Ndzima Ya Vumakumembirhi-n’we
Xikongomelo Xa Yehovha Xi Hetiseka Hi Ndlela Leyi Vangamaka
1, 2. (a) Hi xihi xikongomelo xa Yehovha malunghana ni swivumbiwa swa yena leswi twisisaka? (b) Xana i vamani lava a va ri swirho swa ndyangu wa Xikwembu, lava va xi gandzelaka hi vun’we?
XIKONGOMELO xa Yehovha hi leswaku swivumbiwa hinkwaswo leswi twisisaka swi gandzela Xikwembu xi ri xin’we xa ntiyiso hi vun’we, naswona hinkwaswo swi tiphina hi ntshunxeko lowu vangamaka tanihi vana va Xikwembu. Nakambe, leswi hileswi varhandzi va leswo lulama va swi rindzeleke hi mahlo-ngati.
2 Yehovha u sungule ku hetisisa xikongomelo lexi, lexi vangamaka loko a sungula ntirho wa yena wo tumbuluxa. U sungule hi ku tumbuluxa N’wana wa yena, loyi ku sukela loko a pfuxiwile eku feni, a nga “xikombiso xa ku vangama ka [Xikwembu] ni xifaniso [xa] xiviri xa [xona].” (Vaheveru 1:1-3) N’wana loyi a a hlawulekile, hikuva u tumbuluxiwe hi Xikwembu xi ri xoxe. Xisweswo, vanhu lavan’wana hinkwavo a va ta endliwa hi N’wana loyi: a ta rhanga hi tintsumi etilweni, kutani endzhaku a endla vanhu emisaveni. (Yobo 38:7; Luka 3:38) Lava hinkwavo a va endla ndyangu wun’we wa vuako hinkwabyo. Yehovha Hosi ya Vuako Hinkwabyo, a a ri Xikwembu xa vona hinkwavo ni Tata wa vona la rhandzekaka.
3. (a) Xana hi yihi ndzhaka leyi hinkwerhu ka hina hi yi kumeke eka vatswari va hina vo sungula? (b) Hi rihi lunghiselelo leri Yehovha a ri endleleke vana va Adamu?
3 Endzhaku ka loko vatswari va hina vo sungula va dyohe hi vomu, va avanyiseriwe rifu kutani va hlongoriwa aEdeni, va tlhela va fularheriwa hi Xikwembu. A a va nga ha ri swona swirho swa ndyangu wa xona wa vuako hinkwabyo. (Genesa 3:22-24; Deteronoma 32:4, 5) Hinkwerhu ka hina hi vana va vona naswona hi tswariwe hi ri ni mboyamelo wa vudyoho. Kambe Yehovha a a swi tiva leswaku ku ni van’wana exikarhi ka vana va Adamu na Evha lava nga ta rhandza vululami. Kutani hi rirhandzu rakwe U endle lunghiselelo ra leswaku vanhu volavo va kuma “ntshunxeko lowu vangamaka wa vana va Xikwembu.”—Varhoma 8:20, 21.
Tiko Ra Israyele Ri Lahlekeriwa Hi Tintswalo
4. Hi rihi lunghelo leri Yehovha a ri nyikeke Vaisrayele va khale?
4 Endzhaku ka malembe ya kwalomu ka 2 500 ku sukela loko Adamu a vumbiwile, Yehovha u nyike vanhu vokarhi lunghelo ro va ni vuxaka byo hlawuleka na Yena. U hlawule Vaisrayele va khale leswaku va va tiko ra yena kutani a va nyika Nawu wa yena. (Genesa 12:1, 2) U va endle va va tiko naswona a va tirhisela ku hetisisa xikongomelo xa yena. (Deteronoma 14:1, 2; Esaya 43:1) Hambiswiritano, a va ha ri evuhlongeni bya xidyoho ni rifu, kutani a va tiphinanga hi ntshunxeko wo vangama lowu Adamu na Evha a va ri na wona eku sunguleni.
