, ni loko swi mi talela swi andza, swi ta endla leswaku mi nga phyami kumbe ku pfumala mihandzu, kutani swi ta mi fikisa eku tiveni loku hetisekeke ka Hosi ya hina Yesu Kriste.’—2 Petro 1:5-8.”—Xihondzo xo Rindza (xa Xinghezi) December 1, 1916, tl. 356.

Ku lavisisa ku twisisa Matsalwa ka C. T. Russell swin’we ni vanghana vakwe a ku veka mihandzu. Tanihi varhandzi va ntiyiso a va tshemba leswaku Bibele i Rito ra Xikwembu leri huhuteriweke. (2 Tim. 3:16, 17) Va papalate mianakanyo ya hundzuluko ya Darwin ni mavonelo lama dlayaka ripfumelo ya vaxopeleri lavakulu va Bibele. Hi ku amukela Matsalwa tanihi buku leyi tlakukeke, va ale tidyondzo leti nga riki ta matsalwa to tanihi Vunharhu-un’we, ku nga fi ka moya-xiviri ni ku xanisiwa hi laha ku nga heriki—tidyondzo leti sunguleke evuhedenini. Exikarhi ka “mintiyiso leyikulu” leyi va yi amukeleke a ku ri leswaku Yehovha i Muvumbi wa swilo hinkwaswo, leswaku Yesu Kreste i N’wana wa Xikwembu, loyi a nyikeleke vutomi byakwe tanihi nkutsulo wa van’wana ni leswaku loko a vuya Yesu u ta va kona hi ndlela leyi nga vonakiki tanihi xivumbiwa xa moya. (Mt. 20:28; Yoh. 3:16; 14:19; Nhlav. 4:11) Va tlhele va swi twisisa kahle leswaku munhu i moya-xiviri lowu faka.—Gen. 2:7; Ezek. 18:20.

A hi swona leswaku Swichudeni swa Bibele kun’we na Russell swi paluxe mintiyiso leyi hinkwayo; yo tala yi twisisiwe hi vanhu lavanene lava tivulaka Vakreste, laha van’wana va vona va khomeleleke eka ripfumelo ra vona loko tidyondzo teto ti nga tiviwi. Kambe xana vanhu volavo va fambisane ni swilaveko hinkwaswo swa Matsalwa swa vugandzeri bya ntiyiso? Hi xikombiso, xana a va nga ri xiphemu xa misava hakunene, hi laha Yesu a vuleke ha kona malunghana ni valandzeri vakwe?

Ku engetela eka langutelo ra swona hi Bibele, xana Swichudeni swa Bibele swo sungula leswi a swi hlanganyela na Russell swi tihlawule njhani swi ri leswi hambaneke? Entiyisweni va tihlawule hi ku hiseka loku va ku kombiseke hi ku avelana ni van’wana hi leswi va swi pfumelaka, va ri karhi va kandziyisa swinene ku huwelela vito ni Mfumo wa Xikwembu. Hambi leswi a va nga talanga, hi ku hatlisa va fikelele makume ya matiko hi mahungu lamanene. Xana a va nga ri xiphemu xa misava hi laha valandzeri va Kreste a va ri ha kona? Hi tindlela to karhi, a va nga ri xiphemu xa misava. Kambe ku xalamukela ka vona vutihlamuleri lebyi katsekaka eka leswi ku engetelekile ku sukela hi Nyimpiu yo Sungula ya Misava, ku fikela loko se byi ve mfungho wa Timbhoni ta Yehovha. A swi fanelanga ku honisiwa leswaku loko mintlawa leyin’wana ya vukhongeri yi ri karhi yi twarisa Ntwanano wa Matiko, ivi endzhaku yi twarisa Nhlangano wa Matiko, Timbhoni ta Yehovha ti huwelele Mfumo wa Xikwembu—ku nga ri nhlengeletano yo karhi ya vanhu—tanihi ntshembo wu ri woxe wa vanhu.

Kambe xana tidyondzo tin’wana ta Timbhoni ta Yehovha a ti ololoxiwanga hi ku famba ka malembe? Loko va hlawuriwile hakunene ni ku kongomisiwa hi Xikwembu ni loko tidyondzo ta vona ti seketeriwa hi matimba ya Matsalwa, hikwalaho ka yini ku laveke ku cinca koloko?

