Xiphemu 9
Vukhongeri Bya Ntiyiso Byi Nga Ku Vuyerisa Hilaha Ku Nga Heriki!
1. Ku ta humelela yini loko hi ‘tshinela eka Xikwembu’?
YEHOVHA wa va rhandza lava va n’wi tirhelaka. Loko u gandzela Yehovha, u ta ku katekisa sweswi ni le nkarhini lowu taka. Bibele yi ri: “Tshinelani eka Xikwembu, kutani xi ta tshinela eka n’wina.”—Yakobo 4:8.
2. Hi nga tshinela njhani eka Xikwembu, naswona sweswo swi ta swi khumba njhani swikhongelo swa hina?
2 Loko u lava ku tshinela eka Xikwembu, u fanele u dyondza Rito ra xona u tlhela u ri tirhisa. Loko u khongela hi ku pfumelelana ni ku rhandza ka Yehovha, u ta yingisela swikhongelo swa wena naswona u ta swi hlamula. Muapostola Yohane la nga Mukreste u tsarile: “Ku tiyiseka loku hi nga na kona [hi Xikwembu], i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa. Ku tlula kwalaho, loko hi tiva leswaku xa hi twa malunghana ni xin’wana ni xin’wana lexi hi xi kombelaka, ha swi tiva leswaku hi ta swi kuma swilo leswi hi swi kombelaka tanihi leswi hi swi kombelaka eka xona.”—1 Yohane 5:14, 15.
3-7. Xana vutlhari bya Xikwembu hi nga byi kuma njhani, naswona byi nga hi pfunisa ku yini?
3 Ku tlula kwalaho, loko u tshinela eka Xikwembu, xi ta ku nyika vutlhari leswaku u kota ku hlangavetana ni timhaka ta siku ni siku evuton’wini. Bibele yi ri: “Loko mani na mani eka n’wina a kayivela vutlhari, a a hambete a kombela eka Xikwembu.”—Yakobo 1:5.
4 Xana vutlhari bya Xikwembu byi nga ku pfuna njhani? Ndlela yin’wana hi leswaku byi nga ku pfuna ku tiva swilo leswi Yehovha a swi vengaka. U ta tlhela u dyondza leswaku ha yini swilo leswi swi hoxile ni leswaku u nga endla yini leswaku u swi papalata. Vutivi lebyi byi ta ku sirhelela eka swiphiqo swo tala leswi vunyingi byi langutanaka na swona. Hi xikombiso, ku yingisa ndzayo ya Xikwembu ya ku va ni mahanyelo lamanene, swi pfuna vanhu va Xikwembu leswaku va nga tiki va nga tekiwanga, va nga fambi va rhwala mavabyi lama tluletiwaka hi vuxaka bya rimbewu naswona va nga vi evukatini lebyi teleke swiphiqo kumbe lebyi hetelelaka byi file.
5 Hi swihi swilo swin’wana leswi vutlhari lebyi humaka eka Xikwembu byi nga ku endlelaka swona? Byi ta ku pfuna leswaku u vuyeriwa swinene evuton’wini. Byi ta ku pfuna ku endla swiboho swa vutlhari etimhakeni leti tolovelekeke, to tanihi matirhiselo lamanene ya mali. U ta kota ku landzelela tipakani letinene kutani u tshika ku salana endzhaku ni tipakani leti nga riki ta nkoka.
6 Vutlhari bya Xikwembu byi nga tlhela byi ku pfuna leswaku u kota ku hanyisana ni vanhu van’wana. U nga ha va ni ndyangu lowu tsakeke. U nga va ni xinakulobye xa xiviri lexi hetaka nkarhi wo leha ni van’wana, naswona u ta xiximiwa, hambi ku ri hi vanhu lava nga xi tirheliki Xikwembu.
7 Ku engetela kwalaho, loko u va ni vutlhari bya Xikwembu u ta antswisa malangutelo ya wena hi vutomi. Swi ta ku pfuna leswaku u langutana ni swiphiqo swa vutomi ni timhaka leti hetaka matimba. Nakambe u ta va ni vonelo lerinene hi vumundzuku. Hilaha ku fanaka, langutelo lerinene ri ta endla leswaku u va ni mianakanyo leyinene u tlhela u va la hanyeke kahle emirini.—Swivuriso 14:30; Esaya 48:17.
8. Loko u tirhela Xikwembu, i yini leswi u nga ta ka u nga swi chavi?
8 Loko u tirhela Xikwembu xa ntiyiso, u ta ntshunxeka eku chaveni loku karhataka vanhu lava nga xi tirheliki. Leswi u swi tivaka leswaku vafi a va ha hanyi esirheni, u nge va chavi. Leswi u xi tshembaka xitshembiso xa Xikwembu xa ku pfuxiwa ka vafi, a wu nge chavi ku fa. Naswona leswi u tivaka leswaku Xikwembu xi ni matimba hinkwawo, a wu nge byi chavi vuloyi kumbe vungoma.—Yohane 8:32.
