Ndzima 22
Xikwembu Xa “Hosana Ya Ku Rhula” Xi Va “Hinkwaswo Eka Hinkwavo”
1. Yesu Kriste u vekele swivumbiwa swin’wana hinkwaswo ematilweni ni la misaveni xikombiso eka yini?
HI KU hatlisa endzhaku ka ku pfuxiwa ka yona, “Hosana ya ku Rhula” yi byele un’wana wa vadyondzisiwa va yona yi ku: “Ndzi tlhandlukela eka Tata wa mina, a nga Tata wa n’wina, eka Xikwembu xa mina, xi nga Xikwembu xa n’wina.” (Yohane 20:17) Hi marito wolawo u xiye leswaku Tata wakwe wa le tilweni na yena a a ri Xikwembu xa yena, Loyi a gandzeleke yena ntsena. Evugandzerini byo tano u vekele swivumbiwa swin’wana hinkwaswo xikombiso ematilweni na le misaveni.
2, 3. (a) 1 Vakorinto 15:24-26, 28 yi hlamusela xiendlo lexi hlawulekeke xa Yesu xo titsongahata eka Tata wakwe hi ndlela yihi? (b) Vuyelo lebyinene byi ta va byihi?
2 Mawaku xikombiso lexinene swonghasi lexi “Hosana ya ku Rhula” yi nga ta va xona eka vanhu hinkwavo lava hetisekeke loko hi ku tshembeka yi tiveka ehansi ka Loyi a nga Mufumi lonkulu wa misava hinkwayo hi ndlela yo hlawuleka! Leswi swi ta hlavuteriwa hi laha ku nga ringanisiwiki eku heleni ka ku Fuma kakwe ka Gidi ra Malembe ehenhla ka vanhu, loko a ta va a pfuxete ku rhula, nsirhelelo ni ntwanano emisaveni hinkwayo. Evuprofeteni lebyi nga hoxisiki, hi tshembisiwa leswi:
3 “Endzhaku, ku ta fika makumu, siku a nyiketaka Mfumo eka Xikwembu Tatana, loko a ta va a herisile vuhosi hinkwabyo, ni ku fuma hinkwako, ni matimba hinkwawo. Hikuva Kriste ú fanele ku fuma, Xikwembu xi kondza xi veka valala hinkwavo ehansi ka minkondzo ya yena. Kutani nala lowo hetelela la nga ta herisiwa i rifu. Loko hinkwaswo swi vekiwile ehansi ka yena N’wana, na yena hi xiviri ú ta vekiwa ehansi ka Xikwembu lexi xi vekeke hinkwaswo ehansi ka yena, leswaku Xikwembu xi va lexi fumaka ehenhla ka hinkwaswo-kwaswo.” (1 Vakorinto 15:24-26, 28) Kumbe hi laha The Amplified Bible yi hundzuluxelaka xiphemu xo hetelela xa ndzimana 28 ha kona: “Leswaku Xikwembu xi ta va hinkwaswo-nkwaswo—hi leswaku, xi va hinkwaswo eka hinkwavo, la tlakukeke, ku nga mhaka leyi nga ni matimba ni leyi lawulaka ya vutomi.”
4. (a) Vaaki va misava va ta xi amukerisa ku yini xikombiso xa Tata wa vona wa muwundli? (b) I mhaka yihi leyintshwa yo titsongahata leyi nga ta va kona enkarhini wolowo?
4 Loko “Hosana ya ku Rhula” yi hundzisela Mfumo eka Xikwembu xa yona eku heleni ka ku Fuma ka Gidi ra Malembe, vaaki va misava va ta endliwa leswaku va vona xiendlo lexi xa Tata wa vona wa muwundli. Va ri na yena tanihi Xikombiso xa Vuhosi, hi ku fanana va ta tiveka ehansi ka mhaka leyintshwa ya Xikwembu lexi Tlakukeke. Manuku ro sungula va ta nyikela ku titsongahata ka rirhandzu hi ku kongoma eka Yehova, ina, vugandzeri, hi ku tiyiseka hinkwako na hi ntiyiso, va nga ha lavi mintirho ya vuprista bya Yesu, hambi loko va khongela.
5. Langutelo ra tihosi-kulobye na Yesu Kriste ta 144 000 ri ta va rihi xana?
5 Hi ndlela leyi Xikwembu lexi Tlakukeke nakambe xi va Hosi ehenhla ka misava hinkwayo xi ri hava muyimeri wa xona wa le vuhosini ematilweni kumbe emisaveni. Swi le rivaleni leswaku tihosi-kulobye ta 144 000 leti Yesu Kriste a ti kutsuleke emisaveni na tona ti ta nkhinsama emahlweni ka Mufumi Lonkulu naswona hi ku twisiseka loku ku engetelekeke ti ta n’wi xiya a ri Hosi ya Misava Hinkwayo.
