Ku Hiseka

KU HISEKA ku endla nkulumo yi hanya. Hambileswi swi nga swa nkoka ku va ni rungula leri dyondzisaka, nkulumo leyi hanyaka, leyi nyikeriwaka hi ku hiseka hi yona yi nga ta koka nyingiso wa vayingiseri. Ku nga khathariseki ndhavuko kumbe vumunhu bya wena, u nga swi kota ku hlakulela mfanelo ya ku hiseka.

Vulavula Hi Ntlhaveko Lowu Fambisanaka Ni Mhaka Ya Wena. Loko Yesu a vulavula ni wansati wa Musamariya, u vule leswaku lava va gandzelaka Yehovha va fanele va n’wi gandzela “hi moya ni ntiyiso.” (Yoh. 4:24) Vugandzeri bya vona byi fanele byi susumetiwa hi timbilu leti nga ni ku tlangela byi tlhela byi pfumelelana ni ntiyiso lowu kumekaka eRitweni ra Xikwembu. Loko munhu a ri ni ku tlangela ko entisa xileswi, swi ta vonaka eka ndlela leyi a vulavulaka ha yona. U ta hisekela ku vulavula ni van’wana hi malunghiselelo ya Yehovha ya rirhandzu. Ku languteka ka xikandza xakwe, ku tshukatshuka ka miri wakwe ni rito rakwe swi ta kombisa ndlela leyi a titwaka ha yona hakunene.

Kutani ke, swi endliwa hi yini leswaku xivulavuri lexi rhandzaka Yehovha naswona xi swi pfumelaka leswi xi swi vulaka, nkarhi wun’wana xi nga hiseki loko xi vulavula? A xi fanelanga xi lunghiselela leswi xi nga ta swi vula ntsena. Xi fanele xi pfumelela mhaka leyi yi nghena eka xona, yi va engatini. A hi nge xi averiwe ku vulavula hi gandzelo ra nkutsulo ra Yesu Kreste. Loko xivulavuri xi nyikela nkulumo ya xona, mianakanyo ya xona yi fanele yi tala hi ku tlangela leswi gandzelo ra Yesu ri vulaka swona eka xona hi xoxe ni le ka vayingiseri va xona, ku nga ri ku tala hi vuxokoxoko ntsena. Xi fanele xi kombisa mintlhaveko ya xona ya ku tlangela lunghiselelo ro hlamarisa ra Yehovha Xikwembu na Kreste Yesu. Xi fanele xi anakanya hi ntshembo wo hlamarisa wo kuma vutomi, lowu gandzelo ri endlaka vanhu va va na wona—ku nga ntsako wa hi laha ku nga heriki ni rihanyo leri hetisekeke emisaveni leyi pfuxetiweke yi va paradeyisi! Xisweswo, xi fanele xi endla mbilu ya xona yi katseka.

Malunghana na Ezra lowa mutsari tlhelo mudyondzisi eIsrayele, Bibele yi vula leswaku u “lunghiselele mbilu yakwe leswaku yi kambisisa nawu wa Yehovha ni ku wu endla ni ku dyondzisa xileriso ni vululami eIsrayele.” (Ezra 7:10) Loko ho endla tano—hi nga lunghiseleli rungula ntsena kambe hi lunghiselela ni timbilu ta hina—hi ta vulavula swi huma embilwini. Marito yo tano yo huma embilwini ma nga va pfuna swinene lava hi vulavulaka na vona leswaku va wu rhandza swinene ntiyiso.

Anakanya Hi Vayingiseri Va Wena. Mhaka yin’wana ya nkoka eku kombiseni ka ku hiseka i ku khorwiseka leswaku swi ta va pfuna vayingiseri va wena leswi u nga ta swi vula. Leswi swi vula leswaku loko u lunghiselela rungula ra wena, u nga hlengeleti rungula leri lavekaka ntsena kambe u fanele u kombela ni nkongomiso wa Yehovha hi xikhongelo leswaku rungula ra wena ri ta pfuna lava u nga ta vulavula na vona. (Ps. 32:8; Mat. 7:7, 8) Kumisisa leswaku ha yini rungula leri ri ta pfuna vayingiseri va wena, ndlela leyi ri nga ta va pfuna ha yona ni ndlela leyi u nga ta ri nyikela ha yona leswaku va vona ntikelo wa rona.

Tlhuvutsa nkulumo ya wena ku fikela laha u titwaka u tsaka ha yona. A swi bohi leswaku yi va yintshwa, kambe u nga ha yi veka hi ndlela leyi nga tolovelekangiki. Loko wo lunghiselela nkulumo leyi nga ta va pfuna swinene vayingiseri va wena leswaku va tiyisa vuxaka bya vona na Yehovha, va tlangela malunghiselelo ya yena, va langutana ni mintshikilelo ya vutomi bya sweswi hi ndlela leyi humelelaka kumbe leswaku va humelela entirhweni wa nsimu, kutani u ta va na xona xivangelo xo hisekela nkulumo ya wena.

