Ku Endliwa Ka Swivumbiwa Leswintshwa!
SOLOMONI Hosi ya vutlharhi u tshama a ku: “A ku na le’šintŝha e hansi ka dyambu.” (Eklesiasta 1:9) Sweswo swi tano hi misava ya xiviri leyi hi tshamaka eka yona, kambe ku vuriwa yini hi xivandla lexikulu xa swivumbiwa swa Yehovha swa moya? Eka xivandla xexo, un’wana loyi a nga nkulukumba eka Solomoni, loyi entiyisweni a a ri munhu lonkulu eka hinkwavo lava tshameke va hanya, u ve xivumbiwa lexintshwa lexi hlawulekeke. Xana leswi swi endlekise ku yini ke?
Hi lembe ra 29 ra Nguva ya hina leyi Tolovelekeke, munhu la hetisekeke, ku nga Yesu, u titisile leswaku a ta khuvuriwa hi Yohane eNambyeni wa Yordani. “Kuteloko Yesu a khuvuriwile, a hatla a huma ematini; kutani hi nomu lo matilo ma pfuleka, a vona Moya wa Xikwembu wu xika tanihi tuva, wu ta ehenhla ka yena. Kutani ku twakala rito leri humaka etilweni, ri ku: ‘Loyi i N’wananga la rhandzekaka, loyi ndzi n’wi tsakelaka.’” (Matewu 3:16, 17) Xisweswo, munhu loyi a nga Kreste Yesu a a ri wo sungula eka swivumbiwa leswintshwa, leswi totiweke leswaku swi endla ku rhandza ka Xikwembu. Endzhaku, exisekelweni xa rifu ra yena ra gandzelo, Yesu u ve Muhlanganisi wa ntwanano lowuntshwa exikarhi ka Xikwembu na ntlawa wa vanhu lava hlawuriweke. Un’wana ni un’wana wa vona u ve ‘xivumbiwa lexintshwa,’ lexi tswariweke hi moya wa Xikwembu, xi va ni ntshembo wo ya hanya etilweni, xi langutele ku fuma na Yesu eMfun’weni wa yena wa le tilweni.—2 Vakorinto 5:17; 1 Timotiya 2:5, 6; Vaheveru 9:15.
Hi malembe xidzana layo tala, Vakreste lava va totiweke, lava tswariweke hi moya a va ri karhi va hlengeletiwa leswaku va va kun’we na Kreste tanihi vandlha ra ntiyiso ra Vukreste, leri ri nga xivumbiwa lexintshwa. Xikwembu xi ri vitanile hi xikongomelo leswaku ri huma emisaveni leyi, hi laha muapostola Petro a vulaka ha kona: “Mi rixaka leri hlawuriweke, mi vaprista va Hosi, mi tiko leri hlawulekeke, vanhu lava nga va Xikwembu hi xiviri, leswaku mi ta kota ku twarisa mintirho leyo saseka ya loyi a mi vitaneke ku huma emunyameni, mi ta nghena eku vonakaleni ka yena loku hlamarisaka.” (1 Petro 2:9) Tanihi Kreste Yesu, xivumbiwa xo sungula xa Xikwembu, swivumbiwa leswintshwa leswi landzeleke swi ni ndzhwalo lowukulu wo chumayela mahungu lamanene. (Luka 4:18, 19) Xirho xin’wana ni xin’wana xa kona, laha loko swi hlanganile swi nga 144 000, xi fanele xi “[ambala] munhu lontshwa la vumbiweke hi xifaniso xa Xikwembu, la . . . tikombaka hi ku lulama ka yena ni ku hlawuleka loku nga ni ntiyiso.” (Vaefesa 4:24; Nhlavutelo 14:1, 3) Leswi swi lava leswaku va hlakulela “mihandzu ya Moya,” leyi hlamuseriweke eka Vagalatiya 5:22, 23, ni ku khathalela ntirho wa vona wa vulanguteri hi rixaladza.—1 Vakorinto 4:2; 9:16.
