Ndzima 26

Ku Vuriwa Yini Hi Ku Endla Timhaka Ta Masangu Ni Munhu Loyi U Nga Rhandzaniki Na Yena?

“Vana va hlangana hi xikongomelo xa leswaku va endla timhaka ta masangu ni ku vona leswaku va nga etlela ni vanhu vangani.”—Penny.

“Vafana va vulavula va ntshunxekile hi mhaka leyi. Va tibuma hi ku etlela ni vanhwanyana vo tala hambileswi va nga na ntombhi ya vona.”—Edward.

VANTSHWA vo tala namuntlha va tibuma hi ku endla timhaka ta masangu ni munhu loyi va nga rhandzaniki na yena. Van’wana va ni vanhu lava va tolovelaneke na vona lava va nga endlaka timhaka ta masangu na vona kambe va nga rhandzani.

U nga hlamali loko u titwa u ringiwa hi mhaka yoleyo! (Yeremiya 17:9) Edward, la tshahiweke eku sunguleni u ri: “Vanhwanyana vo tala va kombele ku etlela na mina, naswona swi ndzi tikela swinene ku ala tanihi leswi ndzi nga Mukreste. Swa tika ku ala!” Hi yihi milawu ya le Bibeleni leyi u faneleke u yi tsundzuka loko un’wana a kombela ku etlela na wena kambe mi nga rhandzani?

Tiva Leswaku Ha Yini Swi Bihile Ku Etlela Ni Munhu Kambe Mi Nga Rhandzani

Vumbhisa i xidyoho lexikulu lerova lava va byi endlaka “va nga ka va nga yi dyi ndzhaka ya mfumo wa Xikwembu.” (1 Vakorinto 6:9, 10) I ntiyiso, sweswo swi tano ku nga khathariseki leswaku vanhu vambirhi va “rhandzana” kumbe va endla timhaka ta masangu va nga rhandzani. Leswaku u lwisana ni ndzingo lowu eka swiyimo haswimbirhi, u fanele u languta vumbhisa hilaha Yehovha a byi langutaka hakona.

“Ndza tiyiseka leswaku ndlela ya Yehovha hi yona ndlela leyinene yo hanya ha yona ku tlula hinkwato.”—Karen, wa le Canada.

“Tsundzuka leswaku u ni vatswari, u munghana wa vanhu vo tala naswona u xirho xa vandlha. U ta va khomisa tingana vanhu lava hinkwavo loko wo pfumela ku ringiwa!”—Peter, wa le Britain.

Loko u teka vumbhisa hi ndlela leyi Yehovha a byi tekaka ha yona, u ta swi kota ku ‘venga leswo biha,’ hambiloko byi vonaka byi tsakisa.—Pisalema 97:10.

Tsalwa leri u nga ri hlayaka: Genesa 39:7-9. Xiya leswaku Yosefa u yime a tiyile loko a ringiwa leswaku a endla vumbhisa ni leswaku u pfune hi yini ku hlula ndzingo lowu.

Tibume Hi Ripfumelo Ra Wena

Swi tolovelekile leswaku vantshwa va tibuma ni ku lwela ripfumelo ra vona. U ni lunghelo ra ku seketela milawu ya Xikwembu hi mahanyelo ya wena lamanene. U nga khomiwi hi tingana hi ndlela leyi u yi tekaka ha yona mhaka ya ku endla timhaka ta masangu u nga si nghenela vukati.

“Swi veke erivaleni to ho suka leswaku wena u namarhela milawu ya mahanyelo leyinene.”—Allen, wa le Jarimani.

“Vafana lava a ndzi dyondza na vona exikolweni a va swi tiva kahle leswaku ndzi mani, naswona a va swi tiva leswaku ku gangisa mina a ku ri ku tlanga hi nkarhi.”—Vicky, wa le United States.

Ku yimela ripfumelo ra wena i xikombiso xa leswaku u va Mukreste la wupfeke.—1 Vakorinto 14:20.

Tsalwa leri u nga ri hlayaka: Swivuriso 27:11. Vona ndlela leyi swiendlo swa wena leswinene swi nga yi khumbaka ha yona mbilu ya Yehovha!

Yima U Tiyile!

I swa nkoka ku ala. Kambe van’wana va nga ha ehleketa leswaku ku ala ka wena “ko va ndlela yo endla onge a wu swi rhandzi.”

“Hinkwaswo leswi u swi endlaka—ku katsa ni ndlela leyi u ambalaka ha yona, u vulavulaka ha yona, lava u vulavulaka na vona ni ndlela leyi u tirhisanaka ha yona ni vanhu van’wana—swi fanele swi kombisa leswaku a wu swi lavi ku gangisiwa hi vona.”—Joy, wa le Nigeria.

