Xiyenge 13

Ripfumelo Ra Xiviri Ri Tisa Ntsako Lowu Nga Heriki

MATSALWA yo Kwetsima ma ri: “Loyi a lulameke—u ta hanya hikwalaho ka ripfumelo.” (Varhoma 1:17) Marito lawa ma ni xitshembiso lexi ku khumbaka. Hi ndlela yihi?

Endzhaku ka loko Yesu la nga Mesiya a hete ntirho wakwe laha misaveni, u tlhandlukele ematilweni leswaku a ya va ni Xikwembu. Loko vadyondzisiwa vakwe va ha langutile, ‘u tlakuseriwe ehenhla kutani papa ri n’wi tela ri n’wi funengeta va nga ha n’wi voni.’ (Mintirho 1:9) Xikwembu xi n’wi veke tanihi Hosi ya matimba etilweni. Ku nga ri khale, Yesu “N’wana wa munhu” u ta fika “hi ku vangama kakwe, tintsumi hinkwato ti ri na yena, u ta tshama exiluvelweni xakwe xo vangama. Naswona matiko hinkwawo ma ta hlengeletiwa emahlweni kakwe, kutani u ta hambanisa vanhu van’wana eka van’wana, ku fana ni loko murisi a hambanisa tinyimpfu eka timbuti.” (Matewu 25:31, 32) Xana swilo leswi swi ta endleka rini?

Matsalwa yo Kwetsima ma profete hi nkarhi lowu a ku ta va ni maxangu emisaveni hinkwayo lawa a ma ta va xikombiso xa leswaku Mesiya u le kusuhi ni ku avanyisa misava. Yesu u hlamusele leswaku xikombiso xexo a xi ta katsa yini, u te: “Tiko ri ta pfukela tiko rin’wana, ni mfumo wu ta pfukela mfumo wun’wana; ku ta va ni ku tsekatseka lokukulu ka misava, naswona ku ta va ni mintungu ni ku kayivela ka swakudya; ku ta va ni swivono leswi chavisaka.”—Luka 21:7, 10, 11.

Namuntlha, ha swi vona leswaku marito ya Yesu ma hetiseka. Ku nga ri khale, Yesu u ta ta leswaku a ta lovisa lavo homboloka. Eku heteleleni, hambi ku ri Sathana u ta lovisiwa! Misava hinkwayo yi ta hundzuka paradeyisi. Vanhu hinkwavo va ta hanyisana hi ku rhula naswona va ta hanyisana ni swiharhi. “Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we; kutani swi ta rhangeriwa hi mufana lontsongo. A va nge endli swo biha kumbe ku onha.” (Esaya 11:6, 9) “Ku hava munhu la tshamaka kona la nga ta ku: ‘Ndza vabya.’ . . . Hi nkarhi wolowo mahlo ya lava nga voniki ma ta pfuriwa, ni tindleve ta lava nga twiki ti ta pfuriwa.” (Esaya 33:24; 35:5) Hambi ku ri lava feke va ta pfuxiwa. “Kunene Yehovha, Hosi leyi Lawulaka yi ta sula mihloti eswikandzeni hinkwaswo” naswona “rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.” (Esaya 25:8; Nhlavutelo 21:4) Xikongomelo xa Xikwembu xo sungula hi misava xi ta va xi hetisekile. Mawaku ntshembo lowu tsakisaka swonghasi!

Hambeta U Kula Eripfumelweni

Xana Xikwembu xi ta byi nyika vamani vutomi eParadeyisini? Vanhu lava nga ni ripfumelo—ripfumelo ra xiviri!

Tsundzuka leswaku ripfumelo ra xiviri ri sekeriwe eka vutivi lebyi kongomeke bya Rito ra Xikwembu. Hikokwalaho, hambeta u tiva Xikwembu na Yesu ku antswa.

Ripfumelo ra xiviri ri fambisana ni mintirho leyinene. Rito ra Xikwembu ri ri: “Ripfumelo leri nga riki na mintirho ri file.” (Yakobo 2:26) Loko u endla mintirho yoleyo leyinene, u ta va u kombisa timfanelo letikulu ta Xikwembu, ku nga matimba, vululami, vutlhari ni rirhandzu. Hambeta u lwela ku hlakulela timfanelo teto letinene!

Loko u hlakulela ripfumelo ra xiviri u ta kuma hakelo leyinene. Hakunene, ripfumelo ra xiviri hi rona ri nga ta ku tisela vutomi byo tsakisa—sweswi ni hilaha ku nga heriki!

U Nga Hlamula Njhani?

• Yesu u le kwihi sweswi?

• Hi swi tivisa ku yini leswaku ku nga ri khale Yesu u ta avanyisa matiko?

• Loko Yesu a ta, u ta endla yini?

• Xana ripfumelo ra wena u nga hambeta u ri tiyisa njhani?

[Xifaniso lexi nga eka tluka 31]

Swiphiqo leswi nga kona namuntlha swi kombisa leswaku ku nga ri khale Mesiya u ta avanyisa matiko

[Xifaniso lexi nga eka tluka 30, 31]

Vanhu lava nga ni ripfumelo ra xiviri va ta tsakela ku hanya eParadeyisini hilaha ku nga heriki!