“Tlhandlekani Joko Ra Mina”
1 Emisaveni leyi nga ni swilo swo tala leswi tshikilelaka ni ku vilerisa vanhu, hi kume ntshunxeko wa xiviri hikwalaho ko amukela xirhambo xa Yesu lexi phyuphyisaka xa ku tlhandleka joko rakwe. (Mat. 11:29, 30) Ku amukela joko ra ku endla vadyondzisiwa swi katsa ku hlanganyela entirhweni lowu lavaka leswaku hi endla matshalatshala kambe wu phyuphyisaka. Wu katsa ku chumayela mahungu lamanene ya Mfumo ni ku pfuna van’wana leswaku va phyuphya swin’we na hina ehansi ka joko ra Yesu leri olovaka.—Mat. 24:14; 28:19, 20.
2 Ku Phyuphyisiwa Hi Nsimu: Yesu a nga vulanga leswaku vadyondzisiwa vakwe va tlhandleka joko ra yena ehenhla ka majoko lawa ana se a va ma tlhandlekile. U va byele leswaku va rhula ndzhwalo wa vona lowu tikaka kutani va rhwala wa yena lowu vevukaka. A ha ha tshikileriwi hi mivilelo ni hi ku pfumala ntshembo ka mafambiselo lawa ya swilo; hambi ku ri ku tirhela rifuwo leri nga pfuniki nchumu. (Luka 21:34; 1 Tim. 6:17) Hambileswi hi tshamaka hi khomekile naswona hi bohekaka ku tirha leswaku hi kuma swilaveko swa siku ni siku, kambe ku gandzela Xikwembu hi ku teka ku ri ka nkoka evuton’wini bya hina. (Mat. 6:33) Loko hi tshama hi ri ni langutelo lerinene hi swilo swa nkoka, ntirho wo chumayela wu ta hi phyuphyisa minkarhi hinkwayo naswona a wu nge hi tikeli.—Filp. 1:10.
3 Hi ntumbuluko hi rhandza ku vulavula hi swilo leswi hi swi rhandzaka hi mbilu hinkwayo. (Luka 6:45) Vakreste hinkwavo va rhandza Yehovha ni mikateko leyi a yi tshembisaka eMfun’weni wakwe. Xisweswo, swa phyuphyisa ku vulavula hi “mahungu lamanene ya swilo leswinene,” naswona swi hi endla lewaku loko hi ri entirhweni wo chumeyela hi nga vileli hi swiphiqo swa hina! (Rhom. 10:15) I ntiyiso leswaku loko hi tshamela ku endla nchumu wo karhi hi ya hi va ni ntokoto naswona wu hambeta wu hi tsakisa swinene. Loko hi kota ku heta nkarhi wo tala hi ri ensin’wini hi ta phyuphya swinene. Entiyisweni, ha tsaka swinene loko vanhu va amukela rungula leri hi ri chumayelaka! (Mint. 15:3) Hambiloko hi pfa hi hlangana ni vanhu lava nga tsakeliki kumbe hi kanetiwa, nsimu ya hi phyuphyisa hi tlhelo ra moya hikuva ha swi tiva leswaku Yehovha wa ma tlangela matshalatshala ya hina naswona mikateko yakwe yi nga ha hetelela yi tise vuyelo lebyinene.—Mint. 5:41; 1 Kor. 3:9.
4 Loko hi amukela xirhambo xa Yesu, hi tiphina hi lunghelo ra ku tirha swin’we na yena tanihi Timbhoni ta Yehovha. (Esa. 43:10; Nhlav. 1:5) A ku na xin’wana lexi nga hi phyuphyisaka ku tlula sweswo!