Matirhiselo Lamanene Ya Swilo Swo Dyondzisa Ha Swona

HIKWALAHO ka yini u tirhisa swilo swo dyondzisa ha swona emhakeni ya wena? Hikuva loko u endla tano swi ta endla leswaku ndlela ya wena yo dyondzisa yi va leyi humelelaka. Yehovha Xikwembu na Yesu Kreste a va tirhisa swilo swo dyondzisa ha swona, naswona hi nga dyondza eka vona. Loko swilo swo dyondzisa ha swona swi fambisana ni marito, rungula ri kumiwa hi tindlela timbirhi. Leswi swi nga endla leswaku vayingiseri va wena va ku yingisa kasi ni mhaka leyi u yi vulaka yi ta dzika emianakanyweni ya vona. Xana u nga swi tirhisa njhani swilo swo dyondzisa ha swona loko u ri eku chumayeleni ka mahungu lamanene? Xana u nga tiyiseka njhani leswaku u swi tirhisa hi ndlela leyi pfunaka?

Ndlela Leyi Vadyondzisi Lavakulu Va Swi Tirhiseke Ha Yona Swilo Swo Dyondzisa Ha Swona. Yehovha u tirhise swilo swo dyondzisa ha swona leswi tsundzukekaka hi ku olova loko a dyondzisa tidyondzo ta nkoka. Hi vusiku byin’wana u humesele Abrahama ehandle kutani a ku: “Ndzi kombela u languta ehenhla ematilweni, u hlaya tinyeleti loko u swi kota ku ti hlaya . . . Mbewu ya wena yi ta va tano.” (Gen. 15:5) Hambileswi leswi a swi tshembisiwile a swi vonaka swi nga ta endleka ku ya hi vonelo ra munhu, Abrahama u khumbekile swinene kutani a va ni ripfumelo eka Yehovha. Enkarhini wun’wana, Yehovha u rhumele Yeremiya endlwini ya muvumbi wa timbita, a n’wi nghenisa laha muvumbi a vumbelaka kona timbita ku vona muvumbi loko a endla mbita. Mayana dyondzo leyi nga rivalekiki leyi Muvumbi a kombiseke vulawuri bya yena ha yona eka vanhu! (Yer. 18:1-6) Naswona xana Yonasi a a ta yi rivarisa ku yini dyondzo leyi ya musa leyi Yehovha a n’wi dyondziseke yona hi ku tirhisa ximilana xa xikutsu? (Yon. 4:6-11) Yehovha u kale a byela vaprofeta va yena leswaku va endla drama ya rungula ra vuprofeta hi ku tirhisa swilo leswi faneleke. (1 Tih. 11:29-32; Yer. 27:1-8; Ezek. 4:1-17) Tabernakela ni tempele hi yoxe i swikombiso leswi pfunaka hina ku twisisa swilo swa le matilweni. (Hev. 9:9, 23, 24) Xikwembu xi tlhele xi tirhisa swivono swo tala ku hundzisela rungula ra nkoka.—Ezek. 1:4-28; 8:2-18; Mint. 10:9-16; 16:9, 10; Nhlav. 1:1.

Xana Yesu u swi tirhise njhani swilo swo dyondzisa? Loko Vafarisi ni ntlawa wa valandzeri va Heroda va ringeta ku n’wi phasa hi rungula leri a a ri vula, Yesu u kombele denari kutani a kombetela eka xifaniso xa Khezari lexi nga emalini yoleyo. Kutani u hlamusele leswaku swilo swa Khezari swi fanele swi tlheriseriwa eka Khezari kambe swa Xikwembu swi fanele swi tlheriseriwa eka Xikwembu. (Mat. 22:19-21) Leswaku a hi pfuna ku dzunisa Xikwembu hi swilo hinkwaswo leswi hi nga na swona, Yesu u kombetele eka wansati loyi a a ri etempeleni la nga noni ya xisiwana loyi munyikelo wa yena—swimalana swimbirhi swa nsimbi—a ku ri swo tihanyisa ha swona leswi a nga na swona. (Luka 21:1-4) Ku ni nkarhi wun’wana laha a nga tirhisa n’wana lontsongo tanihi xikombiso xo titsongahata, xo papalata ku navela xikhundla. (Mat. 18:2-6) U tlhele a kombisa leswaku ku titsongahata swi vula yini, hi ku hlambisa vadyondzisiwa vakwe milenge.—Yoh. 13:14.