Ndzingo Wo Hetelela Ehenhla Ka Vanhu Hinkwavo
6. (a) I yini lexi nga ta humelela eka vanhu lava xandzukaka enkarhini wa Vulawuri bya Gidi ra Malembe bya Yesu? (b) Xiyimo xa lavaya Yesu a va yisaka eka Tata wakwe wa le tilweni xi ta va xihi?
6 Hi ku xiya Yehova tanihi Muavanyisi la Tlakukeke, Yesu Kriste u navela leswaku ku amukeriwa hinkwako ka Xikwembu ka ntikelo ku kombisiwa ehenhla ka ntirho lowu Yesu a wu endleke enkarhini wa Vulawuri byakwe bya Gidi ra Malembe. Enkarhini wa vulawuri byebyo, vanhu lava aleke ku pfumelelana ni swilaveko swo lulama ni lava va kombiseke ku delela Hosi va ta va va herisiwile. Xisweswo, lava Yesu Kriste a va yisaka eka Yehova, Muavanyisi wo hetelela, va ta va vanhu lavaya va yingisaka lava kumeke ku hetiseka ka vanhu.
7. (a) I yini lexi nga ta vekiwa endzingweni lowu lavisisaka endzhaku ka loko Yesu a tlherisele Mfumo? (b) Vanhu lava endliweke lava hetisekeke va ta vekisiwa ku yini endzingweni wolowo?
7 Eyinhleni yoleyo i nkarhi wa leswaku ku tinyiketa loku tiyeke ka vanhu malunghana ni Hosi ya Misava Hinkwayo, Yehova Xikwembu, ku ringiwa. Tanihi le mhakeni ya Yobo, xivutiso hi lexi: Xana va gandzela ni ku rhandza Xikwembu hikwalaho ka swilo hinkwaswo leswinene leswi va endleriweke swona ntsena, kumbe va xi rhandza hikwalaho ka leswi xi nga swona hi xoxe—Mufumi wo Lulama wa misava hinkwayo? (Yobo 1:8-11) Kambe xana vanhu lava hetisekeke va ta vekisiwa ku yini endzingweni wa ku tshembeka ka mbilu ke? Bibele ya hlamula: Sathana Diyavulosi ni mademona yakwe va ta ntshunxiwa “nkarhinyana” ekheleni leri va khotsiweke eka rona hi Gidi ra Malembe. (Nhlavutelo 20:3) Hi ku pfumelela Diyavulosi ku ringa vanhu lava kondleteriweke, swirho swa vanhu lava hetisekeke swi nga kombisiwa malunghana ni vutshembeki bya swona bya munhu hi xiyexe eka Xikwembu hi langutelo leri hetisekeke.—Ringanisa Yobo 1:12.
8. (a) Loko va ntshunxiwile ekheleni, Sathana ni mademona yakwe va ta tikarhatela ku endla yini? (b) Lava va pfumelelaka ku kanganyisiwa hi Diyavulosi hi mademona ya yena va ta teka ndlela yihi?
8 Emahlweni ka nkombo wa magidi ya malembe, Sathana Diyavulosi u swi kotile ku kanganyisa Adamu na Evha lava hetisekeke leswaku va dyoha hi ku teka ndlela leyi va yi lavaka. Leswaku i tindlela tihi ta ndzingo leti Yehova a nga ta pfumelela Sathana ni mademona yakwe ku ti tirhisa endzhaku ka ku ntshunxiwa ka vona ekheleni Matsalwa a ya vuli. Kambe a swi kanakanisi leswaku u ta tirhisa vutianakanyi ni ku navela ku ntshunxeka eka Xikwembu. A ha ri muxandzuki wo lwisana ni vuhosi bya Yehova, Diyavulosi u ta kunguhata ku xandzukisa ni vanhu. Leswaku mavuthu lawa ya mademona lama ntshunxiweke ya ta humelela ku fikela kwihi a swi boxiwanga, kambe ku ta va ni vaxandzuki lava eneleke va vanhu leswaku va vonaka onge i ntshungu lowukulu. Xidyoho xa munhu un’wana ni un’wana, loyi sweswi a endliweke la hetisekeke, manuku hi vutlhari xi ta va xi susiwile, kutani xi ta va xa ha vomu, xo tirhandzela. Xi ta komba ku suka evugandzerini bya Xikwembu xa ntiyiso ni lexi hanyaka ntsena ni ku teka tlhelo ra Sathana Diyavulosi. (Nhlavutelo 20:7, 8) Xisweswo, emhakeni ya vanhu lava xandzukeke, Yehova a nga vi “hinkwaswo eka hinkwavo.”
