Xikombiso Lexinene—Vaheveru Vanharhu

Hananiya, Mixayele na Azariya a va yime etimbaleni ta le Dura ekusuhi na Babilona. A va rhendzeriwe hi vanhu lava nkhinsameke emahlweni ka xifaniso lexikulu. Hambileswi a va tshikileriwa hi tintangha ta vona ni leswi hosi a yi vule leswaku loyi a nga nkhinsamiki u ta dlayiwa, vantshwa lava a va xi gandzelanga xifaniso lexi. Va byele Nebukadnetsara hi xichavo leswaku a va nge pfuki va gandzele swikwembu swin’wana handle ka Yehovha.—Daniyele 1:6; 3:17, 18.

Majaha lawa a ma ha ri vantshwa loko ma yisiwa evuhlongeni le Babilona. Ku tshembeka ka wona loko ma ha ri vantshwa—hi ku nga dyi swakudya leswi Nawu wa Xikwembu a wu vula leswaku a ma fanelanga ma swi dya—swi endle leswaku ma swi kota ku langutana ni miringo leyikulu evuton’wini bya wona. (Daniyele 1:6-20) A ma swi tiva leswaku ku yingisa Yehovha i vutlhari. Xana na wena u tiyimisele ku yingisa Xikwembu hambiloko tintangha ta wena ti ku kucetela ku endla swo biha? Loko u dyondza ku tshembeka eka Yehovha wa ha ri ntsongo hambi eka swilo leswi vonakaka swi ri switsongo, u ta kota ku tshama u tshembekile loko u langutana ni miringo leyikulu loko se u kurile.—Swivuriso 3:5, 6; Luka 16:10.