Ku vuriwa yini hi xivumbiwa lexi xintshwa eminkarhini ya namuntlha? Hi lembe ra 1914, hi laha xiyimiso xa nkarhi xa Bibele xi kombisaka ha kona, marito lama landzelaka ya Nhlavutelo 11:15 ma hetisekile: “Matimba ya ku fuma misava, sweswi ma nyikiwile Hosi ya hina [Yehovha] ni Mesiya wa yona, kutani ú ta fuma hilaha ku nga heriki.” Ntirho wo sungula wa Kreste tanihi Hosi leyi ya ha ku vekiwaka a ku ri ku cukumeta Sathana ni tintsumi ta yena ta mademona va suka etilweni va ta misaveni. Leswi swi tise ‘khombo emisaveni,’ hi xivumbeko xa nyimpi yo sungula ya misava ni maxangu lama fambisaneke na yona.—Nhlavutelo 12:9, 12, 17.
Leswi swi tlhele swi tirha tanihi xitsundzuxo eka masalela ya xivumbiwa lexintshwa emisaveni, xa leswaku ma fanele ku hlanganyela eku hetisiseni ka vuprofeta bya Yesu lebyi nge: “Evhangeli leyi ya Mfumo [lowu simekiweke] yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika.” Xana “makumu” wolawo i yini ke? Yesu u ya emahlweni a hlamusela a ku: “Nhlomulo wu ta va lowukulu enkarhini wolowo; nhlomulo lowo tano a wu si va kona hi mpfhuka misava yi tumbulukile ku fikela namuntlha, naswona a wu nga ha vi kona ni siku ni rin’we. Loko masiku walawo a ma nga hungutiwanga, a ku nga ta pona munhu, kambe hikwalaho ka vahlawuriwa va Xikwembu, masiku ya kona ma ta hungutiwa.”—Matewu 24:3-14, 21, 22.
Moya wa Yehovha wu susumetele vatotiwa lava va xivumbiwa xa yena lexintshwa leswaku ma khomeka eka tsima lerikulu swinene eka hinkwawo lama tshameke ma endliwa emisaveni leyi. Nhlayo ya vahuweleri lava va Mfumo lava chivirikaka yi engeteleke yi suka eka magidi lama nga riki mangani hi 1919 yi ya kwalomu ka 50 000 exikarhi ka va-1930. Hi laha ku profetiweke ha kona, “ku dyondzisa ka vona ku twakele emisaveni hinkwayo, ni marito ya vona ma fikile emakun’wini ya misava.”—Varhoma 10:18.
Xana masalela ya xivumbiwa lexintshwa a ku ta va wona ntsena lama nga ta hlengeleteriwa ku pona? E-e, hikuva vuprofeta byi vule leswaku tintsumi ta Xikwembu a ti ta sivela mimoya ya nhlomulo lowukulu ku fikela loko ku hetiwa ku hlengeletiwa, hayi ka Vaisrayele lava va moya lava yaka etilweni ntsena, kambe ni ka van’wana, ku nga “ntshungu lowukulu wa vanhu; a ku nga ri na un’we la kotaka ku va hlaya. A va huma ematikweni hinkwawo, ni le tinxakeni hinkwato, va ri va swivongo hinkwaswo ni va tindzimi hinkwato.” Xana a va ta helela kwihi ke? Entiyisweni a va ta ‘pona nhlomu lowukulu’ va nga vavisekanga, leswaku va ta kuma vutomi lebyi nga heriki emisaveni ya paradeyisi!—Nhlavutelo 7:1-4, 9, 14.