5. Xana Vaisrayele byi va lahlekele njhani vuxaka bya vona byo hlawuleka ni Xikwembu?
5 Hambiswiritano, Vaisrayele a va amukeleka eka Xikwembu. Nakambe a va ri ni vutihlamuleri byo xixima Yehovha tanihi Tata wa vona ni ku hanya hi ku pfumelelana ni xikongomelo xa yena. Yesu u kandziyise nkoka wa ku hetisisa ka vona vutihlamuleri byolebyo. (Matewu 5:43-48) Hambiswiritano, tiko ra Israyele ri tsandzekile ku endla leswi. Hambileswi Vayuda a va ku, “hi ni Tatana un’we, ku nga Xikwembu,” Yesu u vule leswaku swiendlo swa vona ni moya lowu va wu kombiseke, swi kanetana ni leswi va swi vulaka. (Yohane 8:41, 44, 47) Hi 33 C.E., Xikwembu xi herise Nawu, walawo a ma ri makumu ya vuxaka bya xona byo hlawuleka ni Vaisrayele. Kambe xana leswi a a swi vula leswaku vanhu a va nge pfuki va ve na byona vuxaka lebyinene ni Xikwembu?
Ku Hlengeletiwa Ka “Swilo Swa Le Tilweni”
6. Hi xihi xikongomelo xa “vukongomisi” lebyi Pawulo a vulavuleke ha byona eka Vaefesa 1:9, 10?
6 Muapostola Pawulo u kombise leswaku van’wana exikarhi ka vanhu va nga swi kota ku tiphina hi vuxaka byo hlawuleka ni Xikwembu. Hi xikombiso, malunghana ni lunghiselelo ra Yehovha ra leswaku lava va kombisaka ripfumelo, va nga va swirho swa ndyangu wa Yena, Pawulo u tsarile: “[Xikwembu xi] hi tivisa xihundla xo kwetsima xa ku rhandza ka xona. Swi fambisana ni leswi tsakeriwaka hi xona hi ku ya hi xikongomelo xa xona leswaku ku va ni vukongomisi eku heleni ka minkarhi leyi vekiweke, bya ku hlengeleta swilo hinkwaswo nakambe eka Kreste, swilo swa le tilweni ni swilo swa le misaveni.” (Vaefesa 1:9, 10) “Vukongomisi” byi endliwa hi Yesu Kreste. Hikwalaho ka yena vanhu va endliwa va amukeleka eka Xikwembu. Nhlayo leyintsongo ya vona yi ni ntshembo wo ya etilweni. Kasi nhlayo leyikulu yi ta hanya laha misaveni hilaha ku nga heriki.
7. Xana i vamani “swilo swa le tilweni”?
7 Xo sungula, ku sukela hi Pentekosta ya 33 C.E., a ku hlengeletiwa “swilo swa le tilweni,” ku nga vadyandzhaka swin’we na Kreste eMfun’weni wa le tilweni. Leswi va kombiseke ripfumelo eka ntikelo wa gandzelo ra Yesu, va vuriwe lava lulameke hi Xikwembu. (Varhoma 5:1, 2) Hi ku famba ka nkarhi, ku hlanganisiwe Vayuda ni Vamatiko, kutani “swilo swa le tilweni” a swi ta endla nhlayo ya 144 000. (Vagalatiya 3:26-29; Nhlavutelo 14:1) Laha misaveni ku ni maselela ya vona ntsena.
Ku Hlengeletiwa Ka “Swilo Swa Le Misaveni”
8. Xana i vamani “swilo swa le misaveni,” naswona hi byihi vuxaka bya vona na Yehovha?
8 Vukongomisi lebyi fanaka byi tlhela byi hlengeleta “swilo swa le misaveni.” Sweswi, timiliyoni ta vanhu, ti hlengeletiwa ti ri ni ntshembo wo hanya laha misaveni hilaha ku nga heriki. Tona swin’we ni masalela ya vadyandzhaka va Mfumo, va twarisa vito ra Yehovha ni ku tlakusa vugandzeri bya yena. (Esaya 2:2, 3; Sofaniya 3:9) Nakambe va vitana Yehovha va ku i “Tatana” hikuva va swi xiya leswaku hi yena a nga xihlovo xa vutomi. Naswona va amukeleka eka yena hikwalaho ka leswi va nga ni ripfumelo engatini ya Yesu leyi halatiwe. (Nhlavutelo 7:9, 14) Kambe leswi va nga hetisekangiki, va ta va vana va Xikwembu hi ku hetiseka enkarhini lowu taka.
