Xana Swilo Leswi Hinkwaswo Swi Hi Byela Yini?

YESU KRESTE u te: “Makumu ya mafambiselo ya swilo” ma ta vonaka hi tinyimpi, ku kayivela ka swakudya, mintungu ni ku tsekatseka ka misava.—Matewu 24:1-8; Luka 21:10, 11.

Ku sukela hi 1914 ku dlayeteriwe vanhu etinyimpini ta matiko ni ta tinxaka, naswona minkarhi yo tala sweswo swi vangiwe hi ku nghenelela ka vafundhisi eka tipolitiki, kasi sweswi swi vangiwa hi ku tala ka nhlaselo wa vutherorisi.

Hambiloko ku ri ni nhluvuko eku endliweni ka swakudya, kambe vanhu va madzana ya timiliyoni emisaveni hinkwayo va sika hi ndlala. Lembe na lembe timiliyoni ta vanhu ta fa hikwalaho ka ku pfumaleka ka swakudya.

Mintungu, ku nga ku hangalaka ka mavabyi lama tlulelaka, na yona i xikombiso lexi vuriweke hi Yesu. Endzhaku ka Nyimpi yo Sungula ya Misava ntungu wa chachalaza wu dlaye vanhu vo tlula 21 000 000. Ku hambana ni mintungu ya khale leyi a yi hlasela ndhawu yo karhi ntsena, wona wu tlulele ematikweni ni le swihlaleni hinkwaswo. Sweswi AIDS yi hlasela misava hinkwayo, naswona mintungu yo tanihi rifuva, dari, vubofu bya le nambyeni ni vuvabyi bya Chagas swi hambeta swi hlasela ematikweni lama ha hluvukaka.

Ku vikiwa leswaku lembe ni lembe ku va ni makume ya magidi ya ku tsekatseka ka misava ko hambana-hambana. Hambileswi ku nga ni michini leyi hluvukisiweke ya ku vika ndlela leyi misava yi nga ta tsekatseka ha yona, kambe emahungwini nkarhi na nkarhi ku vikiwa timhangu ta ku tsekatseka ka misava etindhawini leti ti nga tala hi vanhu.

Bibele yi tlhele yi profeta leswi: “Tiva leswi, leswaku emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu, va ri ni xivumbeko xa ku tinyiketela loku nga ni vukwembu kambe va tikomba va nga tshembeki eka matimba ya kona; kutani lava u va fularhela.”—2 Timotiya 3:1-5.

Xana wa swi vona leswaku hi hanya ‘eminkarhini ya mangava leyi swi nonon’hwaka ku langutana na yona’?

Xana u swi xiyile leswaku vanhu va hundzeleta loko swi ta emhakeni ya ku tirhandza, ku rhandza mali naswona va titlakusa?

Xana u kona la nga alaka leswaku laha misaveni ku tele vanhu lava sindzisaka leswaku ku endliwa swilo leswi laviwaka hi vona kambe va nga nkhensi, lava nga laviki ntwanano, lava nga tshembekiki?

Xana wa swi vona leswaku ku pfumaleka ka rirhandzu swin’we ni vana lava nga yingisiki vatswari va vona se swi andze ngopfu, ku nga ri etindhawini to karhi ntsena kambe emisaveni hinkwayo?

A swi kanakanisi leswaku wa swi vona leswaku hi hanya emisaveni leyi rhandzaka ntsako ku tlula mpimo kambe yi venga leswinene. Hi yona ndlela leyi Bibele yi swi hlamuselaka ha yona swilo leswi nga ta va kona “emasikwini yo hetelela.”

Xana ka ha laveka vumbhoni lebyi engetelekeke leswaku u ta tiva nkarhi lowu hi hanyaka eka wona? Yesu u tlhele a profeta leswaku enkarhini lowu, mahungu lamanene ya Mfumo wa Xikwembu ma ta chumayeriwa emisaveni hinkwayo leyi akiweke. (Matewu 24:14) Xana ya karhi ya chumayeriwa?

Magazini wa Xihondzo xo Rindza lowu sekeriweke eBibeleni, lowu endleriweke ku twarisa mahungu lamanene ya Mfumo wa Yehovha, wu kandziyisiwa nkarhi na nkarhi hi tindzimi to tala ku tlula magazini wihi na wihi.

Lembe na lembe, Timbhoni ta Yehovha ti heta tiawara to tlula biliyoni ti ri karhi ti byela van’wana hi Mfumo wa Xikwembu.

Ti kandziyisa ni tibuku leti hlamuselaka Bibele hi tindzimi ta kwalomu ka 400, hambi ku ri hi tindzimi leti vulavuriwaka hi vanhu vatsongo. Timbhoni ta Yehovha ti chumayela mahungu lamanene ematikweni hinkwawo; ti chumayela ni le swihlaleni ni le tindhawini to tala leti tihulumendhe ti nga ti tekeliki enhlokweni. Ematikweni yo tala, ti ni nongonoko lowu yaka emahlweni wo dyondzisa Bibele hi rixaladza.

