‘Ku Kumela Mimoya Ya N’wina Ku Wisa’
“Tanani ka mina, n’wina hinkwenu lava karhaleke, lava tikeriwaka, . . . kutani mimoya ya n’wina yi ta kuma ku wisa; hikuva joko ra mina ra olova, ni ndzhwalo wa mina wa vevuka.”—MATEWU 11:28-30.
1, 2. A xi ri xihi xiyimo xa ndyangu wa vanhu hi malembe xidzana naswona leswi swi hambanisa ku yini ni xikongomelo xa Xikwembu xo sungula?
“HIKUVA hi tiva leswaku, ku fikela namuntlha, swivumbiwa hinkwaswo swa konya ni ku vaviseka.” Hi leswi wanuna a swi tsaleleke vanghana eRhoma malembe xidzana lama hundzeke. (Varhoma 8:22) Emalembeni yo tala ku sukela kwalaho, ku konya ni ku vaviseka eka mindyangu hinkwayo ya vanhu ku tlakukile. Xihlawu-hlawu, vusweti, vugevenga, ni ndlala swi tlakuke hi laha ku hlamarisaka kun’wana ni kun’wana. Vuhomboloki bya mafambiselo ya ikhonomi byi humesa timiliyoni emintirhweni hambi ku ri emakaya ya vona naswona minkucetelo ya vusathana yi tsanisa matshalatshala ya vona yo kurisa vana hi ndlela leyi va faneleke ku hanya ha yona.
2 Kambe kumbexana ku kayakaya lokukulu ka humelela loko vuvabyi, ntungu kumbe ku dyuhala swi tekela vanhu matimba ya vona naswona swi va tekela ku xiximeka ka vona loko va ri karhi va ehla va va malandza ya khale ka mahlonga ya vona. Ku vava ni ku xaniseka lokukulu, hakanyingi loku tshamaka mavhiki, tin’hweti naswona minkarhi yin’wana hambi ku ri malembe, swi vavisa timbilu naswona swi vanga milambu ya mihloti yi khuluka. Oho tinhlamuselo leti vavaka ehenhleni ka vutomi! Malunghana ni khombo ra munhu, hosi ya vutlhari ya khale yi te: “Masiku hikwawo ya yena, hi la’ma nga ni mahlomulo.” (Eklesiasta 2:23; 4:1) Vutomi namuntlha entiyisweni a byi hi laha Xikwembu a xi kunguhate ha kona eku sunguleni!—Genesa 2:8, 9.
3. Xikwembu xi vumbe munhu a ri ni vuswikoti byihi, naswona sweswi swi xiyiwa hi mpimo lowu hikiweke ku fikela kwihi?
3 Yehova Xikwembu u vumbe munhu a hetisekile, a ri ni vuswikoti bya ku tiphina hi vutomi hakunene. (Deuteronoma 32:4, 5) U nga anakanya ku tsakisa ka ku dya swakudya leswinene, ku hefemula moya lowu baseke lowu tsakisaka, kumbe ku languta ku pela ka dyambu ko saseka! “Nḍi vonile mitiro leyi Šikwembu ši yi nyikeke v̌ana v̌a v̌anhu leŝaku v̌a tikarata ha yona,” ku xiye hosi leyi fanaka ya khale. “Ši endlile hikwaŝo ŝi sasekile hi nkari wa ŝona. . . . Hikwalaho nḍa ŝi tiva leŝaku a ku na v̌unene e ka v̌ona, loko ku nga ri ku tiṭakela ni ku tiendlela v̌unene e ku hanyeni ka v̌ona. Ni leŝaku loko munhu a dya, a nwa, u ṭakela ntiro hikwawo wa ku tikarata ka yena, naŝona i ku nyika ka Šikwembu.”—Eklesiasta 3:10-13.
4. (a) Hi laha swi kombisiweke ha kona hi mintokoto ya Yesu, hi xihi xiyimo lexi khomisaka gome xa vanhu vo tala? (b) I xirhambo xihi lexi tsakisaka lexi Yesu a xi twariseke naswona leswi swi tlakusa swivutiso swihi ke?
