U Nga Yimi Ndhawu Yin’we—Endla Nhluvuko

LOKO u sungula ku dyondza ku tirhisa misinya ya milawu ya Bibele, maanakanyelo, mavulavulelo ni mahanyelo leswi nga engatini swi sungule ku cinca hakatsongo-tsongo. Swo tala swa swona u swi tshike ni ku tsarisa eXikolweni xa Vutirheli bya le Tilweni u nga si tsarisa. Kumbexana sweswi u endle nhluvuko ku fikela laha u nyikeleke vutomi bya wena eka Yehovha. Xana sweswo swi vula leswaku se u thwasile? Nikatsongo. Ku khuvuriwa ka wena ko va ku sungula ka timhaka.

Mudyondzisiwa Timotiya ana se a a ri nkulu wa Vukreste loko Pawulo a n’wi byela leswaku a “anakanyisisa” hi ndzayo leyi a nyikiweke yona ni malunghelo ya ntirho lawa a tamerisiweke wona—a “dzika eka” swilo leswi—leswaku “ku ya emahlweni ka [y]ena ku vonaka eka vanhu hinkwavo.” (1 Tim. 4:12-15) Hambi wa ha ku sungula ku khoma ndlela ya ntiyiso kumbe ana se i khale u hanya hi ndlela ya Vukreste, u fanele u tikarhatela ku endla nhluvuko.

Vutivi Ni Ku Cinca

Eka Vaefesa 3:14-19, hi hlaya leswaku muapostola Pawulo u khongelele leswaku vapfumeri-kulobye va ‘kota ku ku twisisa hi rixaladza ku anama ni ku leha ni ku tlakuka ni ku enta’ ka ntiyiso. Hi xikongomelo xexo, Yesu u teke ntirho wo dyondzisa, wo ololoxa ni ku aka vandlha a wu byarhisa tinyiko leti nga vanhu. Ku anakanyisisa nkarhi ni nkarhi hi Rito ra Xikwembu leri huhuteriweke, swin’we ni vukongomisi bya vadyondzisi lava nga ni ntokoto, swi nga hi pfuna ku ‘kula’ emoyeni.—Efe. 4:11-15.

Ku kula koloko ku katsa ku ‘endliwa lavantshwa ematimbeni lama susumetaka mianakanyo ya hina.’ Leswi swi hlanganisa ku va ni mianakanyo leyi twananaka swinene ni ya Xikwembu na Kreste. Swi lava ku tshama u ri karhi u tswonga vutivi bya vona, leswaku u “ambala vumunhu lebyintshwa.” (Efe. 4:23, 24) Loko u dyondza Tievhangeli, xana u teka matimu lawa ya vutomi bya Kreste ma ri xikombiso lexi u faneleke u xi landzela? Xana u lwela ku kuma timfanelo to karhi leti kombisiweke hi Yesu, kutani u lwa hi matimba leswaku u ti tirhisa evuton’wini bya wena?—1 Pet. 2:21.

Timhaka leti u vulavulaka ni van’wana ha tona ti nga va xikombiso xa mpimo lowu u endleke nhluvuko wo tano ha wona. Lava va ambaleke vumunhu lebyintshwa a va vulavuli timhaka ta mavunwa, a va khahli, a va na nhlambha kumbe ku vulavula swilo leswi nga akiki. Ku ri na sweswo, mavulavulelo ya vona ‘ma aka, ma tsakisa eka lava ma twaka.’ (Efe. 4:25, 26, 29, 31; 5:3, 4; Yudha 16) Loko va vulavula ni munhu etlhelweni ni loko va nyikela tinhlamuselo eminhlanganweni ya vandlha, marito ya vona ma komba leswaku ntiyiso wu cinca vutomi bya vona.

Loko u nga ha “ndlengandlengisiw[i] hi magandlati ni ku yingayingisiwa hi mheho yin’wana ni yin’wana ya ku dyondzisa,” ni sweswo swi komba leswaku u endla nhluvuko. (Efe. 4:14) Hi xikombiso, xana u angurisa ku yini loko misava yi ku fumba hi mianakanyo leyintshwa, tindlela ta ku tihungasa kumbe mixaka ya vuhungasi? Xana u tikuma se u teke nkarhi wa timhaka ta moya u wu tirhisela swilo swo tano? Ku endla sweswo swi nga hingakanya nhluvuko wa wena wa moya. I vutlhari swinene ku xava nkarhi wa timhaka ta moya!—Efe. 5:15, 16.

