Langutelo Ra Vakreste Hi Vuhosi

“A ku na vuhosi lebyi nga humiki eka Xikwembu.”—VARHOMA 13:1.

1. Ha yini ku nga vuriwaka leswaku Yehovha i Muvumbi la Tlakukeke?

HOSI Leyi vumbeke swilo hinkwaswo, leswi hanyaka ni leswi nga hanyiki i Yehovha Xikwembu. Handle ko kanakana hi yena Muvumbi la Tlakukeke. Vakreste va ntiyiso va ni mintlhaveko yo fana ni ya swivumbiwa swa le tilweni leswi nge: “We Hosi, Xikwembu xa hina, u lulameriwile hi ku amukela ku twala, ni ku dzunisiwa, ni matimba, hikuva hi wena Muendli wa swilo hinkwaswo, kutani hi ku rhandza ka wena swi tumbulukile, swi kuma ku hanya.”—Nhlavutelo 4:11.

2. Vafumi vo sungula va vanhu hi ndlela yo karhi va swi amukele njhani leswaku a va nga velekiwanga va ri ni mfanelo yo fuma vanhu-kulobye, naswona Yesu u n’wi byele yini Pontiyo Pilato?

² Mhaka ya leswaku vafumi vo tala vo sungula va vanhu va ringete ku endla leswaku vuhosi bya vona byi va enawini hi ku tivula xikwembu kumbe muyimeri wa xikwembu a ku ri vumbhoni lebyi nga erivaleni bya leswaku ku hava munhu loyi a tswariweke a ri ni mfanelo yo fuma vanhu van’wana.a (Yeremiya 10:23) Xihlovo xa vuhosi lexi nga enawini i Yehovha Xikwembu ntsena. Kreste u byele Pontiyo Pilato, mufumi wa Rhoma loyi a a lawula Yudiya a ku: “A wu nga ta va ni matimba ehenhla ka mina ni kutsongo, loko a wu nga nyikiwanga hi Tilo.”—Yohane 19:11.

“A Ku Na Vuhosi Lebyi Nga Humiki Eka Xikwembu”

3. Muapostola Pawulo u te yini malunghana ni “tihosi,” naswona i swivutiso swihi leswi tlakusiwaka hi marito ya Yesu ni ya Pawulo?

³ Muapostola Pawulo u tsalele Vakreste lava a va tshikileriwa hi Mfumo wa Rhoma a ku: “Munhu un’wana ni un’wana a a tiveke ehansi ka tihosi, hikuva a ku na vuhosi lebyi nga humiki eka Xikwembu; kutani tihosi leti nga kona, ti vekiwile hi Xikwembu.” (Varhoma 13:1) Xana Yesu a a vula yini loko a ku Pilato u nyikiwile vuhosi “hi Tilo”? Naswona Pawulo a a vula yini loko a ku tihosi ta politiki ta le sikwini rakwe a ti vekiwe hi Xikwembu? Xana a va vula leswaku Yehovha hi yena a vekaka mufumi un’wana ni un’wana wa politiki wa misava leyi hi ku kongoma?

4. Yesu na Pawulo va n’wi vitanise ku yini Sathana, naswona i mhaka yihi leyi Sathana a yi vuleke leyi Yesu a nga yi kanetangiki?

⁴ Xana leswi a swi ta endlekisa ku yini, tanihi leswi Yesu a vitaneke Sathana “mufumi wa misava leyi,” kasi muapostola Pawulo yena u n’wi vule “xikwembu xa misava leyi”? (Yohane 12:31; 16:11; 2 Vakorinto 4:4) Ku tlula kwalaho, loko a ringa Yesu, Sathana u n’wi nyike “vuhosi” bya “mimfumo hinkwayo ya misava,” a vula leswaku vuhosi lebyi byi nyikiwe yena. Yesu u yi bakanyile nyiko ya nala, kambe a nga kanetanga leswaku Sathana a a ri ni matimba ya ku nyika un’wana vuhosi byebyo.—Luka 4:5-8.

