Xikombiso Lexinene—Pawulo

Muapostola Pawulo a a swi xiya leswaku a nga hetisekanga. U te: “Loko ndzi navela ku endla leswi lulameke, leswo biha swi kona eka mina.” Pawulo a a lava ku endla leswinene. U ye emahlweni a ku: “Kunene ndza wu tsakela nawu wa Xikwembu hi ku ya hi munhu loyi ndzi nga yena endzeni.” Kutani i yini lexi a xi n’wi sivela? U te: “Kambe . . . ndzi vona nawu wun’wana lowu lwaka ni nawu wa mianakanyo ya mina, wu ndzi endla khumbi ra nawu wa xidyoho lowu nga eswirhweni swa mina.” Swihoxo leswi Pawulo a a swi endla a swi nga n’wi tsakisi. Kutani u te: “Mina munhu wa maxangu!”—Varhoma 7:21-25.

Xana u khomiwa hi gome loko u endla swihoxo? Loko swi ri tano tsundzuka leswaku Pawulo na yena a a titwa hi ndlela leyi fanaka. Kambe Pawulo a a swi tiva leswaku Kreste u fele vanhu va ku fana na yena, hi yona mhaka a nga vula a ku: “Ndzi nkhensa Xikwembu ha Yesu Kreste Hosi ya hina!” (Varhoma 7:25) Pawulo a a swi xiya leswaku nkutsulo wa Yesu a ku ri nyiko leyi Xikwembu xi nyikeke un’wana ni un’wana wa hina. U tsale a ku: ‘N’wana wa Xikwembu, u ndzi rhandzile kutani a tinyiketa hikwalaho ka mina.’ (Vagalatiya 2:20) Loko u titwa u tshikilelekile anakanyisisa hi nkutsulo wa Yesu. Kutani loko swihoxo leswi u swi endlaka swi ku heta matimba, tsundzuka leswaku Kreste u fele vadyohi ku nga ri vanhu lava hetisekeke.