“U fanele u swi veka erivaleni leswaku a wu nge pfuki u etlele na vona. U nga ti amukeli tinyiko leti humaka eka vafana lava lavaka ku etlela na wena. Loko u ti amukela va ta lava leswaku u endla timhaka ta masangu na vona u hakela tinyiko leti va ku nyikeke tona.”—Lara, wa le Britain.

Yehovha u ta ku pfuna loko u yima u tiyile. Hi ku ya hi ntokoto lowu mupisalema Davhida a veke na wona, u vule leswi ha Yehovha: “U ta n’wi endla hi vutshembeki loyi a tshembekeke.”—Pisalema 18:25.

Tsalwa leri u nga ri hlayaka: 2 Tikronika 16:9. Xiya leswaku Yehovha u tiyimiserile ku pfuna lava lavaka ku endla leswinene.

Vona Khombo Ra Ha Ri Ekule

Bibele yi ri: “U tlharihile la voneke khombo kutani a tumbela.” (Swivuriso 22:3) U nga xi tirhisa njhani xitsundzuxo xexo? Hi ku vona khombo ra ha ri ekule!

“Fambela ekule swinene ni vanhu lava vulavulaka hi swilo swo tano.”—Naomi, wa le Japani.

“U nga nyiki vanhu rungula ra wena ra munhu hi yexe, ku fana ni adirese ya wena kumbe tinomboro ta riqingho.”—Diana, wa le Britain.

Kambisisa mavulavulelo ya wena, ndlela leyi u tikhomaka ha yona, vanghana va wena ni tindhawu leti u talaka ku ya eka tona. Kutani tivutise, ‘Xana ndzi endla swi vonaka onge ndza swi lava ku etlela na vona ndzi nga swi xiyi?’

Tsalwa leri u nga ri hlayaka: Genesa 34:1, 2. Vona ndlela leyi swi n’wi peteke ekhombyeni ha yona nhwanyana la vitaniwaka Dina hi ku va endhawini leyi nga fanelangiki.

Tsundzuka, ku endla timhaka ta masangu ni munhu loyi u nga rhandzaniki na yena a hi mhaka yitsongo eka Yehovha Xikwembu; na wena a wu fanelanga u swi teka swi ri matlangwana. Loko u yimela leswinene, u nga tshama u ri ni ripfalo leri baseke emahlweni ka Xikwembu naswona u tshama u ri ni xindzhuti. Nhwanyana la vuriwaka Carly, u ri, “ha yini u fanele u pfumela ku ‘tirhisiwa’ leswaku u enerisa ku navela ka munhu un’wana hi nkarhi wolowo? Hlayisa vuxaka lebyinene na Yehovha lebyi u tirheke hi matimba leswaku u va na byona!”

MATSALWA

“Endlani hinkwaswo leswi mi nga swi kotaka leswaku emakumu [Xikwembu xi] mi kuma mi ri lava pfumalaka xivati, lava nga solekiki ni lava nga ni ku rhula.”—2 Petro 3:14.

XITSUNDZUXO

Tikarhatele ku va ni timfanelo letinene. (1 Petro 3:3, 4) Loko u ri ni vumunhu lebyinene, vanhu va vumunhu lebyinene va ta tsakela ku va vanghana va wena.

XANA A WU SWI TIVA LESWAKU . . . ?

Yehovha u lava leswaku u tiphina hi timhaka ta masangu hi ku pfumelelana ni leswi a ti endleleke swona—leswaku ti tsakisa vanhu lava tekaneke—va nga vileli, va nga titwi va nga sirhelelekanga naswona va nga tisoli hikwalaho ka vuyelo lebyi talaka ku va kona loko munhu a endle vumbhisa.

LESWI NDZI TIYIMISELEKE KU SWI ENDLA!

Ndzi nga tekelela ku tiyimisela ka Yosefa ku tshama a ri ni mahanyelo lamanene loko ndzi ․․․․․

Ndzi ta papalata xihoxo lexi endliweke hi Dina loko ndzi ․․․․․

Leswi ndzi tiyimiseleke ku vutisa (va-)mutswari wa mina hi mhaka leyi hi leswi ․․․․․

U NGA KU YINI?

● Hambileswi ku endla timhaka ta masangu u nga si nghenela vukati swi nga ha vonakaka swi tsakisa, ha yini swi hoxile?

● U ta endla yini loko munhu a ku kombela leswaku u endla timhaka ta masangu na yena?

[Marito lama tshahiweke exihlokweni lama nga eka tluka 185]

Vana ni xivindzi! Loko jaha rin’wana ri ringete ku ndzi xavelela leswaku ndzi endla swilo leswi humeke endleleni, ndzi te, ‘Susa voko ra wena ekatleni ra mina!’ kutani ndzi suka ndzi famba ndzi ri karhi ndzi ri xondzolota.’’—Ellen

[Xifaniso lexi nga eka tluka 187]

Loko u endla timhaka ta masangu ni munhu loyi u nga rhandzaniki na yena, u tisusa xindzhuti