Swivutiso Swa Vahlayi
◼ A a ku ri yini “leswinene” leswi muapostola Pawulo a a nga koti ku swi endla, hi laha a vulaka ha kona eka Varhoma 7:19?
Entiyisweni, Pawulo a a kombetela eka ku tsandzeka ka yena ku endla swilo leswinene hinkwaswo leswi vuriwaka eNawini wa Muxe. Leswi a a swi nga koteki eka Pawulo ni le ka hinkwavo van’wana, ku katsa na hina, hikwalaho ka ku nga hetiseki na xidyoho. Kambe ku hava xilaveko xo khomiwa hi gome. Gandzelo ra Kriste ri pfule ndlela yo rivaleriwa hi Xikwembu na xiyimo lexinene na Yena.
Varhoma 7:19 yi ri: “Hikuva leswinene leswi ndzi navelaka ku swi endla, a ndzi swi endli, kambe leswo biha leswi ndzi nga naveliki ku swi endla, ndza swi endla.” Mongo wu komba leswaku Pawulo eku sunguleni a a vulavula hi “leswinene” hi mianakanyo ya leswi a a swi lerisiwile eNawini. Eka ndzimana 7 u te: “Xana Nawu i ku dyoha ke? Niswitsanana! Hambiswiritano, a ndzi nga ta tiva leswi ku dyoha ku nga swona, loko Nawu a wu nga vanga kona; hikuva a ndzi nga ta tiva leswi ku navela loko biha ku nga swona, loko Nawu a wu nga vulanga wu ku: ‘U nga tshuki u navela!’” Ina, Nawu wu swi endle swi va erivaleni leswaku tanihi leswi a va nga swi koti ku wu hlayisa hi ku helela, vanhu hinkwavo a a va dyohile.
Pawulo u ya emahlweni a vula leswaku a a ri “la hanyaka, [a] nga ri ehansi ka Nawu.” A a wu ri wihi nkarhi wolowo? Kahle-kahle, hi loko a ha ri exisutini xa Abrahama loko Yehova a nga si nyikela Nawu. (Varhoma 7:9; ringanisa Vaheveru 7:9, 10.) Hambi leswi Abrahama a a nga hetisekangi, Nawu a wu nga si nyikeriwa, kutani a nga tsundzuxiwanga hi vudyoho bya yena hi ku tsandzeka ku hlayisa milawu ya wona leyo tala. Xana sweswo swi vula leswaku mpfhuka loko Nawu wu nyikeriwile kutani wu kombisa ku nga hetiseki ka munhu, wu humesa vuyelo byo biha? Doo. Pawulo u ye emahlweni: “Hikokwalaho ke, nawu hi woxe wu [kwetsimile, NW], na xona xileriso xi hlawulekile, xi lulamile, hi lexinene.”—Varhoma 7:12.
Xiya leswaku Pawulo u hlamusela Nawu tanihi lowu wu ‘kwetsimeke’ ni ‘lowunene’. Eka tindzimana leti landzelaka, u hlamusele leswaku “leswinene”—Nawu—wu swi veke erivaleni leswaku a a ri mudyohi, naswona xidyoho lexi xi n’wi endle a faneriwa hi rifu. Pawulo u tsarile: “Leswinene leswi ndzi navelaka ku swi endla, a ndzi swi endli, kambe leswo biha leswi ndzi nga naveliki ku swi endla, ndza swi endla. Swi komba leswaku loko ndzi endla leswi ndzi nga naveliki ku swi endla, a nga ha ri mina hi xiviri xa mina la swi endlaka, kambe i ku dyoha loku akeke eka mina.”—Varhoma 7:13-20.
Kutani ke, eka ndzima leyi Pawulo a a nga vulavuli hi vunene hi ntolovelo, kumbe swiendlo leswi tolovelekeke leswinene. (Ringanisa Mintirho 9:36; Varhoma 13:3.) A a kombetela ngopfu-ngopfu eka ku endla (kumbe ku nga endli) swilo leswi a swi fambisana ni Nawu lowunene wa Xikwembu. Enkarhini lowu hundzeke hi ku chivirika u tirhise vukhongeri bya Xiyuda kutani—loko a ringanisiwa ni van’wana—a a “nga ri na nandzu.” Ku nga khathariseki sweswo, hambi leswi emianakanyweni a a ri hlonga ra ripfalo eka Nawu wolowo wo lulama, kambe a a nga hanyi hi wona hi ku helela. (Vafilipiya 3:4-6) Nawu a wu kombisa mimpimanyeto leyi hetisekeke ya Xikwembu, wu kombisa muapostola leswaku emirini wa yena a a ha ri hlonga ra xidyoho xa nawu naswona a a faneriwa hi rifu. Hambi swi ri tano, Pawulo a a ta nkhensa leswi hi gandzelo ra Kriste a a vuriwa lonene—la kutsuriweke eka xidyoho xa nawu na swiyimo swa wona leswi fanelaka, xigwevo xa rifu.—Varhoma 7:25.
Namuntlha Vakriste a va le hansi ka Nawu wa Muxe, hikuva wu beleriwe emhandzini ya nxaniso. (Varhoma 7:4-6; Vakolosa 2:14) Kambe hi endla kahle loko hi xiya leswaku a a wu nga ri nawu lowu tshikilelaka lowu hi fanelaka ku wu honisa. Doo, kahle-kahle Nawu a a wu lulamile. Xisweswo hi na xivangelo xo hlaya tibuku ta Bibele leti tameleke Nawu ni ku tiva leswi a a swi laveka eka Israyele. Ku nga ri khale, Timbhoni ta Yehova emisaveni hinkwayo ti ta va ti endla sweswo, ti namarhela ku hlaya ka tona Bibele vhiki na vhiki.
Loko hi ri karhi hi hlaya Nawu, hi fanele ku kombetela eka misinya ya nawu leyi seketelaka milawu ya wona leyo hambana-hambana na mimpfuno ya vanhu va Xikwembu leyi kumiwaka loko va ri karhi va ringeta ku landzelela milawu yoleyo leyinene. Na hina, hi fanele ku lemuka leswaku a hi hetisekangi, xisweswo a hi swi koti ku landzelela leswinene leswi hi swi dyondzaka eRitweni ra Xikwembu hi laha ku heleleke. Kambe loko hi ri karhi hi lwisana ni xidyoho xa nawu, hi nga tsakela ntshembo wa ku kutsuriwa hi ku tirhisiwa ka gandzelo ra Kriste eka hina.