Ku Tsakela Muvumbi Wa Hina La Hlamarisaka

“Israel a a ṭakele muv̌umbi wa yena, v̌ana v̌a Sion a v̌a ṭakele hosi ya v̌ona!”—PISALEMA 149:2.

1. Ku nga khathariseki minkulungwana ya leswaku ku kumiwe “ku rhula eku heteleleni,” kahle-kahle hi xihi xiyimo lexi nga kona evanhwini?

MISAVA ya namuntlha yi karhatiwa hi “mahlomulo.” Xexo i xiga lexi Yesu a xi tirhiseke evuprofeteni byakwe bya ‘ku hela ka mafambiselo ya swilo,’ nguva ya mangava leyi sunguleke hi nyimpi yo sungula ya misava hi 1914. (Matewu 24:3-8) Vativi vo tala va tipolitiki va vona vumundzuku byi ri lebyi dzwihaleke. Ku nga khathariseki minkulungwana ya leswaku ku kumiwe “ku rhula eku heteleleni” le Yuropa Vuxa, khale ka muungameri wa tiko rero u katsakanye xiyimo xexo a ku: “Ku andza lokukulu ka vaaka-tiko ni ku hisa lokukulu ka misava, ku boxeka ka ozone ni AIDS, nxungeto wa vutherorisi bya nyutliya ni vangwa ro hlamarisa leri pfulekaka exikarhi ka matiko lama fuweke ya le n’walungwini ni matiko lama sikaka ya le dzongeni, khombo ra ndlala, ku kala ka vutshamo ni ku hetiwa ka swicelwa swa misava, ku andza ka vanhu lava mianakanyo ni langutelo ra vona swi lawuriwaka hi tithelevhixini ni ku andza ka nxungeto wa tinyimpi ta swifundzha—hinkwaswo leswi, ku katsa ni swin’wana swa magidi, swi kombisa nxungeto lowu tolovelekeke eka vanhu.” Ku hava ntamu wa munhu lowu nga susaka nxungeto lowu wu nga ni khombo swonghasi.—Yeremiya 10:23.

2. Xana i mani la nga ni ntlhantlho lowu nga heriki wa swiphiqo swa vanhu, naswona hi rihi goza leri ana se a ri tekeke?

² Hambi swi ri tano, hi nga tsaka hi leswi Muvumbi wa hina la Hlamarisaka a nga ni ntlhantlho lowu nga heriki. Evuprofeteni bya Yesu, ‘ku hela ka mafambiselo ya swilo’ ku fambisana ni ‘vukona’ bya yena lebyi nga vonekiki. (Matewu 24:3, 37-39) Leswaku a tumbuluxa “matilo lamantshwa,” Yehovha u veke Yesu exiluvelweni xakwe tanihi Hosi ya Vumesiya, laha vumbhoni bya vuprofeta byi kombaka leswaku xiendlakalo lexi xa matimu xi endleke ematilweni hi lembe ra 1914.a (2 Petro 3:13) Tanihi mufumi-kulobye na Yehovha Hosi ya Hinkwako-nkwako, sweswi Yesu u rhumiwa ku avanyisa matiko ni ku hambanisa lavo rhula, vanhu va la misaveni lava fanaka ni tinyimpfu, eka vanhu vo sihalala lava fanaka ni timbuti. “Timbuti” leti nga chaviki Xikwembu ti fungheriwe “ku suseriwa makumu,” kasi “tinyimpfu” ti fungheriwe vutomi lebyi nga heriki eMfun’weni wa laha misaveni.—Matewu 25:31-34, 46, NW.