Lavo Lulama Va Ta Fuma Misava
9-11. I vamani lava nga ta hanya eParadeyisini, naswona i vamani lava nga ta tsandzeka?
9 Loko u tshinela eka Xikwembu, a wu nge karhateki hi vumundzuku. Hilaha hi voneke hakona, Bibele yi swi boxe ka ha ri emahlweni swiphiqo swo tala leswi hi swi vonaka namuntlha laha misaveni. Yehovha u hi byela leswaku swilo leswi i swa xinkarhana; ku nga ri khale Mfumo wa Xikwembu wu ta endla misava leyi yi va paradeyisi.—Luka 21:10, 11, 31; 23:43.
10 Lava nga ta hanya eParadeyisini hi lava tshinelaka eka Yehovha ni lava n’wi tirhelaka ntsena. Bibele yi ri: “Hi nkarhinyana, lowo homboloka a nge he vi kona; kunene u ta languta endhawini yakwe, u ta va a nga ri kona. Kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.”—Pisalema 37:10, 11.
11 Lava va tiomisaka tinhloko, va ala ku yingisa milawu ya Xikwembu leyo lulama, va ta khawula. (2 Vatesalonika 1:8, 9) A va nge he vi kona. Va ta lovisiwa hilaha ku heleleke na Sathana swin’we ni madimona yakwe. (Nhlavutelo 20:10, 14) Kambe lava dyondzaka hi Yehovha va tlhela va n’wi tirhela va ta tiphina emisaveni ya Paradeyisi.
Vumundzuku Lebyinene!
12. Xana Bibele yi ri yini hi vumundzuku?
12 Yehovha u va hlayisele swilo leswinene lava n’wi rhandzaka! Anakanya hi leswi Rito ra yena ri swi vulaka malunghana ni vutomi bya le Paradeyisini emisaveni:
● Ndzalo ya swakudya: “Ku ta va ni mavele yo tala [kumbe swakudya] emisaveni; ma ta khapakhapa etinhlohlorhini ta tintshava.”—Pisalema 72:16.
● Vutshamo lebyinene: “Kunene va ta aka tindlu va tshama eka tona.”—Esaya 65:21.
● Ntirho lowu enerisaka: “Ntirho wa mavoko ya vona, vahlawuriwa va mina va ta wu tirhisa hi xitalo. A va nge tirheli swa hava hi matimba.”—Esaya 65:22, 23.
● A ku nge he vabyiwi: “Ku hava munhu la tshamaka kona la nga ta ku: ‘Ndza vabya.’”—Esaya 33:24.
● A ku nge he vi na swilema: “Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa. Hi nkarhi wolowo la khutaka u ta tlula kukota mhunti, ni ririmi ra la nga vulavuriki ri ta huwelela hi ku tsaka.”—Esaya 35:5, 6.
● A ku nge he vi na switlhavi, maxangu ni rifu: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.”—Nhlavutelo 21:4.
● A ku nge he vi na nyimpi: “[Xikwembu xi] herisa tinyimpi ku ya fika emakumu ya misava.”—Pisalema 46:9.
● Vutomi lebyi nga heriki: “Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.
13. I mani ntsena loyi a nga endlaka misava leyi yi va paradeyisi, naswona ha yini?
13 Vanhu va nyama a va nge swi koti ku tisa swilo swo fana ni leswi, kambe Yehovha u ni matimba ya ku endla xin’wana ni xin’wana lexi a vulaka leswaku u ta xi endla. Ku hava lexi nga n’wi sivelaka ku endla leswi a lavaka ku swi endla. Bibele yi ri: “Ku hava lexi tivisiwaka hi Xikwembu lexi nga ta ka xi nga endleki.”—Luka 1:37.
14. Xana u nga nghena njhani egondzweni leri yisaka evuton’wini lebyi nga heriki?
14 Hi ku tirhisa Timbhoni ta yena, kun’wana ni kun’wana Yehovha u nyika vanhu lunghelo ra leswaku va “nghen[a] hi nyangwa leyo khuma” naswona va famba hi gondzo leri yisaka evuton’wini lebyi nga heriki. Onge u nga va exikarhi ka vanhu lava tsakeke lava amukelaka xirhambo xexo. Onge u nga hanya hi ku pfumelelana ni vukhongeri bya ntiyiso kutani u tsakela mikateko ya Yehovha hilaha ku nga heriki!—Matewu 7:13, 14.
[Xifaniso lexi tataka tluka hinkwaro lexi nga eka tluka 31]