Xiyenge 11
Ku Kombisa Ripfumelo Ra Xiviri Namuntlha
VANHU vo tala namuntlha va vula leswaku va ni ripfumelo. Kambe Yesu u dyondzise leswaku i vatsongo lava a va ta va ni ripfumelo ra xiviri. U te: “Gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.”—Matewu 7:13, 14.
Xana vanhu va swi kombisa njhani namuntlha leswaku va ni ripfumelo ra xiviri? Yesu u te: “Mi ta va vona hi mihandzu ya vona. Murhi wun’wana ni wun’wana lowunene wu humesa mbhandzu lowunene, kambe murhi wun’wana ni wun’wana wo bola wu humesa mbhandzu lowu nga pfuniki nchumu.” (Matewu 7:16, 17) Kutani ripfumelo ra xiviri ri humesa “mbhandzu lowunene.” Ri khutaza vanhu leswaku va kombisa timfanelo ta Xikwembu. Va swi endlisa ku yini sweswo?
Tirhisa Vulawuri Ni Matimba Hi Ndlela Leyinene
Vanhu lava nga ni ripfumelo ra xiviri va tirhisa matimba ni vulawuri bya vona leswaku ku dzunisiwa Xikwembu ni ku pfuna van’wana. Yesu u dyondzise a ku: “Mani na mani la lavaka ku va lonkulu exikarhi ka n’wina u fanele ku va mutirheli wa n’wina.” (Marka 10:43) Hilaha ku fanaka, vavanuna lava nga ni ripfumelo a va na tihanyi, hambiloko va ri ni van’wana kumbe loko va ri ekaya. Va khathalela swilaveko swa vasati va vona ni ku va xixima. Matsalwa ma ri: “N’wina vavanuna lava tekeke, tshamani mi ri karhi mi rhandza vasati va n’wina naswona mi nga va hlundzukeli ku tlula mpimo.” (Vakolosa 3:19) “Vavanuna lava tekeke, hambetani mi tshama na vona hi mukhuva lowu fanaka hi ku ya hi vutivi, mi va xixima leswi va nga xibya xo tsana swinene, xa xisati, tanihi leswi na n’wina mi nga vadyandzhaka va tintswalo leti nga faneriwiki ta vutomi swin’we na vona, leswaku swikhongelo swa n’wina swi nga siveriwi.”—1 Petro 3:7.
Hi hala tlhelo, nsati la nga ni ripfumelo ra xiviri “u fanele ku va ni xichavo xo enta eka nuna wakwe.” (Vaefesa 5:33) Vavasati va fanele ku “rhandza vanuna va vona, va rhandza vana va vona.” (Tito 2:4) Vatswari lava nga ni ripfumelo va heta nkarhi va ri ni vana va vona ni ku va dyondzisa misinya ya milawu ya Xikwembu. Loko va ri ekaya, entirhweni kumbe kun’wana va khoma van’wana hi xichavo ni ku va xixima. Va landzelela ndzayo ya matsalwa leyi nge: “Vanani lavo rhanga eku xiximaneni.”—Varhoma 12:10.
Malandza ya Xikwembu ma landzela xileriso xa Matsalwa lexi nge: “A wu fanelanga u amukela xifumbarheriso.” (Eksoda 23:8) A va xi tirhisi hi ndlela yo biha xikhundlha xa vona leswaku ku vuyeriwa vona. Ematshan’wini ya sweswo, va lava tindlela to pfuna van’wana, ngopfu-ngopfu lava pfumalaka. Va yingisa ndzayo leyi nge: “Mi nga rivali ku endla leswinene ni ku avelana swilo ni van’wana, hikuva Xikwembu xi tsakisiwa swinene hi switlhavelo swo tano.” (Vaheveru 13:16) Hikokwalaho, va vona ntiyiso wa marito ya Yesu lama nge: “Ku nyika swi tisa ntsako lowukulu ku tlula ku amukela.”—Mintirho 20:35.