4 Hambi swi ri tano, i vantsongo swinene swonghasi lava swi kotaka ku tiphina hi swilo leswinene leswi Xikwembu xi hi kunguhateleke swona! Yesu Kriste a a xi vona xiyimo lexi chavisaka, lexi khomisaka gome xa vanhu. “Mintshungu leyikulu yi ta ka yena,” ku vula Bibele, “yi ri ni lavo khwita, ni swilema, ni lavo fe mahlo, ni timbheveve, ni van’wana lavo tala; yi va veka emilengeni ya Yesu.” Vona ndlela leyi Yesu a tweleke vanhu volavo lava weriweke hi khombo vusiwana ha yona! (Matewu 9:36; 15:30) Eka xiendlakalo xin’wana, u tivise xirhambo lexi tsakisaka lexi nge: “Tanani ka mina, n’wina hinkwenu lava karhaleke, ni lava tikeriwaka, ndzi ta mi wisisa. Rhwalani joko ra mina, mi dyondza eka mina hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa.” (Matewu 11:28, 29) Entiyisweni, lawa i marito lama kondletelaka ntshembo hakunene! Kambe xana i ku wisa kwihi loku Yesu a a vulavula ha kona ke? Naswona hi nga ku kumisa ku yini?
Ntiyiso Lowu Wisisaka
5. Yesu u yi kombise njhani ndlela yo kumela mimoya ntshunxeko ni ku wisa ka ntiyiso ke?
5 Loko Yesu a ye eNkhubyeni wa le Mintsongeni kwalomu ka tin’hweti ta tsevu emahlweni ka rifu ra yena, u kombetele eka ndlela yo kuma ntshunxeko naswona xisweswo u amukela ku wisa ka ntiyiso. Loko a vulavula ni lava vekeke ripfumelo ra vona eka yena, u te: “Loko mi tiyisela eritweni ra mina, mi vadyondzisiwa va mina hakunene; naswona mi ta tiva ntiyiso, kutani ntiyiso wu ta mi ntshunxa.” (Yohane 8:31, 32) Hi wihi ntiyiso lowu Yesu a a vulavula ha wona? Wu ta hi ntshunxa eka yini? Vayingiseri va yena a va ri mahlonga hi ndlela yihi?
6. (a) I njhekanjhekisano wihi lowu vakaneti va vukhongeri va wu tlakuseke naswona ha yini? (b) Hinkwerhu ka hina hi mahlonga hi ndlela yihi ke?
6 Vakaneti va vukhongeri va kavanyete Yesu va ku: “Hi vatukulu va Abrahama; a hi si va mahlonga ya munhu ni siku ni rin’we. Xana u nga vurisa ku yini u ku: ‘Mi ta va lava ntshunxiweke’, xana?” Vakaneti volavo va Vayuda a va tinyungubyisa hi rixaka ra vona. Hambi loko tiko hakanyingi ri ve ehansi ka ku lawuriwa hi matiko mambe, Vayuda va arile ku vuriwa mahlonga. Kambe Yesu u kombise ndlela leyi a va ri mahlonga ha yona, a ku: “Ndzi tiyisisile ndzi ri ka n’wina: un’wana ni un’wana la endlaka xidyoho i hlonga ra xidyoho.” Ina, vayingiseri vakwe hinkwavo a va ri ‘vaendli va xidyoho,’ hi laha hinkwerhu ka hina hi nga ha kona namuntlha. Leswi swi endliwa hi leswi hinkwerhu hi kumeke xidyoho tanihi ndzhaka eka vatswari va hina vo sungula. Kambe Yesu u tshembisile a ku: “Loko N’wana a mi ntshunxa, mi ta va lava ntshunxekeke hakunene.”—Yohane 8:33-36; Varhoma 5:12.
