Kingdom News No. 35

Xana Vanhu Hinkwavo Va Ta Kala Va Rhandzana?

Ku Rhandza Vaakelani A Swa Ha Ri Kona

TIMILIYONI ta vanhu ti heleriwe hi ntshembo, a ti tsakanga naswona a ku kona laha ti nga tsutsumelaka kona ku ya kuma mpfuno. Khale ka n’wamabindzu wa xisati u te: ‘Eka madyambu man’wana noni leyi tshamaka eka xithezi lexi ndzi nga eka xona, yi gongondze enyangweni wa mina kutani yi vula leswaku yi ni xivundza. Hi loko hi ku kongoma ni hi musa ndzi yi byela leswaku ndzi khomekile. Yi kombele ndzivalelo hi leswi yi ndzi karhateke kutani yi famba.’

Lexi khomisaka gome, hi vusiku byebyo, noni yoleyo yi tisungile. Endzhaku ka sweswo, n’wamabindzu loyi u vule leswaku wa swi vona leswaku “u endle xihoxo lexikulu.”

Ku pfumaleka ka rirhandzu ro rhandza vaakelani i ku kulu. Hi nkarhi wa minkwetlembetano ya rixaka le Bosnia ni le Herzegovina, khale ka xiyenge xa Yugoslavia, vanhu vo tlula miliyoni va hlongoriwile emakaya ya vona naswona makume ya magidi va dlayiwile. Hi vamani? “Hi vaakelani va hina,” ku vule xinhwanyetana lexi na xona xi hlongoriweke ekaya ka vona. “Ha va tiva.”

Le Rwanda madzana ya magidi ya vanhu va dlayiwile, hakanyingi hi vaakelani va vona. The New York Times yi vike leswaku “Mahutu ni Matutsi a va [tshama] swin’we, vatekana, va nga ri na mhaka leswaku Muhutu i mani ni leswaku Mututsi i mani. Hi loko ku va ni ku cinca ka xitshuketa,” kutani “ku dlayana ku sungula.”

Hi laha ku fanaka, Vayuda ni Maarabu le Israyele va tshama ndhawu yin’we, kambe vo tala va vengana. Leswi swi tano hi Makhatoliki ni Maprotestente yo tala le Ireland, ni mintlawa yin’wana yo tala ematikweni man’wana. Misava leyi a yi si tshama yi pfumala rirhandzu swonghasi, ematin’wini.

Hikwalaho Ka Yini Ku Rhandza Vaakelani Swi Nga Ha Ri Kona?

Muvumbi wa hina u nyikela nhlamulo. Rito rakwe, Bibele, ri vula leswaku nkarhi lowu hi hanyaka eka wona, i ‘masiku ya makumu.’ Lowu i nkarhi lowu ha wona vuprofeta bya Bibele byi nge, vanhu ‘va ta pfumala rirhandzu ra ntumbuluko.’ (Xiitaliki i xerhu.) Malunghana ni ‘minkarhi leyi yo nonon’hwa leyi swi tikaka ku langutana na yona,’ leyi nakambe eMatsalweni yi vitaniwaka ‘makumu ya mafambiselo lawa ya swilo,’ Yesu Kreste u vhumbhe leswaku “rirhandzu ra lavo tala ri ta sungula ku titimela.” (Xiitaliki i xerhu.)—2 Timotiya 3:1-5; Matewu 24:3, 12.

Xisweswo, ku pfumaleka ka rirhandzu namuntlha, i byin’wana bya vumbhoni bya leswaku hi hanya emasikwini ya makumu ya misava leyi. Lexi tsakisaka, leswi nakambe swi vula leswaku misava leyi, ya vanhu lava nga xi chaviki Xikwembu yi ta siviwa hi misava leyintshwa yo lulama ku nga ri khale, leyi eka yona ku fumaka ku rhula.—Matewu 24:3-14; 2 Petro 2:5; 3:7, 13.

Kambe, xana hakunene hi na xona xivangelo xo pfumela leswaku ku cinca ko tano ku ta va kona—leswaku vanhu hinkwavo va nga dyondza ku rhandzana ni ku hanyisana hi ku rhula?

Ku Rhandza Vaakelani—Swa Koteka

GQWETA ra lembe-xidzana ro sungula ri vutise Yesu ri ku: ‘Muakelani wa mina i mani xana?’ Handle ko kanakana a a ri rindzele leswaku Yesu a ku, ‘I Muyuda-kuloni.’ Kambe eka mhaka ya Musamariya la nga muakelani, Yesu u kombise leswaku vanhu va matiko man’wana na vona i vaakelani va hina.—Luka 10:29-37; Yohane 4:7-9.

Yesu u kandziyise leswaku, rirhandzu ra hina eka Xikwembu, ri fanele ri tlhandlamiwa hi ku rhandza ka hina vaakelani. (Matewu 22:34-40) Kambe, xana va kona vanhu lava tshameke va rhandza vaakelani va vona? Vakreste vo sungula va swi endlile sweswo! A va tiviwa hi rirhandzu leri a va ri na rona eka van’wana.—Yohane 13:34, 35.

Ku vuriwa yini hi namuntlha? Xana rirhandzu ro fana ni ra Kreste ri kona eka un’wana ni un’wana? Encyclopedia Canadiana yi ri: “Ntirho wa Timbhoni ta Yehovha wu pfuxeta wu tlhela wu simeka Vukreste bya khale lebyi Yesu ni vadyondzisiwa va yena a va landzela byona . . . Hinkwavo i vamakwavo.”

