Esinagogeni Ya Le Nazareta

A swi kanakanisi leswaku a ku tsakiwile eNazareta. Se swi tlula lembe Yesu a fambile leswaku a ya khuvuriwa hi Yohane naswona loko a nga si famba a a ri muvatli kwala. Kambe sweswi se a a dume hi ku endla masingita. Vaakatiko va ndhawu leyi a va swi langutele hi mahlongati ku n’wi vona a endla masingita.

Ku navela koloko ku kurile loko va vona Yesu tanihi ntolovelo wakwe a ya esinagogeni ya le Nazareta. “Emasinagogeni savata yin’wana ni yin’wana” a ku khongeriwa ku tlhela ku hlayiwa tibuku ta Muxe. (Mitirho 15:21) A ku tlhela ku hlayiwa tibuku ta vuprofeta. Loko Yesu a suka a yima leswaku a sungula ku hlaya, swi nga ha endleka a vone vo tala lava a hamba a a va vona eka malembe lawa a ma heteke a ri karhi a ta esinagogeni. Hiloko a nyikiwa buku leyi songiwaka ya Esaya. U kume laha yi vulavulaka hi Loyi a totiweke hi moya lowo kwetsima wa Yehovha naswona rungula rero sweswi ri kumeka eka Esaya 61:1, 2.

Yesu u hlaya hi ndlela leyi Loyi ku nga profetiwa hi yena a nga ta chumayela hi ta ku tshunxiwa ka mahlonga, a pfula matihlo ya lava nga voniki ni hi lembe ra Yehovha ra ntwelavusiwana. Loko Yesu a heta ku hlaya u tlherise buku leyi songiwaka kutani a tshama ehansi. Vanhu hinkwavo a va n’wi honolele mahlo. Kutani a sungula ku vulavula, swi nga ha endleka mbulavulo wakwe a wu lehilenyana, u boxe marito ya nkoka swinene lama nge: “Namuntlha tsalwa leri ma ha ku ri twaka ri hetisekile.”—Luka 4:21.

Vanhu va hlamarisiwa “hi leswi a a swi vula,” kutani va tivutisa va ku: “Xana loyi a hi n’wana wa Yosefa?” Kutani loko Yesu a xiya leswaku va lava ku vona a endla mitirho ya matimba leyi va tweke ha yona, u ya emahlweni a ku: “Ndza swi tiva leswaku mi ta lava ku xi tirhisa eka mina xivuriso lexi nge, ‘Dokodela, tihanyise. Swilo leswi hi tweke leswaku u swi endlile eKapernawume swi endle ni kwala tikweni ra rikwenu.’” (Luka 4:22, 23) Lava a va ri vaakelani va Yesu a va twisisa leswaku a fanele a rhanga a horisa vanhu va le mugangeni wa ka vona. Kutani va vona onge a nga va tekelanga enhlokweni.

Hi ku xiya leswi va swi ehleketaka, Yesu u boxe leswi endlekeke khale eIsrayele. Yesu u vule leswaku a ku ri ni tinoni to tala eIsrayele hi nkarhi wa Eliya, kambe Eliya a nga rhumiwanga ni le ka yin’we ya tona. Ematshan’weni ya sweswo, u ye eka noni leyi a yi nga ri Muisrayele, leyi a yi tshama eSarepta, ku nga muti lowu nga ekusuhi na Sidoni laha Eliya a hanyiseke munhu hi singita. (1 Tihosi 17:8-16) Naswona hi nkarhi wa Elixa, a ku ri ni vanhu vo tala lava a va ri ni nhlokonho eIsrayele kambe muprofeta loyi u basise Namani lowa Musiriya ntsena.—2 Tihosi 5:1, 8-14.

Xana vanhu lava va le mugangeni wa ka va Yesu va angule njhani loko va xiya leswaku matimu lawa a ma paluxa leswaku va ni makwanga naswona a va na ripfumelo? Lava a va ri esinagogeni va hlundzukile, va suka va yima kutani va kokakoka Yesu va n’wi humesela ehandle ka muti. Va n’wi teke va famba na yena ehenhla ka ntshava leyi muti wa Nazareta a wu akiwe eka yona, va ringeta ku n’wi cukumetela ehansi. Kambe Yesu u chupukile a baleka va nga n’wi vavisanga. Sweswi Yesu u kongoma eKapernawume, en’walungwini wa Lwandle ra Galeliya.