Ndlela leyi u hanyisanaka ha yona ni van’wana na yona yi nga va xikombiso xa nhluvuko wa moya. Xana se wa swi kota ku va ni ‘ntwela-vusiwana ni ku kombisa moya wa ku rivalela hi ku ntshunxeka’ eka vamakwenu?—Efe. 4:32.

Nhluvuko wa wena eku endleni ka swilo hi ndlela ya Yehovha wu fanele wu vonaka evandlheni ni le kaya. Wu fanele wu vonaka ni le xikolweni, etindhawini ta mani na mani ni le ntirhweni wa wena wa ku tihanyisa. (Efe. 5:21–6:9) Loko wo kombisa timfanelo letinene hi xitalo eswiyin’weni sweswo hinkwaswo, kutani nhluvuko wa wena wu ta va erivaleni.

Tirhisa Nyiko Ya Wena

Yehovha u nyike un’wana ni un’wana wa hina vuswikoti byo karhi. U langutele leswaku hi byi tirhisa eka van’wana, leswaku va vona ndlela leyi a va kombaka tintswalo leti nga faneriwiki hi ku tirhisa hina. Mayelana ni leswi, muapostola Petro u tsale a ku: “Hi ku ya hilaha un’wana ni un’wana a amukeleke nyiko hakona, tirhisani nyiko leyi leswaku mi tirhelana ha yona tanihi valanguteri lavanene va musa lowu nga faneriwiki wa Xikwembu.” (1 Pet. 4:10) Xana vulanguteri bya wena u byi tirhisa njhani?

Petro u ya emahlweni a ku: “Loko mani na mani a vulavula, marito yakwe a ma fane ni marito lama hlawulekisiweke ya Xikwembu.” (1 Pet. 4:11) Ndzimana leyi yi kandziyisa vutihlamuleri bya ku vulavula hi ku pfumelelana kahle ni Rito ra Xikwembu, leswaku ku dzunisiwa Xikwembu. Ndlela leyi munhu a vulavulaka ha yona na yona yi fanele yi dzunisa Yehovha. Vuleteri bya Xikolo xa Vutirheli bya le Tilweni byi nga ku pfuna ku tirhisa nyiko ya wena hi ndlela yo tano—u dzunisa Xikwembu hi mukhuva lowu u pfunaka van’wana ha wona. Loko yoleyo yi ri pakani ya wena, xana u ta wu vonisa ku yini nhluvuko wa wena exikolweni?

Ematshan’weni yo anakanya hi nhlayo ya tinhla leti u ti hlanganiseke eka xiphephana xa wena xa ndzayo, kumbe muxaka wa swiavelo leswi u nyikiweke swona, anakanyisisa hi mpimo lowu vuleteri bya kona byi antswiseke mfanelo ya wena ya ku tinyiketela ku dzunisa. Xikolo xi hi pfuna leswaku hi humelela swinene evutirhelini bya le nsin’wini. Kutani tivutise: ‘Xana leswi ndzi nga ta swi vula entirhweni wa nsimu ndza swi lunghiselela hakunene? Xana ndzi titolovete ku kombisa nkhathalelo wa xiviri eka lava ndzi nyikelaka vumbhoni eka vona? Xana ndzi veka xisekelo xa riendzo ra ku vuyela eka vanhu hi ku va siya ni xivutiso lexi hi nga ta bula ha xona enkarhini lowu taka? Loko ndzi dyondza Bibele ni munhu, xana ndza tikarhata leswaku ndzi va mudyondzisi wo antswa la fikelelaka mbilu?’

U nga anakanyi leswaku malunghelo ya ntirho lawa u nyikiwaka wona ma kombisa leswaku u endla nhluvuko. Nhluvuko wa wena a wu kombisi hi xiavelo hi xoxe, kambe wu kombisiwa hi leswi u swi endlaka eka xiavelo xexo. Loko u kume xiavelo lexi lavaka ku dyondzisa, tivutise: ‘Xana vuswikoti bya ku dyondzisa ndzi byi tirhisile hakunene? Xana ndzi nyikele rungula ra kona hi ndlela leyi khumbaka vutomi bya vayingiseri?’