3. Hi xihi xivangelo lexi Vakreste va nga na xona xo tsaka?

³ Masalela ya Israyele wa moya lama nga emisaveni, lawa sweswi ma hlanganeke ni ntshungu lowukulu wa tinyimpfu leti ti yingisaka, ma ni xivangelo lexi heleleke xa ku tsakela Yehovha, Hosi ya hi laha ku nga heriki, tanihi leswi a nga kusuhi ni ku chaputa xikongomelo xa yena lexikulu, hi Mfumo wa N’wana wa yena. Ma nga vula ma ku: “Nḍi ta tiṭakela e ka Yehova, moya wa nga wu ta tiṭakela e ka Šikwembu ša mina; hikuv̌a ši nḍi ambešile tinguv̌u ta ku hlayiseka . . . Hikuv̌a, hi laha misav̌a yi humesaka mahluke, hi laha ntanga wu mirisaka timbewu ta wona, hi mukhuv̌a wolowo, Hosi Yehova, o ta mirisa ku lulama ni ku ḍuna, e mahlweni ka matiko hikwawo.” (Esaya 61:10, 11) “Mahluke” lawa ma vonaka hi timiliyoni leti sweswi ti hlengeletiwaka ti huma ematikweni leswaku ti ta yimbelela risimu ra Yehovha.

‘Ku Swi Hatlisisa’

4, 5. (a) Ku hlengeletiwa ka vanhu va Xikwembu ku vhumbhisiwe ku yini? (b) I ku andza kwihi lokukulu loku voniweke hi lembe ra ntirho ra 1992?

⁴ Ku hlengeleta loku ku ya ku hatlisa leswi makumu ya mafambiselo ya Sathana ma tshinelaka. Muvumbi wa hina la hlamarisaka u ri: “Ku ta kumiwa la’v̌o lulama ntsena e tikweni ra wena . . . ; i hluke leri nḍi ri byaleke, i ntiro wa mav̌oko ya mina, leŝaku wu ta nḍi twarisa. Lo’nṭongo o ta v̌a khume ra madzana, lo’nṭongo ngopfu, o ta v̌a tiko le’ra matimba. Mina, Yehova, nḍi hatlisisa ŝilo leŝi e mikarini ya ŝona.” (Esaya 60:21, 22) Ku hatlisisa loku ku kombisiwa hi ndlela leyi hlamarisaka eka Xiviko Xa Ntirho Wa Lembe Ra 1992 Wa Timbhoni Ta Yehovha eMisaveni Hinkwayo, lexi humesiweke eka magazini lowu eka matluka 12 ku ya eka 15.

⁵ Lexi xiyekaka eka xiviko lexi i nhlohlorhi leyintshwa ya 4 472 787 wa vahuweleri va Mfumo, ku andza ka 193 967—loku tlulaka ka n’wexemu hi 4,5 wa tiphesente. Nhlohlorhi ya 301 002 wa lava khuvuriweke hi 1992, na yona yi komba ntiyiso wa leswaku mintshungu ya wu amukela ntiyiso wa Bibele. Vona ndlela leyi hi tsakaka ha yona leswi esikwini leri “ra munyama ni mihihi, . . . ku nga [na] tiko le’rikulu le’ra matimba,” leri, tanihi ntlhambi wa tinjiya, ri hangalasaka vumbhoni bya Mfumo “ku ya fika emakun’wini ya misava”! (Yuwele 2:2, 25; Mintirho 1:8) Ku sukela eAlaska etikweni ra ayisi—laha xihaha-mpfhuka xa Sosayiti ya Watch Tower xi veke ni maendzo yo tlula 50 yo ya etindhawini leti siviweke hi gamboko—ku ya fika emananga lama vavuriweke ya Mali na Burkina Faso ni swihlala leswi hangalakeke swa Micronesia, malandza ya Yehovha ma vangama tanihi “ku v̌onakala ka matiko, e ku fikisa ku pona ka [yena] e makuṅwini ya misav̌a!”—Esaya 49:6.

6, 7. Xana i ku hundzuka kwihi ka xiyimo loku voniweke emalembeni ya sweswinyana, naswona malandza ya Yehovha ma endle yini?

⁶ Yehovha u fane ni khokholo ni xihondzo xo tiya loko a sirhelela ni ku hlayisa vanhu va yena. Eswiphen’wini swo tala swa misava, Timbhoni ta Yehovha ti boheke ku tiyiselela ntshikilelo ni nxaniso wa tihanyi ku ringana makume ya malembe. (Pisalema 37:39, 40; 61:3, 4) Kambe sweswinyana, onge hi loko ku ri hlori, minsivelo ni swihingakanyo swi susiwile ematikweni ya kwalomu ka 21, lerova sweswi vanhu va Xikwembu va nga twarisa va tshunxekile leswaku Muvumbi wa hina la Hlamarisaka u veke Kreste leswaku a va Hosi emisaveni.—Pisalema 2:6-12.

