Ndzima 14
Xana I Vulawuri Bya Mani Lebyi U Faneleke Ku Byi Xixima?
1, 2. Xana tinxaka hinkwato ta vulawuri ti bihile? Hlamusela.
“VULAWURI” i rito leri nyangatsaka eka vanhu vo tala. Leswi swa twala, hikuva vulawuri hakanyingi a byi tirhisiwi kahle—entirhweni, endyangwini ni le ka tihulumendhe. Bibele yi vula hi laha ku tiyeke yi ku: ‘Munhu u fume henhla ka munhu un’wana ku n’wi vavisa.’ (Eklesiasta 8:9) Ina, vo tala va fume van’wana hi mukhuva wa tihanyi ni wa ku tivona.
2 Kambe vulawuri byin’wana a byi bihanga. Hi xikombiso, ku nga ha vuriwa leswaku miri wa hi lawula. Wu hi “lerisa” leswaku hi hefemula, hi dya, hi nwa ni ku etlela. Xana sweswo swa karhata? E-e. Ku yingisa swilaveko leswi swi pfuna hina. Hambi leswi ku yingisa swilaveko swa miri wa hina swi tiendlekelaka, ku ni tindlela tin’wana ta vulawuri leti lavaka leswaku hi byi yingisa hi ku swi rhandza. Xiya swikombiso swin’wana.
VULAWURI LEBYI TLAKUKEKE
3. Ha yini swi fanerile leswi Yehovha a vitaniwaka ‘Hosi Leyikulu’?
3 Ku tlula minkarhi ya 300 eBibeleni, Yehovha u vitaniwa ‘Hosi Leyikulu.’ Hosi leyikulu, hi leyi yi nga ni vulawuri lebyi tlakukeke. Xana i yini lexi endlaka Yehovha a faneriwa hi xikhundlha lexi? Nhlavutelo 4:11 ya hlamula: “We Hosi, Xikwembu xa hina, u lulameriwile hi ku amukela ku twala, ni ku dzunisiwa, ni matimba, hikuva hi wena Muendli wa swilo hinkwaswo, kutani hi ku rhandza ka wena swi tumbulukile, swi kuma ku hanya.”
4. Xana Yehovha u hlawula ku tirhisa vulawuri byakwe hi ndlela yihi?
4 Tanihi leswi a nga Muvumbi wa hina, Yehovha u ni mfanelo ya ku tirhisa vulawuri byakwe hi laha a rhandzaka ha kona. Leswi swi nga ha tikomba swi chavisa, ngopfu-ngopfu loko hi lemuka leswaku Xikwembu xi ni “ntamu lo’wukulu.” Xi vitaniwa “Šikwembu ša matimba hikwawo”—rito leri hi Xiheveru ri kombisaka matimba lamakulu ngopfu. (Esaya 40:26; Genesa 17:1) Kambe, Yehovha u kombisa matimba yakwe hi ndlela leyinene, hikuva mfanelo yakwe leyikulu i rirhandzu.—1 Yohane 4:16.
5. Ha yini swi nga tiki ku titsongahatela vulawuri bya Yehovha?
5 Hambi leswi Yehovha a tsundzuxeke leswaku a a ta xupula vadyohi lava nga hundzukiki, Muxe a a n’wi tiva swinene tanihi ‘Xikwembu xa ntiyiso, Xikwembu xo tshembeka, lexi hlayisaka ntwanano ni tintswalo eka lava va xi rhandzaka ni lava hlayisaka milawu ya xona.’ (Deteronoma 7:9) Anakanya hi sweswo! Mulawuri la Tlakukeke wa vuako hinkwabyo a nga hi sindzisi leswaku hi n’wi tirhela. Ematshan’weni ya sweswo, hi tshinela eka yena hi ku kokiwa hi rirhandzu rakwe. (Varhoma 2:4; 5:8) Ku titsongahatela vulawuri bya Yehovha swi tlhela swi tsakisa, hikuva milawu ya yena nkarhi hinkwawo yi pfuna hina.—Pisalema 19:7, 8.
