Xiyenge 1

Xana Xikwembu Xi Ni Mhaka Na Hina?

MISAVA leyi yi tele hi swiphiqo. Vanhu va timiliyoni va xaniseka hikwalaho ka tinyimpi, timhangu ta ntumbuluko, vuvabyi, vusweti, vukanganyisi ni vubihi byin’wana. Swi nga ha endleka leswaku na wena siku ni siku u langutana ni swiphiqo. I mani la nga hi pfunaka? Xana u kona la khathalaka?

Hi nga tiyiseka leswaku Xikwembu xa khathala. Eka Rito ra xona ro Kwetsima xi te: “Xana wansati a nga rivala n’wana loyi a n’wi an’wisaka lerova a nga n’wi tweli vusiwana n’wana wa khwiri rakwe? Vavasati lava va nga rivala, kambe mina a ndzi nge ku rivali.”a

Xana sweswo a swi hi chaveleli? Xikwembu xi hi rhandza swinene ku tlula ndlela leyi manana a rhandzaka n’wana wakwe ha yona. Xikwembu a xi nge hi tshiki! Entiyisweni ana se xi hi pfune hi ndlela yo hlamarisa. Njhani? Hi ku hi komba leswaku loko hi ri ni ripfumelo ra xiviri hi nga tsaka evuton’wini.

Ripfumelo ra xiviri ri ta ku endla u tsaka. Ripfumelo ro tano ri nga ku pfuna leswaku u papalata swiphiqo swo tala naswona u kota ku langutana ni leswi u nga ta ka u nga swi koti ku swi papalata. Nakambe ri ta ku tshineta eka Xikwembu ri tlhela ri ku endla u va ni ku rhula. Ripfumelo ra xiviri ri ta endla leswaku u va ni vumundzuku lebyinene ku nga vutomi lebyi nga heriki eParadeyisini.

Kambe i yini ripfumelo ra xiviri? Naswona u nga ri hlakulela njhani?

[Nhlamuselo ya le hansi]

[Xifaniso lexi nga eka tluka 3]

Xikwembu xi hi rhandza swinene ku tlula ndlela leyi manana a rhandzaka n’wana wakwe ha yona