Dyondzo 52
Ndlela Leyinene Yo Khongotela
VAKULU lava nga Vakreste va fanele va kota ku “khongotela, hi dyondzo leyi hanyisaka.” (Tito 1:9) Minkarhi yin’wana va fanele va khongotela tano va langutane ni swiyimo swo tika. I swa nkoka ku nyikela ndzayo hi ku pfumelelana ni vukongomisi bya Matsalwa. Hikwalaho vakulu va fanele va yingisa ndzayo leyi nge: “Yana emahlweni u tinyiketela . . . eku khongoteleni.” (1 Tim. 4:13) Hambileswi laha bulo ra hina ri kongomisiweke ngopfu-ngopfu eka vakulu kumbe lava nga ta va vakulu va mundzuku, ku ni minkarhi leyi vatswari va faneleke va khongotela vana va vona, kasi ni lava va fambisaka tidyondzo ta Bibele va fanele va khongotela swichudeni swa vona swa Bibele. Ni kwalaho ku ta tirha vukongomisi lebyi fanaka.
Laha Nkhongotelo Wu Lavekaka Kona. Leswaku u kota ku vona laha nkhongotelo wu lavekaka kona, swa antswa u kambisisa swikombiso swa le Bibeleni. Muapostola Petro u khongotele vakulu leswaku va hitekela ntirho wa vona wo risa ntlhambi wa Xikwembu. (1 Pet. 5:1, 2) Pawulo u laye Tito leswaku a khongotela va xinuna lava ha tsakamaka leswaku va va lava “hlutekeke emianakanyweni.” (Tito 2:6) Pawulo u khutaze Vakreste-kulobye leswaku va “vulavula hi ku twanana” naswona va papalata lava va lavaka ku hambanisa vamakwavo. (1 Kor. 1:10; Rhom. 16:17; Filp. 4:2) Hambileswi Pawulo a bumabumeleke swirho swa vandlha ra le Tesalonika hikwalaho ka swilo leswinene leswi a ri swi endla, u va khongotele leswaku va wu tirhisa swinene ndzetelo lowu va wu kumeke. (1 Tes. 4:1, 10) Petro u khongotele Vakreste-kulobye ‘leswaku va papalata ku navela ka nyama.’ (1 Pet. 2:11) Yudha u khongotele vamakwavo ku ‘lwa hi matimba va lwela ripfumelo,’ hikwalaho ka nkucetelo wa vanhu lava nga chaviki Xikwembu lava a va tipete emahanyelweni yo biha. (Yudha 3, 4) Vakreste hinkwavo a va khutaziwa ku khongotelana leswaku ku nga vi na loyi a tlanyatiwaka hi matimba ya vuxisi ya xidyoho. (Hev. 3:13) Petro u khutaze Vayuda lava a va nga si va ni ripfumelo eka Kreste a ku: “Ponisiwani eka xitukulwana lexi xo homboloka.”—Mint. 2:40.
Hi tihi timfanelo leti lavekaka leswaku u kota ku khongotela eka swiyimo swo tano? Xana la khongotelaka a nga endla njhani leswaku xikhutazo xa yena xi vonaka xi ri xa xihatla kambe a nga sindzisi vanhu kumbe ku va holovela?
“Exisekelweni Xa Rirhandzu.” Loko xikhongotelo xa hina xi nga nyikeriwi “exisekelweni xa rirhandzu,” xi nga ha tlhava. (Film. 9) I ntiyiso, loko ku laveka leswaku vayingiseri va teka goza ro karhi hi xihatla, nkulumo ya xivulavuri yi fanele yi kombisa leswaku xiyimo xa kona i xa xihatla. Loko xi vulavula hi ndlela yo tsana swi nga ha twala onge xa tisola hi leswi xi swi vulaka. Hi nkarhi lowu fanaka, xikhongotelo xi fanele xi vuriwa hi ku hiseka naswona xi suka embilwini. Ku khongotela hi ndlela ya rirhandzu swi ta khutaza vayingiseri. Loko a vulavula hi yena n’wini swin’we ni vanghana va yena, Pawulo u byele Vatesalonika a ku: “Mi yi tiva kahle ndlela leyi kotisaka leyi tatana a va endlelaka ha yona vana va yena, leyi hi hambeteke hi khongotela ha yona un’wana ni un’wana wa n’wina.” (1 Tes. 2:11) Valanguteri volavo lava nga Vakreste va khutaze vamakwavo hi rirhandzu. Marito ya wena a ma kombise leswaku wa khathala hakunene hi vayingiseri va wena.
