Ndzima 36

Xana Ndzi Nga Ri Lwela Njhani Ripfumelo Ra Mina Eka Xikwembu?

I yini leswi talaka ku ku sivela ku bula ni tintangha ta wena exikolweni hi vukhongeri bya wena?

□ Ku pfumala vutivi lebyi ringaneke bya Bibele

□ Ku chava ku hlekiwa

□ Ku nga tivi ku sungula bulo

Hi yihi ndlela leyi ku olovelaka leswaku u kota ku bula hi vukhongeri bya wena?

□ Ku bula ni xichudeni xin’we hi ri vambirhi

□ Ku bula emahlweni ka tlilasi

□ Ku tsala xitsalwana mayelana ni vukhongeri bya mina

Tsala vito ra un’wana loyi u nghenaka na yena xikolo loyi u ehleketaka leswaku a nga yingisa rungula ra wena loko wo sungula ku n’wi chumayela hi mhaka yo karhi. ․․․․․

SWI nga endleka leswaku tintangha ta wena exikolweni a ti rhandzi ku vulavula hi Xikwembu. Kambe loko wo bula hi swilo swo fana ni ta mintlangu, swiambalo, vafana ni vanhwanyana mi nga bula nkarhi wo leha. Hambiswiritano, loko wo sungula ku vulavula hi Xikwembu, ko vhela ku ku whii!

Leswi a swi vuli leswaku tintangha ta wena a ti tshembi leswaku Xikwembu xi kona, to tala ta kholwa. Kambe tin’wana ti khomiwa hi tingana ku vulavula hi mhaka leyi. Ti anakanya leswaku a hi mhaka yo tsakisa.

Xana Wena U Titwa Njhani Hi Mhaka Leyi?

Swa twisiseka loko u kanakana ku bula ni vantshwa lava u dyondzaka na vona mayelana ni Xikwembu. Phela, hinkwerhu ha swi lava ku va ni vanghana naswona a hi swi rhandzi ku hlekiwa. Xana swi nga endleka leswaku tintangha ta wena ti ku hleka loko u bula hi vukhongeri bya wena? Swi nga endleka. Kasi, nkarhi wun’wana tintangha ta wena ti nga ha ku hlamarisa. To tala ta tona ti lavana ni tinhlamulo ta swivutiso swo fana ni leswi nge: Xana misava leyi yi ta helela kwihi? ni lexi nge Ha yini ku ri ni maxangu yo tala swonghasi? Ti nga titwa ti ntshunxile ku bula hi timhaka leti ni ntangha ya tona ku tlula ku bula ni munhu lonkulu.

Hambiswiritano, ku bula ni tintangha ta wena hi timhaka ta vukhongeri swi nga vonaka ku ri nchumu wo tika swinene. Kambe a swi lavi u kala u vonaka onge u munhu la hisekelaka vukhongeri hi ndlela leyi hundzeletiweke, kumbe u karhateka hi leswaku a wu fanelanga u endla xihoxo loko u ri karhi u vulavula. Ku bula hi vukhongeri bya wena swi nga fana ni ku tlanga xichayachayana xo karhi. Loko wa ha sungula swa tika. Kambe loko u ya emahlweni u titoloveta, swi ya swi ku olovela. Kambe u nga ri sungula njhani bulo ni ntangha ya wena?

U nga swi kota ku kuma xingheniso lexi olovaka. Hi xikombiso, loko ku ri ni mhaka yo karhi leya ha ku endlekaka leyi ku buriwaka ha yona exikolweni, u nga kombisa leswaku Bibele yi ri yini hi yona. Kumbe u nga ringeta ku bula ni muntshwa un’we exikolweni. Vantshwa van’wana lava nga Vakreste va veka buku kumbe magazini wo karhi lowu sekeriweke eBibeleni ehenhla ka desika ra vona leswaku vantshwa van’wana va ta wu vona. Ko tala vantshwa van’wana va wu xiya kutani va lava ku tiva ha wona.

Hi yihi ndlela leyi u lavaka ku yi tirhisa eka leti boxiweke laha henhla? ․․․․․

Xana yi kona ndlela yin’wana leyi u nga yi tirhisaka ku bula ni tintangha ta wena exikolweni mayelana ni vukhongeri bya wena? Loko yi ri kona yi tsale laha.

․․․․․

Minkarhi yin’wana ntirho wo karhi wa xikolo wu nga ku pfuna leswaku u bula hi vukhongeri bya wena. Hi xikombiso, xana u nga endla yini loko ku dyondzisiwa dyondzo ya leswaku swilo hinkwaswo swi ve kona hi xiwelo? Xana u nga endla yini ku lwela mhaka ya leswaku swilo hinkwaswo swi lo tumbuluxiwa?