6. Xana mhaka ya vulawuri yi tlhekeke njhani entangeni wa Edeni, naswona vuyelo byi ve byihi?
6 Vatswari va hina vo sungula va ale vuhosi bya Xikwembu. A va lava ku tihlawulela leswi nga swinene ni leswi biheke. (Genesa 3:4-6) Hikwalaho, va hlongoriwile ekaya ra vona ra Paradeyisi. Endzhaku ka sweswo Yehovha u pfumelele vanhu leswaku va endla vumbiwa bya vulawuri lebyi a byi ta endla leswaku va hanya va ri lava hlelekeke, hambi va nga hetisekanga. Xana hi byihi byin’wana bya vulawuri lebyi, naswona xana Xikwembu xi langutela leswaku hi byi yingisa ku fikela kwihi?
“VALAWURI LAVA TLAKUKEKE”
7. Xana “valawuri lava tlakukeke” i vamani, naswona xikhundlha xa vona xi yelana njhani ni vulawuri bya Xikwembu?
7 Muapostola Pawulo u tsarile: “Munhu un’wana ni un’wana a a tiveke ehansi ka [valawuri lava tlakukeke, NW], hikuva a ku na vuhosi lebyi nga humiki eka Xikwembu.” Xana “valawuri lava tlakukeke” i vamani? Marito ya Pawulo eka tindzimana leti landzelaka ma kombisa leswaku i valawuri va tihulumendhe ta vanhu. (Varhoma 13:1-7; Tito 3:1) Yehovha a hi yena a sunguleke valawuri va tihulumendhe ta vanhu, kambe va pfumeleriwe hi yena leswaku va va kona. Xisweswo Pawulo u tsarile: ‘Valawuri lava nga kona, va vekiwile hi Xikwembu.’ Xana leswi swi kombisa yini hi vulawuri byo tano bya laha misaveni? Swi kombisa leswaku byi le hansi kumbe a byi ringani, ni vulawuri bya Xikwembu. (Yohane 19:10, 11) Hikwalaho, loko ku ri ni ku lwisana exikarhi ka nawu wa munhu ni nawu wa Xikwembu, Vakreste va fanele va kongomisiwa hi ripfalo ra vona leri leteriweke hi Bibele. Va “fanele ku yingisa Xikwembu ku tlula vanhu.”—Mintirho 5:29.
8. Xana u vuyeriwa njhani eka valawuri lava tlakukeke, naswona u nga ku kombisa njhani ku titsongahata ka wena eka vona?
8 Hambi swi ri tano, minkarhi yo tala valawuri lava tlakukeke va hulumendhe va tirha tanihi ‘mutirheli wa Xikwembu la hi pfunaka.’ (Varhoma 13:4) Hi tindlela tihi? Ina, anakanya hi mintirho yo tala leyi valawuri va yi endlaka, tanihi ku fambisa poso, nsirhelelo wa maphorisa ni lava timelaka ndzilo, mbhasiso ni dyondzo. Pawulo u tsarile: “Hi swona leswi endlaka leswaku mi humesa ndzuvo; hikuva tihosi i vatirhi va Xikwembu, lava tinyiketaka ku tirha ntirho wolowo.” (Varhoma 13:6) Malunghana ni swibalo kumbe mfanelo yihi na yihi ya nawu, hi fanele ‘ku tikhoma hi ku tshembeka.’—Vaheveru 13:18.
9, 10. (a) Xana valawuri lava tlakukeke va nghena njhani elunghiselelweni ra Xikwembu? (b) Ha yini swi hoxile ku kanetana ni valawuri lava tlakukeke?
