Ndzima 17
I Yini Leswi Ndzi Faneleke Ndzi Swi Xiya Hi Ku Va Ni Vanghana eXikolweni?
“Minkarhi yin’wana a ndzi vona ntlawa wa vantshwa kutani ndzi ku, ‘Hakunene va rhandzana. Na mina ndzi lava ku va munghana wa vona.’”—Joe.
“Xiphiqo xa mina hileswaku a swi ndzi olovela ku va ni vanghana exikolweni.”—Maria.
HINKWERHU ha va lava vanghana, leswaku hi ta hungasa na vona ni leswaku va hi pfuna loko swiyimo swi bihile. Yesu a a ri na vona vanghana naswona a a rhandza ku hungasa na vona. (Yohane 15:15) Kutani loko a ri kusuhi ni ku fa emhandzini ya nxaniso, munghana wa yena lonkulu Yohane “mudyondzisiwa loyi a a n’wi rhandza,” a a ri kona. (Yohane 19:25-27; 21:20) Vanghana vo fana na Yohane hi vona vanghana va xiviri hikuva va ta rila va tlhela va tsaka na wena!
Kumbexana u titwa onge u kume vanghana vo tano exikolweni, a nga ha va un’we kumbe vambirhi lava mi twanaka kahle. Ku ni swo karhi leswi mi fanaka ha swona naswona mi tsakela ku dya mabulo swin’we. Eka wena va nga ha vonaka va nga ri ‘vanakulobye vo biha.’ (1 Vakorinto 15:33) Anne u ri: “Siku ni siku u tshama u ri na vona. Kutani loko u ri na vona u titwa u ntshunxekile. A swi fani ni loko u ri ni Vakreste-kuloni hikuva minkarhi yin’wana u titwa u nga ntshunxekanga ku endla swilo swin’wana. Kambe exikolweni u titwa u ntshunxekile.” Ku engetela kwalaho u nga tikuma u anakanya ku fana na Lois, loyi a nge: “A ndzi lava ku komba vanghana va mina leswaku Timbhoni ta Yehovha ta fana ni vanhu van’wana.” Xana leswi i swivangelo leswi twalaka, leswi nga endlaka leswaku u aka vunghana ni vana lava u dyondzaka na vona xikolo?
Ha Yini U Fanele U Va Ni Vuxiyaxiya Loko U Hlawula Vanghana eXikolweni?
Anakanya leswi humeleleke Maria, la boxiweke eku sunguleni ka xihloko lexi. Tanihi leswi a a rhandza vanhu, a swi n’wi olovela ku va ni vanghana kambe a a nga swi koti ku vona lava nga riki lavanene. U ri: “A ndzi rhandza ku va ni vanghana va majaha ni tintombhi. Hikwalaho ka sweswo ndzi tikume ndzi ri karhi ndzi nyupela hakatsongo-tsongo emakhombyeni ya misava leyi.” Lois na yena u ve ni ntokoto lowu fanaka. U ri: “Ndzi sungule ku tekelela mikhuva ya vana lava a ndzi famba na vona kutani ndzi endla swilo hi ndlela leyi a va endla ha yona.”
Mhaka leyi a yi hlamarisi hikuva loko u lava ku va munghana wa munhu wo karhi u fanele ku rhandza leswi a swi rhandzaka ni ndlela leyi a tikhomaka ha yona. Loko u va ni vanghana lava nga hanyiki hi milawu ya Bibele, va ta ku kucetela leswaku u hanya hi ndlela leyi va hanyaka ha yona. (Swivuriso 13:20) Hikwalaho ka sweswo muapostola Pawulo u te: “Mi nga paniwi ni lava va nga riki vapfumeri.”—2 Vakorinto 6:14.
Leswi U Nga Swi Endlaka
Xana marito ya Pawulo ma vula leswaku u fanele u fambela ekule ni vana lava u nghenaka na vona xikolo? Doo! Leswaku Vakreste va ta kota ku hetisisa ntirho wa vona wa ku “endla vanhu va matiko hinkwawo va va vadyondzisiwa,” va fanele va tolovelana ni vanhu va tinxaka hinkwato, vukhongeri hinkwabyo ni mindhavuko hinkwayo.—Matewu 28:19.