9. (a) Ku ta humelela yini eka lava va nga hlayisiki vutshembeki eka Yehova Xikwembu? (b) Xivandla lexi nga vonekiki xi ta ntshunxisiwa ku yini eka vaxandzuki hinkwavo? (c) I xiyimo xihi lexinene lexi nga ta va kona enkarhini wolowo etilweni ni le misaveni?
9 Hambi swi ri tano, vanhu lava tshembekaka va ala ku amukela minjhekanjhekisano ni mintshikilelo ya vanhu lava kanganyisiweke, lava nga ni vutiko. Handle ko ba mariri, vanhu lava tshembekaka va hlawula ku pfumelela Yehova a va “hinkwaswo eka hinkwavo” emhakeni ya vona vini. Leswaku ku va ni ku lulama hi koxe, vuhosi bya Yehova byi fanele ku nghenisiwa hi rixaladza. Hikwalaho ke, vaxandzuki hinkwavo lava kuceteriweke va Sathana emisaveni va ta suseriwa makumu. Mayana ku kutsuriwa lokunene eka vona! Xivandla lexi nga vonekiki xa swivumbiwa na xona xi fanele ku ntshunxiwa eka vaxandzuki lava. Kutani ke, leswaku ku tisiwa ku tenga ka misava hinkwayo ku ya fika emakumu, Sathana Diyavulosi ni mavuthu yakwe hinkwawo ya mademona va ta lovisiwa, va nga ha vi kona. Xisweswo matilo ni misava swi ta hlantswiwa nthyakiso wihi na wihi wa xidyoho. (Nhlavutelo 20:9, 10) Ku kwetsima ka Yehova ku ta va kona hinkwako-nkwako. (Ringanisa Zakaria 14:20.) Vito leri hlawulekeke ra Xikwembu lexi Tlakukeke ri ta kwetsimisiwa ematilweni ni laha misaveni. Hinkwavo lava hanyaka ematilweni ni laha misaveni va ta endla ku rhandza ka xona loku tlakukeke hi ntsako.
10. Misava yi ta kombisa ku hambana loku nga hava planete yin’wana leyi nga ta ku tsakela hi laha ku nga heriki hi tindlela tihi?
10 Misava ya hina yi ta kombisa ku hambana loku ku nga hava planete yin’wana empfhukeni lowu nga heriki leyi nga ta ku tsakela hi laha ku nga heriki, hambi leswi misava yi nga ha vaka yi nga ri yona ntsena planete leyi nga ta akiwa. Xa nkoka swinene, ku ta va ku ri kona laha Yehova handle ko kanakana a kuriseke vuhosi byakwe bya misava hinkwayo, a simeka vulawuri lebyi nga heriki ni bya misava hinkwayo lebyi nga enawini. Ku ta va planete yin’we ntsena leyi Yehova wa tinyimpi a nga ta va a lwile “ka siku lerikulu ra Xikwembu xa Matimba Hinkwawo.” Ku ta va yona planete ntsena leyi Xikwembu xi rhumeleke N’wana wa xona la rhandzekaka a va munhu ivi a fa leswaku a pfuxeta vaaki va planete leyi eka xidyoho ni rifu. Ku ta va yona planete ntsena leyi Yehova a nga ta va a teke 144 000 wa vaaki va yona leswaku va va “vadyandzhaka va Xikwembu, ni vadyandzhaka swin’we na Kriste.”—Varhoma 8:17.
Tiserafimi, Tikerubimi, Tintsumi
11, 12. (a) I swivumbiwa swa njhani swa moya leswi Esaya a swi voneke exivonweni? (b) I ku tsakela kwihi loku swi nga na kona eka hina vanhu?
11 Xikwembu, Xihlovo lexi vangamaka xa ku tumbuluxa hinkwako, xa le tilweni ni xa laha misaveni, xi ta va “swilo hinkwaswo” hayi eka vadyandzhaka-kulobye na Kriste va 144 000 ntsena kambe ni le ka van’wana exivandleni xa le tilweni. Eka ndzima 6 ya buku ya Esaya, hi nyikiwa ku vonakala ka le tihubyeni ta le tilweni. Kona ha hlaya: “Ndzi vonile Yehova a tshamile xiluvelweni lexikulu lexi tlakukeke; kutani mahlangula ya xifunengeto xa yena a ma tata tempele. Kutani tiserafimi a ti yimile henhla ka yena; yin’wana ni yin’wana a yi ri ni timpapa ta ntlhanu na yin’we: ha timbirhi ti funengeta mimombo, ha timbirhi ti funengeta milenge, ha timbirhi tin’wanyana a ti haha ha tona. A ti huwelelana, ti ku: Wa kwetsima, wa kwetsima, wa kwetsima, Yehova wa tinyimpi! Misava hinkwayo yi tele hi ku kwetsima ka yena.”—Esaya 6:1-3.