Lexi tsakisaka, ntshungu lowu wukulu, lowu hlengeletiweke wu huma eka matiko ya kwalomu ka 229, wu engeteleke wu va Timbhoni leti chivirikaka ta kwalomu ka 4 500 000. Ka ha ta vo tala, hi laha swi kombisiwaka ha kona hi lava va veke kona eka Xitsundzuxo xa rifu ra Yesu, laha a va ri 11 431 171, hi April 17, lembe leri hundzeke. Eka timiliyoni leti hinkwato, i vanhu va 8 683 ntsena lava tivulaka leswaku i masalela lama ha riki emisaveni ya xivumbiwa lexintshwa, lava dyeke swifanekiselo swa Xitsundzuxo. Swirho swa ntlawa lowu wutsongo a swi nga ta swi kota ku hetisisa ntirho lowukulu wa ku chumayela namuntlha swi ri swoxe. Timiliyoni leti vumbaka ntshungu lowukulu sweswi ti tirhisana hi vun’we na swona eku endleni ka ntirho lowu. (Sofoniya 3:9) Ku tlula kwalaho, swirho leswi leteriweke kahle swa ntshungu lowukulu sweswi swi endla ntirho wa vulanguteri ni wa vutihlamuleri kun’we ni Huvo leyi Fumaka ya Israyele wa moya, hi laha Vanethinimi lava nga riki Vaisrayele va tirheke ha kona ni vaprista lava a va pfuxeta marhangu ya Yerusalema.—Nehemiya 3:22-26.
Ku Vumbiwa Ka “Matilo Lamantshwa Ni Misava Leyintshwa”
Ku hlengeletiwa loku ku fambisana ni ntsako lowukulu swonghasi! Swi hi laha Yehovha a vuleke leswaku swi ta va ha kona: “Maŝiv̌o, nḍi v̌umba matilo la’mantŝha, ni misav̌a le’yintŝha; timhaka ta khale a ti nga ha ṭunḍukiwi, ti nga ka ti nga ha tlheleri meehleketweni. Kambe hikwalaho ka leŝi nḍi nga ta ŝi v̌umba, ṭakani, mi ṭakisisa hi masiku, hikuv̌a Yerusalem, nḍi ṅwi tumbulušela ku ṭaka, ni tiko ra yena e ku ṭakisisa. Kutani nḍi ta tiṭakela ha Yerusalem, nḍi ta ṭaka hikwalaho ka tiko ra mina; kutani ku nga ka ku nga ha twakali rito ra ŝirilo, hambi ku ri ku huwelela ka ku tšhav̌a.” (Esaya 65:17-19) Matilo lamantshwa ya swivumbiwa swa Yehovha eku heteleleni ma ta vumbiwa hi Kreste Yesu ni swirho swa 144 000 leswi pfuxiweke eku feni, xivumbiwa lexintshwa lexi xaviweke exikarhi ka vanhu hi malembe xidzana ya 19 lama hundzeke. Ma vangama swinene ku tlula hulumendhe yihi ni yihi ya laha misaveni leyi fumeke eYerusalema wa xiviri, hambi ku ri leyi fumeke hi nkarhi wa Solomoni. Ma katsa Yerusalema Lontshwa, muti wa le tilweni, lowu hlamuseriweke hi vuxongi lebyi vangamaka hi ku helela eka Nhlavutelo ndzima 21.
Yerusalema Lontshwa i mutekiwa wa moya wa Kreste, valandzeri va yena lava totiweke va 144 000, lava va tihlanganisaka ni Muteki wa vona etilweni endzhaku ka loko va file ivi va pfuxiwa hi tlhelo ra moya. Va hlamuseriwe eka Nhlavutelo 21:1-4 tanihi lava ‘xikaka va huma etilweni eka Xikwembu,’ hi leswaku va tirhisiwa hi xona eku yiseni ka mikateko eka vanhu lava nga laha misaveni. Hi ndlela leyi ku hetiseka vuprofeta lebyi landzelaka: “Vonani, vuako bya Xikwembu byi le vanhwini. Xi ta aka na vona, kutani va ta va vanhu va xona; Xikwembu hi xoxe xi ta va na vona, xi va Xikwembu xa vona. Xi ta sula mihloti hinkwayo emahlweni ya vona, ni rifu a ri nga ha vi kona; hambi ya ri mahlomulo kumbe ku rila kumbe ku vaviseka a swi nga ha vi kona, hikuva leswo sungula swi hundzile.”
