U Fanele U Dyondza Hi Xikwembu

Leswaku u va munghana wa Xikwembu, u fanele u dyondza hi xona. Xana vanghana va wena va ri tiva vito ra wena naswona va ku vitana hi rona? Va ri tiva naswona va ku vitana hi rona. Xikwembu na xona xi lava u tiva vito ra xona u tlhela u xi vitana hi rona. Vito ra Xikwembu i Yehovha. (Pisalema 83:​18; Matewu 6:⁠9) Nakambe u fanele u dyondza leswi xi swi rhandzaka ni leswi xi swi vengaka. U fanele u tiva leswaku i vamani vanghana va xona ni leswaku i vamani valala va xona. Swi teka nkarhi ku tiva munhu. Bibele yi vula leswaku i vutlhari ku tivekela nkarhi etlhelo wo dyondza hi Yehovha.​—⁠Vaefesa 5:​15, 16.

Vanghana va Xikwembu va endla leswi swi xi tsakisaka. Anakanya hi vanghana va wena. Loko u nga va khomi kahle naswona u endla swilo leswi va swi vengaka, xana va ha ta ya emahlweni va endla xinghana na wena? Nikatsongo! Hilaha ku fanaka, loko u lava ku va munghana wa Xikwembu, u fanele u endla leswi swi xi tsakisaka.​—⁠Yohane 4:⁠24.

A hi vukhongeri hinkwabyo lebyi nga endlaka leswaku u va munghana wa Xikwembu. Yesu, loyi a nga munghana lonkulu wa Xikwembu, u vulavule hi magondzo mambirhi. Gondzo rin’wana ri anamile naswona va tele lava fambaka eka rona. Gondzo rolero ri yisa endzovisweni. Gondzo lerin’wanyana ri khumile naswona a va talanga lava fambaka eka rona. Gondzo rolero ri yisa evuton’wini lebyi nga heriki. Leswi swi vula leswaku loko u lava ku va munghana wa Xikwembu, u fanele u dyondza ndlela leyinene yo xi gandzela.​—⁠Matewu 7:​13, 14.