9. Hi xihi xitshembiso lexi Varhoma 8:21 yi xi tshembisaka vanhu?
9 Lava va nga ni ntshembo wa laha misaveni sweswi va rindzeke nkarhi lowu vanhu va nga ta “ntshunxiwa evuhlongeni bya ku onhaka.” (Varhoma 8:21) Ntshunxeko wolowo wu ta sungula endzhaku ka loko Kreste ni mavuthu yakwe ya le tilweni va herise nhlomulo lowukulu hi nyimpi ya Armagedoni. Leswi swi ta vula ku lovisiwa ka mafambiselo hinkwawo yo homboloka ya Sathana, loku ku nga ta landzeriwa hi mikateko ya Ku Fuma ka Kreste ka Gidi ra Malembe ematimbeni ya Mfumo.—Nhlavutelo 19:17-21; 20:6.
10. Hi rihi risumu ra ku dzunisa leri malandza ya Yehovha ma nga ta ri yimbelela?
10 Hakunene swi ta tsakisa loko malandza ya Yehovha ya hlangane hi vun’we kutani ma phindha marito ya malandza ya yena ya le tilweni, lama huweleleke hi ku tsaka ma ku: “Yikulu naswona ya hlamarisa mintirho ya wena, Yehovha Xikwembu, xa Matimba Hinkwawo. Tindlela ta wena ti lulamile naswona i ta ntiyiso, wena Hosi leyi nga riki na makumu. Kunene, i mani la nga ta ka a nga ku chavi, Yehovha, a vangamisa vito ra wena, hikuva hi wena ntsena u tshembekeke? Hikuva matiko hinkwawo ma ta ta ma ta gandzela emahlweni ka wena, hikuva swileriso swa wena swo lulama swi kombisiwile.” (Nhlavutelo 15:3, 4) Ina, malandza hinkwawo ya Yehovha ma ta hlangana leswaku ma gandzela Xikwembu xi ri xin’we xa ntiyiso. Hambi ku ri lava feke va ta pfuxiwa ni ku nyikiwa nkarhi wo hlanganyela eka tinsimu ta ku dzunisa Yehovha.—Mintirho 24:15.
Ntshunxeko Wo Hlamarisa Wu Le Kusuhi
11. Hi wihi ntshunxeko wo hlamarisa lowu lava va poneke nhlomulo lowukulu va nga ta tiphina ha wona?
11 Endzhaku ka nhlomulo lowukulu, ni loko nhlonhlorhi ya wona ya Armagedoni se yi suse vuhomboloki emisaveni, Sathana Diyavulosi a nge he vi “xikwembu xa mafambiselo lawa ya swilo.” Vagandzeri va Yehovha a va nge he boheki ku lwa ni nkucetelo wa Sathana wo biha. (2 Vakorinto 4:4; Nhlavutelo 20:1, 2) Vukhongeri bya mavunwa a byi nge he ri onhi vito ra Yehovha naswona a byi nge endli leswaku vanhu va avana. Malandza ya Xikwembu xa ntiyiso a ma nge he langutani ni vuhomboloki swin’we ni ku dyeleriwa hi valawuri va tiko. Hakunene va ta tiphina hi ntshunxeko wo hlamarisa!
12. Xana hinkwerhu hi ta ntshunxiwa njhani eka xidyoho ni mimbuyelo ya xona?
12 Tanihi “Xinyimpfana xa Xikwembu lexi susaka xidyoho xa misava,” Yesu u ta tirhisa ntikelo wa gandzelo ra yena ku herisa swidyoho swa vanhu. (Yohane 1:29) Loko Yesu a ha ri laha misaveni kutani a rivalela swidyoho swa munhu, a a n’wi horisa ku kombisa leswaku u n’wi rivalerile. (Matewu 9:1-7; 15:30, 31) Hi mukhuva lowu fanaka, Kreste Yesu, tanihi Hosi ya Mfumo wa Xikwembu ya le tilweni, hi singita u ta horisa lavo-fe-mahlo, timbeveve, lava nga twiki, lava nga lamala, lava vabyaka emianakanyweni ni lava va nga ni mavabyi man’wana. (Nhlavutelo 21:3, 4) “Nawu wa xidyoho” wu ta herisiwa eka hinkwavo lava yingisaka,naswona mianakanyo ni swiendlo swa vona swi ta va leswi tsakisaka eka vona ni le ka Xikwembu. (Varhoma 7:21-23) Loko ku hela Gidi ra Malembe, va ta va se va hetisekile, va ri ‘xifaniso naswona va fana’ ni Xikwembu xi ri xin’we xa ntiyiso.—Genesa 1:26.
