Ku Vulavula Hi Ndlela Yo Bula

HI NTOLOVELO vanhu va ntshunxeka loko va vulavula ni vanghana. Va vulavula va nga hlayi helo. Eka van’wana, ku vulavula swo va engatini; van’wana va lava ku kala va khwenutiwa kunene leswaku va vulavula. Nilokoswiritano, ku vulavula hi ndlela ya ntumbuluko swa rhandzeka.

Kambe loko u vulavula ni munhu loyi u nga n’wi tiviki, a wu fanelanga u vulavula hi ndlela yo n’wi nghena exikhwameni. Kahle-kahle etindhawini tin’wana loko u vulavula ni munhu loyi u nga n’wi tiviki, minkarhi hinkwayo u fanele u vulavula hi xichavo lexikulu. Loko u n’wi kombe xichavo lexi faneleke, kutani endzhaku u nga sungula ku vulavula hi vuxiyaxiya, u tirhisa ririmi leri tolovelekeke hi ndlela yo bula.

Niloko u vulavula emahlweni ka vandlha, u fanele u va ni vuxiyaxiya. Ku vulavula hi ku ntshunxeka ngopfu swi dzudza ntikelo wa nhlangano wa Vukreste ni leswi swi vuriwaka. Eka tindzimi tin’wana, u fanele u tirhisa swithopo swin’wana loko u vulavula ni munhu lonkulu eka wena, mudyondzisi, mutirhela-mfumo kumbe mutswari. (Xiya marito lama tirhisiweke eka Mintirho 7:2 na 13:16.) Ku tirhisiwa swithopo swin’wana loko ku vulavuriwa ni munghana wa vukati kumbe nakulobye lonkulu. Hambileswi mavulavulelo ya hina emahlweni ka vandlha ma nga fanelangiki ma xiximeka ku tlula mpimo, ma fanele ma kombisa xichavo.

Kambe ku ni swilo leswi nga endlaka leswaku nkulumo ya munhu yi twala yi xiximeka ku tlula mpimo. Xin’wana xa swona i mavekelo ya swiga. Ku va ni xiphiqo loko xivulavuri xi ringeta ku phindha mhaka hilaha yi tsariweke hakona. Marito lama tsariweke hakanyingi a ma fani ni lawa munhu a ma tirhisaka loko a vulavula. I ntiyiso, munhu hakanyingi u lunghiselela nkulumo hi ku tirhisa mhaka leyi tsariweke. Hi ntolovelo nkulumo yi va yi sekeriwe ephepheni leri kandziyisiweke ra nxanxamelo wa tinhla ta xisekelo. Kambe loko u vula mhaka hilaha yi tsariweke hakona kumbe u yi hlaya hi ku kongoma ephepheni ra nxanxamelo wa tinhla ta xisekelo loko u nyikela nkulumo, mavulavulelo ya wena hakanyingi ma ta twala ma nga ri bulo. Leswaku u vulavula hi ndlela yo bula, vula tinhla hi marito ya wena, u papalata ku tirhisa swivulwa swo rharhangana.

Nchumu wun’wana i ku cinca-cinca rivilo ra rito. Ku vulavula hi ririmi ro xiximeka ngopfu hakanyingi swi lava leswaku u vulavula hi ku rhelela ku tlula mpimo, marito lawa u ma tirhisaka ma siyana hi nkarhi wo ringana, naswona u tirhisa rivilo rin’we. Loko u vulavula hi ndlela leyi tolovelekeke, u ta cinca rivilo u tlhela u koka moya hi mpimo wo hambana.

Ina, loko u vulavula ni vayingiseri vo tala hi ndlela yo bula, u fanele u tshivelela nkulumo ya wena hi rito leri tlakukeke, u vulavula hi ntamu ni hi ku hiseka, leswaku u khoma mianakanyo ya vona yi nga tsendzeleki.

Leswaku u vulavula hi ndlela yo bula leyi fanelaka ntirho wa nsimu, u fanele u titoloveta ku vulavula kahle siku na siku. Leswi a swi vuli leswaku u fanele u va la dyondzekeke ngopfu. Kambe i swinene ku tolovela ku vulavula hi ndlela leyi nga ta endla leswaku van’wana va swi yingisela hi xichavo leswi u swi vulaka. Ha ha ri kwalaho, xiya loko u fanele u tirhela eka tinhla leti landzelaka eku vulavuleni ka wena ka siku na siku.

1. Papalata marito lama lwisanaka ni ririmi leri amukelekaka kumbe lama nga ta endla leswaku u fana ni vanhu lava vutomi bya vona byi nga fambisaniki ni misinya ya milawu ya Xikwembu. Ku pfumelelana ni ndzayo leyi kumekaka eka Vakolosa 3:8, papalata mavulavulelo yo pitsula kumbe ya nhlambha. Hi hala tlhelo, mavulavulelo ya siku na siku a ma bihanga. Mavulavulelo yo tano ma fambisana ni ku vulavula loku tolovelekeke.

2. Papalata ku phindha-phindha marito ni swiga swin’we eka mhaka yin’wana ni yin’wana leyi u yi vulaka. Titolovete ku tirhisa marito lama nga ta swi veka kahle leswi u vulaka swona.

3. Papalata ku phindha-phindha mhaka yin’we, hi ku anakanya kahle hi leswi u lavaka ku vula swona; kutani u sungula ku vulavula.

4. Papalata ku phimphela tinhla letinene hi marito yo tala. Loko ku ri ni yinhla leyi faneleke yi tsundzukiwa, titolovete ku yi veka erivaleni hi ku tirhisa xiga xo olova.

5. Vulavula hi ndlela leyi kombaka leswaku wa va xixima vanhu van’wana.