Ndlela Leyi Yehovha A Kongomisaka Ha Yona Vanhu Vakwe

Lava va vumbaka nhlengeletano yin’we ya Vukreste bya ntiyiso namuntlha a va hlavuteriwi hi tintsumi kumbe ku huhuteriwa hi Xikwembu. Kambe va ni Matsalwa yo Kwetsima lama huhuteriweke, lawa ma nga ni tinhlavutelo ta mianakanyo ni ku rhandza ka Xikwembu. Tanihi nhlengeletano ni hi munhu ha un’we-un’we, va fanele va amukela Bibele tanihi ntiyiso wa Xikwembu, va yi dyondza hi vukheta, va tlhela va tirhisa leswi va swi dyondzaka. (1 Tes. 2:13) Kambe va swi kotisa ku yini ku twisisa Rito ra Xikwembu hi ku kongoma?

Bibele hi yoxe yi ri: “Ku hlamusela a ku humi ka Šikwembu šana?” (Gen. 40:8) Loko va dyondza Matsalwa kumbe va kuma ndzimana yin’wana yi nonon’hwa ku yi twisisa, va fanele va lavisisa leswaku va kuma tindzimana tin’wana leti huhuteriweke leti hlamuselaka mhaka ya kona. Xisweswo va tshiketa Bibele yi tihlamusela, kutani hi ku endla tano va lwela ku twisisa “ntila” wa ntiyiso lowu andlariweke eRitweni ra Xikwembu. (2 Tim. 1:13) Yehovha wa va kongomisa kumbe ku va yisa eku twisiseni koloko hi moya wakwe lowo kwetsima. Kambe leswaku va kuma nkongomiso wa moya wolowo, va fanele va hlakulela mihandzu ya wona, va nga wu xumbadzi kumbe ku lwisana na wona, ni ku yingisa nkongomiso wa wona. (Gal. 5:22, 23, 25; Ef. 4:30) Ku tlula kwalaho, hi ku hiseka eku tirhiseni ka leswi va swi dyondzaka, va hambeta va aka ripfumelo ra vona, tanihi xisekelo xo kuma ku twisisa lokunene, loku baseke ka ndlela leyi va faneleke va endla ku rhandza ka Xikwembu ha yona emisaveni leyi va nga riki xiphemu xa yona.—Lk. 17:5; Flp. 1:9, 10.

Yehovha nkarhi hinkwawo u kongomise vanhu vakwe eku twisiseni lokunene ka ku rhandza kakwe. (Ps. 43:3) Kahle-kahle, ndlela leyi a va kongomiseke ha yona yi nga hlamuserisiwa xileswi: Loko munhu a tshame nkarhi wo leha ekamareni ra munyama, xana a swi antswi leswaku a humeseriwa eku vonakaleni hakatsongo-tsongo? Yehovha u humesele vanhu vakwe eku vonakaleni ka ntiyiso hi mukhuva lowu fanaka; u va voningele hakatsongo-tsongo. (Ringanisa Yohane 16:12, 13.) Swi endleke hi laha xivuriso xi vulaka ha kona: “Ndlela ya la’v̌o lulama yi kotisa ku v̌onakala, ku hatima ka kona ku engeteleka ku fikela nhlekanhi lo’wukulu.”—Swiv. 4:18.

Ku tirhisana ka Yehovha ni malandza yakwe lama hlawuriweke eminkarhini ya Bibele ku tiyisekisa leswaku ku twisisa loku kongomeke ka ku rhandza kakwe ni swikongomelo swakwe hakanyingi ku ta hakatsongo-tsongo. Hi xikombiso, Abrahama a nga yi twisisanga hi ku helela ndlela leyi xikongomelo xa Yehovha malunghana ni ‘mbewu’ a xi ta hetiseka ha yona. (Gen. 12:1-3, 7; 15:2-4; ringanisa Vaheveru 11:8.) Daniyele a nga byi twisisanga vuyelo byo hetelela bya vuprofeta lebyi a byi tsaleke. (Dan. 12:8, 9) Yesu loko a ha ri la misaveni, u pfumerile leswaku a nga ri tivi siku ni nkarhi lowu mafambiselo lawa ya swilo ma nga ta hela ha wona. (Mt. 24:36) Eku sunguleni vaapostola a va nga swi twisisi leswaku Mfumo wa Yesu a wu ta va wa le tilweni, leswaku a wu nga ta simekiwa eka lembe xidzana ro sungula ni leswaku ni Vamatiko va nga wu kuma.—Lk. 19:11; Mint. 1:6, 7; 10:9-16, 34, 35; 2 Tim. 4:18; Nhlav. 5:9, 10.

