Lunghekela Vumundzuku Lebyi Vangamaka

“TSHAMANI mi tilunghisile,” ku khutaze Yesu. (Luka 12:40) Loko hi endlisa sweswo, loko Kreste a ta “a ri ni matimba ni ku kwetsima lokukulu,” hi ntsako hi nga endla leswi vuriwaka hi xileriso xakwe lexi nge: “Ololokani, mi languta henhla, hikuva ku kutsuriwa ka n’wina ku kusuhi.”—Luka 21:27, 28.

Xana i nkutsulo wa muxaka muni? Wona, i nkutsulo wo kota lowu voniweke hi Nowa ni ndyangu wakwe—ina, ku kutsuriwa emakun’wini ya misava leyi! “Misava ya hundza,” ku tsale muapostola Yohane, “kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.

Emisaveni leyintshwa ya Yehovha, vafumiwa va Hosi, Yesu Kreste lava nga emisaveni, va ta tiphina hi vutomi lebyi nga heriki. “La’v̌o lulama v̌a ta fuma misav̌a,” ku vula Bibele, “v̌a ta ṭhama ka yona hi masiku.” (Pisalema 37:29) Mawaku vumundzuku lebyinene swonghasi lebyi Xikwembu xi byi tshembisaka vanhu va xona! Rito ra xona ri ri: “Xikwembu hi xoxe xi ta va na vona, . . . Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona.” Lebyi i vuprofeta bya ntiyiso!—Nhlavutelo 21:3, 4.

Kambe, leswaku u tiphina hi vumundzuku lebyi, u fanele ku endla swo karhi. Ku kuma vutivi i mfanelo yo sungula. Bibele ya hlamusela: “Kambe vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.”—Yohane 17:3.

Nakambe u fanele ku hlangana swin’we nkarhi na nkarhi ni lava va lavaka vutivi lebyi, hi laha muapostola a khutazeke: “A hi laveni tindlela to pfuxana, hi kombana rirhandzu ni mintirho leyinene. Hi nga tshiki ku hlengeletana, . . . leswi mi vonaka leswaku siku ra Hosi ri ya ri tshinela.” (Vaheveru 10:24, 25) Kunene, vanhu va Yehovha va swi vona leswaku siku ra ku kutsuleriwa emisaveni ya Xikwembu leyintshwa ri ya ri tshinela swinene, kutani va tiviwa swinene hi ku hlangana ka vona swin’we.

Phepha-hungu leri nge Sunday Telegraph ra le London, loko ri vulavula hi yin’wana ya tinhlengeletano ta vona erivaleni ra mintlangu lerikulu, ri te: “Eka vona ku hava ku hlunama loku hi ntolovelo ku voniwaka eka vanhu lava twarisaka leswaku ‘Makumu Ma Tshinele.’ Hambi leswi hakunene ma tshineleke. Enkarhini lowu vanhu lava hinkwavo va vonaka va tsakile hi ndlela leyi faneleke, leyinene yo chava Xikwembu.” Phepha-hungu ri engeterile: “Loko misava ya sweswi yi ri kusuhi ni ku hela, Timbhoni leti nga eTwickenham ti vonaka ti tiyimisele kahle ku lunghiselela leyintshwa.”

Ku tshama u tilulamisile swi vula ku tshama u khomekile, hi ku endla ntirho wo kota lowu wu endliweke hi Nowa, loyi a tirheke emasikwini ya le mahlweni ka Ndhambi tanihi “mutwarisi wa leswo lulama.” (2 Petro 2:5) Nakambe ku tshama u tilulamisile swi vula ku hanya “vutomi lebyo hlawuleka bya vukhongeri.” Wa rhambiwa, ina, u khutaziwa ku hlanganyela ni vanhu va Yehovha ‘u langutela . . . , naswona u tshama u anakanya vukona bya siku ra Yehovha.’—2 Petro 3:11, 12.