9 Minkarhi yin’wana valawuri lava tlakukeke va tirhisa matimba ya vona hi ndlela yo biha. Xana leswi swi susa vutihlamuleri bya hina bya ku titsongahata eka vona? E-e, a swi tano. Yehovha wa swi vona swiendlo swo biha swa valawuri lava. (Swivuriso 15:3) Leswi a tshikaka ku fuma ka munhu ku ya emahlweni a swi vuli swona leswaku u honisa vubihi bya kona; naswona a nga languteli leswaku hi byi honisa. Hakunene, ku nga ri khale Xikwembu xi ta “seletela ni ku herisa ku fuma kuloku hikwako,” xi ku siva hi vulawuri bya hulumendhe ya xona yo lulama. (Daniyele 2:44) Kambe loko leswi swi nga si endleka, valawuri lava tlakukeke va hetisisa xikongomelo lexi pfunaka.
10 Pawulo u hlamuserile: “Hikwalaho loyi a solaka vuhosi, ú sola [lunghiselelo ra, NW] Xikwembu.” (Varhoma 13:2) Valawuri lava tlakukeke i “lunghiselelo” ra Xikwembu hikuva va hlayisa nhleleko wo karhi lowu handle ka wona a ku ta tala mpfilumpfilu ni hasahasa. Ku lwisana na vona swi ta va swi nga fambisani ni Matsalwa naswona ku nga va ku ri vuhunguki. Hi xikombiso: A hi nge u endliwe vuhandzuri kutani mbanga yi sirheleriwe hi mirhungo. Hambi leswi mirhungo leyi yi nga riki xiphemu xa miri, yi hetisisa xikongomelo xo karhi swa xinkarhana. Ku hatlisela ku yi susa swi nga vanga khombo. Hi laha ku fanaka, valawuri va tihulumendhe ta vanhu a va nga ri xiphemu xa xikongomelo xo sungula xa Xikwembu. Hambi swi ri tano, loko Mfumo wa xona wu nga si yi fuma misava hi ku helela, tihulumendhe ta vanhu ti hlanganisa vanhu, ti endla ntirho lowu fambisanaka ni ku rhandza ka Xikwembu enkarhini wa sweswi. Xisweswo hi fanele hi titsongahatela valawuri lava tlakukeke nkarhi hinkwawo, kambe hi rhangisa nawu ni vulawuri bya Xikwembu emahlweni.
VULAWURI ENDYANGWINI
11. Xana nsinya wa nawu wa vunhloko u nga wu hlamuserisa ku yini?
11 Ndyangu i xiaki xa xisekelo xa vandla ra vanhu. Endzeni ka wona wanuna ni wansati va nga kuma vunghana lebyi vuyerisaka, naswona vana va nga sirheleriwa ni ku leteriwa va kondza va kula. (Swivuriso 5:15-21; Vaefesa 6:1-4) Lunghiselelo ro tano ro hlawuleka ri fanele ri hleriwa hi ndlela leyi endlaka leswaku swirho swa ndyangu swi kota ku hanya hi ku rhula ni ntwanano. Yehovha u hetisisa leswi hi ku tirhisa nsiya wa nawu wa vunhloko, lowu hlamuseriwaka hi marito lawa, lama kumekaka eka 1 Vakorinto 11:3: “Kriste i nhloko ya wanuna un’wana ni un’wana, wanuna i nhloko ya wansati, Xikwembu i nhloko ya Kriste.”
12, 13. Xana nhloko ya ndyangu i mani, naswona ku nga dyondziwa yini eka ndlela leyi Yesu a tirhisaka vunhloko ha yona?
