Xana U Lava Ku Tiva Swo Tala Hi Bibele?

Ha Yini U Hlaya Bibele?

A KU na buku yin’wana leyi fanaka na Bibele, hikuva yona yi ni nkongomiso wa rirhandzu lowu humaka eka Xikwembu. (1 Vatesalonika 2:13) Loko u tirhisa leswi Bibele yi swi dyondzisaka, u ta pfuneka swinene. Rirhandzu leri u nga na rona eka Xikwembu ri ta kula naswona u ta va ni vuxaka lebyikulu na xona, tanihi Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yakobo 1:17) U ta tiva ndlela leyi u nga xi khongelaka ha yona. Loko u langutane ni maxangu, u ta lemuka ndlela leyi Xikwembu xi ku pfunaka ha yona. Loko u endla leswaku vutomi bya wena byi pfumelelana ni misinya ya milawu leyi hlamuseriweke eBibeleni, Xikwembu xi ta ku nyika vutomi lebyi nga heriki.—Varhoma 6:23.

Bibele yi tamele ntiyiso lowu voningelaka. Lava va kumaka vutivi bya Bibele, va huma emunyameni wa tidyondzo leti hoxeke lowu vanhu va timiliyoni va ngwingwaka eka wona. Hi xikombiso, ku tiva ntiyiso malunghana ni leswi humelelaka hi munhu loko a file, swa hi ntshunxa leswaku hi nga chavi leswaku lava feke va nga hi komba xa ncila wa bulubulu kumbe leswaku maxaka ya hina ni vanghana lava feke va cangayila lomu va nga kona. (Ezekiyele 18:4) Dyondzo ya Bibele malunghana ni ku pfuxiwa ka lava feke yi chavelela lava feriweke hi varhandziwa va vona. (Yohane 11:25) Ku tiva ntiyiso malunghana ni tintsumi leto homboloka swi hi pfuna ku papalata makhombo ya vungoma, naswona swi hi pfuna ku twisisa xivangelo xa ku va ku ri ni maxangu yo tala emisaveni.

Misinya ya milawu ya Xikwembu leyi nga eBibeleni yi hi komba mukhuva wo hanya hi ndlela leyi vuyerisaka enyameni. Hi xikombiso, ku “ringanisela emikhuveni” ku pfuna munhu leswaku a va ni rihanyo lerinene. (1 Timotiya 3:2) Loko hi ‘tibasisa eka swilo hinkwaswo leswi nyamisaka nyama ni moya,’ hi papalata ku onha rihanyo ra hina. (2 Vakorinto 7:1) Ku tirhisa ndzayo ya Xikwembu leyi kumekaka eBibeleni nakambe swi tisa ntsako evukatini, swi tlhela swi endla leswaku munhu a tixixima.—1 Vakorinto 6:18.

Loko u tirhisa Rito ra Xikwembu, u ta va munhu la tsakeke. Vutivi bya Bibele byi hi pfuna ku kuma ku rhula ka le ndzeni ni ku eneriseka, naswona byi hi nyika ntshembo. Byi hi pfuna ku antswisa timfanelo letinene to tanihi ntwela-vusiwana, rirhandzu, ntsako, ku rhula, musa ni ripfumelo. (Vagalatiya 5:22, 23; Vaefesa 4:24, 32) Timfanelo to tano ti pfuna munhu leswaku a va wanuna kumbe wansati wo antswa, tatana kumbe manana wo antswa, jaha kumbe nhwana wo antswa.

Xana u tshama u tivutisa hi ta vumundzuku? Vuprofeta bya Bibele byi hi komba leswaku hi hanya enkarhini wa nkoka swinene ematin’wini ya vanhu. Vuprofeta lebyi byi hlamusela xiyimo xa misava namuntlha byi tlhela byi komba leswaku ku nga ri khale Xikwembu xi ta hundzula misava yi va paradeyisi.—Nhlavutelo 21:3, 4.