7. Xana ntshunxeko wa ntiyiso wu nga kumisiwa ku yini naswona ntiyiso lowu hi ntshunxaka i yini?
7 Ntshunxeko wa xiviri xisweswo wu nga kumiwa ntsena eka N’wana wa Xikwembu, Yesu Kriste, la nyikeleke vutomi bya yena lebyi hetisekeke bya vumunhu tanihi gandzelo ra nkutsulo. I gandzelo leri leri hi ntshunxaka eka xidyoho lexi vangaka rifu naswona ri endla swi koteka eka hina ku tiphina hi vutomi lebyi nga heriki hi rihanyo leri hetisekeke ni ntsako emisaveni leyintshwa ya Xikwembu yo lulama. (Yohane 3:16; 1 Yohane 4:10) Hikwalaho ke, ntiyiso lowu hi ntshunxaka i ntiyiso malunghana na Yesu Kriste ni xiphemu xa yena eku hetisiseni ka swikongomelo swa Xikwembu. Mfumo, na Kriste tanihi Hosi, hi wona wu nga ta hetisisa ku rhandza ka Xikwembu hi misava naswona Yesu u hambete a nyikela vumbhoni malunghana ni ntiyiso lowu.—Yohane 18:37.
Ndlela Leyi Ntiyiso Wu Wisisaka Ha Yona
8. Xana ndlela leyi ntiyiso wu nyikelaka ku wisa ka ntiyiso ha yona yi nga ha fanisiwa hi ndlela yihi ke?
8 Ndlela leyi ntiyiso wu nyikelaka ku wisa ha yona yi nga ha fanisiwa hi wansati la byeriweke leswaku u na muxaka wa vuvabyi bya rifuva lowu tlulelaka hi ku hatlisa. Vutivi byebyo bya n’wi tika loko a anakanya hi vuyelo lebyi lovisaka hi mpimo lowukulu, lebyi vavaka. Hambi swi ri tano, hi ku famba ka nkarhi a ya eka dokodela un’wana ivi a kamberiwa nakambe. Loko vuyelo bya swikambelo byi paluxa leswaku vukambisisi byo sungula byi nga ha va a byi hoxile kumbe u hlakarhele hi xihatla, anakanya ku titwa loku hlamarisaka ko ntshunxeka loku a ku twaka. Swi phyuphyisa swonghasi emoyeni wa yena!
9. Yesu u ku nyike njhani ku ntshunxeka hi ku dyondzisa vanhu ntiyiso?
9 Hi ku fanana, loko Yesu a te emisaveni, vanhu a va tikeriwa hi mafambiselo ya ndhavuko wa hava ya siku rero. Malunghana ni vatsari ni Vafarisi lava a va ri ni vutihlamuleri, Yesu u te: “Va boha mindzhwalo leyo tika, va yi rhwexa emakatleni ya vanhu kasi vona a va lavi ni ku yi ninginisa hi rintiho.” (Matewu 23:4; Marka 7:2-5) Mawaku ntshunxeko lowu veke kona loko Yesu a nyikela vanhu ntiyiso lowu va ntshunxeke eka mikhuva yo tano leyi vangaka vuhlonga! (Matewu 15:1-9) A swi hambananga ni namuntlha.
10. I mindzhwalo yihi leyi wutlaka ntsako leyi vo tala va yi rhwaleke naswona munhu a nga titwisa ku yini loko mindzhwalo leyi yi susiwile endzhaku ko tiva ka yena ntiyiso?
10 Kumbexana a wu ri un’wana loyi, hikwalaho ka ndzhwalo wo tika wa tidyondzo ta mavunwa ta vukhongeri, a wu hanya hi ku chava ku tokota ku xanisiwa endzilweni wa tihele kumbe ephagatori endzhaku ka rifu. Kumbe loko murhandziwa a file, u nga ha va u hlamarile loko mufundhisi a ku byele leswaku i Xikwembu lexi tekeke n’wana wa wena la rhandzekaka hi mhaka ya leswi a Xi lava ntsumi yin’wana—onge hi loko Xikwembu a xi lava n’wana wa wena ku tlula leswi a wu n’wi lavisa swona. Minkarhi yin’wana vafundhisi nakambe va byela vanhu lava tokotaka vuvabyi byo karhi leswaku leswi i ndzhukano lowu humaka eka Xikwembu. Xana a swi phyuphyisi hakunene ku dyondza hi mintiyiso ya Bibele leyi ntshunxaka munhu eka mavunwa yo tano yo vavisa ya vukhongeri ke? Mawaku ntshunxeko lowu leswi swi wu tisaka!—Eklesiasta 9:5, 10; Ezekiel 18:4; Yohane 9:2, 3.
