Misava Leyintshwa Leyi Xikwembu Xi Yi Tshembiseke

BIBELE, ku nga Rito ra Xikwembu leri tsariweke, yi hi nyika ntshembo loko yi ku: “Ku ni matilo lamantshwa ni misava leyintshwa leswi hi swi rindzeleke hi ku ya hi xitshembiso xa yena, naswona ku ta va ni ku lulama eka swona.”—2 Petro 3:13.

“Matilo lamantshwa” i yini? EBibeleni matilo ma fambisana ni vulawuri. (Mintirho 7:49) “Matilo lamantshwa” i hulumendhe leyintshwa leyi nga ta fuma misava. Ma vitaniwa lamantshwa hikuva ma ta siva mimfumo leyi nga kona sweswi; nakambe i ndlela leyintshwa leyi Xikwembu xi nga ta hetisisa xikongomelo xa xona ha yona. I Mfumo lowu Yesu a hi dyondziseke leswaku hi wu khongelela. (Matewu 6:10) Leswi Xikwembu ku nga xona xi simekeke Mfumo lowu, naswona xi nga etilweni, wu vitaniwa ‘mfumo wa matilo.’—Matewu 7:21.

“Misava leyintshwa” i yini? A hi pulanete leyintshwa, hikuva Bibele yi swi veke erivaleni leswaku misava yi ta tshama hilaha ku nga heriki. “Misava leyintshwa” i vanhu lava nga ta va va hanya loko misava se yi ri paradeyisi. Yi ta va leyintshwa hikuva lavo homboloka va ta va va herisiwile. (Swivuriso 2:21, 22) Kutani hinkwavo lava nga ta va va hanya hi nkarhi wolowo va ta dzunisa Muvumbi va tlhela va n’wi yingisa, naswona va ta hanya hi ku pfumelelana ni swilaveko swa yena. (Pisalema 22:27) Vanhu va matiko hinkwawo va rhambiwa leswaku va dyondza swilaveko sweswo ni ku endla leswaku sweswi vutomi bya vona byi fambisana na swona. Xana wa swi endla sweswo?

Emisaveni leyintshwa ya Xikwembu, un’wana ni un’wana u ta xixima vulawuri bya xona. Xana rirhandzu ra Xikwembu ri ku susumetela ku yingisa swileriso swa xona? (1 Yohane 5:3) Xana wa swi landzela swileriso swa Xikwembu endyangwini wa wena? entirhweni ni le xikolweni? ni le ka ndlela leyi u hanyaka ha yona?

Emisaveni yoleyo leyintshwa, vanhu va ta gandzela Xikwembu xa ntiyiso hi vun’we. Xana u gandzela Muvumbi wa tilo ni misava? Xana vugandzeri bya wena byi ku hlanganisa ni vagandzeri-kuloni va matiko hinkwawo, va tinxaka hinkwato ni va tindzimi hinkwato?—Pisalema 86:9, 10; Esaya 2:2-4; Sofaniya 3:9.

[Bokisi leri nga eka tluka 17]

Xikwembu Lexi Tshembiseke Swilo Leswi

I Muvumbi wa matilo ni Misava. Hi yena loyi Yesu Kreste a n’wi hlamuseleke tanihi “Xikwembu xi ri xin’we xa ntiyiso.”—Yohane 17:3.

Vanhu vo tala va gandzela swikwembu leswi va tiendleleke swona. Kasi van’wana va timiliyoni va nkhinsamela swifaniso leswi nga hanyiki. Van’wana va xixima milawu ya vanhu, leyi sekeriweke eka swilo leswi vonakaka, leswi nga akiki emoyeni kumbe va xixima ku navela ka vona vini. Hambi ku ri lava vulaka leswaku vugandzeri bya vona byi sekeriwe eBibeleni a hi hinkwavo va dzunisaka vito ra loyi Bibele yi n’wi hlamuselaka tanihi “Xikwembu xa ntiyiso.”—Deteronoma 4:35.

Muvumbi u tihlamusela hi ndlela leyi: “Hi mina Yehovha. Rero i vito ra mina.” (Esaya 42:5, 8) Vito leri ri humelela minkarhi yo tlula 7 000 eBibeleni hi ririmi ra yona ro sungula. Yesu Kreste u dyondzise valandzeri vakwe ku khongela va ku: “Tata wa hina la nge matilweni, vito ra wena a ri kwetsimisiwe.”—Matewu 6:9.

Xana Xikwembu xa ntiyiso xi ni timfanelo ta njhani? Xi ti hlamusela xi ri lexi nga ni “tintswalo ni nsovo, [lexi] hlwelaka ku hlundzuka, [lexi] teleke musa wa rirhandzu ni ntiyiso” ni lexi nga tshikiki ku xupula lava yi tlulaka hi vomu milawu ya xona. (Eksoda 34:6, 7) Ndlela leyi a xi tirhisana ni vanhu ha yona enkarhini lowu hundzeke yi tiyisekisa nhlamuselo yoleyo.

Vito ni n’wini wa rona swi fanele swi kwetsimisiwa. Tanihi Muvumbi ni Hosi ya Vuako Hinkwabyo, xi faneriwa hi ku va hi xi yingisa, naswona hi gandzela xona ntsena. Xana wena wa xi yingisa u tlhela u xi gandzela?

[Bokisi/Xifaniso lexi nga eka tluka 18]

I Yini Leswi Nga Ta Va Swi Herisiwile Eka “Matilo Lamantshwa Ni Misava Leyintshwa”?

Misava yi ta hundzuriwa Paradeyisi Luka 23:43

[Bokisi/Swifaniso leswi nga eka tluka 19]

Xana U Ta Vuyeriwa?

Xikwembu a xi nge hembi!—Tito 1:2.

Yehovha u ri: “Rito ra mina . . . a ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 55:11.

Yehovha u karhi u vumba “matilo lamantshwa ni misava leyintshwa.” Hulumendhe ya le tilweni se yi sungurile ku fuma. “Misava” se yi sungurile ku endliwa “leyintshwa.”

Endzhaku ka loko buku ya Nhlavutelo yi boxe swilo swin’wana swo hlamarisa leswi “matilo lamantshwa ni misava leyintshwa” yi nga ta swi endlela vanhu, yi tshaha Xikwembu hi xoxe, Hosi ya Vuako Hinkwabyo, loko xi ku: “Waswivo, ndzi endla swilo hinkwaswo swi va leswintshwa.” Xi tlhela xi ku: “Tsala, hikuva marito lawa ma tshembekile, i ya ntiyiso.”—Nhlavutelo 21:1, 5.

Xivutiso xa nkoka hi lexi nge, Xana hi karhi ha antswisa laha swi fanelaka leswaku hi ta fanelekela ku va swirho swa ‘misava yoleyo leyintshwa’ leyi nga ta fumiwa hi “matilo lamantshwa”?