⁷ Xana vanhu va Yehovha va wu tirhisa kahle ntshunxeko wa vona lowu va ha ku wu kumaka? Languta echatini u vona ku andza le Bulgaria, Romania, ni le khale ka Soviet Union le Vuxeni bya Yuropa na Angola, Benin, na Mozambhiki eAfrika. Ni le Zaire, laha ka ha riki ni swirhalanganya leswikulu, ku andza ka kona ka hlamarisa. Hi ntsako lowu nga etimbilwini ta vona, vamakwerhu lava tshunxekeke va angula xirhambo lexi nge: “Ḍunisani Yehova, hikuv̌a o lulamile . . . ! Hi yena l’a endleke ŝihlamariso le’ŝikulu, a ri ŝakwe, hikuv̌a tintŝalo ta yena hi le’ti nga heriki!” (Pisalema 136:1, 4) Ku dzunisa loku ku kombisiwa hi ku gingiriteka eku hlengeleteni ka vanhu van’wana lava fanaka ni tinyimpfu, hi va tisa etlhelweni ra Mfumo.

8. Vadzunisi lavantshwa va Yehovha va tise ku yini va ri karhi va haha “kukotisa mapapa” eVuxeni bya Yuropa? eAfrika?

⁸ Hi ximumu lexi hundzeke xa le Yuropa, mintsombano ya vanhu va Yehovha leyi khomeriweke ematikweni lawa a ma ri ya Vukhomunisi yi ve ni tinhlayo leti hlamarisaka ta lava va veke kona. Lexi hlamarisaka ngopfu i tinhlayo ta lava va khuvuriweke ematikweni wolawo. Hi ku fanana, eTogo, le Afrika, ku yirisiwa ku herisiwile hi December 10, 1991. N’hweti leyi tlhandlameke ku ve ni ntsombano wa tiko hinkwaro. Loko yi ringanisiwa ni nhlayo-xikarhi ya n’hweti ni n’hweti ya vahuweleri va 6 443 lava humaka nsimu, nhlayo ya lava veke kona entsombanweni lowu yi tlakuke yi ya eka 25 467, ku khuvuriwa 556—leswi endlaka tiphesente ta 8,6 ta nhlayo ya vahuweleri. Hi laha Esaya 60:8 yi swi hlamuselaka ha kona, vadzunisi lavantshwa va Yehovha va ta, va ri karhi va haha “kukotisa mapapa, tani hi matuv̌a e šihahlweni ša wona” emavandlheni ya vanhu va Yehovha.

9. I malunghiselelo wahi lama endliweke leswaku Vakreste ematikweni lama ha ku ntshunxekaka va kota ‘ku dya va eneriseka’?

⁹ Ndlala ya swakudya swa moya eVuxeni bya Yuropa ni le Afrika na yona ya phalariwa. Tifektri ta Sosayiti ya Watch Tower le Afrika Dzonga, eJarimani ni le Italy, ti tleketlele tibuku ta tindzimi to tala, hi tilori ni tilori, ti ti yisa ematikweni lama sikaka emoyeni. Enkarhini lowu hundzeke, Timbhoni to tala a ti boheka ku lombana timagazini, kambe sweswi ti kuma ndzalo ya swakudya swa moya. Ta swi tsakela ku katseka eku hetisekeni ka vuprofeta lebyi nge: “Mi ta dya, mi ko mi šura, mi ta ḍunisa v̌ito ra Yehova, Šikwembu ša ṅwina, l’a mi endleleke le’ŝi hlamarisaka.”—Yuwele 2:26.

Ku Khathalela Ku Andza Kun’wana

10. Hi ku xiya nhlayo ya le henhla ya lava va veke kona eXitsundzuxweni, i xirhambo xihi lexi nyikiwaka hinkwavo lava tsakelaka?