Muapostola Pawulo u hi vekele xikombiso lexinene emhakeni leyi. A a swi kota ku bula ni “vanhu va mixaka hinkwayo,” hambileswi a a nga pfumelelani ni leswi a va swi kholwa. (1 Vakorinto 9:22, 23) Na wena u nga tekelela xikombiso xa yena. A swi bihanga ku tolovelana ni tintangha ta wena. Dyondza ku vulavurisana na tona kahle. Kambe, u nga tekeleli ndlela leyi ti vulavulaka ni ku tikhoma ha yona. Ku ri na sweswo, hatla u ti hlamusela hi xichavo leswaku ha yini u hanya hi ku landza milawu ya Bibele.—2 Timotiya 2:25.
I ntiyiso leswaku u ta vonaka u ri xiphukuphuku, naswona sweswo a swi tsakisi. (Yohane 15:19) Kambe langutisa mhaka leyi hi tihlo rin’wana: Loko a wu ri endzeni ka xikepe lexi rhendzeriweke hi vanhu lava nga le ku nweleni, xana a wu ta va ponisa hi ku huma exikepeni u tlulela ematini? Doo!
Hilaha ku fanaka, loko u ri exikolweni u rhendzeriwe hi vanhu lava nga riki na nsirhelelo wa Yehovha hileswi va nga riki vanghana va yena. (Pisalema 121:2-8) Loko wo honisa milawu ya Yehovha leswaku u ta va munghana wa vana lava u nghenaka xikolo na vona, u ta va u hoxa vuxaka bya wena na Yehovha ekhombyeni naswona sweswo swi ta ku dyisa mbitsi. (Vaefesa 4:14, 15; Yakobo 4:4) Swi ta va swinene loko wo ringeta ku pfuna vanghana va wena hi ku va komba ndlela yo tirhela Yehovha. Loko u endla tano u ta va munghana lonene hakunene.
MATSALWA
“Ndzi endla swilo hinkwaswo hikwalaho ka mahungu lamanene, leswaku ndzi ma avela van’wana.”—1 Vakorinto 9:23.
XITSUNDZUXO
Loko van’wana lava u nghenaka na vona xikolo va lava ku twa hi ta ripfumelo ra wena, va nyike nkarhi wa leswaku va tiphofula. Rhiya ndleve loko va vulavula. Loko u vulavula, endla tano hi “moya wo rhula ni xichavo lexi enteke.”—1 Petro 3:15.
XANA A WU SWI TIVA LESWAKU . . . ?
Vanhu vo tala namuntlha lava gandzelaka Xikwembu va dyondzeriwe Bibele hi vanhu lava a va nghena na vona xikolo, lava a va ri ni xivindzi xa ku byela van’wana hi ripfumelo ra vona.
LESWI NDZI TIYIMISELEKE KU SWI ENDLA!
Loko ndzi vona leswaku ndzi sungula ku va munghana lonkulu ni muntshwa loyi ndzi nghenaka na yena xikolo, ndzi ta ․․․․․
Loko muntshwa loyi ndzi nghenaka na yena xikolo a hlekula tidyondzo ta vukhongeri bya mina, ndzi ta langutana ni xiyimo xolexo hi ku ․․․․․
Leswi ndzi lavaka ku vutisa (va-)mutswari wa mina hi mhaka leyi ․․․․․
U NGA KU YINI?
● Ha yini swi vonaka swi olova ku va ni vanghana exikolweni ku ri ni ku va ni vanghana evandlheni ra Vukreste?
● Ha yini swi ri ni khombo ku hungasa ni muntshwa loyi u dyondzaka na yena xikolo la nga riki mupfumeri loko xikolo xi humile?
● Xana swi ku pfuna hi yini ku byela vantshwa lava u nghenaka na vona xikolo leswaku u Mbhoni ya Yehovha?
[Marito lama tshahiweke exihlokweni lama nga eka tluka 143]
“A ndzi tikhoma ku fana ni vana lavan’wana exikolweni, kutani a swi ndzi olovela ku va ni vanghana. Kambe ndzi dyondze ku vava. Sweswi ndzi ni vanghana va xiviri lava ndzi va tshembaka evandlheni.”—Daniel
[Xifaniso lexi nga eka tluka 146]
Xana u nga n’wi pfuna njhani munhu loyi a nwelaka—hi ku tlulela ematini kumbe hi ku n’wi hoxela nchumu lowu nga ta n’wi ponisa?