12 Esaya a a kombisiwe musa lowukulu swonghasi hi ku vona La kwetsimaka emisaveni hinkwayo a tshame ehenhla ka xiluvelo xakwe xa le tilweni a rhendzeriwe hi tiserafimi leti vangamaka! Vona xivono lexi chavisaka, lexi hlavutelaka xiyimo lexi amukelekaka swinene lexi tiserafimi teto a ti ri eka xona, hikuva hi Yena la Kwetsimaka Ngopfu loyi ku hlawuleka ka yena ti ku kombiseke loko ti ri karhi ti tiyisa ku kwetsima kakwe hi ku kandziyisa hi tindlela tinharhu! Tiserafimi ti tsakela ku pfuna vagandzeri va Yehova leswaku va va lava kwetsimaka tanihi leswi Xikwembu xi kwetsimaka.—Esaya 6:5-7.
13. (a) I muxaka wihi wa swivumbiwa swin’wana swa moya lowu Bibele yi wu hlavutelaka eka hina? (b) Yehova u hlamuserisiwe ku yini mayelana na swona?
13 Tanihi leswi ku nga ni ku hambana ka vutomi bya swivumbiwa laha misaveni, leswi kombisaka matimba ya Yehova Xikwembu, kutani ku ni swivumbiwa swa muxaka wun’wana ni le xivandleni xa moya. Bibele yi hlavutela leswaku leswi i tikerubimi leti vangamaka, leti fanelaka ku haha hi xihatla. (Psalma 18:10; ringanisa Vaheveru 9:4, 5.) Genesa 3:24 yi komba leswaku endzhaku ka loko Adamu na Evha va dyohele Xikwembu lexi kwetsimaka xa matilo hi ku teka muhandzu lowu yirisiweke, Muvumbi u veke tikerubimi ti ri ni “fumu leri vangamaka hi matlhelo hinkwawo” evuxeni bya ndlela leyi taka eParadeyisini ya ntsako. Yehova u hlamuseriwa tanihi loyi a a “tshamile xikarhi ka makerubimi.” (Psalma 99:1; Esaya 37:16) Xisweswo u kombisiwa a fuma ehenhla ka tikerubimi.
14. (a) Hi swihi swivumbiwa swin’wana swa moya leswi nga fanelangiki ku honisiwa? (b) Swi hambanisa ku yini?
14 Lexi nga fanelangiki ku honisiwa exikarhi ka mintshungu ya swivumbiwa swa moya i tintsumi. Ku ni timiliyoni to tala ta tona. (Daniel 7:9, 10) Exikarhi ka tona ku ni tintsumi leti averiweke ku tirhela vagandzeri va Yehova emisaveni. Yesu u tsundzuxe leswaku a ku fanelanga ku va ni munhu la khunguvanyisaka un’wana ni un’wana wa vagandzeri va Yehova hi mhaka ya leswaku “tintsumi ta vona le matilweni ti tshama ti langutile mombo wa Tata wa n’wina la nge matilweni.” (Matewu 18:10; Vaheveru 1:14) Eku heleni ka masiku ya 40 ya Yesu ya ku titsona swakudya emananga ni le ndzhaku ka ku hlula kakwe miringo minharhu yo nonon’hwa leyi andlariweke hi Diyavulosi, mawaku lunghelo leri a ri ri kona eka tintsumi ro hundzisela swilaveko swa nyama swa Yesu la ondzeke, la nga ni ndlala!—Matewu 4:11.
15, 16. (a) Hlamusela vun’we lebyi fanaka ni ndyangu lebyi nga ta va kona etilweni ni la misaveni. (b) I vuyelo byihi lebyi humaka eka Yehova lebyi nga ta nyikiwa vanhu lava endliweke lava hetisekeke lava hlulaka ndzingo hi laha ku humelelaka? (c) Yehova u ta languta ku hetiseka ka xikongomelo xakwe xo sungula hi ndlela yihi?