11. (a) Hi wihi wun’wana wa mindzhwalo leyikulu naswona wu nga susisiwa ku yini? (b) Hi kwihi ku wisa loku Yesu a ku tiseleke vadyohi loko a ri emisaveni?
11 Wun’wana wa mindzhwalo leyikulu yo yi rhwala hi lowuya wa ku tivona nandzu hikwalaho ka swidyoho leswi hi swi endleke. Swa ntshunxa ku tiva leswaku hikwalaho ka ntikelo wa gandzelo ra nkuntsulo ra Kriste, swidyoho leswi swi nga susiwa. “Ngati ya Yesu N’wana wa xona ya hi hlantswa yi susa swidyoho hinkwaswo,” Bibele ya hi tiyisekisa. (1 Yohane 1:7) Ku nga khathariseki swilo swihi na swihi swo chavisa leswi hi nga ha vaka hi swi endlile, loko hi hundzukile hakunene ivi hi ololoxa tindlela ta hina, hi nga tiphina hi ntshunxeko lowu wisisaka wa ripfalo leri tengeke ni ku tiyiseka leswaku Xikwembu xi nge he swi tsundzuki swidyoho swa hina. (Psalma 103:8-14; 1 Vakorinto 6:9-11; Vaheveru 10:21, 22) Mawaku ku wisa loku Kriste a ku tiseleke lava tikeriwaka hi xidyoho, vo tanihi vaoswi ni valuvisi ku fana na Zakiya! Yesu u va khongotele hi mintiyiso ya Bibele loko a ri karhi a dya na vona.—Luka 5:27-32; 7:36-50; 19:1-10.
12. (a) Hi le ka swiyimo swihi leswi khomisaka gome leswi Yesu a tiseke ku wisa eka swona eka vanhu? (b) Eka lembe xidzana ro sungula, Yesu u swi kombise eka mani hi ndlela leyi xiyekaka leswaku hi yena “ndlela, ni ntiyiso, ni vutomi”?
12 Vanhu van’wana vo tala va rhwale mindzhwalo yo tika ya vuvabyi ni ntungu, ntshikilelo lowukulu wa mianakanyo ni ku karhateka lokukulu loku vangiwaka hi rifu ra murhandziwa. Hambi swi ri tano, Yesu u tise ku wisa eka vanhu vo tano hinkwavo “lava karhaleke, ni lava tikeriwaka.” (Matewu 4:24; 11:28, 29) U tshungule wansati loyi a yingayingeke ni tin’anga kambe a nga humeleli hi malembe ya 18. Yesu nakambe u tshungule wanuna loyi a vabya hi malembe ya 38 ni un’wana la tswariweke a fe mahlo. Xana u nga ku anakanya ku ntshunxeka ka vona loko Yesu a va tshungurile ke? (Luka 13:10-17; Yohane 5:5-9; 9:1-7) Ntiyiso hi leswaku hinkwavo lava teke eka Yesu hi ripfumelo a va te exihlobyeni xa ntiyiso, ku wisa ka xiviri ni vutomi. Eka noni leyi amukeleke n’wana wa yona la nga un’we eku feni ni vatswari lava xinhwanyetana xa vona xa malembe ya 12 hi vukhale xi tlherisiweke xi hanya eka vona, Yesu hakunene u swi kombise hi ndlela leyi hlamarisaka leswaku hi yena “ndlela, ni ntiyiso, ni vutomi.”—Yohane 14:6; 17:3; Luka 7:11-17; 8:49-56.
13. Yesu u hi dyondzise ku hundzukela eka mani leswaku hi kuma mpfuno naswona ku humelela yini loko hi tirhisa xitsundzuxo xakwe?