Tindlela To Tirhisa Swilo Swo Pfuneta Ku Dyondzisa. A hi nge swi koti ku tirhisa swivono loko hi vulavula, hilaha Yehovha a endleke hakona. Kambe swifaniso leswi tlhontlhaka mianakanyo swi tele etibukwini ta Timbhoni ta Yehovha. Swi tirhise ku pfuna vanhu lava tsakelaka leswaku va yi vona hi mahlo ya mianakanyo Paradeyisi ya laha misaveni, leyi tshembisiweke eRitweni ra Xikwembu. Eka dyondzo ya le kaya ya Bibele u nga komba n’wini wa muti xifaniso lexi yelanaka ni leswi mi dyondzaka ha swona, kutani u n’wi kombela a ku byela leswaku u vona yini. Xiya leswaku loko muprofeta Amosi a kombisiwa swivono swo karhi, Yehovha u n’wi vutisile a ku: “Xana u vona yini, Amosi?” (Amo. 7:7, 8; 8:1, 2) U nga ha vutisa swivutiso leswi fanaka loko u komba vanhu swifaniso leswi endleriweke ku pfuneta ku dyondzisa.

Loko u tsala tinhlayo to karhi kumbe u kombisa ntlhandlamano wa swiendlakalo swa nkoka hi ku landza malembe ya swona, leswi swi nga pfuna vanhu ku byi twisisa hi ku olova vuprofeta byo fana na “minkarhi ya nkombo” lebyi kumekaka eka Daniyele 4:16, kun’we na “mavhiki ya 70” ya Daniyele 9:24. Swilo swo tano swo pfuneta ku dyondzisa swa kumeka eka vunyingi bya tibuku ta hina to dyondzisa.

Eka dyondzo ya n’wina ya ndyangu ya Bibele, ku dyondza hi swilo swo fana ni tabernakela, tempele ya le Yerusalema ni tempele leyi voniweke hi Ezekiyele exivon’weni, swi nga mi olovela loko mi tirhisa xifaniso kumbe mpfampfarhuto wa swona. Leswi swi nga kumeka eka Insight on the Scriptures, eka xita-ndzhaku xa New World Translation of the Holy Scriptures—With References, ni le ka minkandziyiso yo hambana-hambana ya Xihondzo xo Rindza.

Loko u dyondza Bibele ni ndyangu wa wena tirhisani mimepe. Landzelerisisani riendzo ra Abrahama ku suka eUra ku ya eHarani ni ku ya eBethele. Kambisisani ndlela leyi tirhisiweke hi Vaisrayele loko va suka aEgipta va ya eTikweni leri Tshembisiweke. Lavani tindhawu leti nyikiweke nyimba ha yin’we ya Israyele tanihi ndzhaka. Vonani laha mfumo wa Solomoni a wu suka kona wu ya boxeketa kona. Landzelelani ndlela leyi Eliya a yi tekeke loko a suka eYizriyele a balekela emananga halahaya ka Bera-xeba, endzhaku ko xungetiwa hi Yezabele. (1 Tih. 18:46–19:4) Langutani madoroba ni miti leyi Yesu a chumayeleke eka yona. Landzelela laha Pawulo a fambeke kona hilaha ku hlamuseriweke hakona ebukwini ya Mintirho.