13. Eku heleni ka Ku Fuma ka Gidi ra Malembe, xana Kreste u ta endla yini naswona vuyelo bya kona ku ta va byihi?
13 Loko Kreste se a endle vanhu va hetiseka, u ta vuyisela vulawuri lebyi a nyikiweke byona, ku endla ntirho lowu ekaTata wa yena: “A nyiketa mfumo eka Xikwembu tlhelo Tata wa yena, loko a herise hulumendhe hinkwayo ni vulawuri ni vuhosi hinkwabyo. Hikuva u fanele a va hosi ku fikela loko Xikwembu xi veke valala hinkwavo ehansi ka milenge ya yena.” (1 Vakorinto 15:24, 25) Ku Fuma ka Gidi ra Malembe ku ta va se ku xi hetisisile xikongomelo xa kona; kutani a ku nge he vi ni xilaveko xa leswaku hulumendhe leyi yo khomela yi hambeta yi va kona exikarhi ka Yehovha ni vanhu. Tanihi leswi xidyoho ni rifu swi nga ta va swi susiwile hi ku helela ni vanhu va kutsuriwile, kutani xilaveko xa leswaku Yesu a va Mukutsuri xi va xi nga ha ri kona. Bibele ya hlamusela: “N’wana na yena u ta tiveka ehansi ka xona lexi vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.”—1 Vakorinto 15:28.
14. Xana vanhu lava hetisekeke hinkwavo va ta vekiwa ehansi ka yini, naswona hikwalaho ka yini?
14 Endzhaka ku ka sweswo, vanhu lava hetisekeke va ta nyikiwa nkarhi wo kombisa leswaku va hlawula ku gandzela Xikwembu xi ri xin’we xa ntiyiso hilaha ku nga heriki. Hikwalaho, loko a nga si va amukela hi ku helela tanihi vana va yena, Yehovha u ta veka vanhu hinkwavo lava hetisekeke eka ndzingo wo hetelela. Sathana ni madimona yakwe va ta ntshunxiwa ekheleni ro enta. Hinkwavo lava rhandza Yehovha hakunene va ta tshama va tshembekile. Kambe lava nga tshembekiki, va tshika ku yingisa Yehovha, va ta loviseriwa makumu swin’we ni muxandzuki wo sungula ni madimona yakwe.—Nhlavutelo 20:7-10.
15. Hi xihi xiyimo lexi nga ta tlhela xi va kona exikarhi ka swivumbiwa hinkwaswo swa Yehovha leswi twisisaka?
15 Kutani vanhu hinkwavo lava hetisekeke, lava va seketeleke vuhosi bya Xikwembu eka ndzingo wo hetelela, Yehovha u ta va amukela tanihi vana vakwe. Ku sukela enkarhini wolowo, va ta ti phina hi ntshunxeko lowu vangamaka wa vana va Xikwembu tanihi hi xiphemu xa ndyangu wa Xikwembu wa vuako hinkwabyo. Swivumbiwa hinkwaswo leswi twisisaka leswi nga etilweni ni le misaveni swi ta tlhela swi hlangana eku n’wi gandzeleni tanihi Xikwembu xi ri xin’we xa ntiyiso. Xikongomelo xa Yehovha xi va xi hetiseke hi ndlela leyi vangamaka! Xana wa swi lava ku va xirho xa ndyangu wolowo lowu tsakeke, lowu nga ta tshama hi masiku, wa vuako hinkwabyo? Loko swi ri tano, hi ku khutaza leswaku u yingisa leswi Bibele yi swi vulaka eka 1 Yohane 2:17, leyi nge: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.”
Mpfuxeto
• Loko va nga si xandzuka aEdeni, xana vagandzeri hinkwavo va Yehovha a va ri ni vuxaka byihi na yena?
• Hi byihi vutihlamuleri lebyi malandza ya Xikwembu ma nga na byona?
• Xana i vamani lava nga ta va vana va Xikwembu enkarhini lowu taka, naswona leswi swi fambisana njhani ni xikongomelo xa Yehovha malunghana ni ku gandzela hi vun’we?
[Xifaniso lexi nga eka tluka 190]
Vanhu lava yingisaka va ta tiphina hi ku hanya eparadeyisini