5. (a) Hi fanele hi ma twisisa njhani marito ya Yesu ni ya Pawulo malunghana ni vulawuri bya vanhu? (b) Valawuri lava tlakukeke va “vekiwile hi Xikwembu” hi ndlela yihi?

⁵ Yehovha u nyike Sathana matimba yo fuma misava leyi, hi ku n’wi tshika a hanya endzhaku ka nxandzuko wakwe ni le ndzhaku ka loko a ringe Adamu na Evha, kutani a va susumetela ku xandzukela vuhosi bya Yena. (Genesa 3:1-6; ringanisa Eksoda 9:15, 16.) Hikwalaho, marito ya Yesu na Pawulo ma fanele ma vula leswaku endzhaku ka loko mpatswa wo sungula wa vanhu wu fularhele vulawuri kumbe mfumo wa Xikwembu le Edeni, Yehovha u tshike vanhu lava va xandzukeke va vumba vulawuri byo hambana-hambana lebyi a byi ta va pfumelela ku hanya hi nawu. Minkarhi yin’wana, Yehovha u wise vafumi kumbe tihulumendhe tin’wana leswaku a hetisisa xikongomelo xakwe. (Daniyele 2:19-21) Van’wana u va tshike va ya emahlweni va fuma. Malunghana ni vafumi lava Yehovha a va tshikaka va ya emahlweni, ku nga vuriwa leswaku va “vekiwile hi Xikwembu.”

Vakreste Vo Sungula Ni Valawuri Va Le Rhoma

6. Langutelo ra Vakreste vo sungula hi valawuri va le Rhoma a ri ri rihi, naswona ha yini?

⁶ Vakreste vo sungula a va nga tirhisani ni mimpambukwa ya Vayuda leyi a yi khirha ni ku lwisana ni Varhoma lava a va fuma Vaisrayele. Valawuri va le Rhoma a va hlayisa ku rhula etikweni ni le lwandle hi fambiselo ra vona ra milawu leyi tiyeke; va ake migerho yo tala leyi lavekaka yo nghenisa mati, va aka mapato ni mabuloho; naswona tanihi leswi hi ntolovelo a va pfuna vanhu, Vakreste a va va teka tanihi ‘mutirheli [kumbe nandza] wa Xikwembu la va pfunaka.’ (Varhoma 13:3, 4) Nawu ni ku rhula swi endle leswaku Vakreste va kota ku chumayela kahle mahungu lamanene hinkwako-nkwako, hi laha Yesu a leriseke ha kona. (Matewu 28:19, 20) A va humesa swibalo leswi a swi laviwa hi Varhoma hi mbilu yo basa, hambi leswi mali yin’wana a yi tirhiseriwa swilo leswi Xikwembu a xi nga swi amukeli.—Varhoma 13:5-7.

7, 8. (a) Loko wo hlaya Varhoma 13:1-7 hi vukheta u ta kuma yini, naswona mongo wu kombisa yini? (b) Hi le hansi ka swiyimo swihi laha valawuri va le Rhoma va nga tirhangiki tanihi “nandza wa Xikwembu,” naswona emhakeni leyi Vakreste vo sungula a va ri ni langutelo rihi?