12 Wanuna i nhloko ya ndyangu. Hambi swi ri tano, ehenhla ka yena ku ni nhloko—Yesu Kreste. Pawulo u tsarile: “N’wina vavanuna, rhandzani vasati va n’wina kukota leswi Kriste na yena a nga rhandza [vandlha, NW], kutani ú nyiketile vutomi bya yena hikwalaho ka [rona].” (Vaefesa 5:25) Wanuna u kombisa ku titsongahata ka yena eka Kreste loko a khoma nsati wakwe hi ndlela leyi Yesu a khomeke vandlha ha yona nkarhi hinkwawo. (1 Yohane 2:6) Yesu u nyikiwe vulawuri lebyikulu, kambe u byi tirhisa hi musa, rirhandzu ni ku anakanyela lokukulu. (Matewu 20:25-28) Loko a ha ri munhu wa nyama, Yesu a nga kalanga a tirhisa vulawuri byakwe hi ndlela yo biha. A a ri ni “mbilu yo rhula ni ya tintswalo,” naswona u vitane valandzeri vakwe a ku i “vanakulorhi” ematshan’weni ya leswaku i “malandza.” U va tshembise a ku, “ndzi ta mi wisisa,” naswona sweswo u swi endlile.—Matewu 11:28, 29; Yohane 15:15.
13 Xikombiso xa Yesu xi dyondzisa vavanuna leswaku vunhloko bya Vukreste a hi xikhundlha xa vufumi bya tihanyi. Ematshan’weni ya sweswo, i xa xichavo ni xa rirhandzu ra ku tinyiketela. Swi le rivaleni leswaku leswi a swi nge pfuki swi fambelana ni ku khoma munghana wa vukati hi ndlela yo biha emirini kumbe hi ku vula marito lama tlhavaka. (Vaefesa 4:29, 31, 32; 5:28, 29; Vakolosa 3:19) Loko wanuna wa Mukreste o khoma nsati wakwe hi ndlela yo tano yo biha, mintirho leyin’wana leyinene a yi nge pfuni nchumu, naswona swikhongelo swa yena swi nga siveriwa.—1 Vakorinto 13:1-3; 1 Petro 3:7.
14, 15. Xana vutivi bya Xikwembu byi n’wi pfuna njhani wansati leswaku a titsongahata eka nuna wakwe?
14 Loko wanuna a tekelela xikombiso xa Kreste, swa n’wi olovela nsati wakwe ku endla hi ku pfumelelana ni marito ya Vaefesa 5:22, 23: “N’wina vavasati, titsongahateni eka vanuna va n’wina, kukota loko mi titsongahata eka Hosi. Hikuva nuna i nhloko ya nsati wa yena, kukota leswi Kriste na yena a nga nhloko ya [vandlha].” Tanihi leswi wanuna a faneleke ku titsongahata eka Kreste, wansati u fanele ku titsongahata eka nuna wakwe. Bibele yi tlhela yi swi veka erivaleni leswaku vavasati va mintirho leyinene va fanele ku nkhensiwa ni ku bumabumeriwa hikwalaho ka vutlharhi ni migingiriko ya vona leyi kombaka ku chava Xikwembu.—Swivuriso 31:10-31.
15 Ku titsongahata ka wansati wa Mukreste eka nuna wakwe ku pimiwile. Leswi swi vula leswaku loko ku pfumelelana ni mhaka yo karhi swi ta vula ku tlula nawu wa Xikwembu, ku fanele ku yingisiwa Xikwembu ematshan’weni ya wanuna. Hambi swi ri tano, xiyimo lexi tiyeke xa wansati xi fanele xi lungiwa hi ‘moya wa ku olova ni ku rhula.’ Swi fanele swi vonaka leswaku vutivi bya Xikwembu byi n’wi endle wansati wo antswa. (1 Petro 3:1-4) Swi tano ni le ka wanuna wa Mukreste loyi nsati wakwe a nga pfumeriki. Ku fambisana ka yena ni misinya ya milawu ya Bibele swi fanele ku n’wi endla wanuna wo antswa.
16. Xana vana va nga xi tekelela njhani xikombiso lexi Yesu a xi vekeke loko a ha ri muntshwa?
16 Vaefesa 6:1 yi vulavula hi xiphemu xa vana, yi ri: “Yingisani vatswari va n’wina, hikuva hi swona leswi lulameke emahlweni ka Hosi.” Vana va Vakreste va landza xikombiso xa Yesu, loyi a titsongahateke eka vatswari vakwe loko a kula. Tanihi mufana la yingisaka, a “kula emirini ni le miehleketweni, a tsakeriwa hi Xikwembu ni vanhu.”—Luka 2:51, 52.
