Dyondzo 12

Ku Xixima Vutomi Ni Ngati

Xana hi fanele ku byi languta njhani vutomi? (1) ku xixiwa ka nyimba? (1)

Xana Vakreste va swi kombisa njhani leswaku va ni vukheta? (2)

Xana swi hoxile ku dlaya swiharhi? (3)

I mikhuva yihi yin’wana leyi kombisaka ku pfumala ku xixima vutomi? (4)

Hi wihi nawu wa Xikwembu ehenhleni ka ngati? (5)

Xana leswi swi katsa ni mpompelo wa ngati? (6)

1. Yehovha i Xihlovo xa vutomi. Vutomi bya swilo hinkwaswo leswi hanyaka byi titshenge hi Xikwembu. (Pisalema 36:9) Vutomi bya kwetsima eka Xikwembu. Hambi ku ri vutomi bya n’wana la nga siki tswariwaka la ha riki endzeni ka mana wakwe i bya risima eka Yehovha. Ku dlaya n’wana wo tano loyi a ha kulaka hi vomu swi hoxile emahlweni ya Xikwembu.—Eksoda 21:22, 23; Pisalema 127:3.

2. Vakreste va ntiyiso i vanhu va vukheta. Va tiyiseka leswaku timovha ni makaya ya vona a swi na khombo. (Deteronoma 22:8) Malandza ya Xikwembu a ma tipeti ekhombyeni swi nga fanelanga hi ku lava ntsako kumbe ku tinyanyula. Hikwalaho a ma hlanganyeli emintlangwini leyi nga ni madzolonga laha ku vavisiwaka vanhu van’wana hi vomu. Va papalata vuhungasi lebyi hlohlotelaka madzolonga.—Pisalema 11:5; Yohane 13:35.

3. Vutomi bya swiharhi na byona i bya nkoka eka Muvumbi. Mukreste a nga dlaya xiharhi leswaku a kuma swakudya ni swiambalo kumbe ku tisirhelela eka mavabyi ni khombo ro karhi. (Genesa 3:21; 9:3; Eksoda 21:28) Kambe swi hoxile ku xanisa swiharhi kumbe ku swi dlayela ku tihungasa kumbe ku titsakisa ntsena.—Swivuriso 12:10.

4. Ku dzaha, ku cakunha betel nut, ni ku tirhisa swidzidzirisi leswaku u titsakisa a swi fanelanga eka Vakreste. Swiendlo leswi swi hoxile hikuva (1) swi hi endla mahlonga ya swona, (2) swi vavisa mimiri ya hina, naswona (3) a swi tenganga. (Varhoma 6:19; 12:1; 2 Vakorinto 7:1) Swi nga ha nonon’hwa swinene ku fularhela mikhuva leyi. Kambe hi fanele hi endla tano leswaku hi tsakisa Yehovha.

5. Na yona ngati ya kwetsima emahlweni ya Xikwembu. Xikwembu xi ri moya-xiviri, kumbe vutomi, wu le ngatini. Hikwalaho ku dya ngati swi hoxile. Naswona swi hoxile ku dya nyama ya xiharhi lexi ngati ya xona yi nga humesiwangiki kahle. Loko xiharhi xi tlimbiwa kumbe xi fela entlhan’wini, a xi fanelanga xi dyiwa. Loko xi tlhaviwa hi tlharhi kumbe xi baleseriwa, xi fanele ku humesiwa ngati hi ku hatlisa loko xi fanele ku dyiwa.—Genesa 9:3, 4; Levhitika 17:13, 14; Mintirho 15:28, 29.

6. Xana swi hoxile ku amukela mpompelo wa ngati? Tsundzuka, Yehovha u lerisa leswaku hi tshika ngati. Leswi swi vula leswaku a hi fanelanga hambi hi ndlela yihi na yihi leyi nga kona hi amukela ngati ya vanhu van’wana hambi ku ri ku cheriwa ngati ya hina vini leyi a yi hlayisiwe kun’wana. (Mintirho 21:25) Hikwalaho Vakreste va ntiyiso a va nge wu amukeli mpompelo wa ngati. Va ta amukela mixaka yin’wana ya vutshunguri, yo tanihi ku pomperiwa mirhi yin’wana leyi nga riki na ngati. Va swi lava ku hanya, kambe a va nge ringeti ku sirhelela vutomi bya vona hi ku tlula milawu ya Xikwembu.—Matewu 16:25.

[Swifaniso leswi nga eka tluka 25]

Leswaku hi tsakisa Xikwembu, hi fanele ku papalata mimpompelo ya ngati, mikhuva leyi nga tengangiki ni ku tipeta ekhombyeni swi nga fanelanga