Xiyenge 2
I Yini Ripfumelo Ra Xiviri?
KU VA ni ripfumelo ra xiviri a swi vuli ntsena ku tshemba leswaku Xikwembu xi kona. Ku ni vanhu va timiliyoni lava tshembaka leswaku Xikwembu xi kona kambe va endla swilo swo biha hi vomu. Ripfumelo ro tano ri fana ni mali leyi nga riki ya xiviri. Yi tikomba yi ri ya xiviri kambe a yi pfuni nchumu. Kutani, i yini ripfumelo ra xiviri?
Ripfumelo ra xiviri ri titshege hi vutivi bya Matsalwa yo Kwetsima. Matsalwa wolawo ma hi byela ntiyiso hi Xikwembu naswona ma hi pfuna leswaku hi xi tiva. Ma hi byela hi milawu, swikongomelo ni tidyondzo ta xona. Tidyondzo ta kona ti katsa leswaku:
• Ku ni Xikwembu xin’we lexi nga ringanisiwiki na nchumu.
• Yesu a hi Xikwembu xa Matimba Hinkwawo kambe i muprofeta wa Xikwembu.
• Xikwembu xi venga muxaka wun’wana ni wun’wana wa ku gandzela swifaniso.
• Vanhu va langutane ni siku ra vuavanyisi leri taka.
• Vanhu va ntsandza-vahlayi va ta pfuxiwa leswaku va hanya eParadeyisini.
Ripfumelo ra xiviri ri hi pfuna leswaku hi endla mintirho leyinene. Mintirho yo tano yi tsakisa Xikwembu naswona yi nga hi pfuna yi tlhela yi pfuna ni van’wana. Mintirho leyi yi katsa
• ku gandzela Xikwembu.
• ku tekelela timfanelo ta Xikwembu—ngopfu-ngopfu rirhandzu.
• ku papalata mianakanyo yo biha ni ku navela ko biha.
• ku tshama hi ri ni ripfumelo eka Xikwembu hambiloko hi langutana ni swiphiqo.
• ku dyondzisa van’wana hi Xikwembu.
U Nga Ri Hlakulela Njhani Ripfumelo Ra Xiviri?
Kombela Xikwembu leswaku xi ku pfuna. Muxe u khongele eka Xikwembu a ku: “Ndzi kombela u ndzi tivisa tindlela ta wena, ndzi ku tiva leswaku ndzi kuma ku tsakeriwa ematihlweni ya wena.”a Xikwembu xi xi twile naswona xi xi hlamurile xikombelo xa yena. Muxe u ve xikombiso lexinene xo kombisa ripfumelo. Xikwembu xi ta ku pfuna na wena leswaku u hlakulela ripfumelo ra xiviri.
Tinyike nkarhi wo dyondza Matsalwa yo Kwetsima. Matsalwa yo Kwetsima lama katsaka Torah, Tipisalema ni Tibuku ta Tievhangeli, ma nga kumeka eBibeleni yo Kwetsima ku nga buku leyi nga hundzuluxeriwa ni ku hangalasiwa ku tlula to tala. Xana u na wona matsalwa wolawo?
Evuton’wini bya wena bya siku ni siku, tirhisa ndzayo leyi u yi dyondzaka eMatsalweni yo Kwetsima. Ripfumelo ri fana ni misiha leyi kulaka loko munhu a endla vutiolori. Kutani na rona loko u ri kombisa ra kula. U ta ti vonela hi ya wena leswaku ndzayo ya Xikwembu ya tirha. Ndzayo yoleyo leyi kumekaka eMatsalweni yo Kwetsima yi antswise vutomi bya vanhu vo tala. Yana emahlweni u hlaya broxara leyi leswaku u kuma swikombiso swin’wana.
[Nhlamuselo ya le hansi]
U Nga Hlamula Njhani?
• Ripfumelo ra xiviri ri titshege hi yini?
• Ripfumelo ra xiviri ri hi susumetela ku endla mintirho yihi leyinene?
• U nga ri hlakulela njhani ripfumelo ra xiviri?
[Bokisi/Xifaniso lexi nga eka tluka 4]
Xikwembu Xi Sirhelela Rito Ra Xona
Hi nga tiyiseka leswaku Xikwembu xi sirhelele Matsalwa yo Kwetsima ku ta fikela namuntlha. Xikwembu xa Matimba Hinkwawo xi nga swi kota ku sirhelela buku ya xona. Rito ra xona ri ri: “Byanyi bya rihlaza byi omile, ku rhumbuka ku vunile; kambe loko ku ri rito ra Xikwembu xa hina, ri ta tshama hilaha ku nga riki na makumu.”—Esaya 40:8.
[Xifaniso lexi nga eka tluka 4]
Ripfumelo ri fana ni mali, ri fanele ri va ra xiviri leswaku ri va ra nkoka
[Xifaniso lexi nga eka tluka 5]
Ripfumelo ri fana ni misiha leyi kulaka loko munhu a endla vutiolori
[Xifaniso lexi nga eka tluka 5]
Ripfumelo ra xiviri ri hi susumetela ku endla leswinene