Mpfuno Wo Twisisa Bibele

Kumbexana u ringete ku hlaya Bibele kambe swi ku tikela ku yi twisisa. Kumbexana a wu tivi leswaku u nga languta kwihi eBibeleni leswaku u kuma tinhlamulo ta swivutiso swa wena. Loko swi ri tano, a hi wena ntsena. Hinkwerhu hi lava ku pfuniwa leswaku hi twisisa Rito ra Xikwembu. Vanhu va timiliyoni va dyondzisiwa Bibele mahala hi Timbhoni ta Yehovha, ematikweni ya kwalomu ka 235. Na wena ti nga swi tsakela ku ku pfuna.

Hakanyingi swa antswa ku dyondza Bibele hakatsongo-tsongo, u sungula hi tidyondzo ta xisekelo. (Vaheveru 6:1) Loko u ri karhi u ya emahlweni, swi ta ku olovela ku dya “swakudya leswi tiyeke”—ku nga ntiyiso lowu dzikeke. (Vaheveru 5:14) Bibele hi yona xihlovo lexi tirhisiwaka ngopfu emhakeni leyi. Minkandziyiso leyi sekeriweke eBibeleni, yo tanihi broxara leyi nge I Yini Leswi Xikwembu Xi Swi Languteleke Eka Hina?, yi ta ku pfuna leswaku u twisisa leswi Matsalwa ma vulaka swona malunghana ni timhaka to hambana-hambana.

Xana Wa Swi Rhandza Leswaku Vhiki Rin’wana Ni Rin’wana U Tinyika Nkarhi Wa Ku Twisisa Bibele?

Hakanyingi ku nga endliwa malunghiselelo yo dyondza Bibele hi nkarhi lowu u wu tsakelaka, ni le ndhawini leyi u yi rhandzaka. Vo tala ku dyondziwa na vona emakaya ya vona. Van’wana ku dyondziwa na vona hi riqingho. Dyondzo ya kona a hi ya ntlawa wa vanhu vo tala, kambe yi va yi kongomane na wena hi ku pfumelelana ni swiyimo swa wena, ku katsa ni xikalo xa vutivi ni ku dyondzeka ka wena. A ku tsariwi swikambelo, naswona a wu nge susiwi xindzhuti. Swivutiso leswi u nga na swona hi Bibele swi ta hlamuriwa, naswona u ta dyondza ndlela yo va ni vuxaka lebyikulu na Xikwembu.

A wu hakerisiwi nchumu eka dyondzo yo tano ya Bibele. (Matewu 10:8) Yi dyondzisiwa mahala eka vanhu va vukhongeri hinkwabyo ni lava nga riki va vukhongeri byo karhi, lava hakunene va tsakelaka ku kuma vutivi lebyi engetelekeke hi Rito ra Xikwembu.

I vamani lava nga hlanganyelaka edyondzweni leyi? I vandyangu wa wena hinkwavo. Vanghana va wena hinkwavo lava u va hlawulaka na vona va nga hlanganyela. Kumbe loko u swi lavisa sweswo, ku nga dyondziwa na wena ntsena.

Vo tala va va ni awara leyi va yi vekelaka ku dyondza Bibele vhiki na vhiki. Loko u ta swi kota ku dyondza nkarhi lowu engetelekeke kumbe xiyimo xa wena xi nga ku pfumeleli ku dyondza awara vhiki rin’wana ni rin’wana, Timbhoni ti ta ku pfuna.

Xirhambo Xa Ku Dyondza

Hi ku khutaza leswaku u tihlanganisa na Timbhoni ta Yehovha. Ndlela yin’wana yo endla tano i ku tsalela eka adirese leyi nga laha hansi. Kutani ku ta endliwa malunghiselelo ya leswaku ku ta un’wana a ta dyondza Bibele na wena ekaya ra wena.

□ Ndzi kombela mi ndzi tisela broxara leyi nge I Yini Leswi Xikwembu Xi Swi Languteleke Eka Hina?

□ Ndzi kombela mi tihlanganisa na mina malunghana ni dyondzo ya le kaya ya Bibele ya mahala.

Handle ka mfungho, ku tshaha hinkwako ka le Bibeleni ku tekiwe eka Vuhundzuluxeri Bya Misava Leyintshwa Bya Matsalwa Yo Kwetsima.