Xirhambo Xa Hina Eka Wena

Hi swi tsakerile ku vulavula na wena hi ku tirhisa broxara leyi. Hi tshemba leswaku u swi tsakerile ku dyondza swo tala hi Timbhoni ta Yehovha. Hi kombela leswaku u amukela xirhambo xa hina xo hi endzela eHolweni ya hina ya Mfumo ya laha u tshamaka kona. Xiya ndlela leyi minhlangano ya hina yi fambisiwaka ha yona. Xiya ndlela leyi hi ringetaka ha yona ku byela van’wana mahungu lamanene ya misava ya paradeyisi leyi nga ta va ehansi ka Mfumo wa Kreste.

Xikwembu xi yi tshembisile. “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.” (2 Petro 3:13) Se ku hundze malembe-xidzana yo tala. Nkarhi wa ku rindza wu tshinela emakun’wini ya wona. Swiyimo swa misava swi kombisa sweswo.

“Leswi [hi] vonaka siku ri tshinela,” ku vula muapostola Pawulo, “a hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.” (Vaheveru 10:24, 25) Ha ku khutaza leswaku u yingisa xitsundzuxo xa Pawulo hi ku hlanganyela kun’we na hina.