Vana ni vuxiyaxiya. Vanhu lava u ringetaka ku va khutaza leswaku va teka goza u nga va tlhavi hi marito. Hi nkarhi lowu fanaka, u nga tshiki ku byela vayingiseri va wena “ndzayo hinkwayo ya Xikwembu.” (Mint. 20:27) Lava va tlangelaka ku layiwa a va nge khunguvanyeki kumbe ku ku venga hikwalaho ka leswi u va khutazeke hi musa leswaku va endla leswinene.—Ps. 141:5.
Hakanyingi, loko u nga si khongotela munhu swa antswa u rhanga hi ku n’wi bumabumela swi huma embilwini. Anakanya hi swilo leswinene leswi vamakwenu va swi endlaka—swilo leswi tsakisaka Yehovha: ripfumelo leri vonakaka hi mintirho ya vona, rirhandzu leri va susumetelaka ku tikarhata, ni ku tiyisela ka vona swiyimo leswi ringaka ripfumelo. (1 Tes. 1:2-8; 2 Tes. 1:3-5) Leswi swi ta pfuna vamakwenu leswaku va swi vona leswaku va rhandziwa naswona va twisisiwa, kutani swi ta endla leswaku va lunghekela ku amukela xikhutazo lexi landzelaka.
“Hi Mbilu Yo Leha Leyi Heleleke.” Xikhutazo xi fanele xi nyikeriwa “hi mbilu yo leha leyi heleleke.” (2 Tim. 4:2) Xana leswi swi katsa yini? Ku leha mbilu swi vula ku tiyisela loko munhu a ku dyohela kumbe a ku tlhontlha. Munhu la lehisaka mbilu u tshama a ri ni ntshembo wa leswaku vayingiseri va yena va ta swi tirhisa leswi a swi vulaka. Ku khongotela hi moya lowu swi ta endla leswaku vayingiseri va wena va nga ehleketi leswaku u va endla vanhu vo biha. Ku tiyiseka ka wena leswaku vamakwenu va lava ku tirhela Yehovha hi mbilu ya vona hinkwayo swi ta endla leswaku va navela ku endla leswinene.—Hev. 6:9.
“Hi Dyondzo Leyi Hanyisaka.” Nkulu a nga khongotela njhani “hi dyondzo leyi hanyisaka”? Hi ku “khomelela swinene eritweni ro tshembeka malunghana ni vutshila byakwe byo dyondzisa.” (Tito 1:9) Ematshan’weni yo vula swo tiva hi wena, khutaza hi ku tirhisa Rito ra Xikwembu. Bibele a yi ku pfune ku twisisa leswi u faneleke u swi vula. Xaxameta tindlela leti hi nga vuyeriwaka ha tona loko hi tirhisa leswi Bibele yi swi vulaka emhakeni leyi u vulavulaka ha yona. Hlamusela hi vuyelo byo biha—bya nkarhi wa sweswi ni bya nkarhi lowu taka—lebyi hi nga ta byi tshovela loko hi nga namarheli Rito ra Xikwembu, kutani u tirhisa byona leswaku u khorwisa vayingiseri va wena hi xilaveko xa ku endla leswi faneleke.
Tiyiseka leswaku u swi andlala erivaleni leswi vayingiseri va faneleke va swi endla ni ndlela leyi va faneleke va swi endla ha yona. Swi veke erivaleni leswaku leswi u swi vulaka swi simekiwe eMatsalweni hi ku helela. Loko Matsalwa ma ku ntshunxa leswaku u tiendlela xiboho emhakeni yo karhi, swi veke erivaleni leswaku ya ku ntshunxa ku fikela kwihi. Kutani, loko u gimeta, dlayelela hi marito lama khutazaka vayingiseri va wena leswaku va hambeta va endla leswi faneleke.
Hi ‘Ntshunxeko Wo Vulavula.’ Leswaku munhu a khongotela van’wana hi ndlela leyi fikelelaka mbilu, u fanele a va ni “ntshunxeko . . . wo vulavula eripfumelweni.” (1 Tim. 3:13) I yini lexi endlaka leswaku munhu a vulavula a ntshunxekile? Hi loko “xikombiso xa mintirho [ya yena] leyinene” xi pfumelelana ni leswi a khutazaka vamakwavo ku swi endla. (Tito 2:6, 7; 1 Pet. 5:3) Loko swi te tano, lava va khutaziwaka ku endla xo karhi va ta swi xiya leswaku loyi a va khutazaka a nga langutelanga leswaku va endla leswi yena a nga swi endliki. Va ta vona xilaveko xo tekelela ripfumelo ra yena tanihi leswi na yena a tikarhatelaka ku tekelela Kreste.—1 Kor. 11:1; Filp. 3:17.
Xikhongotelo lexi sekeriweke eRitweni ra Xikwembu xi tlhela xi nyikeriwa hi moya wa rirhandzu xi nga pfuna swinene. Lava nga ni vutihlamuleri byo khongotela va fanele va tikarhatela ku khongotela hi ndlela leyinene.—Rhom. 12:8.