Vutomi Ni Vutirheli Bya Yesu

Lava Tinyungubyisaka Ni Lava Titsongahataka

ENDZHAKU ko boxa timfanelo ta Yohane Mukhuvuri, Yesu u yisa mianakanyo eka vanhu lava tinyungubyisaka, lava nga hava ripfumelo lava n’wi rhendzeleke. “Vanhu va masiku lawa,” ku vula yena, “va fana ni swihlangi leswi tshameke entsendzeleni, swi huwelelana swi ku: ‘Hi mi chayele nanga, kambe a mi cinanga; hi yimbelerile tinsimu ta mahlomulo, kambe a mi rilanga.’”

Yesu u vula yini? Wa hlamusela a ku: “Hikuva Yohane ú tile a nga dyi, a nga nwi, kutani va ku: ‘Ú ni rihuhe!’ N’wana-wa-Munhu ú tile a dya, a nwa, kutani va ku: ‘Langutani, munhu wa makolo hi loyi, wa xidakwa, la twananaka ni valuvisi ni vadyohi!’”

A swi koteki ku anerisa vanhu. Ku hava lexi va tsakisaka. Yohane u hanye vutomi byo olova bya ku titshika tanihi Munazira, leswaku a fambisana ni ku huwelela ka tintsumi ka leswaku “a nga fanelanga ku nwa vhinyo ni swakunwa leswi nga ni matimba nikantsongo.” Hambi swi ri tano vanhu va vula leswaku u ni rihuhe. Hi tlhelo rin’wana, Yesu u hanya ku fana ni vanhu van’wana, a nga endli leswi olovaka, kutani u sandzeriwa ku endla swilo ku tlula mpimo.

Vona ndlela leyi swi tikaka ha yona ku tsakisa vanhu! Va fana ni vanghana lava tlangaka, lava van’wana va vona va alaka ku cina loko vana van’wana va chaya nanga kumbe ku rila loko vanghana va vona va huwelela hi ku vaviseka. Hambi swi ri tano, Yesu u ri: “Vutlhari bya Xikwembu byi tikomba byi ri lebyo lulama hi mintirho ya byona.” Ina, vumbhoni—mintirho—swi swi veka erivaleni leswaku swisandzo swo lwisana na Yohane na Yesu i vunwa.

Yesu u ya emahlweni a kombisa ndzhukano wa miti ya Korazini, Betsayida na Kapernawume, laha a endleke kona vunyingi bya mintirho yakwe ya matimba. Loko a a yi endlile emitini ya Fonixiya le Tiri ni le Sidoni, Yesu u ri, miti leyi ingi yi hundzukile khale yi ambala tinguvu leto khwaxa kutani yi tshama eminkumeni. Loko a avanyisa Kapernawume, lowu entiyisweni a wu ri xisekelo xa kaya rakwe enkarhini wa vutirheli bya yena, Yesu u ri: “Hi siku ra ku avanyisiwa, tiko ra Sodoma ri ta vevukiseriwa ku tlula wena.”

Yesu u vula yini hi leswi? Entiyisweni u kombisa leswaku, hi Siku ra ku Avanyisa loko lava tinyungubyisaka eKapernawume va pfuxiwa eku feni, swi ta va nonon’hwela ngopfu ku amukela swihoxo swa vona ni ku amukela Kriste ku tlula leswi swi nga ta va swona eka Vasodoma va khale lava pfuxiweke eku feni ku hundzuka hi ku titsongahata ivi va dyondza leswo lulama.

Yesu u ya emahlweni a dzunisa Tata wakwe wa le tilweni erivaleni. U susumeteriwa ku endla tano hikwalaho ka leswi Xikwembu xi fihlaka mintiyiso leyi vangamaka ya moya eka vanhu lava tlhariheke ni lava xalamukeke kambe xi paluxa swilo leswi swo hlamarisa eka vanhu lava titsongahataka, kavula, eka vana.

Eku heteleleni, Yesu u nyikela xirhambo lexi nyanyulaka a ku: “Tanani ka mina, n’wina hinkwenu lava karheleke, ni lava tikeriwaka, ndzi ta mi wisisa. Rhwalani joko ra mina, mi dyondza ka mina, hikuva ndzi ni mbilu ya ku rhula ni ya tintswalo; kutani mimoya ya n’wina yi ta kuma ku wisa; hikuva joko ra mina ra olova, ni ndzhwalo wa mina wa vevuka.”

Yesu u nyikela ku wisa hi ndlela yihi? U endla tano hi ku lunghiselela ku ntshunxeka eka mikhuva ya vuhlonga leyi varhangeri va vukhongeri va yi rhwexeke vanhu, hi xikombiso, ku katsa ni milawu leyi bohelelaka yo hlayisa Savata. Nakambe, u komba ndlela yo ntshunxeka eka lava va tikeriwaka hi ndzhwalo lowu vavisaka wa vulawuri bya vafumi va politiki ni le ka lava va tikeriwaka hi ndzhwalo wa swidyoho swa vona hi ripfalo leri nga ekhombyeni. U hlavutelela vanhu vo tano lava nga ekhombyeni ndlela leyi swidyoho swa vona swi nga rivaleriwaka ha yona ni ndlela leyi va nga tiphinaka hi vuxaka lebyi vangamaka ni Xikwembu ha yona.

Joko ra musa leri Yesu a ri nyikelaka i ra ku tinyiketela loku heleleke eka Xikwembu, ku kota ku tirhela Tata wa hina la tsetselelaka, la nga ni musa wa le tilweni. Naswona ndzhwalo wo olova lowu Yesu a wu nyikaka lava va taka eka yena hi lowuya wa ku yingisa swilaveko swa Xikwembu swa vutomi, milawu Yakwe, leyi nga riki ndzhwalo nikantsongo. Matewu 11:16-30; Luka 1:15; 7:31-35; 1 Yohane 5:3.

◆ Rixaka ra Yesu ri fana ni vana hi ndlela yihi?

◆ Hikwalaho ka yini swi ta va leswi tiyiselekaka eka Vasodoma ku tlula va le Kapernawume?

◆ Vanhu va rhwexiwe ndzhwalo hi tindlela tihi, naswona i ntshunxeko wihi lowu Yesu a wu nyikelaka?