¹⁰ Lexi kunene xi hlamarisaka i nhlayo ya 11 431 171 ya misava hinkwayo ya lava va veke kona eXitsundzuxweni xa rifu ra Yesu, ku nga ku andza ka 781 013 kumbe 7,3 wa tiphesente ku tlula n’wexemu. Hoyohoyo, hinkwenu n’wina ma ha ku fikaka! Vona ndlela leyi a swi ta tsakisa ha yona loko hinkwavo vanhu lava lavantshwa, lava tsakelaka, a va lo kuma mpfuno wa dyondzo ya Bibele ya le kaya ni un’wana wa Timbhoni ta Yehovha! (Languta Esaya 48:17.) Xiviko Xa Ntirho Wa Lembe xi komba leswaku 4 278 127 wa tidyondzo leti ti endliwe hi n’hweti, ku andza lokunene ka 8,4 wa tiphesente. Hambi swi ri tano, van’wana vo tala va nga pfuneta lembe leri. Timbhoni ta Yehovha ta swi tsakela leswaku nkarhi ni nkarhi ti endzela vanhu lava tsakelaka leswaku ti fambisa dyondzo ya Bibele ya mahala ekaya, xisweswo ti va pfuna ku yima va tiya endleleni leyi yaka evuton’wini lebyi nga heriki. (Yohane 3:16, 36) Ha yini u nga kombeli dyondzo yo tano? Naswona tsundzuka, nkarhi hinkwawo u ta amukeriwa hi mandla mambirhi eHolweni ya Mfumo!—Pisalema 122:1; Varhoma 15:7.

11, 12. (a) Hi swihi swiphiqo leswi sweswi ku hlangavetaniwaka na swona ematikweni man’wana? (b) Xana ‘ku ringanisela’ ku endlekisa ku yini exikarhi ka matiko lama fumeke ni lama nge vusiwaneni?

¹¹ Mavandlha lama nga na Tiholo letinene ta Mfumo ma kateke hi laha ku fuweke. Xiyimo xexo xi hambene ni xa matiko lawa Timbhoni to tshembeka ti tiyiseleke eka wona ku ringana malembe yo tala ti siveriwile, ti hlangana exihundleni hi swintlawa-ntlawana. Etindhawini to tano to hlayanyana, sweswi va ntshunxekile, kambe va ni Tiholo letitsongo ta Mfumo. Hi xikombiso, etikweni rin’wana ra le Afrika, leri nga na 93 wa mavandlha, ku ni Tiholo tinharhu ta Mfumo ntsena. Kutani minhlangano yi tala ku khomeriwa erivaleni ra ndhawu leyikulu leyi pfulekeke. Vandlha ra vahuweleri va 150 ri nga ha va na 450 wa lava vaka kona eminhlanganweni nkarhi hinkwawo.

¹² EVuxeni bya Yuropa a swi olovi ku xaviseriwa ndhawu kumbe ku aka, kambe nhluvuko wu karhi wa endliwa. Le Poland, ku nyiketeriwe muako lowuntshwa wa rhavi hi November 28, 1992. Minyikelo ya mbilu yo basa entirhweni wa misava hinkwayo wa Timbhoni ta Yehovha yi karhi ya tirhisiwa leswaku yi pfuna ku aka tiholo ni miako yin’wana. Xisweswo, ‘ku ringanisela’ ka endliwa leswaku ku hanana koloko ka vamakwerhu lava nyikelaka hi leswi humaka eka ‘nsalo’ wa swilo swa vona swa nyama, swi ta pfuna ku wundla swilaveko swa moya swa mavandlha lama nga ematikweni lama nge vusiwaneni.—2 Vakorinto 8:13, 14.

Gidi Ra Timiliyoni Ta Tiawara!

13. Xana i tiawara tingani leti tirhisiweke eku chumayeleni ni le ku dyondziseni hi 1992, naswona i matshalatshala ya vamani lama kombisiweke eka nhlayo leyi?