Ku Lwela Mhaka Ya Leswaku Swilo Hinkwaswo Swi lo Tumbuluxiwa

Muntshwa la vuriwaka Ryan u ri: “Loko thicara a sungula ku dyondzisa leswaku swilo hinkwaswo swi lo tiendlekela, ndzi kume leswaku swi hambanile swinene ni leswi ndzi dyondzisiweke swona. A ku vuriwa leswaku dyondzo leyi i ntiyiso naswona swoleswo a swi ndzi chavisa.” Nhwanyana la vuriwa Raquel u titwa hi ndlela leyi fanaka. U ri: “A ndzi chuhe ngopfu loko thicara la ndzi dyondzisaka dyondzo ya mahanyelo ya vanhu a hi byela leswaku hi ta nghena eka dyondzo ya ku tiendlekela ka swilo. Ndzi vhele ndzi swi vona leswaku swi ta lava ndzi hlamusela etlilasini leswaku mina ndzi yime kwihi emhakeni leyi yo tika.”

Xana u titwa njhani loko mi sungula ku dyondza hi mhaka leyi exikolweni? Wena u tshemba leswaku Xikwembu hi xona ‘xi tumbuluxeke swilo hinkwaswo.’ (Nhlavutelo 4:11) Swilo hinkwaswo leswi u swi vonaka swi ku komba leswaku ku ni munhu wo tlhariha swinene loyi a swi tumbuluxeke. Kambe tibuku ta xikolo ti vula leswaku hi lo na swipfuketana hi va kona, ni thicara wa wena u vula sweswo. Wo va mani wena leswaku u nga kaneta leswi vuriweke hi tintlhari?

A hi wena ntsena la tshembaka leswaku swilo hinkwaswo swi lo tumbuluxiwa. Ntiyiso wa mhaka hi leswaku ku ni vativi va sayense vo hlayanyana lava nga yi pfumeriki dyondzo ya ku tiendlekela ka swilo. Ni mathicara yo tala ku katsa ni swichudeni a ma yi pfumeli dyondzo leyi.

Hambiswiritano, leswaku u ta kota ku lwela leswi Bibele yi swi vulaka hi mhaka leyi, swi lava u tiva leswi yi swi dyondzisaka. U nga heti nkarhi u ringeta ku hlamusela swilo leswi Bibele yi nga swi boxiki hi ku kongoma. Xiya swikombiso swi nga ri swingani.

Buku ya mina ya sayense yi vula leswaku misava swin’we ni tipulanete ni tinyeleti se swi ni malembe ya tibiliyoni swi ri kona. Bibele yi vula leswaku matilo ni misava ni hinkwaswo leswi nga kona a swi ri kona ku nga si sungula siku ro sungula ra ku tumbuluxa. Leswi swi vula leswaku swi nga endleka misava ni tipulanete ni tinyeleti swi ri ni tibiliyoni ta malembe swi ri kona.—Genesa 1:1.

Thicara u vula leswaku a swi nge endleki leswaku misava yi va yi tumbuluxiwe hi masiku ya tsevu ntsena. Bibele a yi vuli leswaku siku rin’wana ni rin’wana ra masiku ya tsevu ya ku tumbuluxiwa ka swilo a ri lehe 24 wa tiawara.

Etlilasini hi bule hi swikombiso swo talanyana, leswi kombisaka ndlela leyi swiharhi ni vanhu va cinceke ha yona hi ku famba ka nkarhi. Bibele yi vula leswaku Xikwembu xi tumbuluxe swilo leswi hanyaka “hi ku ya hi mixaka ya swona.” (Genesa 1:20, 21) A yi pfumelelani na yona mhaka ya leswaku swilo leswi hanyaka swi lo tiendlekela swi huma eka swilo leswi nga hanyiki kumbe leswaku Xikwembu xi sungule endlelo ra ku tiendlekela ka swilo hi ku tirhisa sele yin’we. Hambiswiritano, ‘muxaka’ ha wun’we wa swivumbiwa hinkwaswo wa swi kota ku humesa mixaka yo hambana-hambana. Xisweswo Bibele a yi ali leswaku ku ni ku cinca ko karhi eka “mixaka” leyi nga kona.

Hi ku landza leswi ku buriweke ha swona eka ndzima leyi, xana u nga ku yini loko thicara wa wena kumbe lava u nghenaka na vona xikolo va ku:

“Sayense yi ni vumbhoni lebyi tiyeke bya leswaku vanhu va lo na swi pfuketana va va kona.” ․․․․․

“A ndzi tshembi leswaku Xikwembu xi kona hikuva a ndzi xi voni.” ․․․․․

Tiyiseka Hi Leswi U Swi Kholwaka!