⁷ Loko wo hlaya tindzimana ta nkombo to sungula ta Varhoma ndzima 13 hi vukheta, u ta kuma leswaku “tihosi” ta politiki a ti ri “nandza wa Xikwembu” leswaku ti nkhensa lava endlaka leswinene ni ku xupula lava endlaka swo homboloka. Mongo wu paluxa leswaku i Xikwembu lexi kombisaka leswaku hi swihi leswi lulameke naswona hi swihi leswi hombolokeke, hayi valawuri lava tlakukeke. Hikwalaho, loko mufumi wa Rhoma kumbe mulawuri wihi na wihi wa politiki a lava swilo leswi yirisiweke hi Xikwembu, kumbe yena a yirisa swilo leswi laviwaka hi Xikwembu, a a nga ha tirhi tanihi nandza wa Xikwembu. Yesu u te: “Nyikani Khezari leswi nga swa Khezari, ni Xikwembu leswi nga swa Xikwembu.” (Matewu 22:21) Loko Mfumo wa Rhoma wu lava swilo leswi a swi ri swa Xikwembu, tanihi vugandzeri kumbe vutomi bya munhu, Vakreste va ntiyiso a va landzela xitsundzuxo xa vaapostola lexi nge: “Hi fanele ku yingisa Xikwembu ku tlula vanhu.”—Mintirho 5:29.

⁸ Ku ala ka Vakreste vo sungula ku gandzela mufumi ni swikwembu swa hava, ku tshika ku khoma minhlangano ya vona ya Vukreste, ni ku ala ku tshika ku chumayela mahungu lamanene ku va vangele ku xanisiwa. Vo tala va vula leswaku muapostola Pawulo u dlayiwe hi ku lerisa ka Mufumi Nero. Vafumi van’wana, ngopfu-ngopfu Domitian, Marcus Aurelius, Septimius Severus, Decius na Diocletian, na vona va xanise Vakreste vo sungula. Loko vafumi lava ni valawuri lava nga ehansi ka vona va xanisa Vakreste, kahle-kahle a va nga tirhi tanihi “nandza wa Xikwembu.”

9. (a) I ntiyiso wihi lowu nga hundzukiki hi valawuri lava tlakukeke va politiki, naswona xivandzana xa politiki xi nyikiwa matimba ni vuhosi hi mani? (b) Ku nga vuriwa yini hi ku titsongahata ka Vakreste eka valawuri lava tlakukeke?

⁹ Leswi hinkwaswo swi komba leswaku hambi loko valawuri lava tlakukeke va politiki etimhakeni tin’wana va tirha tanihi ‘lava lerisiweke hi Xikwembu’ leswaku va hlayisa ku rhula exikarhi ka vanhu, va ha ri xiphemu xa mafambiselo ya swilo ya misava lawa Sathana a nga xikwembu xa wona. (1 Yohane 5:19) I swirho swa nhlengeletano ya misava hinkwayo ya politiki leyi yimeriwaka hi “xivandzana” xa Nhlavutelo 13:1, 2. Xivandzana xexo xi nyikiwa matimba ni vuhosi hi “dragona leyikulu,” Sathana Diyavulosi. (Nhlavutelo 12:9) Hikwalaho, ku titsongahata ka Vakreste eka vuhosi byo tano ku hikiwile, a hi loku heleleke.—Ringanisa Daniyele 3:16-18.

Xichavo Lexi Faneleke Eka Vuhosi

10, 11. (a) Pawulo u swi kombise njhani leswaku hi fanele hi xixima valawuri? (b) Swikhongelo swi nga endleriwa “tihosi, ni hinkwavo lava nge switshan’wini swa le henhla” hi ndlela yihi, naswona hikwalaho ka yini?

¹⁰ Hambi swi ri tano, leswi a swi vuli leswaku Vakreste va fanele ku delela valawuri lava tlakukeke va politiki. I ntiyiso leswaku ndlela leyi vo tala exikarhi ka vona va tikhomaka ha yona exihundleni kumbe erivaleni a yi xiximeki. Kambe vaapostola hi xikombiso ni xitsundzuxo xa vona va kombise leswaku vanhu lava lawulaka va fanele ku xiximiwa. Loko Pawulo a ri emahlweni ka Hosi Heroda Agripa II loyi a a tikhoma hi ndlela yo biha, u vulavule na yena hi xichavo lexi faneleke.—Mintirho 26:2, 3, 25.