Tekelela Vululami Bya Xikwembu
Vanhu lava nga ni ripfumelo va yingisa milawu ya Xikwembu hi ku swi rhandza naswona eka vona “swileriso swa xona a swi tiki.” (1 Yohane 5:3) Va swi tiva leswaku “nawu wa Yehovha wu hetisekile . . . Swileriso leswi humaka eka Yehovha swi lulamile, swi tsakisa mbilu; xileriso xa Yehovha xi basile, xi hatimisa mahlo.”—Pisalema 19:7, 8.
Nakambe, ripfumelo ra xiviri ri va susumetela ku papalata xihlawuhlawu hi ku helela. A va tlakusi rixaka ro karhi, tiko kumbe xiyimo xa munhu kambe va tekelela Xikwembu. “Xikwembu a xi yi hi nghohe, kambe eka tiko rin’wana ni rin’wana munhu loyi a xi chavaka a tlhela a endla ku lulama wa amukeleka eka xona.”—Mintirho 10:34, 35.
Ripfumelo ra xiviri ri susumetela vanhu “ku tikhoma hi ku tshembeka eka swilo hinkwaswo.” (Vaheveru 13:18) Munhu la nga ni ripfumelo ra xiviri u papalata rihlevo ni ku lumbeta. Malunghana ni munhu loyi Xikwembu xi n’wi amukelaka, Mupisalema Davhida u te: “A nga hlevanga hi ririmi rakwe. Nakulobye wakwe a nga n’wi endlanga nchumu xo biha.”—Pisalema 15:3.
Dyondza Eka Vutlhari Bya Xikwembu
Lava nga ni ripfumelo ra xiviri va sekela tidyondzo ta vona eka Matsalwa yo Kwetsima. Va tshemba leswaku “Matsalwa hinkwawo ma huhuteriwe hi Xikwembu naswona ma pfuna ku dyondzisa, ku tshinya, ku lulamisa swilo, ku laya eku lulameni.” (2 Timotiya 3:16) Eka vuxaka bya vona ni van’wana va kombisa “vutlhari lebyi humaka ehenhla” lebyi “[tengeke], byi tlhela byi va ni ku rhula, ku anakanyela, ku tiyimisela ku yingisa, ku tala tintswalo ni mihandzu leyinene.” (Yakobo 3:17) Va papalata mikhuva leyi nga xi tsakisiki Xikwembu ni vungoma naswona va ‘tivonela eka swifaniso.’—1 Yohane 5:21.
Kombisa Rirhandzu Ra Xiviri
Muprofeta Muxe u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi matimba ya wena lamakulu hinkwawo.” (Deteronoma 6:5) Vanhu lava nga ni ripfumelo ra xiviri va kombisa rirhandzu ro tano. Va xixima vito ra Xikwembu, ku nga Yehovha. Va ‘nkhensa Yehovha’ ni ku ‘vitana vito rakwe’ hi ripfumelo. (Pisalema 105:1) Malandza ya Xikwembu ma tlhela ma yingisa xileriso xa xona lexi nge: “U fanele u rhandza munhu-kuloni kukota loko u tirhandza.” (Levhitika 19:18) Va papalata madzolonga naswona va tikarhatela ku “[va] ni ku rhula ni vanhu hinkwavo.” (Varhoma 12:18) Hi ndlela yo fanekisela, va “fula mabanga ya vona ma va swikomu ni mafumu ya vona ma va swikhutulo.” (Esaya 2:4) Hikwalaho, va “rhandzana” ni ku tiphina hi rirhandzu ra vamakwerhu emisaveni hinkwayo. (Yohane 13:35) Xana u nga swi kota ku va vona vanhu volavo namuntlha?
U Nga Hlamula Njhani?
• Vanhu lava nga ni ripfumelo ra xiviri va tikomba hi yini?
• Vanhu lava nga ni ripfumelo ra xiviri va ti kombisa njhani timfanelo ta Xikwembu loko swi ta eka
matimba?
vululami?
vutlhari?
rirhandzu?