¹³ Xana u nga endla yini hi gidi ra timiliyoni ta tiawara? Hinkwavo lava kumaka vutomi lebyi nga heriki va ta swi kota ku heta tiawara toleto to tala, hambi ku tlula kwalaho, entirhweni wa Yehovha lowu nga ni mihandzu, lowu enerisaka. Kambe ehleketa, u vungelela tiawara toleto to tala hi lembe rin’we! Sweswo hi leswi vanhu va Yehovha va swi endleke hi 1992. Loko hi hlanganisa xiviko xin’wana ni xin’wana xa vahuweleri hinkwavo va Mfumo, hi kuma nhlohlorhi leyintshwa ya 1 024 910 434 wa tiawara leti tirhisiweke hi ndlela leyinene—ku dzunisa Muvumbi wa hina la Hlamarisaka, hi ku “dyondzisa erivaleni ni le mindyangwini.” (Mintirho 20:20) Hi xiringaniso, Timbhoni ta 4 289 737 a ti vika n’hweti ni n’hweti. Ti huma eswiyin’weni hinkwaswo swa vutomi. Tin’wana ti ni nkarhi lowu hikiweke wa ku hlanganyela entirhweni wa Mfumo. Leswi swi katsa tinhloko ta mindyangu, leti fanelaka ku tirhela mindyangu ya tona; vanhu lava kuleke; ni vo tala lava nga ni swiphiqo swa rihanyo; swin’we ni vana lava ha riki exikolweni. Kambe, xiviko lexi endliweke hi un’wana ni un’wana i xikombiso lexi nkhensekaka xa ku rhandza Yehovha.—Ringanisa Luka 21:2-4.

14. Xana vantshwa va n’wi ‘tsundzuka njhani Muvumbi wa vona la Hlamarisaka’?

¹⁴ Rixaka leritsongo ra kula entirhweni wa Yehovha, naswona lexi tsakisaka, vunyingi bya rona byi tirhisa marito ya Solomoni eka Eklesiasta 12:1, lama nge: “Anakanya Muv̌umbi wa wena hi masiku ya v̌untŝha bya wena.” Va tikarhata entirhweni wa vona wa xikolo, ni ku leteriwa hi vatswari va vona eka swilo swa moya. A a swi tsakisa ku vona nhlayo leyinene ya vantshwa va kondlo-a-ndzi-dyi va yima emintsombanweni ya sweswinyana, va tinyiketela hi nkhuvulo. Nakambe swa tsakisa ku tiva leswaku vo tala, hi ku dyondzela mintirho yo karhi, va endla malunghiselelo lama xiyekaka ya ku phayona loko va pasa xikolo. Xisweswo, va ta kota ku tihlayisa, hi laha muapostola Pawulo a endleke ha kona nkarhi na nkarhi hi ku endla matende.—Mintirho 18:1-4.

15, 16. Maphayona ni malandza man’wana ya nkarhi hinkwawo ma pfunete njhani leswaku ma yisa ntirho wa Mfumo emahlweni, naswona i mikateko yihi leyi man’wana ya wona ma yi kumeke?

¹⁵ Mayana xiphemu lexikulu lexi maphayona ni malandza man’wana ya nkarhi hinkwawo ma xi endlaka leswaku ma yisa ntirho wa Mfumo emahlweni! N’wexemu mpimo wa maphayona wu tlakuke ku fikela enhlohlorhini ya 931 521. Loko ma chumayela siku na siku hi yindlu na yindlu, ni ku fambisa tidyondzo ta Bibele emakaya ya vanhu, ma fikela laha ma kotaka ku hlamusela Matsalwa hi ndlela leyi humelelaka. Tlhandla-kambirhi, yo tala ma faneriwile hi ku ya nghena Xikolo xa Ntirho wa Vuphayona xa mavhiki mambirhi, lexi ma pfunaka ku hlakulela vuswikoti lebyikulu ni ntsako eku endleni ka ntirho wa Xikwembu.