Loko u kurisiwa hi vatswari lava nga Vakreste, swi nga endleka u tshemba leswaku swilo hinkwaswo swi lo tumbuluxiwa hileswi vatswari va ku dyondziseke sweswo. Kambe loko u ri karhi u kula, swi lava u gandzela Xikwembu ‘hi matimba ya wena ya ku anakanya,’ u va ni xisekelo lexi tiyeke xa leswi u swi kholwaka. (Varhoma 12:1) Hikwalaho ka sweswo, tivutise, ‘I yini leswi ndzi endlaka ndzi kholwa leswaku ku ni Mutumbuluxi?’ Sam la nga ni malembe ya 14 u langutisa ndlela leyi miri wa munhu wu vumbekeke ha yona. U ri: “Wu rharhanganile, naswona swirho swa wona swi tirhisana kahle hinkwaswo. A swi koteki leswaku wu nga va wu lo tiendlekela!” Holly, la nga ni malembe ya 16, wa pfumela. U ri: “Ku sukela loko ndzi khomiwe hi vuvabyi bya chukela, ndzi dyondze swo tala mayelana ni ndlela leyi miri wa munhu wu tirhaka ha yona. Swa hlamarisa ku vona ndlela leyi xirho lexitsongo lexi nga ekhwirini lexi vitaniwaka rivengwana (pancreas), xi endlaka ha yona ntirho lowukulu swonghasi wa leswaku ngati ni swirho swin’wana swi tirha kahle.”

Tsala swilo swinharhu laha hansi, leswi endlaka u tshemba leswaku ku ni Mutumbuluxi.

1. ․․․․․

2. ․․․․․

3. ․․․․․

A ku na xivangelo xo titwa u nga tlharihanga kumbe u khomiwa hi tingana hileswi u pfumelaka leswaku ku ni Xikwembu nileswaku hi xona xi nga endla swilo hinkwaswo. Loko u kambisisa vumbhoni lebyi nga kona, i vutlhari ku pfumela leswaku vanhu va vumbiwe hi Xikwembu.

Mhaka-nkulu hi leswaku, dyondzo ya leswaku swilo hinkwaswo swi lo tiendlekela yi rharhanganile swinene, hikuva yi lava u pfumela leswaku swilo hinkwaswo swi lo tiendlekela handle ka Muvumbi. Loko se u anakanyisise hi mhaka leyi hi ku tirhisa matimba ya wena ya ku anakanya, u ta va ni xivindzi xo kota ku lwela mhaka ya leswaku Xikwembu xi kona.

MATSALWA

“A ndzi khomiwi hi tingana hi mahungu lamanene; entiyisweni, i matimba ya Xikwembu ya ku ponisa un’wana ni un’wana la nga ni ripfumelo.”—Varhoma 1:16.

XITSUNDZUXO

Vana ni xivindzi loko u bula ni van’wana hi vukhongeri bya wena. Loko u vulavula onge leswi u swi vulaka swi ku khomisa tingana, u ta tihlekisa hi tintangha ta wena. Kambe tintangha ta wena ti ta ku xixima loko u vulavula na tona hi xivindzi, tanihi laha na tona ti endlaka hakona loko ti bula hi timhaka tin’wana.

XANA A WU SWI TIVA LESWAKU . . . ?

Minkarhi yin’wana loko mathicara ma komberiwa ku kombisa vumbhoni bya leswaku dyondzo ya leswaku swilo swi lo tiendlekela i ntiyiso, ma tsandzeka kutani ma swi xiya leswaku ma pfumela eka yona hileswi na wona ma dyondzisiweke tano.

LESWI NDZI TIYIMISELEKE KU SWI ENDLA!

Leswaku ndzi ta kota ku sungula bulo ra Bibele ni ntangha ya mina exikolweni ndzi ta ku ․․․․․

Loko ndzi vutisiwa leswaku ha yini ndzi kholwa leswaku ku ni Mutumbuluxi ndzi ta ku ․․․․․

Leswi ndzi lavaka ku vutisa (va-)mutswari wa mina hi mhaka leyi ․․․․․

U NGA KU YINI?

● Ha yini swi ri swa nkoka ku bula ni van’wana hi vukhongeri bya wena?

● Hi tihi tindlela tin’wana leti nga ku olovelaka exikolweni ku hlamusela mhaka ya leswaku swilo swi lo tumbuluxiwa?

● Xana u nga n’wi nkhensa njhani Loyi a nga tumbuluxa swilo hinkwaswo?—Mintirho 17:26, 27.

[Marito lama tshahiweke exihlokweni lama nga eka tluka 299]

“Xikolo i nsimu leyi nga tirhiwaka hi lava va nghenaka xikolo.”—Iraida

[Xifaniso lexi nga eka tluka 298]

Ku fana ni ku dyondza ku tlanga xichayachayana xo karhi, ku bula ni van’wana hi vukhongeri bya wena swi lava leswaku u va ni vuswikoti, loko u tiletela u ta humelela

[Xifaniso lexi nga eka tluka 300, 301]

U nga swi kota ku bula ni van’wana hi vukhongeri bya wena handle ko chava