Xikhutazo xa ku tirhisa nyiko ya wena xi fambisana ni ku ka u nga yimeli ku byeriwa. Xana wa ya ensin’wini ni van’wana u nga susumetiwanga hi munhu? Xana u tshama u xalamukele ku pfuna swirho swin’wana swa vandlha ra ka n’wina leswa ha ku sungulaka ku hlanganyela, leswa ha riki switsongo hi malembe kumbe leswi nga swigulani? Xana u tiendla u kumeka leswaku u ya basisa Holo ya Mfumo kumbe ku pfuna hi tindlela tin’wana emintsombanweni ni le tinhlengeletanweni? Xana u nga swi kota ku pfa u tsarisela ku va phayona ra nkarhinyana hi ku phindha-phindha? Xana u nga swi kota ku va phayona ra nkarhi hinkwawo kumbe ku ya pfuna evandlheni leri nga ni xilaveko lexikulu? Loko u ri makwerhu wa xinuna, xana u lwela ku fanelekela timfanelo ta Matsalwa ta malandza ya vutirheli ni vakulu? Ku tiyimisela ka wena ku pfuna ni ku amukela vutihlamuleri i xikombiso xa nhluvuko.—Ps. 110:3.

Leswi Ntokoto Wu Pfunaka Swona

Loko u titwa u nga faneleki kahle hileswi u pfumalaka ntokoto emahanyelweni ya Vukreste, u nga heli mbilu. Rito ra Xikwembu ri kota ku “tlharihisa la nga riki na ntokoto.” (Ps. 19:7; 119:130; Swiv. 1:1-4) Ku tirhisa ndzayo ya Bibele swi endla leswaku hi kota ku kuma vutlhari lebyi hetisekeke bya Yehovha, lebyi nga bya nkoka swinene ku tlula dyondzo leyi munhu a yi kumaka hi ku va ni ntokoto ntsena. Kambe, loko hi endla nhluvuko entirhweni lowu hi wu endlelaka Yehovha, hi kuma ntokoto wa risima. Xana hi nga wu tirhisa njhani hi ndlela leyi vuyerisaka?

Loko munhu a langutane ni swiyimo swo hambana-hambana evuton’wini, a nga tikuma a ehleketa hi ndlela leyi: ‘Leswi a ndzi sunguli ku langutana na swona. Ndza swi tiva leswaku ndzi fanele ndzi endla yini.’ Xana sweswo i vutlhari? Swivuriso 3:7 ya tsundzuxa: “U nga vi la tlhariheke ematihlweni ya wena.” Ntokoto wu fanele wu antswisa vonelo ra hina ra swilo leswi lavaka ku xiyisisiwa loko hi langutana ni swiyimo swo karhi evuton’wini. Kambe loko hi endla nhluvuko wa moya, ntokoto wa hina wu fanele wu tiyisekisa mianakanyo ni timbilu ta hina leswaku i mikateko ya Yehovha ntsena leyi nga ta hi endla hi humelela. Kutani nhluvuko wa hina a wu kombisiwi hi ku langutana ni swiyimo hi ku titshemba, kambe hi ku tshemba Yehovha leswaku a hi kongomisa evuton’wini bya hina. Wu kombisiwa hi ku tiyiseka ka hina leswaku a ku na nchumu lexi nga endlekaka yena a nga xi pfumelelanga, wu tlhela wu kombisiwa hi ku va ni vuxaka lebyi tiyeke ni Tata wa hina wa le tilweni.

Hambeta U Ya eMahlweni

Hambileswi muapostola Pawulo a a ri Mukreste la totiweke, la kuleke hi tlhelo ra moya, u swi lemukile leswaku a a fanele ku hambeta ‘a ya emahlweni’ leswaku a fikelela pakani ya vutomi. (Filp. 3:13-16) Xana na wena u ni langutelo ro tano?

Xana u endle nhluvuko ku fikela kwihi? Kambisisa nhluvuko wa wena hi ku ya hi mpimo lowu u byi ambaleke ha wona vumunhu lebyintshwa, hi ku ya hi mpimo lowu u titsongahataka ha wona eka vuhosi bya Yehovha, ni ndlela leyi u ti tirhisaka ha yona tinyiko ta wena ta ku yisa ku dzuneka eka Yehovha. Loko u ri karhi u vuyeriwa hi dyondzo ya Xikolo xa Vutirheli bya le Tilweni, timfanelo leti kandziyisiweke eRitweni ra Xikwembu ti fanele ti ya ti vonaka endleleni leyi u vulavulaka ni ku dyondzisa ha yona. Tshama u ri karhi u anakanyisisa hi timhaka leti ta nhluvuko wa wena. Ina, tsaka ha tona, kutani nhluvuko wa wena wu ta hatla wu vonaka.