¹⁶ Rin’wana ni rin’wana eka maphayona lawa yo tshembeka ri nga hlanganyela emaritweni lawa ya Esaya 50:4: “Hosi Yehova, o nḍi nyikile ririmi ra mudyonḍisi leŝaku nḍi ta kota ku tiyisa hi rito ra mina loyi a heleke mbilu.” Namuntlha ku ni vanhu vo tala lava va karhaleke hi misava leyi onhakeke leyi va nga eka yona, kambe va ri lava phyuphyisiwaka hi rito leri vulavuriwaka hi maphayona ya hina yo tshembeka.—Ringanisa Swivuriso 15:23; Ezekiyele 9:4.

Lunghiselelo Lerikulu Ra Ku Aka

17. Handle ka ku aka ka moya, i ku aka kwihi ka xiviri loku voniweke emalembeni ya sweswinyana?

¹⁷ Nhluvuko wa moya wa Timbhoni ta Yehovha emisaveni hinkwayo wu tlhela wu lava ku andzisiwa ka swilo leswi tirhisiwaka. Ku engeteriwa ka miako yo kandziyisela, tihofisi, ni makaya ya Bethele ni ku akiwa ka Tiholo ta Mfumo ni Tiholo ta Tinhlengeletano ku va loku lavekaka swinene. Kutani ku laveka leswaku Timbhoni ta Yehovha ti va vaaki hi ndlela ya xiviri. Ku aka loku fanaka ni loku ku endliwile esikwini ra Hosi Solomoni. Solomoni u ake tempele ya ku gandzela Yehovha hi ku ya hi ‘pulani yo aka, leyi a yi kumeke hi vuhuhuteri,’ leyi Yehovha a yi nyikeke tata wa yena, Hosi Davhida. (1 Tikronika 28:11, 12) Xisweswo, Solomoni a nga akanga vayingiseri vakwe ntsena hi marito ya risima, ya vutlharhi, kambe u tlhele a kongomisa ku aka ka xiviri loku nga emahlweni, loku nga si tshamaka ku akiwa hi vaaki va sweswi.—1 Tihosi 6:1; 9:15, 17-19.

18, 19. (a) Xana i mintirho yihi ya ku aka leyi yaka emahlweni hi rivilo, leyi endliwaka hi nhlengeletano ya Yehovha? (b) Moya wa Yehovha wu vonake hi ndlela yihi eku akeni ka xiviri ni ka moya ke?

¹⁸ Namuntlha, Timbhoni ta Yehovha a ti aki ha yona mimpimo yo aka leyi huhutiweke hi Xikwembu, kambe ti na wona moya wa Xikwembu. Ku fana ni le masikwini ya Israyele, moya lowu, wu ti susumetela ku aka hi ndlela leyi hlamarisaka vanhu va misava swinene. (Zakariya 4:6) Nkarhi wu komile. Tiholo ta Mfumo ni miako yin’wana swa laveka handle ko heta nkarhi. Ematikweni man’wana, ku aka Tiholo ta Mfumo hi xihatla swi tolovelekile. Hi xikombiso, emalembeni ya 10 lama hundzeke, Canada ri vike ku akiwa ka 306 wa tiholo, yin’wana ni yin’wana hi nkarhi lowu nge hansi ka masiku mambirhi. Hikwalaho ka ku kula loku hatlisaka ka ntirho wa Yehovha emisaveni hinkwayo, ntsengo wa 43 wa miako ya marhavi lamatshwa kumbe marhavi lama engeteriwaka, sweswi ya karhi ya akiwa kumbe ku kunguhatiwa. Tlhandla-kambirhi, muako wo tshama eka wona wa swithezi swa 30, lowu nga rhurhelaka kwalomu ka gidi ra vatirhi vo tirhandzela va Bethele, wu kusuhi ni ku hela eBrooklyn. Nakambe eNew York State, le Patterson, muako wa xivandla xo dyondzela Bibele, muako lowukulu ku tlula hinkwayo leyi Sosayiti ya Watch Tower yi tshameke yi yi aka, wu ya emahlweni hi rivilo ro tlula leswi wu hlerisiweke xiswona.

