Hikwalahokayini Vadyondzisiwa Va Yesu Va Nga Titsoni Swakudya?

Yohane mukhuvuri a ha ri ekhotsweni himpfhuka a pfaleriwa endzhakunyana ka Paseka leyi Yesu a ri eka yona hi 30 C.E. Yohane a a lava leswaku vadyondzisiwa va yena va va vadyondzisiwa va Yesu kambe a hi hinkwavo va endleke tano eka tin’hweti leti landzeleke endzhaku ka ku khomiwa kakwe.

Leswi se Paseka ya lembe ra 31 C.E. a yi ri karhi yi tshinela, van’wana va vadyondzisiwa va Yohane va ye eka Yesu va fika va n’wi vutisa va ku: “Hikwalaho ka yini hina ni Vafarisi hi titsona swakudya kambe vadyondzisiwa va wena va nga titsoni swakudya?” (Matewu 9:14) Vafarisi a va titsona swakudya tanihi mukhuva wa vukhongeri. Hi ku famba ka nkarhi Yesu u kale a endla ni xifaniso lexi eka xona Mufarisi a tivulaka n’wavunene loko a ri karhi a khongela, a ku: “Xikwembu xanga, ndza ku khensa hileswi ndzi nga faniki ni vanhu lavan’wana . . . Ndzi titsona swakudya kambirhi hi vhiki.” (Luka 18:11, 12) Onge vadyondzisiwa va Yohane na vona a va landzela mukhuva wo titsona swakudya. Kumbexana a va titsona swakudya ku kombisa leswaku va twa ku vava hileswi Yohane a khomiweke. Lava hlaleleke na vona a va tivutisa leswaku hikwalahokayini vadyondzisiwa va Yesu va nga titsoni swakudya, kumbe va kombisa ku karhateka hikwalaho ka leswi humeleleke Yohane.

Yesu u va hlamule hi ku tirhisa xikombiso a ku: “Xana vanghana va muteki va na xivangelo xa ku rila loko muteki a ha ri na vona? Kambe nkarhi wa ta lowu muteki a nga ta va a nga ha ri kona, kutani hi kona va nga ta titsona swakudya.”—Matewu 9:15.

Yohane u tshame a vula leswaku Yesu i muteki. (Yohane 3:28, 29) Hikwalaho loko Yesu a ha ri na vona, vadyondzisiwa vakwe a va nga ta titsona swakudya. Hi ku famba ka nkarhi loko Yesu a file vadyondzisiwa vakwe a va ta va ni gome lerova va nga naveli ku dya. Hambiswiritano sweswo a swi ta cinca loko a pfuxiwa. Kutani a va nga ha ta va ni xivangelo xin’wana xo titsona swakudya.

Endzhaku ka sweswo, Yesu u va byele swifaniso swimbirhi leswi nge: “A nga kona munhu loyi a rhungelelaka xilapana lexintshwa eka xiambalo xa khale, hikuva xilapana lexintshwa xi ta endla leswaku xiambalo xi nyanya ku handzuka. Vanhu a va cheli vhinyo leyintshwa emaguleni ya khale. Loko vo yi chela, magula wolawo ma ta buluka kutani vhinyo yi halaka na wona ma onhaka. Kambe vanhu va chela vhinyo leyintshwa emaguleni lamantshwa, kutani vhinyo ni magula swi hlayiseka.” (Matewu 9:16, 17) Yesu a vula yini?

Yesu a a pfuna vadyondzisiwa va Yohane Mukhuvuri va swi xiya leswaku a nga kona loyi a faneleke a langutela leswaku valandzeri va Yesu va landzela mikhuva ya khale ya Vayuda yo tanihi ku titsona swakudya. A a nga telanga ku lunghisa ni ku yisa emahlweni ndlela ya khale yo gandzela leyi onhakeke, leyi a yi ri ekusuhi ni ku lahliwa. Yesu a a nga khutazi vanhu leswaku va landzela vugandzeri bya Vayuda va le nkarhini wakwe lebyi a byi katsa mindhavuko ya vanhu. A a nga ringeti ku rhungelela xilapana lexintshwa eka xiambalo xa khale kumbe ku chela vhinyo leyintshwa emaguleni ya khale lama tsindziyeleke.