17. Xana ndlela leyi vatswari va tirhisaka vulawuri bya vona ha yona yi nga va khumba njhani vana va vona?
17 Ndlela leyi vatswari va hetisisaka vutihlamuleri bya vona ha yona yi nga ha endla leswaku vana va xixima vulawuri kumbe va nga byi yingisi. (Swivuriso 22:6) Kutani vatswari va nga ha tivutisa, ‘Xana vulawuri bya mina ndzi byi tirhisa hi rirhandzu kumbe hi tihanyi? Xana ndzi pfumelela xin’wana ni xin’wana?’ Mutswari la chavaka Xikwembu u languteriwa leswaku a va ni rirhandzu ni ku anakanyela, kambe a tiya eku namarheleni ka misinya ya milawu ya Xikwembu. Hi laha ku faneleke, Pawulo u tsarile: “N’wina vatatana, mi nga dyisi vana va n’wina embitsi [hi ku kongoma, ‘ku pfuxa vukarhi bya vona’], kambe mi va kurisa, hi ku va laya ni ku va dyondzisa ta Hosi.”—Vaefesa 6:4; Vakolosa 3:21.
18. Xana ndzayo ya vatswari yi fanele yi nyikeriwa hi ndlela yihi?
18 Vatswari va fanele ku xiyisisa tindlela leti va letelaka ha tona, ngopfu-ngopfu loko va tsakela leswaku vana va vona va yingisa kutani va va nyika ntsako. (Swivuriso 23:24, 25) EBibeleni, ndzayo ngopfu-ngopfu i ndlela yo letela. (Swivuriso 4:1; 8:33) Yi fambisana ni rirhandzu ni vunene, hayi vukarhi ni nsele. Hikwalaho, vatswari va Vakreste va fanele ku endla hi vutlharhi ni ku tikhoma loko va laya vana va vona.—Swivuriso 1:7.
VULAWURI EVANDLHENI
19. Xana Xikwembu xi lunghiselele yini leswaku ku va ni nhleleko lowunene evandlheni ra Vukreste?
19 Tanihi leswi Yehovha a nga Xikwembu lexi hlelekeke, swi le rivaleni leswaku a ta nyika vanhu vakwe vurhangeri bya ku va kongomisa ni lebyi hlelekeke. Hikwalaho, u veke Yesu tanihi Nhloko ya vandlha ra Vukreste. (1 Vakorinto 14:33, 40; Vaefesa 1:20-23) Ehansi ka vurhangeri bya Kreste lebyi nga vonakiki, Xikwembu xi endle lunghiselelo ra leswaku vakulu lava vekiweke eka vandlha rin’wana ni rin’wana va risa ntlhambi hi ku chivirika, hi ntsako ni hi rirhandzu. (1 Petro 5:2, 3) Malandza ya vutirheli ma va pfuna hi tindlela to hambana-hambana ni ku endla ntirho wa nkoka evandlheni.—Vafilipiya 1:1.
20. Ha yini hi fanele hi titsongahata eka vakulu va Vakreste lava vekiweke, naswona ha yini leswi swi vuyerisa?
20 Malunghana ni vakulu va Vakreste, Pawulo u tsarile: “Yingisani vafambisi va n’wina, mi titsongahata eka vona, hikuva va hitekela mimoya ya n’wina, tanihi vanhu lava nga ta vutisiwa ehenhla ka yona. Mi vona leswaku va tirha ntirho wa vona hi ku tsaka, va nga wu endli hi ku vilela, hikuva loko va vilela, a swi nga mi pfuni nchumu n’wina.” (Vaheveru 13:17) Hi vutlharhi, Xikwembu xi nyike valanguteri va Vakreste vutihlamuleri byo khathalela swilaveko swa moya swa vandlha. Vakulu lava a va fani ni ntlawa wa vafundhisi. I malandza ni mahlonga ya Xikwembu, va langutela swilaveko swa vagandzeri-kulobye, hi laha N’wini wa hina, Yesu Kreste, a endleke ha kona. (Yohane 10:14, 15) Hi ku tiva leswaku vavanuna lava fanelekaka hi ku ya hi Matsalwa va khumbeka hi nhluvuko ni ku kula ka hina ka moya ha khutazeka leswaku hi va ni ntirhisano ni ku titsongahata.—1 Vakorinto 16:16.