Ku vuriwa yini hi loko xiavelo xa wena xi ri xa ku hlaya emahlweni ka vanhu? Leswaku u hlaya hi ku hiseka, ku hlaya marito kahle kumbe ku veka marito lama fambisanaka hi ndlela ya kona, a hi swona ntsena swi lavekaka. Dyondza rungula rero. Loko u ta hlaya Bibele, endla ndzavisiso. Tiyiseka leswaku wa swi tiva leswi yi vulaka swona. Tivutise leswaku yi nga ku pfuna njhani wena ni vayingiseri va wena, kutani u yi hlaya hi ndlela leyi yi nga ta swi endla swi va erivaleni eka lava va ku yingiseke.

Xana u lunghiselela ntirho wa nsimu? Pfuxeta mhaka leyi u nga ta vulavula ha yona ni matsalwa lawa u kunguhataka ku ma tirhisa. Nakambe, ringeta ku anakanya hi leswi vanhu va swi ehleketaka. Ta rivala ti ri yini? Hi swihi swiphiqo leswi va langutanaka na swona? Loko u swi lunghekerile ku kombisa vanhu leswaku Rito ra Xikwembu ri ni ntlhantlho wa swiphiqo swa vona, u ta navela ku endla tano, kutani swi ta olova leswaku u hiseka.

Vana La Hanyaka Loko U Nyikela Nkulumo. Ku hiseka ku vonaka kahle loko u nyikela nkulumo ya wena hi ndlela leyi hanyaka. Leswi swi fanele swi vonaka exikandzeni xa wena. U fanele ku twala u khorwisekile, u nga lavi ku vula swo tiviwa hi wena.

Sweswo swi lava ku ringanisela. Van’wana va tala ku nyanyuriwa hi nchumu wun’wana ni wun’wana. Va fanele va pfuniwa ku vona leswaku loko munhu a titlakusa kumbe a nyanyuka ku tlula mpimo, vayingiseri vakwe va ta anakanya ha yena ku ri ni ku anakanya hi leswi a swi vulaka. Hi hala tlhelo, lava va nga ni tingana va fanele va pfuniwa leswaku va vulavula hi ku ntshunxeka.

Ku hiseka ka tlulela. Loko u languta vayingiseri va wena hi mfanelo naswona u hisekela nkulumo ya wena, vayingiseri va wena va ta fambisana ni ku hiseka ka wena. Apolosi a a vulavula hi ndlela leyi hanyaka, kutani ku vuriwa leswaku a a ri xivulavuri lexinene. Loko u pfurha hi moya wa Xikwembu, nkulumo ya wena leyi hanyaka yi ta susumeta lava va ku yingiseke ku teka goza.—Mint. 18:24, 25; Rhom. 12:11.

Ku Hiseka Ku Fanela Mhaka. Lemuka leswaku u nga hiseki ku tlula mpimo eka nkulumo ya wena hinkwayo lerova vayingiseri va wena va kala va karhala. Xikhutazo xihi na xihi lexi u nga ta va nyika xona a va nge he xi twi. Leswi swi kandziyisa ntikelo wo lunghiselela mhaka leyi nga ta ku endla u cinca-cinca loko u vulavula. Ringeta leswaku u nga tsani loko u vulavula. Loko rungula ra wena u ri hlawula hi vukheta, u ta ri hisekela. Kambe tinhla tin’wana ti lava u hiseka swinene eka tona ku tlula tin’wana, kutani u fanele u famba u nghenisa tinhla to tano hi vutlhari enkulumeni ya wena hinkwayo.

Tinhla-nkulu ti lava ku hisekeriwa. Nkulumo ya wena yi fanele yi va ni tindhawu to karhi leti yi fikaka yi hisa swinene eka tona. Leswi tindhawu to tano ti nga ta nkoka swinene eka nkulumo ya wena, hi ntolovelo ti fanele ku va tinhla leti endleriweke ku susumeta vayingiseri va wena. Loko se u va khorwisile vayingiseri va wena, u fanele u va susumeta, leswaku va vona mimpfuno ya ku tirhisa leswi u swi vuleke. Ku hiseka ka wena ku ta ku pfuna leswaku u fikelela timbilu ta vayingiseri va wena. Nkulumo leyi hanyaka hi leyi humaka embilwini. Ku fanele ku va ni xivangelo xa leswaku yi hanya naswona mhaka leyi u vulavulaka ha yona yi nga ku nyika xivangelo xexo.