13 Handle ko kanakana ku ni minkarhi leyi u langutanaka ni swiphiqo leswikulu lerova u nga swi tlhantlha hi wexe. Yesu u hi dyondzise ku hundzukela eka Yehova ku kuma mpfuno, hi laha na yena a endleke ha kona. (Luka 22:41-44; Vaheveru 5:7) Loko nkarhi na nkarhi hi hundzukela eka Xikwembu hi xikhongelo, hi ta va ni mintlhaveko ya mupisalema la tsaleke a ku: “A ku khensiwe [Yehova la] rwalaka mirwalo ya hina hi masiku, šona Šikwembu leši hi hlayisaka.” (Psalma 55:22; 68:19) Ina, ku tiva ntiyiso hakunene ka phyuphyisa. Ku hi tshineta ekusuhi na Yehova naswona ku hi pfuna ku twisisa leswaku hi mpfuno wa yena swa koteka ku langutana ni swiyimo hi laha ku humelelaka hambi ku ri leswi nonon’hwaka swinene evuton’wini.
Ku Wisisiwa Hi Ntshembo Wa Mfumo
14. I yini lexi tiyiseke Yesu emindzingweni ya yena naswona i yini lexi nga xa nkoka loko hi ta kumela mimoya ya hina ku wisa?
14 Ku kumela mimoya ya hina ku wisa ka ntiyiso, hi fanele hi va ni ntshembo lowu tiyeke. A ku ri ntshembo lowu wu tiyiseke Yesu. Bibele yi ri: “Loyi a nga chavangiki ku byarha [mhandzi ya nxaniso], a nga vuli nchumu hi tingana ta kona, hikwalaho ka ku tsaka loku vekiweke emahlweni ka yena; kutani sweswi u tshamile evokweni ra xinene exiluvelweni xa Xikwembu.” (Vaheveru 12:2) Ntshembo lowu tsakisaka lowu tiyiseke Yesu hi lowuya wa ku hlanganyela eku kwetsimisiweni ka vito ra Tata wakwe hi ku hlayisa vutshembeki, kun’we ni wa ku tikombisa a fanelekela ku fuma tanihi Hosi ya Mfumo wa Xikwembu. Ku hlayisa xivono lexinene xa ntshembo wa hina, tanihi mufumi-kulobye na Kriste ematilweni kumbe tanihi un’wana wa vafumiwa vakwe lava hanyaka emisaveni ya Paradeyisi, na hina swi ta hi tiyisa entirhweni wa Xikwembu. Hakunene, ntshembo wolowo i wa nkoka ku kumela mimoya ya hina ku wisa.—Varhoma 12:12.
15. Vumundzuku bya hina handle ka ntshembo wa Mfumo hi byihi?
15 Anakanya vumundzuku bya hina hi ri hava ntshembo wa Mfumo. Mpimo wa ku hanya i malembe ya 70 kumbe 80. Naswona masiku wolawo ma hela hi ku hatlisa, hi laha un’wana ni un’wana la dyuhalaka a nga ta ku byela ha kona! Ina, Bibele hi laha ku tiyeke yi vula leswi hi vutomi: “Hikuv̌a ha hatla ku hunḍa, hi tihahela.” (Psalma 90:10) Kambe, hi lava masiku ya hina ma ya emahlweni. Hi lava ku hanya. Ku na swo tala swo swi endla ni ku swi tsakela.
16. Leswaku hi kumela mimoya ya hina ku wisa hi fanele ku endla yini?
16 Hikwalaho ke, i swa nkoka swonghasi leswaku hi ta hi ripfumelo eka “Kriste Yesu ku tshemba ka hina”! (1 Timotiya 1:1) Tanihi laha a vuleke ha kona a ku: “Hi koloku ku rhandza ka Tata wa mina: Leswaku un’wana ni un’wana la langutaka N’wana a va a pfumela eka yena, a va ni vutomi lebyi nga heriki.” (Yohane 6:40, 51) Xana ha swi tshemba sweswo ke? Swa hi boha, loko hi ta kumela mimoya ya hina ku wisa. A hi nge humeleli handle ka swona. Hakunene, hi fanele “enhlokweni hi ambala ku langutela ka ku ponisiwa.” (1 Vatesalonika 5:8; ringanisa Vaheveru 6:19.) Ntshembo wolowo wu fanele ku kongomisa mianakanyo ya hina, ku ehleketa ka hina. Loko swi nga ri tano, hi ta tikeriwa hi mindzhwalo ni swiphiqo lerova hi hela matimba kutani hi lahlekeriwa hi vutomi lebyi nga heriki. Hikwalaho ke, leswaku u tsakela ku wisa ka moya wa wena, tiyiseka leswaku u hlayisa ntshembo wa wena wa Mfumo wu tiyile.