21. Xana vakulu lava vekiweke va tikarhata njhani leswaku va pfuna Vakreste-kulobye hi tlhelo ra moya?
21 Minkarhi yin’wana, tinyimpfu ti nga ha hambuka kumbe ti langutana ni khombo ra swilo leswi onhaka swa misava. Ehansi ka vurhangeri bya Murisi Lonkulu, vakulu tanihi varisi-ntsongo va xalamukela swilaveko swa lava va va khathalelaka va tlhela va gingiritekela ku va pfuna. (1 Petro 5:4) Va endzela swirho swa vandlha ni ku vula marito ya xikhutazo. Hi ku tiva leswaku Diyavulosi u lava ku pfindlusa ku rhula ka vanhu va Xikwembu, vakulu va tirhisa vutlharhi lebyi taka hi le henhla loko va tlhantlha swiphiqo swihi na swihi. (Yakobo 3:17, 18) Va tirha hi matimba leswaku va hlayisa vun’we ni ntwanano eripfumelweni, ku nga swilo leswi Yesu hi byakwe a swi khongeleleke.—Yohane 17:20-22; 1 Vakorinto 1:10.
22. Xana vakulu va nyika mpfuno wihi emhakeni ya ku dyoha?
22 Ku vuriwa yini loko Mukreste a langutana ni vubihi byo karhi kumbe a hela matimba hikwalaho ko endla xidyoho? Ndzayo ya Bibele leyi hanyisaka ni swikhongelo swa vakulu leswi humaka embilwini swi nga n’wi pfuna leswaku a tlhela a kuma rihanyo ra moya. (Yakobo 5:13-15) Vavanuna lava, lava vekiweke hi moya lowo kwetsima, nakambe va ni matimba ya ku tshinya ni ku sola un’wana ni un’wana loyi a fambaka hi ndlela ya vudyoho kumbe loyi a thyakisaka vumoya ni mahanyelo layo tenga ya vandlha. (Mintirho 20:28; Tito 1:9; 2:15) Leswaku vandlha ri tshama ri basile, swi nga fanela leswaku vanhu va vika swidyoho leswikulu leswi endliwaka. (Levhitika 5:1) Loko Mukreste loyi a endleke xidyoho lexikulu a amukela ku tshinyiwa ni xisolo xa Matsalwa naswona a kombisa ku hundzuka ka xiviri, u ta pfuniwa. Ina, lava va tlulaka nawu wa Xikwembu hi ku phindha-phindha naswona va nga hundzuki va susiwa.—1 Vakorinto 5:9-13.
23. Xana i yini leswi valanguteri va Vakreste va swi endlaka leswaku va pfuna vandlha?
23 Bibele yi vhumbhe leswaku ehansi ka Yesu Kreste tanihi Hosi, a ku ta vekiwa vavanuna lava wupfeke hi tlhelo ra moya leswaku va nyika nchavelelo, nsirhelelo ni ku phyuphya eka vanhu va Xikwembu. (Esaya 32:1, 2) A va ta rhangela tanihi vavuri va evhangeli, varisi ni vadyondzisi leswaku ku kula ka moya ku ya emahlweni. (Vaefesa 4:11, 12, 16) Hambi leswi valanguteri va Vakreste va nga tshukaka va sola, va tshinya ni ku khongotela vapfumeri-kulobye, ku tirhisiwa ka dyondzo ya vakulu leyi hanyisaka, leyi sekeriweke eRitweni ra Xikwembu swi pfuna hinkwavo leswaku va tshama va ri endleleni leyi yisaka evuton’wini.—Swivuriso 3:11, 12; 6:23; Tito 2:1.