¹¹ Nakambe Pawulo u vule leswaku swi fanerile ku boxa valawuri va misava eswikhongelweni swa hina, ngopfu-ngopfu loko va komberiwa ku endla swiboho leswi khumbaka vutomi bya hina ni mintirho ya hina ya Vukreste. U tsarile a ku: “Loko swi ri tano, xo sungula, ndzi navela hi matimba leswaku ku kombela, ni ku khongela, ni ku khongelela, ni ku nkhensa, swi endleriwa vanhu hinkwavo, swi endleriwa ni tihosi, ni hinkwavo lava nge switshan’wini swa le henhla, leswaku hi kota ku hanya vutomi bya ku rhula ni ku tsaka, lebyi nga bya vukhongeri ni lebyi chavisekaka hi matlhelo hinkwawo. Leswi i swinene, swa amukeleka emahlweni ka Xikwembu muponisi wa hina, lexi navelaka leswaku vanhu hinkwavo va ponisiwa, va fika laha va kotaka ku tiva leswi swi nga ntiyiso.” (1 Timotiya 2:1-4) Ku kombisa ka hina xichavo eka valawuri volavo swi nga endla leswaku va hi pfumelela ku endla ntirho wa hina wa ku ringeta ku ponisa “vanhu hinkwavo” hi ku ntshunxeka swinene.

12, 13. (a) Hi xihi xitsundzuxo lexi ringaniseriweke malunghana ni vulawuri lexi Petro a xi nyikeleke? (b) Hi nga hlangavetana njhani ni “lava nga tiviki nchumu, hi mhaka ya vuphukuphuku bya vona” lava endlaka leswaku Timbhoni ta Yehovha ti vengiwa?

¹² Muapostola Petro u tsarile a ku: “Hikwalaho ka Hosi, tivekeni ehansi ka lava fambisaka tihuvo ta tiko, ku fana ni hosi leyikulu ya tiko leyi nge henhla ka tin’wana tihosi, hambi ti ri tindhuna leti rhumiweke hi yona ku avanyisa lava endlaka leswo biha ni ku dzunisa lava endlaka leswo lulama. Hikuva i ku rhandza ka Xikwembu leswaku, hi ku endla leswo lulama, mi ta miyeta lava nga tiviki nchumu, hi mhaka ya vuphukuphuku bya vona. Hanyani tanihi vanhu lava ntshunxekeke; mi nga teki ku ntshunxeka ka n’wina yi ri ndlela yo xisela ha yona, yo endla leswo biha, kambe hanyani tanihi malandza ya Xikwembu. Xiximani vanhu hinkwavo. Rhandzani nhlengeletano ya vamakwenu. Chavani Xikwembu. Xiximani hosi leyikulu ya tiko.” (1 Petro 2:13-17) Vona xitsundzuxo lexi ringaniseriweke swonghasi! Hi kolota Xikwembu ku titsongahata loku heleleke tanihi malandza ya xona naswona hi titsongahata hi ndlela leyi hikiweke ni ku va ni xichavo eka valawuri va politiki lava lerisiweke ku xupula vadyohi.

¹³ Ku kumeke leswaku valawuri vo tala va misava va ni mianakanyo leyi hoxeke swinene hi Timbhoni ta Yehovha. Leswi hi ntolovelo swi vangiwa hi leswi va byeriweke mavunwa hi valala lava nga ni rivengo lerikulu eka vanhu va Xikwembu. Kumbexana leswi va swi tivaka malunghana na hina va swi vone eka swihangalasa-mahungu, leswi minkarhi yin’wana swi hlamuselaka mhaka hi ku ya hi nghohe. Minkarhi yin’wana hi nga herisa rivengo leri hi ku kombisa xichavo, naswona loko swi koteka, hi nyika valawuri nhlamuselo leyi kongomeke hi ntirho ni tidyondzo ta Timbhoni ta Yehovha. Valawuri lava tshamaka va khomekile va nga kuma nhlamuselo yo koma leyi kongomeke eka broxara leyi nge Timbhoni Ta Yehova Eka Lembe Xidzana Ra Vumakumembirhi. Leswaku va kuma rungula leri engetelekeke, va nga nyikiwa buku leyi nge Timbhoni Ta Yehovha I Vahuweleri Va Mfumo Wa Xikwembu, ku nga buku leyinene leyi swi faneleke leswaku yi kumiwa hi tilayiburari ta tiko ni ta ndhawu yo karhi.