Kunene, mahungu lamanene ya Mfumo wa Xikwembu ma karhi ma chumayeriwa emisaveni hinkwayo leyi akiweke, ku nga ri hi xikongomelo xo hundzula misava hinkwayo kambe leswaku byi va vumbhoni. Etindhawini hinkwato vanhu va nyikiwa nkarhi wo kombisa loko va khathala hi leswaku i mani loyi a vumbeke matilo ni misava ni loko va ta yi xixima milawu ya yena nileswaku va kombisa loko va rhandza vanhu-kulobye.—Luka 10:25-27; Nhlavutelo 4:11.

Ku nga ri khale, Mfumo wa Xikwembu wu ta kukula vuhomboloki hinkwabyo emisaveni ivi yi sala yi ri paradeyisi.—Luka 23:43.

[Bokisi leri nga eka tluka 6]

Xana Masiku Ya Ku Hetelela Ma Vula Ku Hela Ka Yini?

Lawa a hi masiku ya ku hela ka rixaka ra vanhu. Bibele yi tshembisa leswaku lava endlaka ku rhandza ka Xikwembu va ta hanya hilaha ku nga heriki.—Yohane 3:16, 36; 1 Yohane 2:17.

A hi masiku ya ku hela ka misava. Rito ra Xikwembu ri vula leswaku misava leyi akiweke yi ta tshama hilaha ku nga heriki.—Pisalema 37:29; 104:5; Esaya 45:18.

Ntiyiso wa mhaka hileswaku lawa i masiku ya ku hela ka mafambiselo lawa ya swilo lama nga ni madzolonga ni lama pfumalaka rirhandzu, nakambe i masiku ya ku herisiwa ka lava va namarhelaka tindlela ta wona.—Swivuriso 2:21, 22.

[Bokisi/Xifaniso lexi nga eka tluka 7]

Xana Bibele I Rito Ra Xikwembu Hakunene?

Vaprofeta va le Bibeleni va tsale ko tala va ku: ‘Yehovha u te.’ (Esaya 43:14; Yeremiya 2:2) Hambi ku ri Yesu Kreste N’wana wa Xikwembu, u kandziyise leswaku ‘swilo leswi a a swi vula, a a nga swi vuli hi ku tisungulela.’ (Yohane 14:10) Bibele hi yoxe yi swi veka erivaleni loko yi ku: “Matsalwa hinkwawo ma huhuteriwe hi Xikwembu.”—2 Timotiya 3:16.

A yi kona buku yin’wana leyi kandziyisiwaka hi tindzimi to tala swonghasi—phela yi kandziyisiwa hi tindzimi to tlula 2 200, hilaha va United Bible Societies va vulaka hakona. Ku hava buku yin’wana leyi kandziyisiwaka ku fana na yona—sweswi ku kandziyisiwe mune wa tibiliyoni ta yona. Xana a hi swona leswi a wu ta swi langutela hi rungula leri humaka eka Xikwembu ri ya eka vanhu hinkwavo?

Leswaku u kuma rungula leri engetelekeke ra vumbhoni bya leswaku Bibele yi huhuteriwe hi Xikwembu, hlaya buku leyi nge Bibele—I Rito Ra Xikwembu Kumbe I Ra Munhu?, leyi kandziyisiweke hi Timbhoni ta Yehovha.

Loko u hlaya Bibele kutani u khorwiseka leswaku hakunene i Rito ra Xikwembu, u ta vuyeriwa ngopfu.

[Bokisi/Swifaniso leswi nga eka tluka 8]

Xana Mfumo Wa Xikwembu I Yini?

I hulumendhe ya le tilweni leyi mufumi wa yona ku nga Yehovha Xikwembu xa ntiyiso, Muvumbi wa matilo ni misava.—Yeremiya 10:10, 12.

Bibele yi vula leswaku Xikwembu xi nyike Yesu Kreste vulawuri byebyo. (Nhlavutelo 11:15) Loko Yesu a ri emisaveni u kombise leswaku ana se Xikwembu xi n’wi nyike matimba lamakulu yo lawula—lama endleke leswaku a kota ku miyeta swidzedze, a hanyisa vanhu eka mavabyi ya mixaka hinkwayo, hambi ku ri ku pfuxa vafi. (Matewu 9:2-8; Marka 4:37-41; Yohane 11:11-44) Vuprofeta bya Bibele lebyi huhuteriweke byi vule leswaku Xikwembu xi ta n’wi nyika “ku fuma ni xindzhuti ni mfumo, leswaku vanhu, vanhu va matiko ni tindzimi hinkwato va n’wi tirhela.” (Daniyele 7:13, 14) Hulumendhe yoleyo yi vuriwa Mfumo wa le tilweni; hi kona laha sweswi Yesu Kreste a fumaka a ri kona.

[Swifaniso leswi nga eka tluka 7]

Mahungu lamanene ma chumayeriwa emisaveni hinkwayo