Dyondzo 1

Ndlela Leyi U Nga Kumisisaka Ha Yona Leswi Xikwembu Xi Swi Languteleke

Hi rihi rungula ra nkoka leri nga eBibeleni? (1)

Xana Bibele yi tsariwe hi mani? (2)

Ha yini u fanele u dyondza Bibele? (3)

1. Bibele i nyiko ya risima leyi humaka eka Xikwembu. Yi fana ni papila leri humaka eka tatana ri ya eka vana va yena lava a va rhandzaka. Yi hi byela ntiyiso malunghana ni Xikwembu—leswaku i mani kun’we ni timfanelo ta xona. Yi hlamusela ndlela yo langutana ni swiphiqo ni ndlela yo kuma ntsako wa xiviri. I Bibele ntsena leyi hi byelaka leswi hi faneleke ku swi endla leswaku hi tsakisa Xikwembu.—Pisalema 1:1-3; Esaya 48:17, 18.

2. Bibele yi tsariwe hi vavanuna va 40, hi nkarhi lowu endlaka malembe ya 1 600, ku sukela hi 1513 B.C.E. Yi endliwe hi 66 wa tibuku letitsongo. Lava tsaleke Bibele a va huhuteriwe hi Xikwembu. Va tsale mianakanyo ya xona, hayi ya vona vini. Hikwalaho Mutsari wa Bibele i Xikwembu lexi nga etilweni, ku nga ri munhu wo karhi la nga emisaveni.—2 Timotiya 3:16, 17; 2 Petro 1:20, 21.

3. Xikwembu xi tiyisekise leswaku Bibele yi kopiwa kahle ni ku hlayisiwa. Ku kandziyisiwe Tibibele to tala ku tlula buku yihi na yihi leyi nga kona. A hi hinkwavo lava nga tsakelaka ku ku vona u dyondza Bibele, kambe u nga swi pfumeleli swi ku tshikisa. Vumundzuku bya wena lebyi nga heriki byi titshege hi ku tiva ka wena Xikwembu ni ku endla ku rhandza ka xona ku nga khathariseki nkaneto wihi na wihi.—Matewu 5:10-12; Yohane 17:3.