Ku Kuma Ku Wisa Eku Endleni Ka Ntirho Wa Xikwembu
17. (a) Leswaku hi kuma ku wisa, ku laveka yini naswona ha yini swi nga ri leswi tikaka eka hina? (b) Xana ku amukela joko ra Kriste swi katsa yini?
17 Kambe leswaku u kuma ku wisa, ku laveka swo tala ku tlula ku ta eka Yesu ntsena. U engeterile a ku: “Rhwalani joko ra mina, [kumbe, “nghena ehansi ka joko ra mina kun’we na mina”] mi dyondza ka mina, hikuva ndzi ni mbilu yo rhula ni ya tintswalo; kutani mimoya ya n’wina yi ta kuma ku wisa; hikuva joko ra mina ra olova ni ndzhwalo wa mina wa vevuka.” (Matewu 11:29, 30, New World Translation Reference Bible, nhlamuselo.) Ku rhwala joko swi vula ntirho. Kambe xiya leswaku Yesu a nga hi kombeli leswaku hi rhwala joko ivi hi endla ntirho hinkwawo hi ri hexe. Hi fanele hi rhwala joko kun’we na yena. Emhakeni leyi, ku amukela joko leri Kriste a ri nyikelaka swi katsa ku tinyiketela eka Xikwembu, u kombisa leswi hi nkhuvulo wa mati, ivi u byarha vutihlamuleri bya ku va mudyondzisiwa wa Kriste. Kambe xana joko ro tano ra ku va mudyondzisiwa ri nga ku tisa njhani ku wisa?
18. (a) Ha yini ku amukela joko ra Kriste swi tisa ku wisa? (b) Ntirho wa ku chumayela wu hi tisela ntsako ni ku wisa hi ndlela yihi?
18 Ku amukela joko ra Kriste ku tisa ku wisa hikuva Yesu u ni mbilu yo rhula ni tintswalo. Tanihi leswi a twisisaka, swa phyuphyisa ku tirha na yena ehansi ka joko rin’we. U anakanyela mindzilakano ni ku tsana ka hina. Hi laha a vuleke ha kona, “Joko ra mina ra olova.” I ntiyiso, joko ra ku va mudyondzisiwa ri katsa ntirho, ntirho lowu fanaka wo chumayela ni ku dyondzisa lowu Yesu a wu endleke ni lowu a wu leteleke valandzeri va yena vo sungula ku wu endla. (Matewu 28:19, 20; Mintirho 1:8) Hambi swi ri tano, i ntirho lowu phyuphyisaka swonghasi ku byela van’wana mayelana ni Xikwembu xa hina xa rirhandzu, N’wana wa xona na hi Mfumo! Vona ndlela leyi swi phyuphyisaka ha yona ku byela vanhu ndlela leyi va nga hanyaka hi laha ku nga heriki eParadeyisini ha yona! Naswona loko va amukela rungula ra Mfumo leri nyikaka vutomi naswona va hi joyina eku tirheleni Yehova Xikwembu, ntsako wa hina wu va lowukulu swinene!—1 Timotiya 4:16.