Ha tlangela swonghasi leswi Xikwembu xi vumbeke matilo wolawo mantshwa! Ku hambana ni vulawuri lebyi cinca-cincaka ni lebyi hombolokeke lebyi xaniseke vanhu hi nkarhi wo leha swinene, lunghiselelo leri ra hulumendhe ya Xikwembu ri ta va leri nga riki na makumu. Xivumbiwa lexintshwa ni vana va xona va moya, ku nga ntshungu lowukulu, xi tsakisiwa hi xitshembiso xin’wana xa Xikwembu lexi nge: “Hikuv̌a hi laha matilo la’mantŝha, ni misav̌a le’yintŝha, leyi nḍi nga ta yi tumbuluša, ŝi ta ṭhama ŝi v̌a kona, e mahlweni ka mina, ku v̌ula Yehova, hi ŝeŝo rišaka ra ṅwina, ni v̌ito ra ṅwina ŝi ta ṭhama ŝi v̌a kona.”—Esaya 66:22.
“Misav̌a le’yintŝha” yi sunguriwa hi vana lava va vatotiwa va xivumbiwa lexintshwa. I vandla lerintshwa ra vanhu lava chavaka Xikwembu emisaveni. Rivengo, vugevenga, madzolonga, vuhomboloki ni ku tikhoma loko biha ka vanhu namuntlha entiyisweni swi kandziyisa xilaveko xa ku hundzuka loku heleleke ku va ni vandla lerintshwa emisaveni, leri tirhaka ehansi ka vukongomisi bya matilo lamantshwa lama nga ni vunene. Sweswo i swikongomelo swa Yehovha. Tanihi leswi a vumbeke matilo lamantshwa, kutani u vumba misava leyintshwa hi ku hlengeleta ntshungu lowukulu tanihi vaaki va vandla ra misava leyintshwa lero rhula. Vandla leri hi rona ntsena leri nga ta pona ‘nhlomulo lowukulu.’—Nhlavutelo 7:14.
Xana hi nga langutela yini endzhaku ka nhlomulo lowukulu? Loko a vulavula ni vaapostola va yena, ku nga vanhu vo rhanga eka lava va vumbaka matilo lamantshwa lama nga ta fuma misava leyintshwa, Yesu u tshembisile a ku: “Ndzi tiyisile ndzi ri ka n’wina, loko swilo hinkwaswo swi ta va swi vuyeteriwile, ni loko N’wana-wa-Munhu a tshamisile exiluvelweni xa yena lexo kwetsima, n’wina lava mi ndzi landzeke, na n’wina mi ta tshama eswiluvelweni swa 12.” (Matewu 19:28) Swirho leswi hinkwaswo swa 144 000 swa Yerusalema Lontshwa swi ta hlanganyela na Yesu eku avanyiseni ka vanhu. Kutani rirhandzu ri ta siva vutianakanyi ni rivengo, tanihi xisekelo lexi vandla ra vanhu ri akiweke eka xona. Swiphiqo swa rixaka ni swa vutiko swi ta herisiwa. Varhandziwa va ta pfuxiwa hakatsongo-tsongo. Vanhu lava tshembekaka va tibiliyoni va ta va ndyangu wun’we lowukulu, lowu hlanganeke, lowu nga ta kuma vutomi lebyi nga heriki emisaveni leyi hundzuriweke paradeyisi.
Leswi swi ta va leswi tlulaka mianakanyo ya Utopia kumbe Shangri-la. Ku ta va ntumbuluko lowu nga riki na makumu—“matilo lamantshwa ni misava leyintshwa, laha ku nga ta va ni ku lulama”! (2 Petro 3:13) Kunene, lowu i ntshembo lowu hlamarisaka, xitshembiso lexikulu xa loyi a nge, “Vonani, ndzi endla swilo hinkwaswo swi va leswintshwa,” ni loyi a engeteleke hi marito lama nyikaka ripfumelo lama nge: “Marito lawa ma tshembekile, ma ni ntiyiso.”—Nhlavutelo 21:5.