15 Le henhla exivandleni xa le tilweni, vaaki lava vangamaka va moya va ta va vamakwavo, kasi laha misaveni ndyangu wa vanhu lowu endliweke lowu hetisekeke wu ta va wa vamakwavo va xinuna ni va xisati. Va ta va hi xifaniso ni xivumbeko xa Xikwembu ku fika empin’weni lowunene lowu Adamu na Evha, ku sukela eku tumbuluxeni ka Yehova Xikwembu, a va ri na wona ‘hi xifaniso ni xivumbeko’ xa Muvumbi wa vona. (Genesa 1:26, 27) Endzhaku ko hundza endzingweni wo hetelela, vanhu lava endliweke lava hetisekeke va ta nyikiwa lunghelo ro hanya hi laha ku nga heriki naswona va ta amukeriwa hi rirhandzu tanihi “vana va Xikwembu,” va tsakela ntshunxeko lowu vangamaka, kutani va va xiyenge xa ndyangu lowu hlanganeke wa Yehova ematilweni ni laha misaveni.—Varhoma 8:21.
16 Mayana ntsako ni ku tsakisisa ka swivumbiwa swakwe hinkwaswo leswi Yehova Xikwembu a nga ta languta ku hetiseka ka xikongomelo xakwe xo sungula ha swona—goza leri nga ringanisiwiki ro va ni swilo hinkwaswo hi ku ya hi ku tiyimisela kakwe ko sungula—swivumbiwa hinkwaswo swi va evun’weni lebyi nga tsemekiki bya rirhandzu na yena!
17. Hikwalaho ka leswi hinkwaswo, i mani la nga ta kota ku sivela ku endla yini ku pfumelelana ni marito ya mupisalema?
17 Eku twisisekeni ka leswi hinkwaswo, i mani loyi a nga ta kota ku sivela ku dzunisiwa ka Mukunguhati loyi wo hlamarisa wa le tilweni? Loko hi mfanelo a vula marito yakwe lama kongomisiweke eka swivumbiwa leswi tlulaka vanhu, mupisalema u ri: “Nkhensani Yehova, n’wina tintsumi ta yena, leti tiyeke matimba, leti endlaka swileriso swa yena hi ku yingisa mpfumawulo wa rito ra yena! Nkhensani Yehova, n’wina tinyimpfu ta yena hinkwato, leti n’wi tirhelaka hi ku endla leswi a swi rhandzaka!”—Psalma 103:20, 21.
18. Mupisalema u hetelela buku ya Tipisalema hi ndlela yihi?
18 Mupisalema la tlakusiweke, la huhuteriweke u hetelela buku ya Tipisalema hi mahungu lawa ya xikhutazo lama nge: “Dzunisani Yehova! Dzunisani Xikwembu evukwetsimelweni bya xona! Xi dzuniseni ematilweni lama endliweke hi matimba ya xona! Xi dzuniseni hikwalaho. Xi dzuniseni hi mpimo wa vukulu bya xona lebyi tlurisaka! Xi dzuniseni hi mpfumawulo wa tinanga! Xi dzuniseni hi psalteri ni harpa! Xi dzuniseni hi ngoma ni ku cina! Xi dzuniseni hi mpfumawulo wa timbila leti nga ni tingoti, ni nanga! Xi dzuniseni hi madzandzani ya mpfumawulo lowu twalaka! Xi dzuniseni hi tingoma ta mpfumawulo lowu pfumaka! Leswi hefemulaka hinkwaswo a swi dzunise Yehova. Dzunisani Yehova!”—Psalma 150:1-6.
19. (a) Hi le ka xiboho xihi lexi manuku misava yi nga ta hlanganisiwa eka xona? (b) Hikwalaho ke, i yini leswi swivumbiwa leswi tlhariheke swi nga ta swi vula?
19 Misava hinkwayo eku heteleleni yi ta hlanganisiwa exibohweni lexi hetisekeke lexi nga ta va kona hi laha ku nga heriki, xiboho xa vugandzeri byin’we bya Tatana wa le tilweni hikuva vana vakwe va n’wi rhandza ni ku n’wi nkhinsamela ehenhla ka hinkwaswo. Ina, hikwalaho ke, manuku ku ta va kona laha swivumbiwa hinkwaswo leswi tlhariheke swi nga ta vula hi laha tiserafimi ti vuleke ha kona ti ku: “Wa kwetsima, wa kwetsima, wa kwetsima, Yehova wa tinyimpi! Misava hinkwayo yi tele hi ku kwetsima ka yena.” Manuku ke, hakunene, Xikwembu xa “Hosana ya ku Rhula” xi ta va xi ve “hinkwaswo eka hinkwavo”—hi masiku ni masiku.
[Swifaniso leswi nga eka tluka 188, 189]
Misava hinkwayo yi ta hlanganisiwa evugandzerini byo rhula bya Hosi ya Misava Hinkwayo