AMUKELA LANGUTELO RA YEHOVHA RA VULAWURI
24. Xana i mhaka yihi leyi hi ringiwaka ha yona siku na siku?
24 Wanuna ni wansati wo sungula va ringiwile emhakeni ya ku titsongahatela vulawuri. A swi hlamarisi leswi na hina hi langutaneke ni ndzingo lowu fanaka siku na siku. Sathana Diyavulosi u hlohlotele moya wa ku xandzuka exikarhi ka vanhu. (Vaefesa 2:2) Ndlela ya vutilawuri yi endliwa yi vonaka onge yi tlakukile swinene ku tlula ya ku titsongahata.
25. Hi byihi vuyelo bya ku papalata moya wa misava wa vuxandzuki ni bya ku titsongahatela vulawuri bya Xikwembu kumbe lebyi xi byi pfumelelaka?
25 Hambi swi ri tano, hi fanele ku papalata moya wa misava wa ku xandzuka. Loko hi endla tano hi ta kuma leswaku, ku titsongahata eka Xikwembu swi ta hi tisela vuyelo lebyi fuweke. Hi xikombiso, hi ta hambana ni mivilelo ni ku pfilunganyeka loku tolovelekeke eka lava tirhambelaka swiphiqo eka valawuri lava tlakukeke. Hi ta hunguta ku karhateka loku andzeke emindyangwini yo tala. Naswona hi ta tsakela vuyelo bya vunghana lebyi kufumelaka, bya rirhandzu swin’we ni vapfumeri-kulorhi va Vakreste. Ku tlula hinkwaswo, ku titsongahata ka hina eka Xikwembu ku ta tisa vuxaka lebyinene na Yehovha, Mulawuri la Tlakukeke.
KAMBELA VUTIVI BYA WENA
Xana Yehovha u byi tirhisa njhani vulawuri byakwe?
“Valawuri lava tlakukeke” i vamani, naswona hi titsongahata njhani eka vona?
Xana nsinya wa nawu wa vunhloko wu veka vutihlamuleri byihi eka xirho xin’wana ni xin’wana xa ndyangu?
Xana hi nga ku kombisa njhani ku titsongahata evandlheni ra Vukreste?
[Bokisi leri nga eka tluka 134]
VA TITSONGAHATA, A VA PFUKELI
Hi ntirho wa tona wa ku chumayela erivaleni, Timbhoni ta Yehovha ti kombisa leswaku Mfumo wa Xikwembu hi wona ntsena ntshembo wa vanhu wo kuma ku rhula ni nsirhelelo wa ntiyiso. Kambe vahuweleri lava lava hisekaka va Mfumo wa Xikwembu a va ti pfukeli tihulumendhe leti va hanyaka ehansi ka tona. Ku hambana ni sweswo, Timbhoni i vaaki lava xiximaka swinene ni lava landzaka nawu. Mutirhela-mfumo wa tiko rin’wana ra le Afrika u te: “Loko vukhongeri hinkwabyo a byi fana ni timbhoni ta Yehovha, a ku nga ta va na ku dlayana, vukhamba, vuhunguki, vabohiwa ni tibomo ta athomo. Tinyangwa a ti nga ta tshama ti lotleriwile.”
Hi ku lemuka leswi, vatirhela-mfumo ematikweni yo tala va pfumelele ntirho wo chumayela wa Timbhoni leswaku wu ya emahlweni wu nga kavanyetiwi. Ematikweni man’wana, ku yirisiwa ni minsivelo swi herisiwile loko valawuri va xiya leswaku Timbhoni ta Yehovha ti ni nkucetelo lowunene. Swi fana ni leswi muapostola Pawulo a swi tsaleke malunghana ni ku yingisa valawuri lava tlakukeke: “Endla leswinene, [va] ta ku nkhensa.”—Varhoma 13:1, 3.