Vulawuri eMakaya Ya Vukreste

14, 15. (a) Hi xihi xisekelo xa vulawuri endyangwini wa Vukreste? (b) Langutelo ra vavasati va Vakreste eka vavanuna va vona ri fanele ri va rihi, naswona ha yini?

¹⁴ Tanihi leswi Xikwembu xi lavaka leswaku Vakreste va kombisa xichavo lexi faneleke eka valawuri va misava, swi le rivaleni leswaku va fanele va xixima ni vulawuri lebyi simekiweke hi Xikwembu emindyangwini ya Vukreste. Muapostola Pawulo u wu hlamusele hi ku kongoma nsinya wa nawu wa vunhloko lowu tirhaka exikarhi ka vanhu va Yehovha. U tsarile a ku: “Ndzi lava leswaku mi tiva leswi: Kriste i nhloko ya wanuna un’wana ni un’wana, wanuna i nhloko ya wansati, Xikwembu i nhloko ya Kriste.” (1 Vakorinto 11:3) Lowu i nsinya wa nawu wa vulawuri kumbe mfumo wa Xikwembu. Xana wu katsa yini ke?

¹⁵ Ku xixima vulawuri bya Xikwembu swi sungula ekaya. Wansati wa Mukreste loyi a nga kombisiki xichavo lexi faneleke eka vulawuri bya nuna wa yena—hambi i mupfumeri-kulobye kumbe e-e—a nga titsongahateli vulawuri bya Xikwembu. Pawulo u tsundzuxe Vakreste a ku: “Titsongahateni, van’wana eka van’wana, hikwalaho ka xichavo lexi mi nga na xona eka Kriste. N’wina vavasati, titsongahateni eka vanuna va n’wina, kukota loko mi titsongahata eka Hosi. Hikuva nuna i nhloko ya nsati wa yena, kukota leswi Kriste na yena a nga nhloko ya [vandlha, NW], naswona Kriste i muponisi wa [vandlha], miri wa yena; kutani, tanihi leswi [vandlha ri] titsongahataka eka Kriste, vavasati na vona a va titsongahate eka vanuna va vona, etimhakeni hinkwato.” (Vaefesa 5:21-24) Tanihi leswi vavanuna va Vakreste va faneleke ku titsongahatela vunhloko bya Kreste, vavasati va Vakreste va fanele va swi xiya leswaku i vutlharhi ku titsongahatela vulawuri bya vavanuna va vona lava nyikiweke byona hi Xikwembu. Leswi swi ta endla leswaku va eneriseka swinene etimbilwini ta vona, naswona xa nkoka ngopfu, va ta kuma mikateko ya Yehovha.

16, 17. (a) Vana lava kuriseriweke emakaya ya Vakreste va nga tihambanisa njhani ni vana vo tala va namuntlha, naswona va ni nsusumeto wihi? (b) Yesu a a ri xikombiso lexinene xa vantshwa va namuntlha hi ndlela yihi, naswona va khutaziwa ku endla yini?

