Xana Munhu A Nga Endla Mitirho Leyinene Hi Savata?

Yesu u endle swo tala eka vutirheli byakwe loko a ri eGaleliya. Hambiswiritano u te, “Ndzi fanele ku chumayela mahungu lamanene ya Mfumo wa Xikwembu ni le mitini yin’wana,” Yesu a a nga ehleketi hi Galeliya ntsena. Hikwalaho, u ya emahlweni a chumayela “emasinagogeni ya le Yudiya.” (Luka 4:43, 44) Leswi swa twala hikuva sweswi a ku ri ximun’wana naswona nkhuvo wa le Yerusalema a wu ya wu tshinela.

Loko hi pimanisa ni leswi hi swi hlayaka hi vutirheli bya Yesu bya le Galeliya hi kuma switsongo eka Tievhangeli hi ntirho wakwe eYudiya. Hambileswi van’wana a va nga kombisi ku tsakela eYudiya, a swi endlanga leswaku Yesu a tshika ku chumayela hi ku hiseka ni ku endla mitirho leyinene kun’wana ni kun’wana laha a ri kona.

Ku nga ri khale Yesu u ta ya edorobeni rikulu ra Yudiya eYerusalema, a ya tlangela Paseka ya 31 C.E. Edorobeni leri ra mphensamphensa ekusuhi ni Gede ya Tinyimpfu, a ku ri ni ndhawu leyikulu yo hlamba eka yona leyi vuriwaka Betesda. Vo tala lava vabyaka, mabofu ni lava lamaleke a va ta eka yona. Hikwalahokayini? Hikuva vo tala a va tshemba leswaku vanhu va ta hola loko va nghena endzeni ka mati wolawo.

I siku ra Savata naswona eka xidziva xexo Yesu u vona wanuna loyi se a nga ni malembe ya 38 a ri karhi a vabya. Hiloko Yesu a n’wi vutisa a ku: “Xana wa swi lava ku hola?” Wanuna a n’wi hlamula a ku: “Nkulukumba, a ku na munhu loyi a ndzi pfunaka ku nghena ematini loko ma pfindlusiwa, loko ndzi lava ku nghena, un’wana wa ndzi rhangela.”—Yohane 5:6, 7.

Yesu u vula marito lama faneleke ma hlamarise wanuna yoloye ni hinkwavo lava ma tweke: “Pfuka u teka sangu ra wena u famba.” (Yohane 5:8) Leswi hi leswi a swi endleke. Hi nkarhi wolowo u horile, kutani wanuna a teka sangu rakwe a sungula ku famba!

Ematshan’weni yo tsaka hi leswi endlekeke, Vayuda va sungule ku sola va ku: “A swi pfumeleriwi ku rhwala sangu hi Savata.” Kambe a va hlamula a ku: “Loyi a ndzi horiseke u te, ‘Teka sangu ra wena u famba.’” (Yohane 5:10, 11) Vayuda volavo va sola munhu loyi a horisaka hi Savata.

A va lava ku tiva leswaku ‘I mani loyi a n’wi byeleke a ku, ‘Ri teke u famba’?’ Hikwalahokayini va vutise wanuna yoloye sweswo? Hikuva Yesu “a a nghene exikarhi ka ntshungu,” naswona wanuna loyi a horisiweke a nga ri tivi vito ra Yesu. (Yohane 5:12, 13) Kambe wanuna loyi a a ta hlangana na Yesu nakambe. Endzhakunyana loko va ri etempeleni, wanuna loyi u hlangana na Yesu kutani a swi xiya leswaku hi yena a n’wi horiseke le xidziveni.

Wanuna loyi a hanyisiweke, u kuma Vayuda lava n’wi vutisaka hi ta ku hanyisiwa kakwe. Hiloko a va byela leswaku a ku ri Yesu. Loko va twa leswi, Vayuda va ya eka Yesu. Xana va ya eka Yesu hi ku lava ku tiva leswaku u ma endlisa ku yini masingita yonghasi? Nikatsongo. Ku ri na sweswo, va lava ku n’wi sola hileswi a endlaka leswinene hi Savata. Naswona va sungula ni ku n’wi xanisa!