¹⁹ Matsima lawa ma ya emahlweni hi ndlela leyi humelelaka ni hi ntirho wa risima lowu hlamarisaka minhlangano yo aka leyi nga ni vutshila emisaveni. Ha yini? Hikwalaho ka minyikelo leyikulu leyi endliwaka hi Timbhoni ta Yehovha leti tinyiketeleke. Moya wa yena a wu ti susumeteli ku pfuneta hi swilo leswi vonakaka ntsena, kambe ni ku tlhela ti nyikela nkarhi ni matimba ya tona hi mbilu yo basa. Laha ku akiwaka kona ka tala hi vatirhi lava leteriweke khwatsi, lava tinyiketeleke. A ku na switereko swa vatirhi, naswona a ku khekheleziwi entirhweni. Va susumetiwa hi moya wa Yehovha, ku kota leswi wu susumeteke vaaki va tabernakele enkarhini wa Muxe ni lava akeke tempele emasikwini ya Solomoni. Xiyimo xa moya i mfanelo leyikulu leyi lavekaka eka vatirhi lava.—Ringanisa Eksoda 35:30-35; 36:1-3; 39:42, 43; 1 Tihosi 6:11-14.

20. (a) Mahungu lamanene ma ha ta chumayeriwa ku fikela kwihi? (b) I ku langutela kwihi loku tsakisaka, loku yimeleke vanhu va Yehovha?

²⁰ Endzhaku ko heta tempele, Solomoni u yise xiyimiso xakwe xa ku aka emahlweni. (2 Vakorinto 8:1-6) Leswaku ku nyikela vumbhoni ka namuntlha ku ta engeteleka ku fikela kwihi—ku katsa ni xilaveko lexi fambisanaka na kona xa ku aka tiholo ni miako yin’wana—a hi swi tivi. Hambi swi ri tano, ha swi tiva leswaku loko mahungu lawa manene ya Mfumo ma chumayeriwile ku fikela laha Yehovha a leriseke kona, kutani makumu, ku nga ‘nhlomulo lowukulu,’ ma ta fika. (Matewu 24:14, 21) Emisaveni leyi nga ta ka yi nga ha onhiwi hi vanhu va makwanga, lunghiselelo ra Yehovha ra “matilo lamantshwa ni misava leyintshwa,” hi nkarhi wolowo ri ta tisa mikateko ya ntsandza-vahlayi evanhwini. Hikwalaho, onge hi nga ‘tsaka, hi tsakisisa hi laha ku nga heriki hi leswi Xikwembu xi swi tumbuluxaka,’ hi yisa swidzuniso hinkwaswo eka Muvumbi wa hina Lonkulu!—Esaya 65:17-19, 21, 25.

[Nhlamuselo ya le hansi]

Xana U Nga Hlamusela?

◻ Xana hi ni xivangelo xihi xo va hi tsakela Muvumbi wa hina la Hlamarisaka?

◻ I ku andza kwihi loku vikiweke hi lembe ra ntirho ra 1992?

◻ Ematikweni lawa ku chumayela a ku siveriwile enkarhini lowu hundzeke, i mikateko yihi leyi fuweke leyi nga vikiwa?

◻ Xana vantshwa ni maphayona va pfunete njhani eku andzeni loku nga enhlengeletanweni ya Yehovha?

◻ Xana vanhu va Yehovha a va ri karhi va gingiriteka hi ndlela yihi entirhweni wa ku aka ka xiviri ni ka moya?

[Bokisi leri nga eka tluka 17]

N’wexemu, ku tirhisiwe tiawara to tlula gidi ra timiliyoni entirhweni wo chumayela ni wo dyondzisa

[Chati leyi nga eka tluka 12-15]

XIVIKO XA NTIRHO WA LEMBE RA 1992 WA TIMBHONI TA YEHOVHA EMISAVENI HINKWAYO

(See bound volume)

[Xifaniso lexi nga eka tluka 10]

Madzana ya magidi ya lava khuvuriweke n’wexemu ma komba leswaku Yehovha wa wu katekisa ntirho wo chumayela ni wo dyondzisa

[Xifaniso lexi nga eka tluka 16]

Tinhlayo letikulu ta vantshwa ti ‘tsundzuka Muvumbi wa tona la Hlamarisaka’