Endla Nhluvuko Wa Wena Wu Vonaka
1 Tsundzuka nkarhi lowu u sunguleke ha wona ku twa mahungu ya Mfumo. Mintiyiso yo olova yi pfuxe ku navela ka wena ko kuma vutivi ni ku twisisa. Hi ku hatlisa u swi kotile ku vona xilaveko xo endla mindzulamiso endleleni ya wena ya vutomi hikuva tindlela ta Yehovha ti tlakukile swinene eka tindlela ta wena. (Esa. 55:8, 9) U endle nhluvuko, u nyiketela vutomi bya wena ivi u khuvuriwa.
2 Hambi ku ri endzhaku ko endla nhluvuko wa moya, a ka ha ri ni mikhuva leyi a yi fanele ku hluriwa. (Rhom. 12:2) Kumbexana a wu chava vanhu, leswi a swi ku endla u nga hlanganyeli entirhweni wa nsimu. Kumbexana a wu tsandzeka ku kombisa mihandzu ya moya wa Xikwembu. Ematshan’weni yo tlhelela endzhaku, u tiyimisele ku endla nhluvuko hi ku tivekela tipakani ta swa le tilweni.
3 Ku nga ha va se ku hundze malembe yo hlayanyana hi mpfhuka u tinyiketerile. Loko u languta endzhaku, xana hi wihi nhluvuko lowu u wu vonaka eka wena n’wini? Xana u ti fikelerile tin’wana ta tipakani ta wena? Xana wa ha gingiriteka hi ndlela leyi a wu gingiriteka ha yona “eku sunguleni”? (Hev. 3:14, NW) Timotiya ana se a ri Mukreste la vupfeke la nga ni ntokoto wa malembe yo hlayanyana loko Pawulo a n’wi khutaza a ku: “Endla tifanelo leti, tinyiketele eka tona, leswaku hinkwavo va ta vona hilaha u yaka emahlweni hakona.”—1 Tim. 4:15.
4 Ku Tikambisisa Swa Laveka: Loko hi anakanyisisa hi ndlela ya hina ya khale, xana hi kuma leswaku hi hambeta hi ri na mikhuva yin’wana leyi a hi ri na yona loko hi sungula ku dyondza? Xana hi tsandzekile ku fikelela tin’wana ta tipakani leti a hi tivekele tona? Loko swi ri tano, ha yini? Hambi loko a hi ri ni makungu lamanene, swi nga ha endleka hi hlwerile. Kumbexana hi pfumelele swivilelo swa vutomi kumbe mintshikilelo ya fambiselo leri yi hi tlherisela endzhaku.—Lk. 17:28-30.
5 Leswi hi nga taka hi nga endli nchumu hi swilo leswi hundzeke, hi nga ha endla swo karhi hi swa nkarhi lowu taka. Hi nga tipfuxa, hi lulamisa laha hi kayivelaka kona, ivi hi endla matshalatshala yo endla nhluvuko. Hi nga ha fanela ku antswisa eku kombiseni ka mihandzu ya moya wa Xikwembu, yo tanihi ku tikhoma, ku rhula, kumbe ku lehisa mbilu. (Gal. 5:22, 23) Loko swi hi tikela ku hanyisana ni van’wana kumbe ku tirhisana ni vakulu, i swa nkoka leswaku hi hlakulela ku titsongahata ni moya wo rhula.—Flp. 2:2, 3.
6 Xana hi nga endla nhluvuko wa hina wu vonaka hi ku fikelela malunghelo ya ntirho? Hi ku endla matshalatshala lama engetelekeke vamakwerhu va nga faneleka tanihi malandza ya vutirheli kumbe vakulu. Van’wana va hina va nga ha swi kota ku tsarisa tanihi maphayona ya nkarhi hinkwawo. Eka vo tala, vuphayona bya nkarhinyana byi nga ha va pakani leyi fikelelekaka. Van’wana va nga ha lwela ku endla nhluvuko eka mukhuva wa vona wa dyondzo ya munhu hi xiyexe, va hlanganyela swinene eminhlanganweni ya vandlha, kumbe va humesa mihandzu tanihi vahuweleri va vandlha.
7 Kavula, swi le ka un’wana ni un’wana wa hina leswaku a vona laha a faneleke a endla nhluvuko kona. Hi nga tiyiseka leswaku matshalatshala ya hina lamanene yo “kongoma eku hetisekeni” ya ta engetela ntsako wa hina ni ku hi endla swirho swa vandlha leswi vekaka mihandzu.—Hev. 6:1.