Swilo swo pfuneta ku dyondzisa i swinene loko u toloveta swichudeni swa Bibele matirhele ya vandlha. U nga ha komba xichudeni xa wena xiyimiso kutani u xi hlamusela leswaku i rungula ra muxaka muni leri ku vulavuriwaka ha rona etinhlengeletanweni ni le mintsombanweni. Vo tala va tsakisiwe swinene hi ku valanga Holo ya Mfumo kumbe hofisi ya rhavi ra Timbhoni ta Yehovha. Leyi ku nga va ndlela leyinene yo susa mavonelo lama hoxeke malunghana ni ntirho wa hina ni xikongomelo xa wona. Loko u n’wi valangisa eHolweni ya Mfumo, n’wi kombise leswaku yi hambana njhani ni tindhawu tin’wana ta vugandzeri. Kandziyisa leswaku i ndhawu leyinene yo dyondzela eka yona. N’wi kombe swilo leswi endleriweke ngopfu ntirho wa hina wo chumayela—tindhawu to kuma tibuku eka tona, mepe wa nsimu ni mabokisi ya munyikelo (ni leswaku ma hambane njhani ni swibye swa minyikelo).

Loko ku ri na tivhidiyo leti hleriweke hi nkongomiso wa Huvo leyi Fumaka, ti kombe swichudeni hi xikongomelo xo swi khutaza ku tshemba Bibele, swi tolovelana ni ntirho wa Timbhoni ta Yehovha, ni ku swi khutaza ku hanya hi misinya ya milawu ya Bibele.

Ku Tirhisa Swilo Swo Pfuneta Ku Dyondzisa Eka Ntlawa Lowukulu. Loko swi lunghiseleriwe kahle ni ku hlamuseriwa hi ndlela leyinene, swilo swo pfuneta ku dyondzisa swi nga pfuna swinene loko u dyondzisa ntlawa lowukulu. Swilo sweswo swo pfuneta ku dyondzisa swi hleriwe hi tindlela to hambana-hambana hi hlonga ro tshembeka ni ro tlhariha.

Swihloko swa Xihondzo xo Rindza leswi dyondziwaka eminhlanganweni ya vandlha hakanyingi swi va swi ri ni swilo swo pfuneta ku dyondzisa swo fana ni swifaniso, leswi nga tirhisiwaka hi mufambisi wa dyondzo ku kandziyisa tinhla ta nkoka. Swi tano ni hi tibuku leti hi ti tirhisaka eDyondzweni ya Buku ya Vandlha.

Maphepha man’wana ya tinkulumo ta le rivaleni ma nga ku pfumelela ku tirhisa swilo swo pfuneta ku dyondzisa loko u kombisa yinhla yo karhi. Hambiswiritano, leswi pfunaka ngopfu i ku tirhisa leswi nga eBibeleni, hikuva vunyingi bya vayingiseri va ta va va tamele ya vona. Loko nkarhi wun’wana ku laveka xifaniso kumbe nxaxamelo wo koma wa tinhla-nkulu leswaku u hlamusela yinhla yin’we ya nkulumo kumbe tinhla to talanyana, tiyiseka ka ha ri emahlweni leswaku swi ta koteka leswaku va swi vona kahle (kumbe ku swi hlaya) lava va tshameke endzhaku. Swipfuneta ku dyondzisa swa muxaka wolowo a swi fanelanga swi tirhisiwa nkarhi na nkarhi.

Xikongomelo xa hina xo tirhisa swilo swin’wana loko hi vulavula ni ku dyondzisa a hi ku lava ku hungasa vanhu. Xilo xo pfuneta ku dyondzisa lexi xiximekaka xi fanele xi tirhisiwa hi xikongomelo xo dzikisa tinhla-nkulu leti lavaka ku kandziyisiwa hi ndlela yo hlawuleka. Swipfuneto sweswo swi tirha ntirho lowukulu loko swi pfuneta ku hlamusela rito, swi ri endla ri olova ku ri twisisa, kumbe loko swi tiyisekisa leswi vuriweke. Swilo leswinene swo pfuneta ku dyondzisa leswi tirhisiweke kahle swi nga kandziyisa mhaka lerova swi sala swi tsundzukiwa nkarhi wo leha, ku tlhela ku tsundzukiwa ni yinhla leyi a swi hlamusela yona.

Vuswikoti byo twa ni ku vona, byi pfuna swinene eku dyondzeni. Ehleketa ndlela leyi switwi leswi swi tirhisiweke ha yona hi Vadyondzisi-nkulu, kutani u ringeta ku tekelela vona loko u ringeta ku pfuna van’wana.