Nongonoko Wo Antswisa Vuswikoti Byo Vulavula Ni Byo Dyondzisa

KU NGA khathariseki leswaku wa ha ri ntsongo kumbe se u kurile, u munhu wa xinuna kumbe wa xisati, khoso leyi yi nga ku pfuna leswaku u vulavula hi ndlela leyi humelelaka naswona u faneleka swinene ku va mudyondzisi wa Rito ra Xikwembu.

Mulanguteri wa xikolo hi yena la nga ta endla swiavelo swa lava tsariseke eXikolweni xa Vutirheli bya le Tilweni. Eka matluka manharhu lama landzelaka u ta kuma fomo ya wena ya ndzayo. Tinomboro leti nga emahlweni ka tinhla hi ku hambana-hambana ka tona, ti fambisana ni tidyondzo leti nga eka matluka lama landzelaka. Eka tidyondzo leti u ta kuma nhlamuselo ya leswi lavekaka eka timfanelo toleto ta ku vulavula ni ku dyondzisa, ni lexi endlaka leswaku ha yin’we ya tona yi va ya nkoka. Nakambe u ta kuma nkongomiso lowunene wa ndlela yo endla leswi ringanyetiwaka eka tona.

Mivala leyi nga eka fomo ya ndzayo yi kombisa tinhla leti tirhaka eka xiavelo lexi katsaka (1) ku hlaya emahlweni ka vayingiseri, (2) nkombiso lowu katsaka vanhu vambirhi kumbe ku tlula, kumbe (3) nkulumo evandlheni. Mulanguteri wa xikolo hi yena a nga ta ku avela yinhla leyi u nga ta tirhela eka yona. Swa antswa ku tirhela eka yinhla yin’we ntsena hi nkarhi wo karhi. U ta vuyeriwa swinene loko wo pfuxeta switoloveto leswi ringanyetiweke emakumu ka dyondzo leyi u averiweke yona. Loko wo kombisa leswaku u yi tirhise hi ndlela leyi humelelaka ndzayo leyi nga eka dyondzo yoleyo, mukhomi wa xikolo u ta ku avela yinhla yin’wana.

Loko nkulumo ya wena yi fana ni nkombiso, swi ta lava u yi hlela. Nxaxamelo wa mahlelelo ya rungula wu le ka tluka 82, kambe a swi bohi leswaku u tirhisa nxaxamelo lowu ntsena. Mukhomi wa xikolo a nga ha ringanyeta leswaku u ringeta mahlelelo yo karhi ya rungula leswaku u ta kuma ntokoto, kumbe a nga ha ku tshika u tihlawulela.

Ku hlaya buku leyi ni ku endla switoloveto leswi nga eka yona, hambiloko u nga ri eku lunghiseleleni ka swiavelo swa xikolo, swi nga ku pfuna swinene leswaku u endla nhluvuko. Kumbexana u nga ha tiyimisela ku hlaya dyondzo yo karhi vhiki na vhiki.

Ku nga khathariseki leswaku u ni nkarhi wo tanihi kwihi u ri karhi u nyikela tinkulumo exikolweni kumbe u ya ensin’wini, minkarhi hinkwayo u fanele u endla nhluvuko. Onge u nga vuyeriwa swinene eka dyondzo leyi nyikeriwaka hi Xikolo xa Vutirheli bya le Tilweni.