19. Ha yini xitsundzuxo xa mukon’wana wa Muxe xi ri xa ntikelo eka vakulu va mabandlha namuntlha?
19 Emalembeni ya sweswinyana, timiliyoni leti lavaka mpfuno wo amukela joko ra Kriste ti tile enhlengeletanweni ya Yehova naswona leswi swi ndlandlamuxa vutihlamuleri bya ntirho bya vahuweleri va Mfumo ni lava va va risaka. Eka varisi vo tano va moya, xitsundzuxo lexi muprofeta Muxe a xi amukeleke eka mukon’wana wa yena i xa ntikelo. U nyike Muxe xitsundzuxo lexi nge: “Leŝi u ŝi endlaka a hi ŝona. Kunene u ta karala, wena ni tiko leri nga na wena; hikuv̌a e ntiro lowu wu ta ku hlula, u ta ṭanḍeka ku wu heta u ri ŝaku.” Kutani u tsundzuxa Muxe ku hlawula vavanuna van’wana lava fanelekaka leswaku va avelana na yena ntirho wa ku risa vanhu. Ku landzelela xitsundzuxo lexi swi tikombe swi humelela. (Eksoda 18:17-27) Namuntlha, ndzetelo lowu hambetaka wu ta humesa vavanuna vo tala lava nga ni vuswikoti, ‘tinyiko ta vavanuna,’ lava nga hlanganyelaka eku riseni ka ntlhambi leswaku vakulu va bandlha va nga karhali.—Vaefesa 4:8, 16.
20. Xana Yesu Kriste ni Tata wakwe va langutele yini eka hina?
20 Hambi loko Kriste a khongotele valandzeri va yena ku endla hi matimba, yena hambi ku ri Tata wa yena a va swi lavi leswaku un’wana ni un’wana wa hina a endla ntirho wo tala ku tlurisa. Nkarhi wun’wana, loko van’wana va sole Mariya makwavo wa Lazaro hikwalaho ka matshalatshala ya yena ehenhleni ka Yesu, u va sorile, a ku: “N’wi tshikeni. . . . U endlile leswi a swi koteke.” (Marka 14:6-8; Luka 13:24) Sweswo hi leswi languteriweke eka hina—ku endla leswi hi nga swi kotaka. Ntirho wo tano wa Vukriste a hi ndzhwalo kambe i xiphyuphyisi. Ha yini? Hikuva wu tisa ku aneriseka ka ntiyiso sweswi ni ntshembo lowu tiyeke tanihi mimpfuno ya hi laha ku nga heriki enkarhini lowu taka.
21. (a) Xana ndzhwalo wo vevuka wa Kriste i yini, naswona i yini lexi hakanyingi xi endlaka ntirho wo chumayela wu nonon’hwa? (b) Ku tiyimisela ka hina loku tiyeke ku fanele ku va kwihi, naswona hi ri na ku langutela kwihi loku tiyeke?
21 I ntiyiso, Sathana u ta tiyiseka leswaku ha xanisiwa, hi laha munghana wa hina ejokweni, Yesu Kriste, a endliweke ha kona. (Yohane 15:20; 2 Timotiya 3:12) Kambe tsundzuka leswaku a hi ndzhwalo wa Kriste lowu vevukaka lowu tikaka. Ematshan’wini ya sweswo, i nkaneto wa Sathana ni malandza ya yena lowu endlaka ntirho wa hina wu tika swinene. Ndzhwalo wa Kriste wu vumbiwa ntsena hi ku hanya hi ku ya hi swilaveko swa Xikwembu naswona sweswo a swi tiki. (1 Yohane 5:3) Kutani ke, a hi hambeteni hi tshama ehansi ka joko ra Yesu Kriste kun’we na yena, hi tinyiketela entirhweni wa ku chumayela ni wa ku dyondzisa, hi laha a endleke ha kona. Hi ku endla tano, hi laha a tshembiseke ha kona, hi ta ‘kumela mimoya ya hina ku wisa.’
A Wu Ta Hlamurisa Ku Yini?
◻ Hi ku ya hi Varhoma 8:22, xiyimo xa vanhu a xi ri xihi?
◻ Ku tiva ntiyiso ku tisa ku wisa hi ndlela yihi?
◻ Ha yini ntshembo wa Mfumo wu phyuphyisa swonghasi?
◻ Joko ra Yesu i yini naswona ha yini ri olova?
◻ I ku rhwala ndzhwalo wihi loku nga ta hi tisela ku wisa?