¹⁶ Vana lava titsongahatelaka vulawuri bya Xikwembu va kombisa xichavo lexi faneleke eka vatswari va vona hi mbilu hinkwayo. Ku vhumbhiwe leswaku vana va masiku lawa ya makumu a va ta va “lava nga yingisiki vatswari va vona.” (2 Timotiya 3:1, 2) Kambe Rito leri huhuteriweke ra Xikwembu ri byela vana va Vakreste ri ku: “Vana, yingisani vatswari va n’wina etimhakeni hinkwato, hikuva exikarhi ka va ka Kriste, hi swona leswi tsakisaka.” (Vakolosa 3:20) Ku xixima vulawuri bya vatswari swi tsakisa Yehovha, naswona swi tisa mikateko.

¹⁷ Leswi swi kombisiwa emhakeni ya Yesu. Nhlamuselo ya Luka yi ri: “A rhelela na vona [vatswari vakwe], a ya eNazareta, a tshama a va yingisa. . . . Loko a ri Yesu, a kula emirini ni le miehleketweni, a tsakeriwa hi Xikwembu ni vanhu.” (Luka 2:51, 52) Hi nkarhi wolowo Yesu a a ri ni malembe ya 12 hi vukhale, naswona xivumbeko xa riendli ra Xigriki leri tirhisiweke laha xi kandziyisa leswaku a a “tshama a va yingisa” vatswari vakwe. Kutani ku titsongahata ka yena a ku helanga loko a nghena emalembeni yakwe ya kondlo-a-ndzi-dyi. Loko n’wina vana mi lava ku kula emoyeni naswona mi tsakeriwa hi Yehovha ni vanhu lava n’wi chavaka, mi fanele ku kombisa xichavo eka vulawuri bya le kaya ni bya le handle.

Vulawuri eVandlheni

18. I mani Nhloko ya vandlha ra Vukreste, naswona u avele vamani matimba?

¹⁸ Loko a vulavula hi ta xilaveko xa ku hleleka evandlheni ra Vukreste, Pawulo u tsarile a ku: “Xikwembu a hi Xikwembu xa mpfilumpfilu, kambe i xa ku rhula. . . . Hinkwaswo a swi endliwe hi mukhuva lowo saseka, hi nawu wa kona [kumbe “hi nhleleko,” NW, nhlamuselo ya le hansi].” (1 Vakorinto 14:33, 40) Kreste Nhloko ya vandlha ra Vukreste, u avele vavanuna lava tshembekaka vulawuri leswaku swilo hinkwaswo swi endliwa hi nhleleko. Ha hlaya: “Van’wana [u va hlawule] ku va vaapostola, van’wana vaprofeta, van’wana ku va vavuri va Evhangeli, van’wana ku va [varisi] ni vadyondzisi. Ntirho wa vona i ku pfuna vahlawuriwa va Xikwembu leswaku va ta kota ku tirhela van’wana. . . . Ematshan’wini ya sweswo, hi ta hanya entiyisweni hi moya wa rirhandzu, hi kula hi matlhelo hinkwawo eka Kriste, yena loyi a nga nhloko.”—Vaefesa 4:11, 12, 15.

19. (a) Kreste u veke vamani leswaku va langutela swilo swa yena hinkwaswo laha misaveni, naswona i vamani lava a va nyikeke matimba yo hlawuleka? (b) I ku averiwa kwihi ka matimba loku endlekaka evandlheni ra Vukreste, naswona leswi swi lava yini eka hina?

¹⁹ Enkarhini lowu wa makumu, Kreste u veke ntlawa wa “nandza la tshembekaka, wo tlhariha” leswaku a langutela “rifuwo hinkwaro ra . . . yena” kumbe swilaveko swa Mfumo emisaveni. (Matewu 24:45-47) Tanihi le ka lembe xidzana ro sungula, nandza loyi u yimeriwa hi huvo leyi fumaka ya vavanuna lava totiweke va Vakreste lava Kreste a va nyikeke matimba yo endla swiboho ni ku veka valanguteri van’wana. (Mintirho 6:2, 3; 15:2) Hi ku fanana, Huvo leyi Fumaka yi nyika matimba eka Tikomiti ta Marhavi, valanguteri va miganga ni va swifundzha kun’we ni vakulu lava nga emavandlheni ya Timbhoni ta Yehovha lama tlulaka 73 000 emisaveni hinkwayo. Hi fanele ku seketela ni ku xixima vavanuna lava hinkwavo va Vakreste lava tinyiketeleke.—1 Timotiya 5:17.