A swi fanelanga swi hi hlamarisa leswi ni le minkarhini ya hina Yehovha hakanyingi a kongomiseke vanhu vakwe tanihi nhlengeletano leyi kulaka, a va voningela ntiyiso wa Bibele hakatsongo-tsongo. Ntiyiso wona a wu hundzuki. Ntiyiso wu tshama wu ri ntiyiso. Ku rhandza ka Yehovha ni xikongomelo xakwe, hi laha swi andlariweke ha kona eBibeleni, swi tshamisa xisweswo. (Esa. 46:10) Kambe ku twisisa ka vona ntiyiso lowu ku ya ku engeteleka hakatsongo-tsongo “hi nkarhi wa kona,” nkarhi wa Yehovha lowu faneleke. (Mt. 24:45; ringanisa Daniyele 12:4, 9.) Minkarhi yin’wana, hikwalaho ka swihoxo swa vanhu kumbe ku hisekela etlhelweni, mavonelo ya vona ma nga lava ku lulamisiwa.

Hi xikombiso, eminkarhini yo hambana-hambana ematin’wini ya manguva lawa ya Timbhoni ta Yehovha, ku hiseka ni ku chivirika ka tona eku lweleni ka vuhosi bya Yehovha ku vangele ku langutela swilo leswi nkarhi wa swona a wu nga si fika, malunghana ni nkarhi lowu ku hela ka mafambiselo lawa yo biha ya Sathana wu nga ta ta ha wona. (Ezek. 38:21-23) Kambe Yehovha a nga wu paluxanga ka ha ri emahlweni nkarhi wa kona. (Mint. 1:7) Hikwalaho, vanhu va Yehovha a va fanele ku lulamisa mavonelo ya vona emhakeni leyi.

Ku lulamisa koloko ka mavonelo a ku nga vuli swona leswaku xikongomelo xa Xikwembu xi hundzukile. Naswona a ku kombi swona leswaku ku hela ka mafambiselo lawa ku le kule swinene. Ku hambana ni sweswo, ku hetiseka ka vuprofeta bya Bibele mayelana ni ‘ku hela ka mafambiselo ya swilo’ ku tiyisekisa leswaku makumu ma tshinele. (Mt. 24:3) Kambe, xana mhaka ya leswaku Timbhoni ta Yehovha ti langutela makumu hi ku hatlisa yi vula leswaku a ti kongomisiwi hi Xikwembu? Swi fana ni leswi xivutiso xa vadyondzisiwa malunghana ni ku tshinela ka Mfumo esikwini ra vona xi nga vulangiki swona leswaku a va nga hlawuriwanga ni ku kongomisiwa hi Xikwembu!—Mint. 1:6; ringanisa Mintirho 2:47; 6:7.

Kutani hikwalaho ka yini Timbhoni ta Yehovha ti tiyiseka swinene leswaku ti ni vukhongeri bya ntiyiso? Hikuva va pfumela ni ku amukela leswi Bibele yi swi vulaka malunghana ni swilo leswi kombaka vugandzeri bya ntiyiso. Matimu ya vona ya manguva lawa, hi laha ma hlamuseriweke ha kona eka tindzima to sungula ta buku leyi, ma komba leswaku, a ko va vanhu vo karhi ntsena, kambe i nhlengeletano hinkwayo yi fikelelaka swilaveko leswi: Hi ku tshembeka va seketela Bibele tanihi Rito ra Xikwembu ro kwetsima ra ntiyiso (Yoh. 17:17); va fambela ekule ni timhaka ta misava (Yak. 1:27; 4:4); va veka vumbhoni ehenhleni ka vito ra Xikwembu, Yehovha, ni ku twarisa Mfumo wa Xikwembu tanihi ntshembo wa vanhu wa ntiyiso (Mt. 6:9; 24:14; Yoh. 17:26); naswona va rhandzana hi mbilu hinkwayo.—Yoh. 13:34, 35.

Hambi swi ri tano, hikwalaho ka yini rirhandzu ri ri mfungho lowu xiyekaka wa vagandzeri va Xikwembu xa ntiyiso? I rirhandzu ra muxaka muni leri ri funghaka Vakreste va ntiyiso?

[Nhlamuselo ya le hansi]

[Marito lama tshahiweke exihlokweni lama nga eka tluka 705]

Loko va kala va hlawuriwa hi Xikwembu, a swi fanela leswaku va tshama va ri karhi va yingisa milawu ya xona

[Marito lama tshahiweke exihlokweni lama nga eka tluka 706]

Xana vagandzeri lava va ntiyiso a va ta voniwa njhani enkarhini wa makumu?

[Marito lama tshahiweke exihlokweni lama nga eka tluka 707]

“A nga vulanga leswaku u kume ku hlavuteriwa ko hlawuleka loku humaka eka Xikwembu”

[Marito lama tshahiweke exihlokweni lama nga eka tluka 708]

Va tshike Bibele yi tihlamusela hi yoxe

[Marito lama tshahiweke exihlokweni lama nga eka tluka 709]

Yehovha u rhangele vanhu va yena tanihi nhlengeletano leyi yaka emahlweni, a va voningela ntiyiso wa Bibele hakatsongo-tsongo