Khombo Eka Xitukulwana Lexi Nga Riki Na Ripfumelo

Yesu wa n’wi xixima swinene Yohane Mukhuvuri kambe xana vanhu van’wana va n’wi teka njhani? Yesu u ri: “Xitukulwana lexi . . . xi fana ni vana lava tshameke etimakete kutani va huwelela vanghana va vona, va ku: ‘Hi mi chayele xitiringo, kambe a mi cinanga; hi yimbelele risimu ra xirilo kambe a mi rilanga na hina.’”—Matewu 11:16, 17.

Xana Yesu u vula yini? U ya emahlweni a ku: “Yohane u tile a nga dyi hambi ku ri ku nwa kambe vanhu va ku, ‘U ni dimona.’ N’wana wa munhu u tile a dya ni ku nwa, kambe vanhu va ku, ‘Maswivo! I munhu wa makolo naswona u rhandza vhinyo, i munghana wa valuvisi ni vadyohi.’” (Matewu 11:18, 19) Hi hala tlhelo, Yohane u hanya vutomi byo olova hileswi a nga Munaziri naswona a nga byi khumbi byala kambe xitukulwana lexi xi vula leswaku u ni dimona. (Tinhlayo 6:2, 3; Luka 1:15) Hi hala tlhelo, Yesu u hanya ku fana ni vanhu van’wana. Hambileswi a ringaniselaka, u hehliwa hi ku dya ni ku nwa ngopfu. Swi vonaka onge a swi koteki ku enerisa vanhu.

Yesu u fanisa xitukulwana lexi ni vana lava tshameke etimakete lava alaka ku cina loko vana van’wana va va chayela xitiringo kumbe ku ala ku rila loko van’wana va yimbelela risimu ra xirilo. Yesu u ri: “Hambiswiritano, vutlhari byi tikomba byi lulamile hi mitirho ya byona.” (Matewu 11:16, 19) “Mitirho” ya Yesu na Yohane i vumbhoni bya leswaku leswi va hehliwaka hi swona i mavunwa.

Endzhaku ko vulavula hi xitukulwana lexi tanihi lexi nga riki na ripfumelo, Yesu u sungula ku sola miti ya Korazini, Betsayida na Kapernawume laha a endleke masingita lamakulu kona. Yesu u vula leswaku loko a lo endla masingita wolawo emitini ya Vafenikiya ku nga Tiri na Sidoni, miti yoleyo a yi ta va yi hundzukile. U tlhela a vulavula hi Kapernawume, leri a ku ri kaya rakwe leri a tshameke eka rona nkarhinyana. Hambi ku ri kwalaho, vo tala a va yingisanga. Yesu u vula leswi hi muti wolowo: “U ta xupuriwa swinene hi Siku ra Vuavanyisi ku tlula tiko ra Sodoma.”—Matewu 11:24.

Yesu u dzunisa Tata wakwe loyi a ‘fihlelaka lavo tlhariha ni lavo dyondzeka’ ntiyiso ivi a wu paluxela lava languteriwaka ehansi naswona va fanisiwaka ni swihlangi. (Matewu 11:25) U va nyika xirhambo lexi tsakisaka hi ku vula a ku: “Tanani eka mina, n’wina hinkwenu lava karhaleke ni lava tikeriwaka, ndzi ta mi phyuphyisa. Rhwalani joko ra mina mi tlhela mi dyondza eka mina, hikuva ndzi ni musa naswona ndza titsongahata, kutani mi ta phyuphyisiwa. Hikuva joko ra mina ra olova ni ndzhwalo wa mina wa vevuka.”—Matewu 11:28-30.

Xana Yesu u phyuphyisa hi ndlela yihi? Varhangeri va vukhongeri va tikisela vanhu hi milawu ya mindhavuko, yo fana ni ku veka swinawanawana swo tala hi Savata. Yesu u va phyuphyisa hi ku va byela ntiyiso hi Xikwembu ni ku tlhela a va tshunxa eka mindhavuko yoleyo leyi nga riki yinene. Nakambe, u pfuna lava titwaka va nga ha pfuni nchumu hikwalaho ko lawuriwa hi varhangeri va swa tipolitiki ni lava titwaka va tshikilelekile hikwalaho ka xidyoho. Yesu u va komba ndlela yo rivaleriwa swidyoho ni ndlela yo va ni ku rhula ni Xikwembu.

Hinkwavo lava amukelaka joko ra Yesu ro olova va nga swi kota ku tirhela Xikwembu lexi nga ni ntwelavusiwana, ku nga Tatana wa le tilweni loyi a nga ni tintswalo. Ku endla sweswo a swi karhati hikuva swileriso swa Xikwembu a swi tiki.—1 Yohane 5:3.