20. Hi xihi xikombiso lexi kombaka leswaku Yehovha a nga va tsakeli lava va nga riki na xichavo eka Vakreste-kulobye lava lawulaka?

²⁰ Malunghana ni xichavo lexi hi faneleke ku xi kombisa eka lava va nga ni vulawuri evandlheni ra Vukreste, hi nga swi fanisa kahle ni ku titsongahata loku hi faneleke ku ku kombisa valawuri va misava. Loko munhu a tlula nawu wa vanhu lowu Xikwembu xi wu amukelaka, kahle-kahle Xikwembu xi humesa vukarhi bya xona “eka lava endlaka leswo biha” hi ku tirhisa “tihosi” leswaku ti va xupula. (Varhoma 13:3, 4) Loko ku tlula ka munhu milawu ya valawuri va misava ni ku pfumala xichavo lexi faneleke eka vona swi hlundzukisa Yehovha, u fanele a hlundzuka swinene loko Mukreste la tinyiketeleke a hlekula misinya ya milawu ya Bibele ni ku delela Vakreste-kulobye lava lawulaka!

21. Hi xihi xitsundzuxo xa Matsalwa lexi hi nga ta tsakela ku xi landzela, naswona ku ta kambisisiwa yini eka xihloko lexi landzelaka?

²¹ Ematshan’wini yo hlundzukisa Xikwembu hi ku va ni langutelo ra ku xandzuka kumbe ra ku tilawula, hi ta landzela xitsundzuxo xa Pawulo lexi yaka eka Vakreste va le Filipiya lexi nge: “Varhandziwa va mina, tanihi leswi mi ndzi yingiseke masiku hinkwawo, nisweswi, ku nga ri ntsena loko ndzi ri na n’wina kambe ngopfu-ngopfu loko ndzi nga ri na n’wina, tirhelani ku ponisiwa ka n’wina hi ku chava ni ku rhurhumela; hikuva i Xikwembu lexi tirhaka eka n’wina, lexi endlaka leswaku mi tsakela ni ku yingisa ku rhandza ka xona. Endlani swilo hinkwaswo ehandle ka ku n’unun’uta ni ku phikisana, leswaku mi ta pfumala nandzu, mi va lava tengeke, mi va vana va Xikwembu lava nga riki na xisandzu exikarhi ka rixaka lero homboloka, leri tiarisaka; mi fanele ku vangama exikarhi ka rona kukota timboni, laha misaveni.” (Vafilipiya 2:12-15) Ku hambana ni rixaka ra namuntlha ro homboloka leri tivangeleke maxangu ya vulawuri, vanhu va Yehovha va titsongahatela vuhosi hi mbilu hinkwayo. Xisweswo va pfuneka swinene, hi laha hi nga ta vona ha kona eka xihloko lexi landzelaka.

[Nhlamuselo ya le hansi]

Hi Ndlela Yo Pfuxeta

◻ I mani Muvumbi la Tlakukeke, naswona ha yini vuhosi byakwe byi fanerile?

◻ Valawuri lava tlakukeke va “vekiwe hi Xikwembu” hi ndlela yihi?

◻ Hi loko va endla yini valawuri lava tlakukeke laha va tshikaka ku va “nandza wa Xikwembu?”

◻ I xivumbeko xihi xa vulawuri lexi nga kona emindyangwini ya Vakreste?

◻ I ku averiwa kwihi ka matimba loku endlekaka evandlheni ra Vukreste?

[Swifaniso leswi nga eka tluka 18]

Yesu u te: “Nyikani Khezari leswi nga swa Khezari”