Xana sweswo swi vula yini? Swi vula leswaku Timbhoni ta Yehovha a ti pfumeleli nchumu wu ti endla ti venga vaakelani va tona—hambi ku nga ha va rixaka, tiko kumbe ndhavuko wa vona. Naswona a ti nge dlayi munhu, hikuva ti hundzule mabanga ya tona ma va swikomu, hi ndlela yo fanekisela, naswona mafumu ya tona ma hundzuriwe masikele. (Esaya 2:4) Kahle-kahle, Timbhoni ti tiveka swinene hi ku tiyimisela ka tona ku pfuna vaakelani.—Vagalatiya 6:10.

A swi hlamarisi leswi muhleri un’wana wa Sacramento Union ya le California a nga te: “Ndzi nga vula leswaku loko misava hinkwayo a yo hanya hi ku landzela ripfumelo ra Timbhoni ta Yehovha, ku halatiwa ka ngati ni rivengo a swi ta hela, naswona rirhandzu a ri ta fuma tanihi hosi.” Mutsari un’wana eka magazini lowu nge Ring, wa le Hungary, u te: “Ndzi fikelele makumu ya leswaku loko Timbhoni ta Yehovha a ko va tona ntsena ti hanyaka laha misaveni, tinyimpi a ti nga ha ta va kona, kutani ntirho wa maphorisa a ku ta va ku lawula mimovha ni ku humesa tiphasiphoti ntsena.”

Hambiswiritano, leswaku vanhu hinkwavo va rhandzana, ku ta laveka leswaku ku va ni ku cinca lokukulu emisaveni hinkwayo. Xana ku cinca koloko ku ta tisa hi mani? (Vona tluka leri nga endzhaku.)

Nkarhi Lowu Vanhu Hinkwavo Va Nga Ta Rhandzana

XIKHONGELO lexi Yesu Kreste a xi dyondziseke xi kombisa leswaku ku cinca lokukulu ku tshinele. Eka Dyondzo yakwe leyi dumeke ya le Ntshaveni, Yesu u hi dyondzise leswaku hi khongela hi ku: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.”—Matewu 6:10, King James Version.

Mfumo wa Xikwembu i yini? I hulumendhe ya xiviri, leyi yi fumaka yi ri etilweni. Hi yona mhaka leyi vuriwaka ‘mfumo wa matilo.’ Yesu, “Hosi ya ku rula,” u vekiwe hi Tata wakwe leswaku a va mufumi wa yona.—Matewu 10:7; Esaya 9:6, 7; Pisalema 72:1-8.

Loko Mfumo wa Xikwembu wu ta, ku ta humelela yini hi misava leyi leyi nga tala rivengo? ‘Mfumo,’ wu ta “seletela ni ku herisa” hinkwato tihulumendhe to homboloka ta misava leyi. (Daniyele 2:44) Bibele ya hlamusela: “Misava ya hundza . . . , kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.

Malunghana ni misava leyintshwa ya Xikwembu, Bibele yi ri: “La’v̌o lulama v̌a ta fuma misav̌a, v̌a ta ṭhama ka yona hi masiku.” (Pisalema 37:9-11, 29; Swivuriso 2:21, 22) Mawaku ndlela leyi nkarhi wolowo wu nga ta tsakisa ha yona! “Rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” (Nhlavutelo 21:4) Hambi lava feke va ta tlhela va hanya, naswona misava hinkwayo yi ta hundzuriwa yi va paradeyisi ya xiviri.—Esaya 11:6-9; 35:1, 2; Luka 23:43; Mintirho 24:15.

Leswaku hi ta hanya emisaveni leyintshwa ya Xikwembu, hi fanele hi rhandzana, hi laha Xikwembu xi hi dyondzisaka leswaku hi endla ha kona. (1 Vatesalonika 4:9) Xichudeni xa Bibele xa le Vuxeni xi te: “Ndzi rindzele ku vona nkarhi lowu ha wona, hilaha Bibele yi tshembisaka ha kona, vanhu hinkwavo va nga ta dyondza ku rhandzana.” A hi tiyisekeni leswaku Xikwembu xi ta xi hetisisa xitshembiso xa xona! Xi ri: “Hi laha nḍi v̌uleke ha kona, nḍi ta endlisa ŝeŝo.”—Esaya 46:11.

Kambe leswaku u ta kuma mikateko ehansi ka Mfumo wa Xikwembu, u fanele u nghenisa vutivi bya Bibele, hilaha timiliyoni ta vanhu lava nga ni timbilu letinene emisaveni hinkwayo, va endlaka ha kona. (Yohane 17:3) Broxara ya matluka ya 32 leyi nge I Yini Leswi Xikwembu Xi Swi Languteleke Eka Hina? yi ta ku pfuna. Kuma rungula leri engetelekeke malunghana ni ku kuma broxara leyi hi ku tata xiphephana lexi nga eka tluka leri hundzeke kutani u xi rhumela eka adirese leyi nga ekusuhi ni kaya ra wena.

□ Ndza swi lava ku kuma rungula leri engetelekeke malunghana ni ku kuma broxara leyi nge I Yini Leswi Xikwembu Xi Swi Languteleke Eka Hina?

□ Ndzi kombela mi ndzi endzela malunghana ni dyondzo ya le kaya ya mahala ya Bibele.

[Laha Xifaniso Xi Humaka Kona eka tluka 2]

Sniper and funeral in Bosnia: Reuters/Corbis-Bettmann